شي جينپيڭ گۋاڭدۇڭنىڭ مەيجوۋ قالاسى مەيجوۋ _ دابۋ جوعارى قارقىندى تاس جولىنىڭ چاياڭ بولىگىندەگى وپىرىلىپ ٴتۇسۋ اپاتى جونىندە ماڭىزدى نۇسقاۋ بەردى
ناق مايداندا قۇتقارۋ ـ كومەكتەسۋدى، جارالانعانداردى قۇتقارۋ ـ ەمدەۋدى بار كۇشپەن ويداعىداي ىستەپ، حاۋىپ ـ قاتەرلەردى، كومەسكى كىناراتتاردى دەر كەزىندە ٴبىر ـ بىرلەپ اداقتاپ، ٴبىر جايلى ەتىپ، حالىق بۇقاراسىنىڭ ٴومىرى مەن مال ـ مۇلكىنىڭ حاۋىپسىزدىگىنە جانە قوعامدىق كەلەلى جاعدايدىڭ ورنىقتىلىعىنا شىنايـى كەپىلدىك ەتۋدى تالاپ ەتتى
لي چياڭ بەكىتۋ جازدى
شينحۋا اگەنتتىگىنىڭ 5 ـ ايدىڭ 2 ـ كۇنى بەيجيڭنەن بەرگەن حابارى. 5 ـ ايدىڭ 1 ـ كۇنى ساعات 2دەن 10 مينۋت وتكەن مولشەردە، گۋاڭدۇڭنىڭ مەيجوۋ قالاسى مەيجوۋ _ دابۋ جوعارى قارقىندى تاس جولىنىڭ چاياڭ بولىگىندە وپىرىلىپ ٴتۇسۋ اپاتى تۋىلدى. 5 ـ ايدىڭ 2 ـ كۇنى ساعات 15تەن 30 مينۋتقا دەيىن اپاتتان 48 ادام قازا بولىپ، 30 ادام جارالاندى.
اپات تۋىلعاننان كەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ايرىقشا ٴمان بەردى ٴارى ماڭىزدى نۇسقاۋ بەرىپ بىلاي دەدى: گۋاڭدۇڭنىڭ مەيجوۋ _ دابۋ جوعارى قارقىندى تاس جولىنىڭ چاياڭ بولىگىندە وپىرىلىپ ٴتۇسۋ اپاتى تۋىلىپ، اۋىر ٴولىم ـ ٴجىتىم بولدى. ناق مايداندا قۇتقارۋ ـ كومەكتەسۋدى، جارالانعانداردى قۇتقارۋ ـ ەمدەۋدى بار كۇشپەن ويداعىداي ىستەپ، سوڭعى جۇمىستاردى ىڭعايلاستىرۋ سياقتى قىزمەتتەردى ۇيلەسىمدى ويداعىداي ىستەۋ كەرەك. بۇزىلعان جولدى جەدەل جوندەپ، قاتىناس ٴتارتىبىن تەز ارادا قالپىنا كەلتىرۋ كەرەك. قازىر ”1 ـ مامىر“ مەرەكە دەمالىسى كەزى، بۇقارانىڭ جولاۋشىلاۋى ارتىپ، ادامداردىڭ اعىلۋ مولشەرى كوبەيدى، ٴبىر ٴبولىم رايونداردا تاعى كەڭ كولەمدە جاڭبىر جانە كۇشتى كونۆەكسيالىق اۋا رايى جارىققا شىعىپ، ٴتۇرلى شىرعالاڭ، اپات وڭاي، كوپ تۋىلادى. وڭىرلەر، قاتىستى تاراۋلار تومەنگى شەكتە ويلاۋعا تاباندى بولىپ، قىزمەت جاۋاپكەرشىلىگىن قاتايتىپ، باقىلاۋ ـ ولشەۋ، الدىن الا ساقتاندىرۋدى كۇشەيتىپ، شۇعىل جاعدايعا توتەپ بەرۋ دايىندىق جوباسىن كەمەلدەندىرىپ، ٴتۇيىندى وڭىرلەر مەن شەشۋشى سالالارداعى حاۋىپ ـ قاتەرلەردى، كومەسكى كىناراتتاردى دەر كەزىندە ٴبىر ـ بىرلەپ اداقتاپ، ٴبىر جايلى ەتىپ، حالىق بۇقاراسىنىڭ ٴومىرى مەن مال ـ مۇلكىنىڭ حاۋىپسىزدىگىنە جانە قوعامدىق كەلەلى جاعدايدىڭ ورنىقتىلىعىنا شىنايى كەپىلدىك ەتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جازىپ، بىلاي دەدى: جارالانعانداردى بار كۇشپەن جەدەل قۇتقارىپ، سوڭعى جۇمىستاردى تىڭعىلىقتى جاقسى ىستەپ، قامالىپ قالعانداردى بار امالمەن ىزدەستىرىپ، قۇتقارىپ، قوسالقى حاۋىپ ـ قاتەردەن قاتاڭ ساقتانۋ كەرەك. قازىر ”1 ـ مامىر“ دەمالىس كەزى بولىپ، بۇقارانىڭ ساياحاتتايتىن قاۋىرت مەزگىلى، كەيبىر وڭىرلەردە تاعى كەڭ كولەمدە جاڭبىر جاۋادى. جەر ـ جەر، قاتىستى تاراۋلار حاۋىپسىزدىك جاۋاپكەرشىلىگىن تياناقتاندىرۋدى اناعۇرلىم كۇشەيتىپ، تاس جول، كورىنىس ٴوڭىرى جانە الەۋمەتتىك قۇرىلعى سياقتىلاردا ۇزاق ۋاقىت جاۋعان جاڭبىر سەبەبىنەن تۋىلاتىن حاۋىپ ـ قاتەردى، كومەسكى كىناراتتاردى ٴتۇيىندى تۇردە ٴبىر ـ بىرلەپ اداقتاپ، حاۋىپسىزدىكتى باسقارۋ شاراسىن شىنايى تياناقتاندىرىپ، ٴتۇرلى شىرعالاڭداردىڭ، اپاتتاردىڭ تۋىلۋىنان بار كۇشپەن ساقتانۋ كەرەك.
شي جينپيڭنىڭ نۇسقاۋىنا جانە لي چياڭنىڭ تالابىنا ساي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى جاڭ گوچيڭ قاتىستى تاراۋلارداعى جاۋاپتى جولداستاردى باستاپ، اپات تۋىلعان جەرگە جەدەل جەتىپ، قۇتقارۋ ـ كومەكتەسۋ، ٴبىر جايلى ەتۋ قىزمەتىنە جەتەكشىلىك ەتتى. گۋاڭدۇڭ ولكەلىك پارتكومداعى، ولكەلىك ۇكىمەتتەگى نەگىزگى جاۋاپتى جولداستار اپات تۋىلعان جەرگە جەدەل جەتىپ، ٴبىرىنشى شەپتەگى شۇعىل جاعدايعا توتەپ بەرۋ، ٴبىر جايلى ەتۋ قىزمەتىنە سول جەردە جەتەكشىلىك ەتتى، گۋاڭدۇڭ ولكەسى، مەيجوۋ قالاسى اپات ورنىندا قولباسشىلىق شتابىن جانە بىرنەشە قىزمەت گرۋپپاسىن قۇرىپ، اپات تۋىلعان جەردە ىزدەۋ، قۇتقارۋ، جارالانعانداردى قۇتقارۋ ـ ەمدەۋ، قاتىناستى ىركىلىسسزدەندىرۋ جانە سوڭعى جۇمىستاردى ىڭعايلاستىرۋ سياقتى قىزمەتتەردى كۇش سالا جاقسى ىستەدى. قازىر قاتىستى قىزمەتتەر جۇرگىزىلۋدە.
