تيانشان تورى \ شينجياڭ گازەتىنىڭ ٴتىلشىسى حي حۇڭۋي
وتباسىنداعىلارمەن بىرگە تۇزدە تۇنەۋ، مۋزيكالى تەاتر تاماشالاۋ، ساۋدا سارايىنا بارىپ زات ساتىپ الۋ ... قۇربان ايت مەرەكەسى دەمالىسى كەزىندە شينجياڭنىڭ تۇتىنۋ بازارى ۇزدىكسىز جاقسارىپ، تاۋار ٴتۇرى تولىق، زات مول، باعا تۇراقتى بولدى.
تۇتىنۋ كومەسكى كۇشىن قاۋلاتۋ ٴۇشىن بۇكىل شينجياڭنىڭ جەر ـ جەرى ىركەس ـ تىركەس فورماسى الۋان ٴتۇرلى تۇتىنۋدى جەبەۋ قيمىلدارىن ۇسىندى.
ٴۇرىمجى قالاسى سايباق رايونى فينانس قۇرىلىمدارىمەن بىرلەسىپ، ارزانداتىپ ساتۋدى جەبەۋ، تيىمدىلىك بەلەتىن جانە تۇتىنۋ بەلەتىن تاراتۋ سياقتىلار ارقىلى ”ٴبىر ماۋمەن ساتىپ الۋ“، ”ٴبىر يۋانمەن ساتىپ الۋ“ سياقتى حالىققا ٴتيىمدى قيمىلداردى جولعا قويدى.
ٴۇرىمجى قالاسى سايباق رايوندىق ساۋدا ىستەرى مەكەمەسى پارتيا باسشىلىق گرۋپپاسىنىڭ شۋجيى مىڭ شياڭحۋ بىلاي دەدى: مەرەكە كەزىندە سايباق رايونىنداعى ٴىرى ساۋدا سارايلارى باعادا جەڭىلدىك جاساۋ، بەلگىلى سوماعا تولسا اقىسىن ازايتۋ، ساتىپ السا، سيلىق ۇسىنۋ قيمىلدارىن ۇسىنىپ، كاسىپتەر بىرلەسىپ قيمىلداعان، ساۋداگەرلەر بىرلەسكەن، جالپى قاۋىم يگىلىگىن كورگەن تۇتىنۋ رايىن قالىپتاستىرىپ، تۇتىنۋدىڭ كومەسكى كۇشىن ونان ارى اشىپ، تۇتىنۋدىڭ قوزعاۋشى قۋاتىن قاۋلاتتى.
6 ـ ايدىڭ 15 ـ كۇنى 5 كۇندىك ”قۇربان ايتتى قۋانىشپەن قارسى الۋ . شاتتىققا بولەنگەن بۇگۇر . تۇتىنۋ جارمەڭكەسى“ قيمىلى بۇگۇر اۋدانىندا شىمىلدىعىن اشتى. مىڭ ادامدىق ٴماشىراپ، كلاسسيكالىق ٴبي، ٴان ـ كۇي، مۋزيكا سياقتى تارتىمدى ويىن نومىرلەرى ىركەس ـ تىركەس قويىلىپ، كوڭىلدى دە بەرەكەلى مەرەكەلىك لەپ قالىپتاستىردى. وسى رەتكى قيمىل قورا ـ جاي، اۆتوكولىك، ٴۇي ەلەكتر جابدىقتارى، ٴدامدى تاعامدار، بالالار ساۋىق ـ سايرانى، سارا ٴتۇرلى بۇيىمدار سىندى 6 ۇلكەن كورمە اۋماعىن ورنالاستىرىپ، ”ۇكىمەت قوسىمشا قاراجات بەرۋ + كاسىپورىننىڭ تيىمدىلىك جاساۋى“ سىندى ٴادىس ارقىلى بۇقارانىڭ ساپالىلانعان، كوپ نەگىزدەنگەن، قولايلىلاسقان تۇتىنۋ سۇرانىسىن قاناعاتتاندىردى.
بۇگۇر اۋداندىق پارتكوم ۇگىت ٴبولىمىنىڭ ورىنباسار باستىعى لي ليڭ بىلاي دەدى: قيمىل كەزىندە مەجەمەن ٴار ٴتۇرلى ۇكىمەتتىك قوسىمشا قاراجاتقا 2 ميلليون يۋان تاراتىلادى، كاسىپورىن سيلىق بۇيىمدار جانە 4 ميلليون يۋان قوسىمشا قاراجات تاراتادى.
دەمالىستىق تۇتىنۋ - ەكونوميكانىڭ ومىرشەڭدىگىن بارلايتىن ماڭىزدى تەرەزە. قۇربان ايت مەرەكەسى دەمالىسى كەزىندە شينجياڭنىڭ جەر ـ جەرىندە، ٴار ٴتۇرلى تۇتىنۋدا جاڭا بەينە، جاڭا كاسىپ كۇيى ىركەس ـ تىركەس كورىنىس بەرىپ، وتباسىلىق باس قوسۋ، توڭىرەكتىك ساياحات سياقتى سۇرانىستار شوعىرلى بەينەلەنىپ، كينو كورۋ، كورمە تاماشالاۋ، دالادا تاماقتانۋ، تۇزدە تۇنەۋ سياقتى تىنىعۋ تۇتىنۋلارى ۇزدىكسىز كوركەيدى.
6 ـ ايدىڭ 15 ـ كۇنى تۇستەن كەيىن 45 كۇندىك ”جايلاۋ · كوشپەلى مادەنيەت ساياحات فەستيۆالى“ ٴۇرىمجى قالاسى شۇيموگوۋ رايونى شۋيمو تيانشان مەملەكەتتىك تاۋعا شىعىپ دەنە شىنىقتىرۋ جاياۋلار جولىندا باستالدى. ساياحات فەستيۆالىندا ساياحاتشىلار بايگە، لاق تارتۋ، قىزقۋار سياقتىلاردى تاماشالاپ، جايلاۋ تۇرمىسىن ەلىتە سەزىنە الادى.
”قويۋ ۇلتتىق ادەت ـ عۇرىپقا يە باعدارلامالاردى كورىپ، جەرگىلىكتى ورىننىڭ ەرەكشە ٴدامدى تاعامدارىنان ٴدام تاتىپ، دوستارمەن بىرگە جاياۋ جۇرەمىز، تاعى كوبەلەكتەر بىرگە قالىقتاپ جۇرەدى، شىنىمەن دە بەكەر كەلمەگەن ەكەنبىز!“، ـ دەدى فۋجياندىق ساياحاتشى جاڭ يميڭ.
سەرىكتەسە ٴجۇرىپ، ”ات بايلاپ“، سۋرەتكە ٴتۇستى، پەشتى قورالاي شاي ٴىشىپ، ٴومىر سىرلارىن ٴبولىستى... 6 ـ ايدىڭ 17 ـ كۇنى ٴۇرىمجى اۋدانى بانفاڭگوۋ قالاشىعى دىڭساۋگوۋ قىستاعىنداعى شىيە ەرۋجايىندا قالادان كەلگەن ساياحاتشىلار ۇلى تابيعاتپەن جاقىن ارالاساتىن قۇتتى الاپتى تاپتى.
جاز ماۋسىمىنىڭ كەلۋىمەن، ٴۇرىمجىنىڭ تاياۋ ماڭىندا ٴوز كولىگىمەن ساياحاتتاپ، تۇزدە تۇنەۋ، ۇيشە كولىكپەن تۇزدە تۇنەۋ قاۋىرت ماۋسىمدى قارسى الدى، اتا ـ انالار بالالارىمەن تۇزدە تۇنەۋ، وتباسىنداعىلار بىرگە تۇزدە تۇنەۋ جانە جاستاردىڭ باس قوسۋىنا ۇيلەسەتىن قولايلى دا ٴساندى ۇلگىدە تۇزدە تۇنەۋ سياقتىلار قالادان كەلگەن ساياحاتشىلاردىڭ تىنىعىپ دەمالۋداعى قىزۋ تاڭداۋىنا اينالدى.
جازعى دەمالىس تاياپ قالدى، شينجياڭنىڭ جەر ـ جەرى ساياحاتتىڭ قاۋىرت ماۋسىمىن قارسى الدى.
6 ـ ايدىڭ 15 ـ كۇنى جەمسارى اۋدانى چۋانزىگەي قالاشىعى 1 ـ كەزەكتى ”چىشىنى ەمىن ـ ەركىن ارالاۋ“ بۇلدىرگەن تەرۋ ماۋسىمى قيمىلىن وتكىزدى. قۇربان ايت مەرەكەسى دەمالىسى كەزىندە جەمسارى اۋدانى چىشى بايىرعى جولىن ەندەي ٴوتۋ، اۋىل ـ قىستاق الاۋ سالتاناتى سياقتى كوپتەگەن مادەنيەت ـ ساياحات قيمىلدارىن وتكىزدى. سونىمەن بىرگە كەيبىر كورىنىس وڭىرلەرى ورتالاۋ مەكتەپ ٴبىتىرۋ ەمتيحانىنا قاتىناسقان، جوعارى مەكتەپ ەمتيحانىنا قاتىناسقان وقۋشىلارعا باعىتتاپ، ەسىك بەلەتىن ارزانداتۋ، كەشىرىم ەتۋ تيىمدىلىك ساياساتتارىن ۇسىنىپ، اناعۇرلىم كوپ ساياحاتشىنى باۋرادى.
