انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 6 ـ ايدىڭ 24 ـ كۇنى ۇرىمجىدەن حابارلايدى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ٴتوراعاسى ەركىن تۇنياز 6 ـ ايدىڭ 24 ـ كۇنى ۇرىمجىدە شينجياڭعا 8 ـ كەزەكتى جۇڭگو _ ازيا _ ەۆروپا كورمەسىنە قاتىناسۋعا كەلگەن بىرلەسكەن مەملەكەتتەر ۇيىمىنىڭ بۇرىنعى ورىنباسار باس حاتشىسى، ەۆروپا وداعى _ ازيا ورتالىعىنىڭ ٴتوراعاسى ەريك سولحەيممەن جانە ونىڭ ساپارلاستارىمەن كەزدەستى.
ما شيڭرۇي جۇڭگو كوممۋنيستىك پارتياسى شينجياڭ ۇيعۇر اۆتونوميالى رايوندىق كوميتەتى مەن اۆتونوميالى رايوندىق حالىق ۇكىمەتى اتىنان ەريك سولحەيمدى جانە ونىڭ ساپارلاستارىن قارسى الدى. ما شيڭرۇي بىلاي دەدى: ەۆروپا وداعى _ ازيا ورتالىعى ەۆروپا _ ازيا دوستىق اۋىس ـ كۇيىس، سەلبەستىگىن جەبەۋ تۇعىرىن ورناتۋعا ۇزاقتان بەرى كۇش سالىپ كەلدى، وسى رەت ٴتوراعا مىرزانىڭ ۇيىرمە باستاپ جۇڭگونىڭ شينجياڭىندا ساپاردا بولۋى ەۆروپا وداعىنىڭ جۇڭگو شينجياڭىمەن اۋىس ـ كۇيىستى، سەلبەستىكتى تەرەڭدەتۋىنە تىڭ قوزعاۋشى كۇش قوساتىندىعىنا سەنەمىن. جۇڭگونىڭ شينجياڭى ٴتوراعا شي جينپيڭنىڭ جانە جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرۋگە تاباندى بولىپ، دامۋ مەن حاۋىپسىزدىكتى، ەسىك اشۋ مەن ورنىقتىلىقتى ٴبىر تۇتاس جوسپارلاپ، نازاردى جوعارى ساپالى دامۋ ماڭداي الدى مىندەتىنە شوعىرلاندىرىپ، جىبەك جولى ەكونوميكالىق بەلدەۋى وزەكتى رايونى جانە شينجياڭ ەركىن ساۋدا سىناق رايونى قۇرىلىسىن جەدەلدەتىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن تىڭعىلىقتى ىلگەرىلەتتى. قازىر شينجياڭدا قوعام تىنىش، ىنتىماقتى، ەكونوميكا گۇلدەنىپ، دامىدى، ٴار ۇلت حالقى تىنىش ٴومىر، شات ـ شادىمان تىرشىلىك ەتىپ كەلەدى، شينجياڭ سالىستىرمالى توماعا ـ تۇيىق ىشكى قۇرلىقتان جۇڭگونىڭ سىرتقا ەسىك اشۋىنىڭ الدىڭعى شەبىنە اينالدى، ەۆروپا وداعىنا مۇشە ەلدەردىڭ جەرگىلىكتى ورىندارىمەن سەلبەستىك جاساۋ ٴورىسى كەڭ. ما شيڭرۇي شينجياڭنىڭ تازا ەنەرگيانى دامىتۋ، قۇمدى ٴشول ەكولوگياسىن وڭاۋ، ٴتۇيىندى وڭىرلەردىڭ اتموسفەرا ورتاسىن رەتتەۋ ـ وڭاۋ، جوعارى دارەجەلى وقۋ ـ اعارتۋ سياقتى سالالارداعى ناتيجەلەرى مەن بولاشاعىن تانىستىرىپ، جۇڭگو شينجياڭىنىڭ ەۆروپا وداعى _ ازيا ورتالىعىمەن اۋىس ـ كۇيىستى تەرەڭدەتىپ، ەۆروپا وداعىنا مۇشە ەلدەردىڭ جەرگىلىكتى ورىندارىمەن قاتىستى سالالارداعى ٴوزارا تيىمدىلىك جەتكىزۋ سەلبەستىگىن ۇزدىكسىز كۇشەيتۋدى قالايتىندىعىن ٴبىلدىردى. ول مىنالاردى ٴبىلدىردى: جۇڭگو _ ازيا _ ەۆروپا كورمەسى _ جۇڭگونىڭ ازيا _ ەۆروپا ەلدەرىمەن اۋىس ـ كۇيىس، سەلبەستىك ورىستەتۋدەگى، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋداعى ماڭىزدى تۇعىرى، ەكى جاقتىڭ وسى ورايدا اۋىس ـ كۇيىستى، ٴتۇيىلىسۋدى كۇشەيتىپ، كەلەسى قادامداعى ناقتى سەلبەستىكتى جوسپارلاپ ىلگەرىلەتۋىن ٴۇمىت ەتەمىن.
ەريك سولحەيم مىنالاردى ٴبىلدىردى: جۇڭگو شينجياڭى ەجەلدەن بەرى ازيا _ ەۆروپا قۇرلىعىنداعى ٴار سالا اۋىس ـ كۇيىسىنىڭ ماڭىزدى ارناسى بولىپ كەلەدى. وسى رەتكى ساپار ارقىلى شينجياڭنىڭ تازا ەنەرگيانى دامىتۋ، قۇمايتتانۋدى وڭاۋ جانە قورشاعان ورتانى قورعاۋ، ۇلتتار قاتىناسىن ٴبىر جاقتى ەتۋ سياقتى سالالاردا جۇرتتى جالت قاراتقان تابىستارعا قول جەتكىزگەندىگىن ۇعىستىق. باتىستاعى كەيبىر ەلدەردىڭ جۇڭگو شينجياڭىن جازعىرۋىنىڭ جانە جازالاۋىنىڭ فاكت نەگىزى جوق، ەۆروپا وداعى _ ازيا ورتالىعى ٴوز رولىن بەلسەنە ساۋلەلەندىرىپ، حالىقارالىق قوعامنىڭ جۇڭگو شينجياڭىنىڭ دامۋى مەن العا باسۋىن ٴتۇسىنۋىن جەبەپ، تاراپتاردىڭ شينجياڭمەن ٴوزارا ۇلگى الۋىن، اۋىس ـ كۇيىس جاساۋىن ىلگەرىلەتۋدى قالايدى. ەريك سولحەيم مىنالاردى ٴبىلدىردى: جۇڭگو الەمدىك جاسىل ەنەرگيا مەن تەحنيكانىڭ دامۋىنا باسشىلىق ەتۋشى، شينجياڭنىڭ جاسىل ەنەرگيانى دامىتۋى ەرەكشە باسىمدىققا يە. ەۆروپا وداعى _ ازيا ورتالىعى ”ەۆروپا _ ازيا ورتاق گۇلدەنۋ جولىن بىرگە اشۋدى“ ماقسات ەتىپ، جاسىل دامۋ سياقتى سالالاردى ارقاۋ ەتىپ، جۇڭگو شينجياڭىمەن اناعۇرلىم كوپ سەلبەستىك ورىستەتۋدى قالايدى. ۋاكىلدەر ۇيىرمەسىنىڭ ٴىشىنارا مۇشەلەرى جۇڭگو شينجياڭىنىڭ سيفرلى تەحنيكانى دامىتۋىنا قاتىستى ماسەلەلەر جونىندە پىكىر اۋىستىردى.
چىن ۋيجۇن، ۋاڭ جيانشين، قادەن كابەن، ەۆروپا وداعى _ ازيا ورتالىعىنىڭ قاتىستى مۇشەلەرى، اۆتونوميالى رايوننىڭ قاتىستى تاراۋلارى مەن ورىندارىنداعى جاۋاپتى جولداستار كەزدەسۋگە قاتىناستى.
