شينجياڭنىڭ ارتقى ساندىق بازارى قويۋ تۇرمىستىق لەپتى لاۋلاتتى
انار بۇلت \ شينجياڭ گازەتىنىڭ ٴتىلشىسى يۇي جياڭيان
اۆتوموبيلدىڭ ارتقى ساندىعىن اشىپ، وعان ادام نازارىن اۋداراتىن جازۋلاردى ٴىلىپ، اشەكەي شامداردى اسىپ، شاعىن ۇستەلدى جايسا بولعانى، ”جىلجىمالى جايما ورنى“ بولىپ شىعا كەلەدى. 5 ـ ايدىڭ 1 ـ كۇنى شينجياڭ ٴوندىرىس ـ قۇرىلىس بيڭتۋانى 12 ـ شىسى چاڭجوۋ كوشەسىندەگى ارتقى ساندىق بازارى دۋماندى اشىلدى. كوپىرشىك ۇرلەۋ ماشيناسى، قۋىرشاق، عاجايىپ تاس، بالكۇلشە، ت. ب. ”جىلجىمالى جايماداعى“ ٴتۇرلى تاۋارلار كوزدىڭ جاۋىن الادى.
30 جاستاعى لي شياۋيا بيلي بيلي سايتى مەن دوۋيىن تۇعىرى ارقىلى بۇراما تاياقشادان گۇل جاساۋدى ۇيرەنىپ الدى. ارتقى ساندىق بازارىندا لي شياۋيا تىزگەن روزا، ٴلالا گۇلى سياقتىلار ايرىقشا كوز تارتادى. ”روزا گۇلى 9.9 يۋان، ماڭگى سولمايدى!“ تۇڭعىش رەت جايما اشقان لي شياۋيا ٴبىراز قىمسىنىپ تۇر، ول ٴوزىنىڭ قىزمەتى بار ەكەنىن، بۇل جولى جايما اشۋدا، باستىسى، ٴوزىن شىڭداۋ ەكەنىن ايتتى. جارتى ساعات ىشىندە ەكى تال گۇل ساتقان لي شياۋيا قاتتى رازى بولدى.
27 جاستاعى تاۋ ميشيۋ بوياۋ جەلپۋىش جاساي بىلەدى، قاريدارلاردى بەيزاتتىق مادەنيەت مۇرالارىن تۇسىنۋگە باۋراۋ ٴۇشىن، ارناۋلى ۇگىت تاقتاسىن جاساپ، بوياۋ جەلپۋىشتى جاساۋ ونەرىن تانىستىردى. سۋ تولتىرىلعان شەلەككە تاۋ ميشيۋ بىرنەشە تامشى قىزىل، سارى، كوك، التىن ٴتۇستى بوياۋ تامىزىپ، باياۋ ارالاستىرعاننان كەيىن، جەلپۋىشتى سۋعا ماتىرىپ، قىسقا عانا بىرنەشە سەكۋندتان كەيىن الىپ شىققاندا، جەلپۋىشكە قاس ـ قاعىم ساتتە بوياۋ جاعىلىپ، الۋان تۇسكە بويالدى. ”بوياۋ جەلپۋىشتى جاساۋ ونەرىن تۇڭعىش رەت كورۋىم، وتە عاجايىپ ەكەن“. الارمان لي تاۋ قول تەلەفونمەن بوياۋجەلپۋىشتىڭ جاسالۋ بارىسىن ەستەلىككە الىپ، دوۋيىن تۇعىرىنا جولداۋعا دايىندالدى.
نيە ميڭشۋان ەرمەك ٴيتىن قاسىنا الىپ بىرگە جايما اشتى. ”بۇگىن جولىڭىز بولسىن، كىشكەنە كۇشىك ٴسىزدى سۇيەدى“، ول اۆتوموبيلدىڭ ارتقى ساندىعىنا وسى جازبا ۇراندى جازىپ قويدى، جايما ورنىنا يتكە ارنالعان ٴتۇرلى ويىنشىقتار، كيىم ـ كەشەكتەر سياقتىلاردى ٴتىزدى. ”مۇنىڭ ٴبارى ينتەرنەتتەن العان ەرمەك حايۋاندار بۇيىمى، وتە كوپ ساتىپ الىپپىن، مۇندا اكەلىپ ارزان باعادا ساتپاقشىمىن“، ـ دەدى نيە ميڭشۋان.
بيڭتۋان 12 ـ شىسى چاڭجوۋ كوشەسى اۋماعى پارتيا قىزمەت كوميتەتىنىڭ مۇشەسى، باسقارۋ كوميتەتىنىڭ ورىنباسار مەڭگەرۋشىسى ديڭ كاي بىلاي دەپ تانىستىردى: ارتقى ساندىق بازارى 100دەن استام كولىك يەسىن وسىندا كەلىپ جايما اشۋعا باۋرادى، بازاردا قالانىڭ الۋان ٴتۇرلى كورىنىسى مەن مۇندالاپ، جاستاردىڭ قۇلشىنا تۇرمىس كەشىرگەن كۇندەلىكتى جاعدايلارى ايگىلەندى.
زاماناۋي، قىزىقتى بولىپ جۇرتتى باۋرادى، ٴداستۇرلى بازارمەن سالىستىرعاندا، ارتقى ساندىق بازارى شاعىن بولعانىمەن، تۇتىنۋدىڭ كەڭ ٴورىسىن اشتى. ارتقى ساندىق بازارى ەكونوميكانى جانداندىرۋمەن بىرگە، تىرشىلىكتىڭ قويۋ تۇرمىستىق لەبىن لاۋلاتتى، سوڭعى جىلداردان بەرى كۇيتۇن قالاسى، قورعاس قالاسى، جىڭ اۋدانى سياقتى بۇكىل شينجياڭنىڭ جەر ـ جەرىندەگى ارتقى ساندىق بازارلارى جاڭبىردان كەيىنگى جاۋقازىنداي قاۋلادى.
قۇلجا قالاسىنىڭ حايتاڭ جولىنداعى ارتقى ساندىق بازارىندا 200دەن استام كولىك يەسى جايما اشتى، جەرگىلىكتى تۇرعىندار ارتقى ساندىق بازارىنا بارۋدان سىرت، سوڭعى 2 جىلدا سىرت جەرلەردەن كەلگەن ساياحاتشىلار دا بازارعا بارىپ ”اسىل“ ىزدەيتىن بولدى. ”ورىك قاعى، جاڭعاق سياقتى جەرگىلىكتى ەرەكشە ونىمدەردى، سونداي ـ اق رەسەيدىڭ كامپيتى مەن قىرعىزستاننىڭ بالىن ساتىپ الدىم“، ـ دەدى 5 ـ ايدىڭ 1 ـ كۇنى سىچۋاندىق ساياحاتشى يۋان لياڭ سەرىكتەرىنە قۋانىشپەن ”اسىل ىزدەۋ“ بارىسىندا قولعا كەلتىرگەن جەڭىس جەمىستەرىن كورسەتىپ. ول وسى جەڭىس جەمىسىن ۇيىنە اپارىپ، تۋىس ـ تۋعان، دوس ـ جاراندارىنا ۇسىنباقشى ەكەن.
2022 ـ جىلى 6 ـ ايدا جىڭ اۋدانىندا تۇڭعىش رەتكى ارتقى ساندىق بازارى اشىلعاننان بەرى، 135 كولىك يەسىنىڭ جايما جايۋىنا جەتەكشىلىك ەتىپ، جەرگىلىكتى ورىننىڭ ”كەشكى ەكونوميكاسىن“ نۇرلاندىردى. قازىر جىڭ اۋدانى بايگە سياقتى ٴتۇرلى جارىس قيمىلدارى مەن مەرەكەلىك قيمىلدار كەزىندە دە ارتقى ساندىق بازارىن اشىپ، ٴتىپتى دە كوپ ەگىنشى ـ مالشىلاردىڭ جەرگىلىكتى ەرەكشە ونىمدەر مەن قولونەر بۇيىمدارىن ساتۋىنا كومەكتەستى.
ارتقى ساندىق بازارى ىڭعايلى، يكەمدى بولۋداي ەرەكشەلىككە يە. قازىر شينجياڭداعى كەيبىر ساياحات تاس جول قىزمەت وتەۋ اۋماقتارىندا دا ارتقى ساندىق بازارى جارىققا شىقتى، مىسالى، مايتاۋ _ كۇشار تاس جولى ساياحاتىنىڭ قاۋىرت مەزگىلىندە ارتقى ساندىق بازارىندا ساتىلاتىن ساياحات ەستەلىك بۇيىمدارى، ساياحات بۇيىمدارى سياقتىلار ساياحاتشىلاردىڭ قاجەتىن قاناعاتتاندىردى.
اۆتونوميالى رايوندىق پارتيا مەكتەبى ەكونوميا ٴىلىمىن زەرتتەۋ ٴبولىمىنىڭ دوتسەنتى تان يۇڭشيان مىنانى ٴبىلدىردى: ارتقى ساندىق بازارى ساۋدا وزىندىك قۇنى ٴبىرشاما تومەن، ٴبىرشاما ەركىن ساۋدا ٴتاسىلى، بەلگىلى دارەجەدە تۇتىنۋ جاعدايىن كەڭەيتىپ، تۇتىنۋدىڭ ومىرشەڭدىك كۇشىن قاۋلاتادى، ول يكەمدى جۇمىستانۋدىڭ، ەركىن جۇمىستانۋدىڭ جاڭا تاسىلىنە اينالدى. شينجياڭنىڭ ارتقى ساندىق بازارى ەكونوميكا ۇلگىسىنىڭ گۇلدەنۋى ادامدارعا جاڭا تۇتىنۋدان تۋىنداعان ”تۇرمىستىق لەپ پەن جاڭا اعىمدى سەزىندىرىپ، ”كەشكى ەكونوميكانى“ گۇلدەندىرۋدە دە ماڭىزدى رول اتقارۋدا.
