□ شينحۋا اگەنتتىگىنىڭ تىلشىلەرى ني سى ـ ي، ليۋ حۋا
جەرگىلىكتى ۋاقىت 5 ـ ايدىڭ 6 ـ كۇنى تۇستەن كەيىن مەملەكەت ٴتوراعاسى شي جينپيڭ پاريجدەگى ەليزە سارايىندا فرانسيا زۇڭتۇڭى ماكرونمەن كەڭەس وتكىزدى. كەڭەستەن بۇرىن ەكى ەلدىڭ مەملەكەت باسشىلارى جانە ولاردىڭ حانىمدارى ٴوزارا تارتۋ ۇسىندى، تارتۋلاردىڭ اراسىندا وليمپيادا سپورت جارىسىنىڭ 3 الاۋى ەل نازارىن ەرەكشە اۋداردى.
ەليزە سارايىنىڭ 1 ـ قاباتىنداعى ٴمۇسىن زالىندا ٴتۇستى شىراقتار جارقىراپ، وليمپيادا سپورت جارىسىنىڭ 3 الاۋى اقشىل مرامور ۇستەلدە قاتار قويىلىپتى.
ٴتوراعا شي جينپيڭنىڭ ماكرون زۇڭتۇڭعا تارتۋ ەتكەنى بەيجيڭ قوس وليمپيادا سپورت جارىسىنىڭ الاۋى بولسا، ال ماكرون زۇڭتۇڭ پاريج وليمپيادا سپورت جارىسىنىڭ الاۋىن تارتۋ ەتىپ، سيعا سي كورسەتتى. بەيجيڭ كەزىندە 2008 ـ جىلعى جازعى وليمپيادا سپورت جارىسىن جانە 2022 ـ جىلعى قىسقى وليمپيادا سپورت جارىسىن وتكىزگەن، پاريج بيىل 7 ـ ايدان 8 ـ ايعا دەيىن 33 ـ كەزەكتى جازعى وليمپيادا سپورت جارىسىن وتكىزەدى.
”فرانسيا دەنە تاربيەدە قۋاتتى ەل، مەن پاريج وليمپيادا سپورت جارىسىنىڭ تابىسقا جەتۋىن شىن جۇرەكتەن تىلەيمىن. جۇڭگو جاق جوعارى دەڭگەيدەگى ۋاكىلدەر ۇيىرمەسىن فرانسياعا جارىسقا قاتىناسۋعا جىبەرەدى“، ـ دەدى ٴتوراعا شي جينپيڭ كۇلىمسىرەپ.
سول كۇنى ٴتوراعا شي جينپيڭ ماكرون زۇڭتۇڭمەن بىرگە تىلشىلەرمەن كەزدەسكەندە، جۇڭگو جاقتىڭ فرانسيا جاقتىڭ پاريج وليمپيادا سپورت جارىسىن ويداعىداي وتكىزۋىن قولدايتىندىعىن تاعى ٴبىر رەت ٴبىلدىردى.
ٴتوراعا شي جينپيڭ تاعى بىلاي دەپ اتاپ كورسەتتى: بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە جاۋاپكەرشىلىك ارقالاعان ٴىرى ەل رەتىندە، جۇڭگو جاق فرانسيا جاقپەن بىرگە پاريج وليمپيادا سپورت جارىسىن وراي ەتىپ، سپورت جارىسى كەزىندە بۇكىل الەمدە قاقتىعىستى دوعارىپ، سوعىستى توقتاتۋدى دارىپتەۋدى قالايدى.
(شينحۋا اگەنتتىگىنىڭ 5 ـ ايدىڭ 6 ـ كۇنى پاريجدەن بەرگەن حابارى)
