شينحۋا اگەنتتىگىنىڭ 5 ـ ايدىڭ 22 ـ كۇنى بەيجيڭنەن بەرگەن حابارى. 5 ـ ايدىڭ 22 ـ كۇنى مەملەكەت ٴتوراعاسى شي جينپيڭ 14 ـ كەزەكتى جۇڭگو _ امەريكا ساياحات جوعارى جىكتەگىلەر كەڭەسىنىڭ اشىلۋىنا حات جولدادى.
شي جينپيڭ بىلاي دەپ اتاپ كورسەتتى: بيىل جۇڭگو مەن امەريكانىڭ ديپلوماتيالىق قارىم ـ قاتىناس ورناتقاندىعىنىڭ 45 جىلدىعى. جۇڭگو مەن امەريكا قارىم ـ قاتىناسىنىڭ تاعانىن حالىق قالاعان، جۇڭگو مەن امەريكا قارىم ـ قاتىناسىنىڭ قاقپاسىن حالىق اشقان، جۇڭگو مەن امەريكا قارىم ـ قاتىناسىنىڭ حيكاياسىن حالىق جازعان، جۇڭگو مەن امەريكا قارىم ـ قاتىناسىنىڭ بولاشاعىن دا ەكى ەل حالقى ورتاق جاراتاتىنى داۋسىز.
شي جينپيڭ بىلاي دەپ باسا دارىپتەدى: ساياحات _ جۇڭگو _ امەريكا ەكى ەل حالقىنىڭ ارالاسۋىنىڭ، ىشتەسۋىنىڭ، ٴوزارا ٴتۇسىنىسۋىنىڭ، ٴوزارا جاقىن ٴوتۋىنىڭ ماڭىزدى كوپىرى. ٴبىز امەريكا ساياحاتشىلارىنىڭ جۇڭگوعا ساياحاتتاپ كەلىپ، جۇڭگولىق دوستارمەن تانىسۋىن، جۇڭحۋا مادەنيەتىن كوزىمەن كورۋىن، كورىكتى تاۋ ـ وزەندەردى ارالاۋىن، شىنايى جۇڭگونى وزدەرى تىكەلەي سەزىنۋىن ىستىق ىقىلاسپەن قارسى الامىز. ەكى ەلدىڭ ٴار سالاسىنىڭ وسى رەتكى جوعارى جىكتەگىلەر كەڭەسىن وراي ەتىپ، ىشكەرىلەي اۋىس ـ كۇيىس جاساپ، ورتاق تانىم ۇيىستىرىپ، بەلسەنە ارەكەتتەنىپ، ساياحات سەلبەستىگى ارقىلى ادامداردىڭ بارىس ـ كەلىسىن جەبەپ، گۋمانيتارلىق اۋىس ـ كۇيىس ارقىلى جۇڭگو _ امەريكا دوستىعىن ۇزبەي جالعاستىرىپ، ”سان _ فرانسيسكو كەلەشەكتىك نىساناسىن“ ناقتى نىساناعا اينالدىرۋعا كۇش قوسۋىن ٴۇمىت ەتەمىن.
14 ـ كەزەكتى جۇڭگو _ امەريكا ساياحات جوعارى جىكتەگىلەر كەڭەسى سول كۇنى شانشي ولكەسىنىڭ شي ـ ان قالاسىندا اشىلدى، نەگىزگى تاقىرىبى _ ”ساياحات ارقىلى جۇڭگو مەن امەريكانىڭ گۋمانيتارلىق اۋىس ـ كۇيىسىن جەبەۋ“، جۇڭگو مادەنيەت جانە ساياحات مينيسترلىگى، شانشي ولكەلىك حالىق ۇكىمەتى، امەريكا ساۋدا ىستەرى مينيسترلىگى، امەريكا ساياحاتتى جالپىلاستىرۋ مەكەمەسى بىرگە وتكىزدى.
