ورتالىق اسكەري ىستەر كوميتەتى داڭق اتاعىن بەرۋ سالتىن وتكىزدى
شي جينپيڭ داڭق اتاعىنا يە بولعان ورىنعا سيلىق تۋىن بەردى
7 - ايدىڭ 9 - كۇنى ورتالىق اسكەري ىستەر كوميتەتى بەيجيڭدە داڭق اتاعىن بەرۋ سالتىن سالتاناتپەن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ”ۇلگىلى راكەتا، زەڭبىرەكشىلەر ليانى“ داڭق اتاعىنا يە بولعان قۇرلىق ارمياسى بەلگىلى لۇيى 1 - يىڭى 2 - ليانىنا سيلىق تۋىن بەردى ءارى وسى لياننىڭ وفيتسەر - اسكەرلەر ۋاكىلدەرىمەن بىرگە ەستەلىك سۋرەتكە ءتۇستى.
□ سۋرەتتى شينحۋا اگەنتتىگىنىڭ ءتىلشىسى لي گاڭ تۇسىرگەن
شينحۋا اگەنتتىگىنىڭ 7 ـ ايدىڭ 9 ـ كۇنى بەيجيڭنەن بەرگەن حابارى (ٴتىلشى مەي چاڭۋي). جۇڭگو حالىق ازاتتىق ارمياسى قۇرىلعاندىعىنىڭ 97 جىلدىعى قارساڭىندا، ورتالىق اسكەري ىستەر كوميتەتى 7 ـ ايدىڭ 9 ـ كۇنى بەيجيڭدە داڭق اتاعىن بەرۋ سالتىن سالتاناتپەن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ داڭق اتاعىنا يە بولعان ورىنعا سيلىق تۋىن بەردى.
1 ـ تامىز عيماراتىنداعى سالت وتكىزىلگەن ورىندا اسكەري بولىمدەگى وفيتسەر ـ اسكەرلەردىڭ جانە اكىمشىلىك قىزمەتكەرلەردىڭ ۋاكىلدەرى قاتارعا رەتتى تۇردى، ورتا ايبىندى دا دۋماندى بولدى. تۇستەن كەيىن ساعات 3تەن 30 مينۋت شاماسىندا 18 قۇرمەت قاراۋىلى نىق قاداممەن زالعا كىرىپ، ەكى جاقتا مىلتىقتارىن سەرت ۇستاپ تۇردى، اتاق بەرۋ سالتى باستالىپ، بۇكىل زالداعىلار جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق اسكەري ىستەر كوميتەتىنىڭ ورىنباسار ٴتوراعاسى جاڭ يوۋشيا شي جينپيڭ قول قويعان ورتالىق اسكەري ىستەر كوميتەتىنىڭ داڭق اتاعىن بەرۋ بۇيرىعىن وقىدى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق اسكەري ىستەر كوميتەتىنىڭ ورىنباسار ٴتوراعاسى حى ۋيدۇڭ سالتتى باسقاردى.
«حالىق ارمياسى پارتياعا ادال» اتتى اسقاق مۋزيكا ٴۇنى ىشىندە شي جينپيڭ ”ۇلگىلى راكەتا، زەڭبىرەكشىلەر ليانى“ داڭق اتاعىنا يە بولعان قۇرلىق ارمياسى بەلگىلى لۇيى 1 ـ يىڭى 2 ـ ليانىنا سيلىق تۋىن بەردى. ليان ـ دۇيدەگى وفيتسەر _ اسكەرلەردىڭ ۋاكىلدەرى شي جينپيڭگە قۇرمەت ٴبىلدىرىپ، سيلىق تۋىن سالتاناتپەن تاپسىرىپ الدى. شي جينپيڭ ولارعا شىن ىقىلاسپەن قۇرمەت ٴبىلدىرىپ، قۇتتىقتادى ٴارى بىرگە ەستەلىك سۋرەتكە ٴتۇستى. بۇكىل زالدان دۋ قول شاپالاق ٴۇنى كوتەرىلدى.
اتاق بەرۋ سالتى اسقاق جۇڭگو حالىق ازاتتىق ارمياسىنىڭ ارميا انىمەن اياقتادى.
ورتالىق اسكەري ىستەر كوميتەتىنىڭ مۇشەلەرى ليۋ جىنلي، مياۋ حۋا، جاڭ شىڭمين، اسكەري ىستەر كوميتەتى ورگانىنىڭ ٴارقايسى تاراۋلارىنداعى، ارميانىڭ بەيجيڭدەگى قاتىستى ورىندارىنداعى نەگىزگى جاۋاپتى جولداستار، اسكەري ىستەر كوميتەتى داڭق اتاق بەرگەن ورىنداردىڭ ۋاكىلدەرى قاتارلىلار اتاق بەرۋ سالتىنا قاتىناستى.
