5 ـ ايدىڭ 9 ـ كۇنى شينجياڭ يليتى قۇراماسىنىڭ دوپشىسى جونس (وڭنان 3 ـ) جارىستا شابۋىلعا وتۋدە.
□ سۋرەتتى شينحۋا اگەنتتىگىنىڭ ٴتىلشىسى حۋاڭ زۇڭجى تۇسىرگەن
انار بۇلت \ شينجياڭ گازەتىنىڭ ٴتىلشىسى حۋاڭ شيڭ 5 ـ ايدىڭ 9 ـ كۇنى ۇرىمجىدەن حابارلايدى. شەشۋشى جارىسقا شينجياڭ كەلدى! بۇل شينجياڭ فيحۋ قۇراماسىنىڭ اراعا 5 جىل سالىپ 7 ـ رەت شەشۋشى جارىسقا كىرۋى. 5 ـ ايدىڭ 9 ـ كۇنى كەشتە شينجياڭ 2024 _ 2023 جارىس ماۋسىمىنداعى CBA ماۋسىمدىق سوڭعى جارىسىنىڭ جارتىلاي شەشۋشى جارىسىنىڭ 4 ـ مايدان جارىسىندا 95كە قارسى 108 ۇپايمەن جىجياڭدى جەڭىپ، ەڭ سوڭىندا 1گە قارسى 3 ۇپايمەن شەشۋشى جارىسقا كىردى.
وسىدان بۇرىن شينجياڭ 2009 ـ جىلى، 2010 ـ جىلى، 2011 ـ جىلى، 2014 ـ جىلى، 2017 ـ جىلى جانە 2019 ـ جىلى 6 رەت شەشۋشى جارىسقا قاتىناسقان، مۇنىڭ ىشىندە 2014 ـ جىلى بەيجيڭ قۇراماسىمەن سايىسقا تۇسۋدەن سىرت، باسقا 5 رەتتىڭ بارىندە گۋاڭدۇڭ قۇراماسىمەن سايىسقا تۇسكەن. 2017 ـ جىلى شينجياڭ ٴبىر رەت باس جۇلدەگەر بولعان.
وسى رەتكى جارتىلاي شەشۋشى جارىس كەزىندە شينجياڭ العاشقى جارىستا ٴوز الاڭىندا 90عا قارسى 125 ۇپايمەن جىجياڭدى جەڭدى؛ 2 ـ رەتكى جارىستا شينجياڭ ٴوز الاڭىندا جولى بولماي، 95كە قارسى 85 ۇپايمەن قارسىلاسىنان جەڭىلىپ قالدى؛ 3 ـ رەتكى جارىستا شينجياڭ قوناق الاڭدا 93كە قارسى 105 ۇپايمەن جىجياڭدى جەڭدى؛ 4 ـ مايداندا شينجياڭ قوناق الاڭدا 95كە قارسى 108 ۇپايمەن قارسىلاسىن ويسىراتا جەڭدى.
جارتىلاي شەشۋشى جارىستاعى 4 رەتكى جارىستا 3 ۇپايلىق دوپتىڭ دالدىك مولشەرى جەڭىس پەن جەڭىلىستىڭ بارومەترىنە اينالىپ، دالدىك مولشەرى %35تەن جوعارى بولعان جارىستا شينجياڭ قۇراماسى دەرلىك جەڭىسكە جەتتى؛ تەك ٴبىر رەت جەڭىلگەن جارىستا 3 ۇپايلىق دوپتىڭ دالدىك مولشەرى %20عانا بولدى. بۇدان سىرت، 4 رەتكى جارتىلاي شەشۋشى جارىستا شينجياڭ قۇراماسى قايىرىلما دوپ بۋىنىندا باسىم ورىندى يەلەدى.
شينجياڭ شەشۋشى جارىسقا 7 ـ رەت قاتىناستى، سونىمەن بىرگە وسى جارىس ماۋسىمىنداعى العاشقى نىسانانى اسىرا ورىندادى، قازىر تەك ۇزدىكسىز كەرەمەتتەر جاراتۋىن عانا كۇتەمىز. الايدا جارتىلاي شەشۋشى جارىستىڭ 3 ـ مايدانىندا جاۋ رۇي جارالانىپ، شەشۋشى جارىسقا قاتىناسا المايتىن بولدى، بۇل شينجياڭنىڭ شەشۋشى جارىسىنا ٴبىرتالاي ىقپال جاسايدى.
CBA شەشۋشى جارىسىندا شينجياڭ لياۋنيڭ مەن گۋاڭدۇڭ اراسىنداعى سايىستىڭ جەڭىمپازىمەن ايقاسادى.
ماۋسىم سوڭىنداعى جارىستاعى ايقاستاردا شينجياڭ لياۋنيڭمەن جارىسقا تۇسكەندە باسىم ورىندا تۇردى؛ ال گۋاڭدۇڭمەن سايىسقاندا، شينجياڭ 2017 ـ جىلى عانا ٴبىر رەت جەڭىسكە جەتتى.
