تيانشان تورى - شينجياڭ گازەتىنىڭ ءتىلشىسى باي سۋجۇن
6 ـ ايدىڭ 9 ـ كۇنى حان يۇيحۋا ٴبىر توپ قاريداردى اتتاندىرعاننان كەيىن، سەحقا قايتا ورالىپ، جۇمىسشىلارمەن بىرگە جۇمىسقا كىرىستى. ولار 3 كۇن ىشىندە ەرمەننەن 2000 جاستىق جاساپ، گۋاڭجوۋعا جونەلتۋگە ٴتيىس، قىستاقتاعى تىگىنشىلىك ونەرىنەن حابارى بار قىستاق تۇرعىندارى دا كومەككە كەلىپ، كەيبىرەۋى جاستىق قابىن پىشسە، ەندى بىرەۋلەرى جاستىقتى قاپتاپ قاربالاستاندى.
60 جاستاعى حان يۇيحۋا اراسان اۋدانى تاشيۋ اۋىلى زاگىنبۇلگى قىستاعىنىڭ تۇرعىنى، ول 6 جىل ۋاقىت ىشىندە كىشكەنتاي ەرمەننەن ۇلكەن كاسىپ سالاسىن اشتى. ”قازىر بۇكىل ەلدىڭ جەر ـ جەرىنەن تاپسىرىستار ۇزدىكسىز كەلىپ جاتىر، وسى بىرنەشە جىلداعى قۇلشىنىسىم تەككە كەتپەدى، مەن ٴتىپتى دە كوپ اۋىلداستارىمدى ەرمەن ەگىپ بايۋعا باستايمىن“، ـ دەدى ول تەبىرەنە.
حان يۇيحۋا شارۋاشىلىق قۇرعاننان بەرى، وندىرگەن، وڭدەگەن ەرمەن ونىمدەرى 52 تۇرگە جەتتى. سۋرەتتى تيانشان تورى - شينجياڭ گازەتىنىڭ ٴتىلشىسى باي سۋجۇن تۇسىرگەن
تىعىرىققا تىرەلۋ: ەرمەندى جەتىلدىرۋدە قيىنشىلىق كوپ بولدى، ورىپ العاننان كەيىن دە سۇرانىس بولمادى
ەرمەن تۋرالى ٴسوز بولعاندا، حان يۇيحۋانىڭ كوڭىلى جادىراپ سالا بەردى. ول كەز 2018 ـ جىلدىڭ كوكتەمى ەدى، اۋىل قىستاقتاعى تۇرعىنداردى حىنان ولكەسىنىڭ نانياڭ قالاسىنا باۋلۋعا بارۋعا ۇيىمداستىردى، جەرگىلىكتى ورىنداعى ەرمەن ەگىمشىلىك بازاسىن ەكسكۋرسيالاعاننان كەيىن، دارىلىك قۇنى جوعارى،سۋىقتى ايدايتىن، ومىرشەڭدىك قۋاتى ەرەكشە كۇشتى، ٴبىر ەكسەڭ نەشە رەت ٴونىم الۋعا بولاتىن وسى وسىمدىكتى ەگۋ ونىڭ جۇرەك قىلىن تەربەتتى. ول ىشتەي ەسەپ جاسادى: ٴبىر رەت ەگەسىڭ، جىلىنا 2 رەت وراسىڭ، باسقارۋ وڭاي، ەگىس ٴدارىسىن شاشۋدىڭ قاجەتى جوق، ٴسويتىپ، ٴبىر مۋ جەردەن 3000 - 4000 يۋان كىرىس كىرگىزۋگە بولادى.
قايتىپ كەلگەننەن كەيىن، حان يۇيحۋا دەرەۋ 100 مۋ جەردى كوتەرەگە الدى، ٴوز وتباسىنىڭ 30 مۋ جەرىنە دە تۇگەلدەي ەرمەن ەگەدى.
ويلاماعان جەردەن ٴبىر ايدان كەيىن، مايسانىڭ بارلىعى كوكتەمەي قالادى، حان يۇيحۋا اتىز باسىندا كوز جاسىن كولدەتە وتىرىپ، قىستاق پارتيا ياچەيكاسى شۋجيىنە تەلەفون شالادى، اۋىل شارۋاشىلىق ماماندارى جەتىپ كەلگەننەن كەيىن، وعان اسقاباق جانە جۇگەرى ەگۋدى، از بولسا دا زياننىڭ ورنىن تولتىرۋ ۇسىنىسىن بەرەدى. ”ەرمەندى ٴبىرىنشى رەت ەگۋىم، تاجىريبەم جوق، حىنان مەن شينجياڭنىڭ اۋا تەمپەراتۋراسىنىڭ پارقى بار، ونىڭ ۇستىنە تاسىمال بارىسىندا تۇمشالانىپ اكەلىنۋ سياقتى جاعدايلاردان مايسانىڭ بارلىعى كوكتەمەي قالدى“، ـ دەدى ول.
”قوسقان 200 مىڭ يۋاننان استام اقشام بارلىق جيعان ـ تەرگەنىم ەدى، ٴىشىم ۋداي اشىدى، ايتسەدە مويىنسال بولعىم كەلمەدى. حىناندىقتار ەرمەندى ۇلكەن كاسىپ سالاسىنا اينالدىرىپ وتىر، ٴبىزدىڭ شينجياڭنىڭ توپىراعى جانە اۋاسى سونشاما جاقسى، كۇن ساۋلەسىنىڭ ٴتۇسۋ ۋاقىتى دا ۇزاق، نە ٴۇشىن ونى ەگىپ كوكتەتە المايمىز“؟ حان يۇيحۋا ٴوز قاراجاتىمەن حىنانعا بارىپ تەحنيكا ۇيرەنىپ، قايتىپ كەلگەننەن كەيىن، ٴوز ٴۇيىنىڭ جەرىنە قايتادان ەرمەن ەكتى.
”كۇيەۋىم ماعان ەسىڭ اۋىسقان با دەدى، كىشى ۇلىم دا ەندىگارى ماعان ىلەسىپ ىستەگىسى كەلمەي، سىرتقا جۇمىس ىستەپ كەتتى“. حان يۇيحۋا بىلاي دەدى: سول جىلى ەكسكۋرسياعا، باۋلۋعا بىرگە بارعان، جەمسارىدا ەرمەن ەگەتىن كاسىپتەسىمە جىلاپ تەلەفون شالىپ مۇڭىمدى شاققان ەدىم، ول دا ماعان ىستەي الماعاندىعىن، ەندىگارى ىستەمەيتىندىگىن ايتتى، ەرمەن ٴوسىرۋ ۋيشين توبىنان شىعۋعا، ەندى قالعان قارتتىق ٴومىرىمدى امان ـ ەسەن وتكىزۋگە ٴناسيحاتتادى.
حان يۇيحۋا ٴلام دەمەدى. ول ٴار كۇنى تاماق ىشۋدەن، ۇيىقتاۋدان سىرتقى بارلىق ۋاقىتىن جالعىز ٴوزى اتىز باسىندا ەرمەن وسىرۋگە جۇمسادى.
باعىنا جاراي، سول جىلى ەرمەن كوكتەدى.
”ەرەكشە تەبىرەندىم، تۇرمىسىمدا ٴۇمىت ۇشقىنى لاۋلاعانداي بولدى“. حان يۇيحۋا بىلاي دەدى: كۇزدە جاقسى وسكەن ەرمەنگە ساتىمەن وراق سالدىق.
الايدا ساتىپ الاتىن ادام بولمادى. ول امالسىزدان باۋلانعان ەرمەندى اۋلاسىنا ٴۇيىپ قويىپ، ساۋدا ورايىن كۇتتى.
6 ـ ايدىڭ 9 ـ كۇنى حان يۇيحۋا مەن ۇلى جاۋ يۇڭچيڭ ەرمەن جاستىقتى قوراپقا سالىپ قوراپتاۋدا. سۋرەتتى تيانشان تورى - شينجياڭ گازەتىنىڭ ٴتىلشىسى باي سۋجۇن تۇسىرگەن
قىس ٴوتىپ، كوكتەم قايتا ورالدى، ەرمەنگە سۇراۋ سالعان ادام بولمادى. حان يۇيحۋا تاعى ٴبىر رەت شىتىرمان كۇيگە ٴتۇستى.
”قاتتى كۇيزەلدىم، ۇيدەگىلدەردىڭ جۇباتۋىنا ٴزارۋ بولدىم، ٴبىراق كۇيەۋىم مەنى تىم جەڭىلتەكتىك ىستەدىڭ دەدى، كەلىنىم دە اۋرە ـ سارساڭعا سالىنباي ـ اق قوياسىز با دەپ ٴناسيحاتتادى“. حان يۇيحۋا بىلاي دەدى: سول كەزدە قاتتى ازاپتاندىم، تەك ۇلكەن ۇلىم عانا مەنى ٴۇنسىز قولدادى.
بۇرىلىس: ەرمەندى سەزىنۋ ورنى اشىلىپ، تاپسىرىستار ۇزدىكسىز كوبەيدى
باز كەشۋ كەرەك پە، الدە جالعاستىرۋ كەرەك پە؟ قايتا ـ قايتا وي ەلەگىنەن وتكىزگەننەن كەيىن، حان يۇيحۋا ەشكىمگە ٴتىس جارماستان ٴبىر تۋىسىنان 150 مىڭ يۋان قارىز الىپ، ٴبىر سەرىكتەستىكتى ىزدەپ تاۋىپ، ەرمەنمەن ىستاۋ فيزيكالىق ەمدەۋ ورنىن سەلبەسىپ اشتى.
”الدىمەن باسىلىپ قالعان ەرمەندى ىستەتىپ، كوپشىلىككە ەرمەننىڭ رولىن سەزىنۋىنە وراي جاراتۋدى ويلادىم“، ـ دەدى حان يۇيحۋا.
كۇندىز حان يۇيحۋا مەن ۇلكەن ۇلى اتىزدا ەڭبەك ىستەدى. كەشتە ەكەۋى ينتەرنەتتە تىكە تاراتىپ زات ساتۋدى جانە ەرمەنمەن ىستاۋ بىلىمدەرىن ۇيرەندى. ونىڭ ەرمەنمەن ىستاۋ فيزيكالىق ەمدەۋ ورنىنىڭ ساۋداسى كۇسەت بولا باستادى. 2021 ـ جىلى ول اۋلاداعى 6 مۋ جەرگە دە ەرمەن ەگىپ، قىستاق پارتيا ياچەيكاسىنىڭ شۋجيىن ىزدەپ بارىپ، قىستاق تۇرعىندارىن ەرمەن كاسىبىمەن شۇعىلدانۋعا جۇمىلدىردى.
”ۇيىڭدە 3 جىلدىق ەرمەن ساقتاساڭ، ەمشىنىڭ قاجەتى جوق. ينتەرنەت جەلىسىندە چيچۇن ەرمەنمەن ىستاپ ەمدەۋ ٴادىسىنىڭ ەرمەن ارقىلى جۇرىلەتىن ٴبىر ٴتۇرلى ەرەكشە ەمدەۋ ٴادىسى رەتىندە، مەملەكەت دارەجەلى بەيزاتتىق مادەنيەت مۇرالار ۋاكىلدىك تىزىمدىگىنە ەنگىزىلگەندىگىن كورىپ، مەن ەرمەننىڭ دارىلىك قۇنىن ساۋدا ـ ساتتىقپەن ۇشتاستىرۋدى، سونىمەن بىرگە قىستاق تۇرعىندارىن ەرمەن ورۋعا جانە وڭدەۋگە ات سالىسۋعا جۇمىلدىرىپ، ٴتىپتى دە كوپ ادامدى يگىلىككە كەنەلدىرۋدى ويلادىم“. حان يۇيحۋا بىلاي دەدى: قىستاق ”ەكى كوميتەتىنىڭ“ كومەگىندە كەيبىر قىستاق تۇرعىندارى ماعان ىلەسىپ ەرمەن ەكتى، كەيبىرەۋلەرى ەرمەنمەن ىستاۋ فيزيكالىق ەمدەۋ ورنىنا كەلىپ جۇمىس ىستەدى، كوپشىلىك بارعان سايىن ەرمەننىڭ رولىن مويىنداي باستادى.
2022 ـ جىلى حان يۇيحۋا ەرمەن ونىمدەرىن وڭدەۋ وندىرىسىنە كىرىسە باستادى، بىلتىر ول تاعى بۇراتالا قالاسىندا ەرمەن ونىمدەرىن سەزىنۋ ورنىن اشتى. حىناننىڭ 3 كاسىپورنى حان يۇيحۋامەن سەلبەستىك ورناتىپ، ەرمەندى جانە وڭدەلگەن ەرمەن ونىمدەرىن مولىنان ساتىپ الا باستادى.
”وسى جىلدارى ٴبىز سان رەت جەڭىلىسكە ۇشىرادىق، ٴوزىم دە ىستەمەي ـ اق قويايىن دەپ ويلادىم، ٴبىراق شەشەمنىڭ جاپادان ـ جالعىز جاپا تارتقانىنا ٴداتىم شىدامادى، سونىمەن وعان سەرىك بولدىم. قازىر مىنە بولاشاعىمىز نۇرلى بولا ٴتۇستى“. حان يۇيحۋانىڭ ۇلكەن ۇلى جاۋ يۇڭچيڭ بىلاي دەدى: ناقتى دۇكەن اشىلعاننان كەيىن، تاپسىرىستار دا ۇزدىكسىز كوبەيە ٴتۇستى.
داعدارىستان قۇتىلدى: ەگۋدەن وڭدەۋگە دەيىن ەرمەن كاسىپ سالاسى تىزبەگىن قالىپتاستىردى
بيىل قىستاق ”ەكى كوميتەتىنىڭ“ كومەگىندە حان يۇيحۋا سەلبەستىك كووپەراتيۆىن قۇردى، اۋداندا تاعى 360 شارشى مەترلىك وڭدەۋ زاۆودىن قۇرىپ، ەرمەن ەگۋدەن ٴونىم وڭدەۋگە دەيىنگى بارىستى ىسكە اسىردى.
حان يۇيحۋانىڭ ەرمەن ەگىمشىلىك بازاسىندا ٴتىلشى قاتار ـ قاتار قاۋلاپ وسكەن ەرمەننىڭ جەلمەن تەربەلىپ تۇرعانىن، وراق سالىنعانىن، بايلانىپ باۋلانعانىن، تۇرگە بولىنگەنىن كوردى... جاڭادان ورىلعان ەرمەن باۋلانىپ، توڭىرەكتەگى اۋدان ـ قالالارعا ساتىلدى، ٴبىر ٴبولىمى بازاعا جەتكىزىلىپ كۇنگە كەپتىرىلىپ وڭدەلۋ الدىندا تۇر. وڭدەۋ زاۆودىندا جۇمىسشىلار مەن كومەككە كەلگەن قىستاق تۇرعىندارى قاربالاس جۇمىستا، ەرمەن تاياقشالارى، قالتالار، ۇلتاراق، جاستىق سياقتى ەرمەن ونىمدەرى رەتىمەن قوراپتالىپ، تاپسىرىس بويىنشا بۇكىل ەلدىڭ جەر ـ جەرىنە جونەلتىلدى.
اراسان اۋدانى تاشيۋ اۋىلى زاكىنبۇلاق قىستاعى پارتيا ياچەيكاسىنىڭ شۋجيى ۋاڭ جينفىڭ بىلاي دەدى: ەرمەن كاسىپ سالاسىن دامىتۋ، زورايتۋ ٴۇشىن، قىستاق اۋىلداعى باسقا 2 قىستاقپەن كەلىسىم جاساسىپ، شارۋا + سەلبەستىك كوپەراتيۆى + كاسىپورىن ۇلگىسىن قولدانىپ، قىستاق تۇرعىندارىن 2000 مۋ جەرگە ەرمەن ەگۋگە جەتەكتەدى، ”كاسىپورىن ەگىمشىلىك تەحنيكاسىن جانە ماشينا ازىرلەپ، ەرمەن شيكىزاتىن ساتىپ الادى، شارۋالار اتىز باسقارۋعا جاۋاپتى بولدى. وسىنداي بولعاندا، قىستاق تۇرعىندارىنىڭ سەلبەستىك كووپەراتيۆىنە بارىپ جۇمىس ىستەۋىنە، جارنا قوسىپ پايدا ٴبولىسىن الۋىنا، نەمەسە وڭدەۋ زاۆودىنا بارىپ ىستەۋىنە بولادى، ٴسويتىپ، ٴتىپتى دە كوپ ادامدى جۇمىستانۋعا جەتەكتەۋگە بولادى“.
حان يۇيحۋانىڭ كۇيەۋى جاۋ پيڭيۋان تانىستىرىپ بىلاي دەدى: قازىر ٴبىز حىناننان كەلگەن كوپتەگەن سەرىكتەستىكپەن سەلبەستىك ورناتتىق، وڭدەلىپ وندىرىلگەن ەرمەن ٴونىمى 52 تۇرگە جەتىپ، ەگۋ، وڭدەۋ، ساتۋ ٴبىر تۇلعالانعان كاسىپ سالاسى تىزبەگىن قالىپتاستىردىق. سونىمەن بىرگە ينتەرنەت جەلىسىندە جانە ينتەرنەت جەلىسىنەن تىس ەرمەنمەن كۇتىنۋ سارايىن، ەرمەن ەرەكشە مادەنيەت سارايىن، ت. ب اشىپ، تينامداي ەرمەندى ۇلكەن كاسىپ سالاسىنا اينالدىرىپ، ٴتىپتى دە كوپ اۋىلداستاردى كىرىستەرىن ارتتىرۋعا، بايۋعا باستادىق.
