جۇڭگو ۇلگىسىندەگى وسىزامانداندىرۋدى ىلگەرىلەتۋ ٴۇشىن جاستىق كۇش ـ قۋاتىن ارنايىق
_ 4 ـ مامىر قوزعالىسىنىڭ 105 جىلدىعىن ەسكە تۇسىرەمىز
حالىق گازەتى باسماقالاسى
جۇڭگونىڭ بايتاق دالاسى جاسىل جەلەك جامىلىپ، تىرشىلىك تىنىسى جالىندادى. بۇگىن 4 ـ مامىر جاستار مەرەكەسى، سونداي ـ اق 4 ـ مامىر قوزعالىسىنىڭ 105 جىلدىعىن ەسكە ٴتۇسىرۋ كۇنى. ٴبىز بۇكىل ەلدەگى قالىڭ جاستارعا مەرەكەلىك سالەم جولداپ، 4 ـ مامىر اتويشىلارىنىڭ وسكەلەڭ وتانشىلدىق سۇيىسپەنشىلىگى مەن توڭكەرىستىك رۋحىن ساعىنا ەسكە الىپ، 4 ـ مامىر رۋحىن اناعۇرلىم ويداعىداي ساۋلەلەندىرىپ، گۇلدەنۋ كۇشىن تاسقىنداتامىز.
1919 ـ جىلى بۇرق ەتكەن 4 ـ مامىر قوزعالىسى جۇڭگونىڭ تاياۋ زامان، قازىرگى زامان تاريحىنداعى ٴداۋىر بولگىش مانگە يە كەلەلى وقيعا بولىپ، جۇڭگو حالقىنىڭ جانە جۇڭحۋا ۇلتىنىڭ ۇلتتىڭ گۇلدەنۋىن جۇزەگە اسىرۋ مۇراتى مەن سەنىمىن تەلەگەي كۇشپەن جۇمىلدىردى. 4 ـ مامىر قوزعالىسىنىڭ 100 جىلدىعىن ەسكە ٴتۇسىرۋ جينالىسىندا باس شۋجي شي جينپيڭ 4 ـ مامىر قوزعالىسىن ”ول _ العاباسار جاس زيالىلار اتويشى بولعان، قالىڭ حالىق بۇقاراسى قاتىناسقان يمپەرياليزمگە، فەوداليزمگە ٴۇزىلدى ـ كەسىلدى قارسى تۇرعان ۇلى وتانشىلدىق توڭكەرىستىك قوزعالىس، جۇڭگو حالقىنىڭ ۇلتتى جويىلۋ حاۋپىنەن قۇتقارۋ، ۇلتتىڭ ار ـ نامىسىن قورعاۋ، ۇلتتىڭ كۇش ـ قۋاتىن ۇيىستىرۋ ٴۇشىن كوتەرگەن ۇلى قوعامدىق توڭكەرىستىك قوزعالىسى، جاڭا يدەيانى، جاڭا مادەنيەتتى، جاڭا ٴبىلىمدى تاراتقان ۇلى يدەيالىق اعارتۋ قوزعالىسى جانە جاڭا مادەنيەت قوزعالىسى“. وسى ۇلى قوزعالىس جۇڭگو قوعامىنىڭ العا باسۋىن ىلگەرىلەتىپ، ماركسيزمنىڭ جۇڭگودا كەڭ كولەمدە تارالۋىن جەبەپ، ماركسيزمنىڭ جۇڭگونىڭ جۇمىسشىلار قوزعالىسىمەن ۇشتاسۋىن جەبەپ، جۇڭگو كوممۋنيستىك پارتياسىنىڭ قۇرىلۋىنا يدەيا، كادرلار جاعىنان دايىندىق جاسادى، تاياۋ زاماننان بەرى جۇڭحۋا ۇلتىنىڭ ۇلتتىڭ تاۋەلسىزدىگى مەن دامۋىنا، العا باسۋىنا ۇمتىلۋىنىڭ تاريحي بارىسىندا بەلەستىك مانگە يە.
جاستار گۇلدەنسە، مەملەكەت گۇلدەنەدى، جاستار قۇدىرەتتەنسە، مەملەكەت قۇدىرەتتەنەدى. 4 ـ مامىر قوزعالىسىنان بەرى، جۇڭگو كوممۋنيستىك پارتياسىنىڭ باسشىلىعىندا، وتاندى ٴسۇيۋ، العا باسۋ، دەموكراتيا، عىلىم سىندى 4 ـ مامىر رۋحىنىڭ شابىتتاندىرۋىندا، ۇرپاقتان ـ ۇرپاققا جالعاسقان جۇڭگو جاستارى ۇزدىكسىز كۇرەس جۇرگىزىپ، جەڭىسپەن العا باسىپ، جاستىق ورالىمەن جاستىق كوكتەمدەي جايناعان جۇڭگونى، جاستىق شاقتاي جالىندى ۇلتتى سومداپ، جۇڭحۋا ۇلتىنىڭ ۇلى گۇلدەنۋ ۇدەرىسىندە اسقاق جاستىق جىرىن جازدى. جاڭا داۋىرگە قادام تاستاپ، كەڭ كوسىلگەن ەگىنجايدان كاسىپورىن سەحىنا، عىلمي زەرتتەۋدىڭ ٴبىرىنشى شەبىنەن قارلى بوران ازىناعان شەكارا قاراۋىلىنا دەيىن... قالىڭ جاستار بوران ـ شاشىننان تايسالماي، اۋىر مىندەتتى باتىلدىقپەن ارقالاپ، جاستىق جالىنىمەن ”ٴمولدىر ماحاببات تەك جۇڭگوعا عانا ارنالادى“ دەگەن ٴداۋىر كۇشتى ٴۇنىن اسقاقتاتا شىرقاپ، جاستىقتىڭ جالىنداعان ارەكەتى ارقىلى ”پارتيا الاڭسىز بولسىن، قۇدىرەتتى مەملەكەت قۇرۋدا مەن بارمىن“ دەگەن ايبىندى سەرتتى امالياتتا ايگىلەپ، جاستىق كوكتەمنىڭ جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدا جايناي تۇسۋىنە مۇمكىندىك جاسادى. اماليات جاڭا داۋىردەگى جۇڭگو جاستارىنىڭ كەرەمەت ەكەندىگىن، ۇلكەن مىندەت ارقالاي الاتىندىعىن تولىق دالەلدەدى!
پارتيا 20 ـ قۇرىلتايى جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدىڭ ۇلى جوباسىن كەسكىندەدى. باس شۋجي شي جينپيڭ بىلاي دەپ باسا دارىپتەدى: ”مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ايبىندى نىساناسىن جۇزەگە اسىرۋ قالىڭ جاستاردى قامتىعان بۇكىل پارتيانىڭ، بۇكىل ەلدەگى ٴار ۇلت حالقىنىڭ ٴبىر نيەتپەن ىنتىماقتاسىپ، بار كۇشىن سالىپ، ۇزدىكسىز كەزەڭ اسىپ، كەدەرگىلەردەن ٴوتىپ، قيىندىقتاردان قامال الۋىن قاجەت ەتەدى“. ۇلتتىڭ گۇلدەنۋى نىساناسىنا جاقىنداعان سايىن سالعىرتسىماۋىمىز، قايتا ەسەلەپ قۇلشىنۋىمىز، قالىڭ جاستاردى وسى ٴۇشىن كۇرەسۋگە جۇمىلدىرا ٴتۇسۋىمىز كەرەك. ”ەرتەڭگى جۇڭگو جاستارعا ٴۇمىت ارتادى“. تۇتاس قوعامدىق كۇشتەردىڭ ىشىندەگى ەڭ بەلسەندى، ەڭ جالىندى كۇش رەتىندە، جاڭا داۋىردەگى جۇڭگو جاستارى تاريحي ورايدى يگەرىپ، ٴداۋىر بورىشىن ارقالاپ، اسقاق مۇرات ورناتىپ، نىق قادام باسىپ، كەۋدە كەرە جاۋاپكەرشىلىك ارقالاپ، جاستىقتىڭ قوزعاۋشى كۇشى مەن جاسامپازدىق قۋاتى ارقىلى ۇلتتىڭ گۇلدەنۋىنىڭ تاسقىنداعان كوكتەم تولقىنىن قوزعاپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە جاستىق كۇش ـ قۋاتىن ارناۋى كەرەك.
”ادام ومىردە ٴوزىنىڭ بارلىق ٴىسىن ٴوزى تىندىرۋى كەرەك، ٴار جولى جارتى قادام باسساڭ دا، ۇزاق ۋاقىت جيناقتالا كەلە كەڭ دۇنيەگە جەتەسىڭ“. تاماشا ساتتە تۋىپ، اۋىر مىندەت ارقالادى، جاڭا داۋىردەگى جۇڭگو جاستارى جاڭالىق اشۋعا، جاسامپازدىق جاراتۋعا بەل بايلاپ، باتىلدىقپەن الدا جۇرەتىن جىگەر كورسەتىپ، جوعارىدان تومەنگە دەيىن ىزدەنىس جاسايتىن تاباندىلىق تانىتىپ، رەفورما جاساۋ، ەسىك اشۋ بارىسىندا جاڭا جول اشۋعا، جاڭا كاسىپ جاراتۋعا قۇلشىنىپ، عىلىم ـ تەحنيكادا جاڭالىق اشۋ بارىسىندا اۋىر جۇك كوتەرىپ، باس كەيىپكەر بولىپ، جاستىقتىڭ جاڭالىق اشۋ، جاسامپازدىق بارىسىندا شۇعىلا شاشۋىنا مۇمكىندىك جاساۋى؛ باتىلدىقپەن قايراتتانا كۇرەس جۇرگىزىپ، ٴداۋىردىڭ الدىڭعى لەگىندە جۇرەتىن اتويشى، ٴورىس اشۋشى، ۇلەس قوسۋشى بولىپ، جاستىقتىڭ ۇلتتىڭ گۇلدەنۋىن جۇزەگە اسىرۋ جارىس جولىندا ەرلىكپەن جۇلدەلى بولۋعا مۇمكىندىك جاساۋى؛ تانىم مەن ارەكەتتىڭ بىرلىگىنە تاباندى بولىپ، اماليات بارىسىندا شىنايى ٴبىلىم يگەرۋگە، شىندىقتى تۇسىنۋگە باسا ٴمان بەرىپ، بوران ـ شاشىندى باستان كەشىرۋ، ومىرگە ارالاسۋ بارىسىندا قابىلەتىن ٴوسىرىپ، جىگەرىن شىڭداپ، جاۋاپكەرشىلىك ارقالاپ، ىسكەرلىك كورسەتۋدىڭ بەرىك ومىرتقاسىن، قۇرىش يىعىن، ناعىز ونەرىن جەتىلدىرىپ، جاستىقتىڭ پارتيا مەن حالىق ەڭ قاجەت ەتكەن جەرلەردە قۇلپىرا شەشەك اتۋىنا مۇمكىندىك جاساۋ كەرەك.
باس شۋجي شي جينپيڭ بىلاي دەپ باسا دارىپتەدى: ”جاڭا داۋىردەگى جۇڭگو جاستارىنىڭ اعا بۋىنداردى ەڭ جاقسى جۇباتۋى، تاريحقا دەگەن ەڭ ۇلكەن جاۋاپكەرشىلىگى _ جاڭا داۋىردەگى ۇزاق جورىقتى تاباندىلىقپەن ويداعىداي باسۋ“. جاڭا جورىقتا شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ٴداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ٴتورت تانىمدى“ كۇشەيتىپ، ”ٴتورت سەنىمدى“ بەكەمدەپ، ”ەكىنى قورعاۋدى“ ورىنداپ، ٴوز مۇراتىن وتاننىڭ بولاشاعىمەن، ٴوز ٴومىرىن ۇلتتىڭ تاعدىرىمەن تىعىز بايلانىستىرىپ، جاڭا ٴداۋىردىڭ كۇرەسكەرى، 4 ـ مامىر رۋحىنىڭ مۇراگەرى بولعاندا، جاڭا داۋىردەگى جۇڭگو جاستارى، ٴسوز جوق، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ جاندى امالياتى بارىسىندا جاستىق ارمانىنا قانات قاعىپ، اعا بۋىنداردىڭ، ٴداۋىردىڭ، حالىقتىڭ ۇمىتىنەن شىعاتىن شۇعىلالى داستاندى ۇزدىكسىز جازا الادى.
(شينحۋا اگەنتتىگىنىڭ 5 ـ ايدىڭ 3 ـ كۇنى بەيجيڭنەن بەرگەن حابارى)
