
7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن بانگلادەش زۇڭليى حاسينامەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن
شينحۋا اگەنتتىگىنىڭ 7 ـ ايدىڭ 10 ـ كۇنى بەيجيڭنەن بەرگەن حابارى (ٴتىلشى جىڭ ميڭدا). 7 ـ ايدىڭ 10 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن بانگلادەش زۇڭليى حاسينامەن كەزدەستى. ەكى ەلدىڭ باسشىلارى جۇڭگو _ بانگلادەش قارىم ـ قاتىناسىن جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناس دەڭگەيىنە كوتەرۋدى جاريالادى.
شي جينپيڭ بىلاي دەپ اتاپ كورسەتتى: جۇڭگو مەن بانگلادەش ٴوزارا تۇسىنىسەتىن، ٴوزارا ارالاساتىن تاتۋ جاقىن كورشىلەر، ەكى ەلدىڭ دوستىق بارىس ـ كەلىسى مىڭ جىلدان بەرى جالعاسىپ كەلەدى. ديپلوماتيالىق قارىم ـ قاتىناس ورناتقاننان بەرى ەكى ەل باستان ـ اياق ٴوزارا قۇرمەت ەتىپ، ٴوزارا قولداۋ كورسەتىپ، تەڭ تۇرعىدا مامىلە جاساپ، سەلبەسىپ تەڭ يگىلىككە كەنەلىپ، مەملەكەت پەن مەملەكەت اراسىنداعى، اسىرەسە، ”الەمنىڭ وڭتۇستىگىندەگى“ ەلدەر اراسىنداعى دوستىق بارىس ـ كەلىستىڭ، ٴوزارا تيىمدىلىك جەتكىزىپ سەلبەسۋدىڭ تيپتىك ۇلگىسىن ورناتتى. جۇڭگو جاق جۇڭگو مەن بانگلادەش ەكى ەلدىڭ اعا بۋىن باسشىلارى ىرگە قالاعان تەرەڭ دوستىقتى قاستەرلەيدى، كەلەر جىلى ديپلوماتيالىق قارىم ـ قاتىناس ورناتقاندىقتىڭ 50 جىلدىعىن وراي ەتىپ، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋدى تەرەڭدەتىپ، ٴار سالاداعى سەلبەستىكتىڭ تەرەڭدىگىن جانە كەڭدىگىن كەڭەيتىپ، جۇڭگو ـ بانگلادەش جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ ورنىقتى قاداممەن الىستارعا جەتۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: ەكى جاق ٴوزارا قولداۋ كورسەتەتىن تاڭداۋلى ٴداستۇردى اسقاقتاتىپ، ساياسي ٴوزارا سەنىمدىلىكتى تەرەڭدەتۋى كەرەك. جۇڭگو جاق بانگلادەش جاقتىڭ دەربەس، ٴوز ـ وزىنە قوجايىن بولاتىن ديپلوماتيا ساياساتىن اتقارۋعا تاباندى بولىپ، ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرىپ، مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن قولدايدى، سىرتتىڭ ٴارقانداي كيلىگۋىنە قارسى تۇرادى. جۇڭگو جاق بانگلادەش جاقپەن بىرگە پارتيانى باسقارۋ، مەملەكەتتى باسقارۋ تاجىريبەلەرى جانە دامۋ سالاسىنداعى ساياساتتار جونىندە اۋىس ـ كۇيىس جاساپ، دامۋ ستراتەگيالارىن ٴتۇيىلىستىرۋدى كۇشەيتىپ، ەكونوميكا ـ ساۋدا، قارجى قوسۋ، ۇلاستىرۋ، تۇتاستىرۋ سياقتى سالالارداعى سەلبەستىكتى تەرەڭدەتىپ، اناعۇرلىم كوپ جۇڭگو كاسىپورىندارىنىڭ بانگلادەش جاقپەن بىرگە كاسىپ سالاسىنا قارجى قوسۋ سەلبەستىگىن كۇشەيتۋىنە قولداۋ كورسەتىپ، ەكى ەلدىڭ كاسىپ سالاسى تىزبەگىنىڭ، قامداۋ تىزبەگىنىڭ توعىسا دامۋىن ىلگەرىلەتىپ، بانگلادەشتىڭ مەملەكەتتى دامىتۋىن جۇزەگە اسىرۋىنا دەم بەرۋدى قالايدى. ەكى جاق كەلەر جىلى ”جۇڭگو ـ بانگلادەش گۋمانيتارلىق اۋىس ـ كۇيىس جىلىن“ ويداعىداي وتكىزىپ، ەكى ەلدىڭ مادەنيەت، ساياحات، مەديا، دەنە تاربيە سياقتى سالالارداعى اۋىس ـ كۇيىسىن، سەلبەستىگىن جەبەۋى كەرەك. جۇڭگو جاق بانگلادەش جاقپەن بىرگە حالىقارالىق جانە وڭىرلىك ىستەردە ىستەستىكتى جيىلەتىپ، بىرلەسكەن مەملەكەتتەر ۇيىمى سياقتى كوپ جاقتى جۇلگەدە سايكەسۋدى جانە سەلبەسۋدى كۇشەيتىپ، بۇكىل ادامزاتتىڭ ورتاق قۇندىلىعىن اسقاقتاتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
حاسينا مىنالاردى ٴبىلدىردى: بانگلادەش جاق جۇڭگومەن تەرەڭ دوستىق ورناتقاندىعىن ەرەكشە داڭق سانايدى، جۇڭگونىڭ ٴتوراعا شي جينپيڭنىڭ كەمەڭگەر باسشىلىعىندا ٴتۇرلى قيىنشىلىقتاردى، سىن ـ سايىستاردى جەڭىپ، كۇن سايىن جاڭارىپ، اي سايىن تۇلەجىگەن ۇلى تابىستارعا قول جەتكىزگەندىگىنە، حالىقتىڭ تۇرمىس دەڭگەيىن ۇزدىكسىز جوعارىلاتقاندىعىنا ەرەكشە سۇيىنەدى. بانگلادەش ۇلت ازاتتىعى جانە كەدەيلىكتى ازايتۋ، دامۋ ىستەرىن ىلگەرىلەتۋگە تاباندىلىقپەن كۇش سالىپ كەلەدى، جۇڭگو جاقتىڭ وسى بارىستا بانگلادەش جاققا قىمباتتى قولداۋ كورسەتكەندىگىنە العىس ايتادى. بانگلادەش جاق جۇڭگونىڭ تابىستى دامۋ تاجىريبەلەرىن ۇيرەنىپ جانە ودان ۇلگى الىپ، ەكى ەلدىڭ ەكونوميكا ـ ساۋدا، نەگىزدىك قۇرىلعى، كەدەيلىكتى ازايتۋ سياقتى سالالارداعى سەلبەستىكتى كەڭەيتىپ، جاستار، مادەنيەت سياقتى گۋمانيتارلىق ىستەر جونىندەگى اۋىس ـ كۇيىستى كۇشەيتۋىن ٴۇمىت ەتەدى. ”ٴبىر بەلدەۋ، ٴبىر جولدى“ بىرگە قۇرۋ باستاماسى وسى ٴوڭىردىڭ ەكونوميكالىق دامۋىن جانە حالىق تۇرمىسىنىڭ جاقسارۋىن بارىنشا جەبەدى، بانگلادەش جاق ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىنە ۇزدىكسىز بەلسەنە ات سالىسادى. جۇڭگو جاقتىڭ بانگلادەشتىڭ وڭتۇستىگىن ٴبىر تۇلعالاندىرا اشۋ جوسپارىنا بەلسەنە ات سالىسىپ، بانگلادەشتىڭ ”2041 بولاشاقتىق جوباسىن“ جۇزەگە اسىرۋىنا دەم بەرۋىن قارسى الادى. بانگلادەش جاق ٴبىر جۇڭگو پرينسيبىنە تاباندىلىقپەن باتىل بويسۇنادى، جۇڭگو جاقتىڭ تايۋان ماسەلەسىندەگى تۇرعىسىن قولدايدى، سىرتقى كۇشتەردىڭ جۇڭگونىڭ ىشكى ىسىنە كيلىگۋىنە باتىل قارسى تۇرادى، جۇڭگو جاقتىڭ ٴوزىنىڭ وزەكتى مۇددەسىن قورعاۋىن باتىل قولدايدى. بانگلادەش ـ جۇڭگو جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ، ٴسوز جوق، اناعۇرلىم زور دامۋعا قول جەتكىزەتىندىگىنە سەنەمىن.
ۋاڭ ي كەزدەسۋگە قاتىناستى.