انار بۇلت \ شينجياڭ گازەتىنىڭ ٴتىلشىسى لۋ فىڭباۋ 5 ـ ايدىڭ 20 ـ كۇنى قاشقاردان حابارلايدى. 5 ـ ايدىڭ 20 ـ كۇنى ”جوعارى ساپالى دامۋ جۇڭگو ساپارى. شينجياڭ تاراۋى“ ارناۋلى تاقىرىپتىق قيمىلى قاشقار قالاسىندا باستالدى، قيمىلعا قاتىناسۋشىلار ٴبىر اپتا ۋاقىتپەن قاشقار، ىلە، ٴۇرىمجى سياقتى 3 جەردى ارالاپ احۋال ۇعىسىپ، بۇكىل ەلگە، اۋەلى، دۇنيە جۇزىنە شينجياڭنىڭ دامۋ تابىستارىن ايگىلەپ، اناعۇرلىم كوپ ادامنىڭ شينجياڭدى تۇسىنۋىنە، شينجياڭعا نازار اۋدارۋىنا، شينجياڭدى قولداۋىنا مۇمكىندىك جاسايدى.
”جەلەگىڭدى اش...“ قيمىل باستالعان ورىن _ قاشقار شياڭفي باقشاسى كورىنىس وڭىرىندەگى ينتەرنەتتە تانىمال ۇجىم ويناقى ٴبي قيمىلدارىمەن، شاتتىققا تولى ٴان اۋەندەرىمەن كوپشىلىككە ٴان ـ بيگە شەبەر، ىقىلاستى، مەيماندوس شينجياڭدى ايگىلەدى.
الداعى ٴبىر اپتادا بۇكىل ەلدىڭ جەر ـ جەرىنەن كەلگەن ينتەرنەت وركەنيەتى سەرىكتەرى، ينتەرنەتتە تانىمال ادامدار، سايت تەكشەسى ۋاكىلدەرى، سونداي ـ اق مەديا تىلشىلەرى سياقتىلاردان ۇيىمداسقان ارالاپ احۋال ۇعىسۋ ۇجىمى قاشقار ايماعى، ىلە قازاق اۆتونوميالى وبلىسى، ٴۇرىمجى قالاسىنداعى شەكارا اتتاعان ەلەكتروندى ساۋدا، اۋىر ونەركاسىپ بازاسى، مادەنيەت ـ ساياحات كاسىپ سالاسى باقشاسى، حالىقتىق سالت ـ سانا بازارى، تيانشان گۇل تەڭىزى سياقتىلاردى ىشكەرىلەي ارالاپ، شينجياڭنىڭ دامۋ تابىستارىنا كۋا بولىپ، شينجياڭنىڭ جەرگىلىكتى سالت ـ ساناسىن ٴتۇيسىنىپ، باۋرامدى شينجياڭدى، گۇلدەنىپ ـ كوركەيگەن شينجياڭدى ايگىلەپ، شينجياڭنىڭ دامۋ حيكاياسىن ويداعىداي باياندايدى.
”مەن ٴوز ٴتاسىلىم مەن تەكشەم ارقىلى كوپشىلىككە شىنايى شينجياڭدى، قارىشتاپ العا باسقان شينجياڭدى كورسەتەمىن“، ـ دەدى قيمىلدىڭ سيلى قوناعى، ”دۇنيە جۇزىنەن كورگەن ـ بىلگەندەردىڭ“ بىلوگەرى گۋ بوۋىن.
تاياۋ جىلداردان بەرى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، اۆتونوميالى رايوندىق پارتكوم جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، مەملەكەت جالپى جاعدايىنداعى شينجياڭنىڭ ”بەس ۇلكەن ستراتەگيالىق ورنىن“ كوزدەپ، شينجياڭنىڭ ابزال شارت ـ جاعدايى مەن دامۋ كومەسكى كۇشىن تياناق ەتىپ، جوعارى ساپالى دامۋدى ماڭداي الدى مىندەت، ەرەكشە، باسىمدىققا يە كاسىپ سالالارىن دامىتۋدى نەگىزگى قامال الۋ بەتالىسى ەتىپ، جاڭاشا وندىرگىش كۇشتەردى جەدەل جەتىلدىرىپ، جۇڭگو (شينجياڭ) ەركىن ساۋدا سىناق رايونى جانە ”سەگىز ٴىرى كاسىپ سالاسى شوعىرى“ قۇرىلىسىن جوعارى ولشەممەن ىلگەرىلەتىپ، ەرەكشەلىكتى، باسىمدىقتى ايگىلەيتىن وسىزاماندانعان كاسىپ سالاسى جۇيەسىن جەدەل ورناتتى. قازىرگى تاڭدا، شينجياڭنىڭ قوعامدىق ورتاسى ٴۇرتىس ورنىقتى بولدى، ەكونوميكاسى جىلدام، جوعارى ساپالى دامىپ، سىرتقا ەسىك اشۋ ۇلكەن ارناسى جەدەل قۇرىلىپ، ۇلتتار ىنتىماعى، العاباسارلىعى گۇلى بار الاپتا شەشەك اتىپ، ٴار ۇلت بۇقاراسىنىڭ تۇرمىسى بارعان سايىن شالقي ٴتۇستى.
”جوعارى ساپالى دامۋ جۇڭگو ساپارى · شينجياڭ تاراۋى“ ارناۋلى تاقىرىپتىق قيمىلىن ورتالىق ينتەرنەت حاۋىپسىزدىگى جانە ينفورماتسيالاندىرۋ كوميتەتى كەڭسەسىنىڭ ينتەرنەت قوعامدىق قىزمەت مەكەمەسى، جۇڭگو ينتەرنەتتى دامىتۋ قور قوعامى، شينجياڭ ۇيعۇر اۆتونوميالى رايوندىق پارتكوم ينتەرنەت حاۋىپسىزدىگى جانە ينفورماتسيالاندىرۋ كەڭسەسى بىرلەسىپ ۇيىمداستىردى، ٴۇرىمجى قالالىق پارتكوم ينتەرنەت حاۋىپسىزدىگى جانە ينفورماتسيالاندىرۋ كەڭسەسى، ىلە وبلىستىق پارتكوم ينتەرنەت حاۋىپسىزدىگى جانە ينفورماتسيالاندىرۋ كەڭسەسى، قاشقار ايماقتىق پارتكوم ينتەرنەت حاۋىپسىزدىگى جانە ينفورماتسيالاندىرۋ كەڭسەسى سەلبەستى، شينجياڭ انار بۇلت مادەنيەت جاسامپازدىعى شەكتى سەرىكتەستىگى ۇستىنە الىپ وتكىزدى.
