شينحۋا اگەنتتىگىنىڭ 5 ـ ايدىڭ 1 ـ كۇنى بەيجيڭنەن بەرگەن حابارى. 4 ـ ايدىڭ 29 ـ كۇنى مەملەكەت ٴتوراعاسى شي جينپيڭ حىبەي بولات ـ تەمىر توبى شەكتى سەرىكتەستىگى سيمەدەرەۆو بولات زاۆودىنداعى سەربيالىق جۇمىسشى ـ قىزمەتكەرلەرگە جاۋاپ حات جازىپ، ولاردى جۇڭگو _ سەربيا دوستىعىنا جاڭا ۇلەس قوسۋعا ىنتالاندىردى.
شي جينپيڭ بىلاي دەپ اتاپ كورسەتتى: 2016 ـ جىلى سەربيادا مەملەكەتتىك ساپاردا بولعان كەزىمدە سيمەدەرەۆو بولات زاۆودىنا بارىپ، وزدەرىڭىزبەن بەتپە ـ بەت پىكىر اۋىستىرىپ، كوپشىلىكتىڭ جۇڭگو _ سەربيا ٴوزارا تيىمدىلىك جەتكىزۋ سەلبەستىگىن قولدايتىندىعىن جانە بولات زاۆودىنىڭ جارقىن بولاشاعى جونىندەگى ارمان ـ تىلەگىن تەرەڭ سەزىندىم. سىزدەردىڭ حاتتارىڭىزدان ەكى جاقتىڭ باسقارۋ ۇجىمدارىنىڭ جانە بولات زاۆودىنداعى جۇمىسشىلاردىڭ بىرگە قۇلشىنۋىندا بولات زاۆودىنىڭ بەت ـ بەينەسى جاڭارىپ، سيمەدەرەۆو قالاسىنىڭ دامۋىنا پارمەندى تىرەك ازىرلەگەندىگىن ٴبىلدىم. جۇڭگو قارجىلاندىرعان كاسىپورىندار قارجى قوسقاننان كەيىن، بولات زاۆودىنىڭ دەرەۋ زياندى پايداعا اينالدىرعاندىعىنا، 5000نان استام جۇمىسشى ـ قىزمەتكەردىڭ قىزمەت ورنىنىڭ قامتاماسىز ەتىلگەندىگىنە، سان مىڭداعان وتباسىنىڭ تىنىش، باقىتتى تۇرمىسقا كەنەلگەندىگىنە توتەنشە قۋاندىم. بولات زاۆودىنىڭ دامۋىن قىزمەت ورنىن ٴسۇيىپ، كاسىپتى قادىرلەيتىن، ايانباي كۇرەس جۇرگىزەتىن جۇمىسشى ـ قىزمەتكەرلەردەن بولە قاراۋعا بولمايدى، سىزدەر قاجىرلى ەڭبەكتەرىڭىز ارقىلى بولات زاۆودىنىڭ دامۋىن كۇن سايىن جاڭارتىپ، جۇڭگو _ سەربيا مىزعىماس دوستىعىنىڭ جاڭا تاراۋىن جالعاستىرىپ جازدىڭىزدار، سىزدەردى القايمىن.
شي جينپيڭ بىلاي دەپ باسا دارىپتەدى: سيمەدەرەۆو بولات زاۆودىنىڭ تاماشا دامۋى جۇڭگو مەن سەربيانىڭ ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋىنىڭ جاندى امالياتى ٴارى ەكى ەلدىڭ ٴوزارا تيىمدىلىك جەتكىزۋ سەلبەستىگىنىڭ تابىستى ۇلگىسى سانالادى. بولات زاۆودىنداعى جۇمىسشى ـ قىزمەتكەرلەر جۇڭگو _ سەربيا دوستىق سەلبەستىگىنە ات سالىسۋشىلار، كۋا بولۋشىلار، ۇلەس قوسۋشىلار ٴارى يگىلىگىن كورۋشىلەر. سىزدەردىڭ ٴوز قىزمەتتەرىڭىزدى ۇزدىكسىز بۇكىل ىنتا ـ پەيىلمەن ويداعىداي ىستەپ، بولات زاۆودىنىڭ جۇمىس جۇرگىزۋىنە جانە دامۋىنا قىزۋ ىنتامەن ات سالىسىپ، سەربيانىڭ ەكونوميكالىق، قوعامدىق دامۋىن جەبەۋگە جانە جۇڭگو _ سەربيا مىزعىماس دوستىعىن بەكەمدەۋگە جاڭا اناعۇرلىم زور ۇلەس قوسۋلارىڭىزدى ٴۇمىت ەتەمىن.
جۋىقتا حىبەي بولات ـ تەمىر توبى شەكتى سەرىكتەستىگى سيمەدەرەۆو بولات زاۆودىنداعى سەربيالىق 30 جۇمىسشى ـ قىزمەتكەر ۋاكىلى ٴتوراعا شي جينپيڭگە حات جازىپ، بولات زاۆودىنىڭ جۋىقتاعى دامۋ جاعدايىن، سونداي ـ اق جەرگىلىكتى ورىننىڭ حالىق تۇرمىسىن جاقسارتۋعا قوسقان ماڭىزدى ۇلەسىن تانىستىرا كەلىپ، ٴتوراعا شي جينپيڭنىڭ اتالعان نىسانعا ٴوزى كوڭىل بولگەندىگىنە جانە وعان جەبەۋشى بولعاندىعىنا العىس سەزىمىن ٴبىلدىردى.
