جول بويىنداعى قۇرىلعىلار اناعۇرلىم تولىقتانىپ، ساياحات ونىمدەرى مەن كاسىپ كۇيى اناعۇرلىم باي مازمۇندى بولدى
بيىل مايتاۋ _ كۇشار تاس جولىندا ٴوز كولىگىمەن ساياحاتتاۋ ٴتىپتى دە قىزىقتى بولادى
□ انار بۇلت \ شينجياڭ گازەتىنىڭ ٴتىلشىسى جاڭ شياۋمي
قار اتقىلاپ وينادى، قارلى جەردە قاربىز جەدى... 6 ـ ايدىڭ 3 ـ كۇنى مايتاۋ _ كۇشار تاس جولى قاشلىعىن اسۋىندا شينجياڭ ٴوندىرىس ـ قۇرىلىس بيڭتۋانى ٴوز كولىگىمەن ساياحاتتاۋ قوعامىنىڭ ورىنباسار باستىعى تاڭ چۇن جانە ونىڭ سەرىكتەرى مايتاۋ _ كۇشار تاس جولىندا ٴوز كولىگىمەن ساياحاتتاۋدىڭ جازعى قىزىعىنا شومدى.
تاڭ چۇن ٴۇرتىس 10 جىل مايتاۋ _ كۇشار تاس جولىندا ٴوز كولىگىمەن ساياحاتتاۋ قيمىلىن ۇيىمداستىردى، بيىل تاعى 20 جەكە اۆتوكولىك، ۇيشە اۆتوكولىك ۇيىمداستىرىپ، 6 ـ ايدىڭ 1 ـ كۇنى شيحۋ قالاسىندا وتكىزىلگەن 2024 ـ جىلعى مايتاۋ _ كۇشار تاس جولىندا اۆتوكولىك قاتىناۋ سالتىنا قاتىناستى. ٴوز كولىگىمەن ساياحاتتاۋشىلار شاڭحاي، حاينان، شىنجىن سياقتى جەرلەردەگى شينجياڭنىڭ سىرتىنداعى ٴوز كولىگىمەن ساياحاتتاۋ اۋەسكەرلەرىن نەگىز ەتەدى، مۇنىڭ ىشىندە حايناننان ٴوز اۆتوكولىگىمەن ساياحاتتاي كەلگەن دوستار 5 ـ ايدىڭ ورتا شەنىندە ـ اق شينجياڭعا جەتىپ ۇلگىرگەن، ونداعىسى مايتاۋ _ كۇشار تاس جولىندا اۆتوكولىك قاتىناي سالا دەرەۋ بارىپ تاماشالاۋ ٴۇشىن ەدى.
شينجياڭ كۇيتۇن شىفاڭ جيچى كلوبى 42 اۆتوكولىك ۇيىمداستىرىپ، اۆتوكولىك قاتىناۋ سالتىنا قاتىناستى. ”وسى 2 جىلدا شينجياڭنىڭ سىرتىندا اۆتوكولىك اۋەسكەرلەرى بارعان سايىن كوبەيدى. مايتاۋ _ كۇشار تاس جولىندا اۆتوكولىك قاتىناعان كۇنى ٴوز كولىگىمەن ساياحاتتاۋ اۋەسكەرلەرىنىڭ مەرەكەسى كەلىپ جەتكەندەي بولىپ، وسى تاس جولدىڭ بەدەلى مەن اتاعى اسپاندادى“، ـ دەدى وسى كلۋبتىڭ جاۋاپتىسى ۋ بين.
”تيانشاننىڭ جوتاسىنان ەندەي وتەتىن كورىنىستىك داڭعىل جول“، ”جۇڭگوداعى ەڭ كوركەم تاس جول“ دەپ اتالعان مايتاۋ _ كۇشار تاس جولى، ٴسىرا، قانداي جول؟ ول G217 جەلىسىنىڭ ماڭىزدى قۇرامداس بولىگى، سولتۇستىكتە قارامايلى قالاسىنىڭ مايتاۋ رايونىنان باستالىپ، وڭتۇستىكتە اقسۋ ايماعىنىڭ كۇشار قالاسىنا دەيىن، 5 ايماق، وبلىس، قالانى باسىپ وتەدى، جالپى ۇزىندىعى 561 كيلومەتر، جول بويى جايلىم، وزەن، قارلى تاۋ، كول، قىساڭ، ورمان سياقتى كورىنىستەردى تاماشالاۋعا بولادى.
”بۇل جولدا ٴبىر كۇندە ٴتورت ماۋسىمنىڭ كورىنىسىن كورۋگە بولادى، بەينە ادام ٴومىرى سياقتى باي مازمۇندى، تارتىمدى كەلەدى“. شينجياڭ جۇڭباڭ مادەنيەت ـ ساياحات شەكتى سەرىكتەستىگىنىڭ باس ديرەكتورى دۋ چۇن ـ ي بىلاي دەدى: سەرىكتەستىك قۇرعان ٴوز كولىگىمەن ساياحاتتاۋ توبى اۆتوكولىك قاتىناۋ سالتىندا سول كۇنى 5 ساعات تىكە تاراتۋ جۇرگىزىپ، ٴوز كولىگىمەن ساياحاتتايتىن 10 مىڭعا جۋىق اۋەسكەردى وزىنە باۋرادى، 100دەن استام ادام ۇيىرمەگە تىزىمدەلۋ ينفورماتسياسىن سۇراستىردى.
تاڭ چۇن مايتاۋ _ كۇشار تاس جولى بويىنداعى مول جاراتىلىستىق كورىنىستەردەن، وزگەشە تاس جول مادەنيەتىنەن سىرت، جەلى بويىنداعى جەر ـ جەردىڭ تاريحي مادەنيەتى ونى ٴتىپتى دە باۋرامدىلىققا يە ەتتى دەپ سانادى. بيىل ول ساياحاتشىلارعا مايتاۋ _ كۇشار تاس جولى مۇراجايىن، ”مايتاۋ _ كۇشار تاس جولى“ تەرەڭ سەزىنۋ ۇلگىسىندەگى ناقتى كورىنىستىك كولەمدى كونسەرتتى ٴتۇيىندى تۇردە تانىستىردى، ”كوپشىلىككە ەڭ كوركەم تاس جولدىڭ كورىنىسى كوركەم بولۋمەن بىرگە، ونىڭ استارىندا جىرلاۋعا تاتيتىن تاريح جاتقانىن ٴتۇسىندىرۋ قاجەت“.
مايتاۋ _ كۇشار تاس جولى بويىنان ليۋليان ساتىپ الامىن دەپ مۇلدە ويلاماپپىن“. 6 ـ ايدىڭ 3 ـ كۇنى ٴۇرىمجى قالاسىنان كەلگەن ٴوز كولىگىمەن ساياحاتتاۋ اۋەسكەرى پان حۇي اتتانار الدىندا، شيحۋ قالاسى تەرەكتى قالاشىعى شيحۋ بەكەتى مەيمانحاناسىنىڭ 1 ـ قاباتىنداعى ەرەن بازاردان جەمىس ـ جيدەك ساتىپ الدى، ”بۇرىن مايتاۋ مەن شيحۋ قالاسىندا تۇنەيتىنبىز، بىرنەشە جىل بويى اياق باسقامىز جوق، بۇل ارادا قوناق ٴۇي، ٴدامدى تاعامدار كوشەسى سالىنىپتى، وزگەرىس وتە زور ەكەن“.
جالپى 120 ميلليون يۋان قارجى قوسىلعان ”شيحۋ بەكەتى“ ساياحات كوپ يقۋاتتى جالپىلىق قىزمەت وتەۋ ورتالىعى مايتاۋ _ كۇشار تاس جولى مەن S101 جەلىسىنىڭ تۇيىلىسكەن جەرىنە ورنالاسقان، 6 ـ ايدىڭ 1 ـ كۇنى پايدالانۋعا بەرىلدى. بۇل ارادا شيحۋ بەكەتى مەيمانحاناسىنان سىرت، حالىقتىق تۇسەلحانا، ۇيشە اۆتوكولىك تۇزگە تۇنەۋ لاگەرى، ٴدامدى تاعامدار ايالداماسى، سىرا سەزىنۋ سارايى، اشىق بازار سياقتى ساياحاتتىق قىزمەت وتەۋدىڭ سايكەستى قۇرىلعىلارى بار“، ـ دەدى. ”قازىر حالىقتىق تۇسەلحانالاردىڭ قوناق بولمەلەرىنە 6 ـ ايدىڭ ورتا شەنىنە دەيىن الدىن الا تاپسىرىس بەرىلىپ بولدى، بيىل جەكە كولىكپەن ساياحاتتاۋشىلاردان ٴبىر ميلليوننان استام ادام (رەت) قابىلدانادى دەپ مەجەلەنۋدە“، ـ دەدى شيحۋ قالاسى شيڭديڭ مادەنيەت ـ ساياحات شەكتى جاۋاپكەرشىلىك سەرىكتەستىگى شيحۋ بەكەتى نىسانىنىڭ تيجارات ديرەكتورى ۋاڭ جياشين.
بيىل اۆتونوميالى رايوندىق قاتىناس ـ تاسىمال مەڭگەرمەسى قاتىناس، ٴجۇرىس ـ تۇرىس ىستەرىنە قىزمەت وتەۋدى، قامتاماسىز ەتۋدى ويداعىداي ىستەۋ ٴۇشىن، مايتاۋ _ كۇشار تاس جولى بويىندا 10 قاتىناس اۋا رايى پۋنكتى ٴتۇيىنىن، 4 قاتىناۋ قىزمەت وتەۋ پۋنكتىن، 9 جول كۇتىمدەۋ، جول تۇتاستىرۋ پۋنكتى سياقتىلاردى كوبەيتىپ، قالىڭ ساياحاتشىلاردىڭ دەمالۋىنا، تۇزگە وتىرۋىنا قولايلىلىق جاسادى؛ قۇرىلعىلار مەن زاتتىق ماتەريالداردى تەگىس دايىنداپ، تولىق دايىنداپ، تاۋلى رايوندا قار كوشكىنى ٴتۇسۋ سياقتى جاعدايلارعا بەلسەنە توتەپ بەردى؛ زاريادتاۋ باعاناسىن كوبەيتىپ، كىلەڭ ەلەكترلى اۆتوكولىك يەلەرىنىڭ ساياحاتقا شىعۋىنا ٴتىپتى دە قولايلىلىقتار جاراتتى.
جەلى بويىنداعى ٴارقايسى ايماق، وبلىس، قالالاردىڭ نەگىزدىك قۇرىلعىلاردى ۇزدىكسىز كەمەلدەندىرۋىنە، قىزمەت وتەۋ ساپاسىن ساپالىلاندىرۋىنا بايلانىستى، بيىل مايتاۋ _ كۇشار تاس جولىندا بۇرىنعى جىلدارداعىدان ەرتە قاتىناس قاتىناۋمەن بىرگە، جول بويىنداعى قۇرىلعىلار دا اناعۇرلىم تولىقتانىپ، ساياحات ونىمدەرى، ساياحات كاسىپ كۇيى دە اناعۇرلىم بايىدى. 5 ايماق، وبلىس، قالا مايتاۋ _ كۇشار تاس جولى مەن جەرـ جەردىڭ ساپالى مادەنيەت ـ ساياحات بايلىعىن، سارا ٴوز كولىگىمەن ساياحاتتاۋ جەلىسىن، جاڭا كاسىپ كۇيىن، جاڭا ونىمدەردى ٴوزارا ۇشتاستىرىپ، ۇيىرمە ۇيىمداستىرىپ ساياحات جەلىسى ونىمدەرىن تانىستىردى. كۇشار قالالىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى گاۋ شيانجى بىلاي دەدى: بيىل كۇشار قالاسى كۇسان كوشەسى، دوپپا كوشەسى سياقتى ٴبىر توپ ەرەكشە ساياحات كورىنىس تۇيىندەرىن جوعارى ولشەممەن قۇرىپ، مايتاۋ _ كۇشار تاس جولى G217 جەلىسىنىڭ بويىنداعى اۆتوتۇراقتاردى، سەيىل ـ سەرۋەن كورىنىس تۇيىندەرىن كەمەلدەندىردى. كورىنىس وڭىرلەرىنىڭ قىزمەت وتەۋىن قامتاماسىز ەتۋ سياقتى جەلىلەس نەگىزدىك سايكەستى قىزمەت وتەۋ قۇرىلعىلارى ساياحاتشىلاردىڭ ”بايىرعى اۋەندى كۇسان · جىبەك جولىنداعى كۇشار“ وزگەشە ساياحات مادەنيەتىن تەرەڭ سەزىنۋىن ٴۇمىت ەتتى.
مۇنان سىرت، شينجياڭ ىشىندەگى ساياحات سەرىكتەستىكتەرى مايتاۋ _ كۇشار تاس جولى مەن G219 شەكارالىق ساياحات كورىنىس جولى، S101 تيانشان جاعراپيالىق سۋرەت ٴدالىزى سياقتى ٴوز كولىگىمەن ساياحاتتاۋ جەلىلەرىن بىرىكتىرىپ، باي مازمۇندى، تارتىمدى ساياحات جەلىسى ونىمدەرىن شىعاردى.
شىنجىننان كەلگەن ٴوز كولىگىمەن ساياحاتتاۋ اۋەسكەرى لي يان مەن دوستارى وسى ارادا ٴوز كولىگىمەن ساياحاتتاۋدى تاڭدادى. 5 ـ ايدىڭ 28 ـ كۇنى ولار ٴۇرىمجى قالاسىنان جولعا شىعىپ، جۇردەك اۆتوكولىكپەن S101 لەنياسىن باسىپ ٴوتىپ، كۇيتۇن قالاسىنا باردى، سايرام كولى، نارات كورىنىس ٴوڭىرىن ساياحاتتاعاننان كەيىن، 6 ـ ايدىڭ 3 ـ كۇنى مايتاۋ _ كۇشار تاس جولىنا ٴتۇستى. ولار 3 اي ۋاقىت جۇمساپ، شينجياڭدا ٴوز كولىگىمەن ىشكەرىلەي ساياحاتتاۋدى جوسپارلادى، ”ٴبىز جۇرە ٴجۇرىپ سۋرەتكە ٴتۇسىرىپ، سەيىل ـ سەرۋەن قۇرماقشىمىز. شينجياڭنىڭ كورىنىسى كوركەم، جول جاعدايى وتە جاقسى، نەگىزدىك قۇرىلعىلارى كەمەلدى ەكەن. ٴبىز كوركەم كورىنىستى اپپارات كوزىنەن قاعىس قالدىرماي سۋرەتكە ٴتۇسىرىپ، باسقالارمەن ٴبولىسىپ، تاماشا ساتتەردى جۇرەگىمىزگە ساقتاپ، قاستەرلەپ وتەمىز“، ـ دەدى.
