تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ ۆانۋاتۋ زۇڭليى سالۋايمەن كەزدەستى

  

7 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن ۆانۋاتۋ زۇڭليى سالۋايمەن كەزدەستى.

□سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  شينحۋا اگەنتتىگىنىڭ 7 ـ ايدىڭ 12 ـ كۇنى بەيجيڭنەن بەرگەن حابارى (ٴتىلشى جىڭ ميڭدا). 7 ـ ايدىڭ 12 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن ۆانۋاتۋ زۇڭليى سالۋايمەن كەزدەستى.

  شي جينپيڭ سالۋايدىڭ ۇزاق ۋاقىتتان بەرى جۇڭگو _ ۆانۋاتۋ قارىم ـ قاتىناسىنىڭ دامۋىن ىلگەرىلەتۋدە ماڭىزدى رول اتقارعاندىعىن القادى. شي جينپيڭ بىلاي دەپ اتاپ كورسەتتى: ۆانۋاتۋ جۇڭگونىڭ تىنىق مۇحيتتاعى ارال ەلدەرى وڭىرىندەگى جاقسى دوسى، جاقسى سەرىگى. جۇڭگو مەن ۆانۋاتۋ ديپلوماتيالىق قارىم ـ قاتىناس ورناتقان 42 جىلدان بەرى ەكى ەلدىڭ دوستىعى ۋاقىت وتكەن سايىن بەكەمدەلىپ، ٴبىر ـ ٴبىرىنىڭ وزەكتى مۇددەسىنە ساياتىن ماسەلەلەردە باستان ـ اياق ٴبىرىن ـ ٴبىرى تاباندىلىقپەن قولدادى. جۇڭگو جاق جۇڭگو _ ۆانۋاتۋ قارىم ـ قاتىناسىنىڭ دامۋىنا ايرىقشا ٴمان بەرەدى، ۆانۋاتۋ جاقپەن جوعارى دەڭگەيدەگى ساياسي ٴوزارا سەنىمدىلىكتى ۇزدىكسىز تەرەڭدەتىپ، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرىپ، بارلىق جاعدايدا بىردەي، جان ـ جاقتى دوستىق سەلبەستىكتى تەرەڭدەتىپ، جاڭا داۋىردەگى جۇڭگو _ ۆانۋاتۋ تاعدىرلاس ورتاق تۇلعاسىن قول ۇستاسا قۇرۋدى قالايدى. جۇڭگو جاق ۆانۋاتۋ جاقپەن ەل باسقارۋ تاجىريبەلەرىن اۋىستىرىپ، جۇڭگو ۇلگىسىندەگى وسىزامانداندىرۋ دامۋ ورايىنان بىرگە يگىلىكتەنىپ، دامۋ ستراتەگيالارىن ٴتۇيىلىستىرۋدى كۇشەيتىپ، نەگىزدىك قۇرىلعى، ەكونوميكا ـ ساۋدا، قارجى قوسۋ، كليمات وزگەرىسىنە توتەپ بەرۋ سياقتى سالالارداعى ناقتى ىستەر سەلبەستىگىن تەرەڭدەتۋدى، جۇڭگو كاسىپورىندارىن ۆانۋاتۋعا بارىپ قارجى قوسۋعا، سەلبەستىك جاساۋعا ىنتالاندىرۋدى قالايدى. جۇڭگو جاق ۆانۋاتۋعا ۇزدىكسىز ەشقانداي ساياسي شارت ۇستەمەيتىن ەكونوميكالىق، تەحنيكالىق كومەك كورسەتىپ، ۆانۋاتۋدىڭ دامۋ، گۇلدەنۋ جولىمەن ويداعىداي جۇرۋىنە دەم بەرۋدى قالايدى.

  شي جينپيڭ بىلاي دەپ باسا دارىپتەدى: جۇڭگو ٴىرى، شاعىن ەلدەردىڭ ٴبارىنىڭ تەرەزەسى تەڭ دەگەنگە تاباندى بولادى، ادىلەت پەن مۇددەنى قاتار ۇستانۋعا، ادىلەتتىلىكتى باستى ورىنعا قويۋعا تاباندى بولادى، ٴىرى ەلدەرمەن باسەكەلەسۋدى قاراستىرمايدى، وڭىرلىك ىقپال كولەمىن كوزدەمەيدى، باسقا ەلدىڭ ىشكى ىسىنە كيلىكپەيدى، باسقا ەلدەردى ٴبىر تاراپتى تاڭداپ سول جاقتا تۇرۋعا زورلامايدى، باستان ـ اياق تاريحتىڭ دۇرىس جاعىندا، ادىلدىك، تۋراشىلدىق جاعىندا تۇرادى. جۇڭگو تىنىق مۇحيتتاعى ارال ەلدەرى ٴوڭىرىنىڭ بەيبىت قاتار تۇرۋىن، بىرگە دامۋىن ىلگەرىلەتۋشى جانە وعان ۇلەس قوسۋشى. جۇڭگونىڭ بىرلەسكەن مەملەكەتتەر ۇيىمىنداعى ٴبىر بەلەتى ماڭگى وركەندەپ كەلە جاتقان ەلدەرگە ٴتان. جۇڭگو جاق تىنىق مۇحيتتاعى ارال ەلدەرىمەن قارىم ـ قاتىناسقا ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ تۇرعىسىنان مامىلە جاسايدى جانە ٴمان بەرەدى، ارال ەلدەرىنىڭ ەكونوميكالىق، قوعامدىق دامۋىنا جانە حالىق تۇرمىسىن جاقسارتۋىنا قولىنان كەلگەنىنشە ۇزدىكسىز كومەكتەسىپ، ارال ەلدەرىنىڭ دەربەس، باياندى دامۋ نىساناسىن جەدەل جۇزەگە اسىرۋىن قولداۋدى قالايدى.

  سالۋاي مىنالاردى ٴبىلدىردى: ۆانۋاتۋ مەن جۇڭگو ديپلوماتيالىق قارىم ـ قاتىناس ورناتقان 42 جىلدان بەرى ەكى ەل قاتىناسى تاماشا، سەرپىندى دامىدى. ٴتوراعا شي جينپيڭنىڭ كەرەمەت باسشىلىعىندا، جۇڭگونىڭ دامۋى ۇلى تابىستارعا قول جەتكىزىپ، مەملەكەت ىنتىماقتى، ورنىقتىلىقتى ساقتاپ، جۇڭگو ۇلگىسىندەگى وسىزامانداندىرۋ ارقىلى ۇلتتىڭ گۇلدەنۋ ۇلى ٴىسىن ىلگەرىلەتۋدە. بۇعان ۆانۋاتۋ جاق ايرىقشا سۇيىنەدى. ٴتوراعا شي جينپيڭ العا قويعان 3 ۇلكەن الەمدىك باستاما مەن ادامزاتتىڭ تاعدىرلاس ورتاق تۇلعاسىن قۇرۋ ۇستانىمى حالىقارالىق ادىلدىك پەن ادىلەتتىلىكتى قورعاۋدا، بىرگە دامۋدى جەبەۋدە كەلەلى ماڭىز الادى. جۇڭگو بەيبىت قاتار تۇرۋدىڭ بەس پرينسيبىن امالياتتا ايگىلەپ، ۆانۋاتۋ سياقتى شاعىن ەلگە بىردەي مامىلە جاساپ، تەڭدىك پەن قۇرمەتتى تولىق بەينەلەدى. ۆانۋاتۋ ۇكىمەتى ٴبىر جۇڭگو پرينسيبىن باتىل اتقارادى، تايۋان جۇڭگو تەرريتورياسىنىڭ ايرىلماس ٴبىر بولىگى دەپ قارايدى، جۇڭگو ۇكىمەتىنىڭ مەملەكەتتىڭ تۇتاستىعىن جۇزەگە اسىرۋ ٴۇشىن جاساعان بارلىق قۇلشىنىستارىن باتىل قولدايدى، ٴارقانداي فورماداعى ”تايۋاندى دەربەستەندىرۋگە“ باتىل قارسى تۇرادى، جۇڭگو جاقتىڭ شينجياڭعا ساياتىن، شياڭگاڭعا ساياتىن، شيزاڭعا ساياتىن، ادامدىق ۇقىق، نانحاي تەڭىزى سياقتى ماسەلەلەردەگى تۇرعىسىن باتىل قولدايدى. ۆانۋاتۋ جاق جۇڭگو جاقتىڭ ەل باسقارۋ تاجىريبەلەرىنەن ۇيرەنىپ، ۇلگى الىپ، جۇڭگو جاقپەن دامۋ ستراتەگياسىن ٴتۇيىلىستىرۋدى كۇشەيتىپ، نەگىزدىك قۇرىلعى، ەكونوميكا ـ ساۋدا سياقتى سالالارداعى ناقتى سەلبەستىكتى ىلگەرىلەتۋدى قالايدى. ۆانۋاتۋ جاق جۇڭگو جاقپەن حالىقارالىق كوپ جاقتى ىستەستىكتى نىعايتىپ، ۆانۋاتۋ مەن جۇڭگونىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

  ەكى جاق «جۇڭحۋا حالىق رەسپۋبليكاسى مەن ۆانۋاتۋ رەسپۋبليكاسىنىڭ بىرلەسكەن مالىمدەمەسىن» جاريالاپ، ەكى ەلدىڭ جالپى بەتتىك ستراتەگيالىق سەرىكتەستىك قارىم ـ قاتىناسىنىڭ ساپاسىن جوعارىلاتىپ، دەڭگەيىن كوتەرىپ، جاڭا داۋىردەگى جۇڭگو _ ۆانۋاتۋ تاعدىرلاس ورتاق تۇلعاسىن قۇرۋدى ٴبىر اۋىزدان قۇپتادى.

  ۋاڭ ي كەزدەسۋگە قاتىناستى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.