«ىزدەنۋ» جۋرنالى باس شۋجي شي جينپيڭنىڭ ماڭىزدى ماقالاسىن جاريالايدى
وزىمىزگە سەنۋگە، ٴوز كۇشىمىزگە سۇيەنۋگە، ٴسوز جوق، تاباندى بولۋىمىز كەرەك
شينحۋا اگەنتتىگىنىڭ 7 ـ ايدىڭ 15 ـ كۇنى بەيجيڭنەن بەرگەن حابارى. 7 ـ ايدىڭ 16 ـ كۇنى باسپادان شىعاتىن «ىزدەنۋ» جۋرنالىنىڭ 14 ـ سانى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭنىڭ «وزىمىزگە سەنۋگە، ٴوز كۇشىمىزگە سۇيەنۋگە، ٴسوز جوق، تاباندى بولۋىمىز كەرەك» اتتى ماڭىزدى ماقالاسىن جاريالايدى. بۇل _ باس شۋجي شي جينپيڭنىڭ 2013 ـ جىلى 1 ـ ايدان 2024 ـ جىلى 3 ـ ايعا دەيىنگى مەزگىلدەگى قاتىستى ماڭىزدى بايىمداۋلارىنان ۇزىندىلەر.
ماقالادا مىنالار باسا دارىپتەلدى: جۇڭگو حالقى مەن جۇڭحۋا ۇلتىنىڭ تاياۋ زاماننان كەيىنگى اۋىر ازاپتى كۇندەردەن ۇلى گۇلدەنۋدىڭ نۇرلى بولاشاعىنا قادام تاستاۋىندا ەشقاشان پايدالانارلىق سىلتەمە بولعان ەمەس، دايىن جاۋاپ تىپتەن بولعان ەمەس. پارتيانىڭ 100 جىلدىق كۇرەسىنىڭ تابىستى جولىن پارتيا حالىققا باسشىلىق ەتىپ، دەربەس، وزىنە ـ ٴوزى قوجايىن بولا وتىرىپ ىزدەنىس جاساۋ ارقىلى اشقان، ماركسيزمنىڭ جۇڭگو تاراۋىن جۇڭگو كوممۋنيستەرى ٴوز كۇشىنە سۇيەنىپ امالياتتان وتكىزگەن، وعان سىڭىرىلگەن ٴبىر نەگىزگى ٴتۇيىن _ جۇڭگونىڭ ماسەلەسىن، ٴسوز جوق، جۇڭگونىڭ نەگىزگى مەملەكەت جاعدايىن نەگىز ەتە وتىرىپ، جۇڭگولىقتاردىڭ ٴوزى شەشۋى كەرەك. ٴبىز ماركسيزم جونىندەگى بەرىك سەنىمگە، جۇڭگوشا سوتسياليزم جونىندەگى بەرىك سەنىمگە تاباندى بولىپ، جول سەنىمىن، نازاريا سەنىمىن، ٴتۇزىم سەنىمىن، مادەنيەت سەنىمىن بەكەمدەپ، اناعۇرلىم بەلسەندى تاريحي جاۋاپكەرشىلىك ارقالاۋمەن جانە جاسامپازدىق رۋحپەن ماركسيزمنىڭ دامۋىنا تىڭ ۇلەس قوسۋىمىز، ٴبىر كورگەنىنەن جازباۋدان، توماعا ـ تۇيىقتىقتان، قاتىپ ـ سەمۋدەن اۋلاق بولۋمەن بىرگە، ٴوز قالپىندا كوشىرۋدەن، شەتەلدەن العاندى وزدەستىرمەۋدەن دە اۋلاق بولۋىمىز كەرەك.
ماقالادا مىنالار اتاپ كورسەتىلدى: وزىنە سەنگەندە عانا ٴوزىن الۋەتتەندىرۋگە بولادى. ”جۇڭحۋا وركەنيەتى نەشە مىڭ جىلدى وتكەرىپ، ۇزىلمەي جالعاسىپ، سان تاۋقىمەتتى باستان كەشسە دە السىرەمەي كەلەدى، بۇل _ ادامزات وركەنيەتىندەگى كەرەمەت ٴارى ٴبىزدىڭ سەنىمىمىزدىڭ تياناعى“. پارتيانىڭ 100 جىلدىق كۇرەس بەلەستەرى جانە ۇلى تابىستارى ٴبىزدىڭ ”ٴتورت سەنىمدى“ نىعايتۋىمىزدىڭ ەڭ مىعىم نەگىزى. قازىرگى تاڭداعى دۇنيە جۇزىندە قايسى ساياسي پارتيا، قايسى مەملەكەت، قايسى ۇلت وزىنە سەنىم ارتا الادى دەسەك، جۇڭگو كوممۋنيستىك پارتياسى، جۇڭحۋا حالىق رەسپۋبليكاسى، جۇڭحۋا ۇلتى وزىنە سەنىم ارتۋعا ەڭ قاقىلى. ٴوز جولىمىزبەن جۇرۋدە شەكسىز دە كەڭ ساحنامىز بار، شەكسىز دە تەرەڭ تاريحي نەگىزىمىز بار، شەكسىز دە قۋاتتى العا باسۋ تاباندىلىعىمىز بار. جۇڭگو ۇلگىسىندەگى وسىزامانداندىرۋدى ىلگەرىلەتۋدە، ٴسوزسىز، دەربەس، ٴوز ـ وزىمىزگە قوجايىن بولۋعا، ٴوز كۇشىمىزگە سۇيەنۋگە، ٴوزىمىزدى الۋەتتەندىرۋگە تاباندى بولۋىمىز، مەملەكەت پەن ۇلتتىڭ دامۋىندا ٴوز كۇش ـ قاۋقارىمىزدى تياناق ەتۋگە تاباندى بولۋىمىز، ەلىمىزدىڭ دامۋ، العا باسۋ تاعدىرىن ٴوز قولىمىزدا مىقتاپ يگەرۋگە تاباندى بولۋىمىز كەرەك.
ماقالادا مىنالار اتاپ كورسەتىلدى: بەرىك ٴتۇزىم سەنىمى بولماسا، رەفورمانى جاپپاي تەرەڭدەتۋ باتىلدىعى بولمايدى، وسىعان ۇقساس ۇزدىكسىز رەفورما جاساۋدان قول ۇزسە، ٴتۇزىم سەنىمى دە تۇبەگەيلى بولمايدى، ۇزاققا بارمايدى. ٴبىزدىڭ رەفورمانى جاپپاي تەرەڭدەتۋىمىز جۇڭگوشا سوتسياليستىك ٴتۇزىمدى ونان ارى جاقسارتۋ ٴۇشىن بولىپ وتىر؛ ٴبىزدىڭ ٴتۇزىم سەنىمىن بەكەمدەۋ دەگەنىمىز قاتىپ ـ سەمىپ، تۇيىقتالىپ قالۋ ەمەس، قايتا ٴتۇزىلىس ـ مەحانيزمدەردىڭ كەمشىلىكتەرىن ۇزدىكسىز جويىپ، ٴتۇزىمىمىزدى كەمەلدى ٴارى باياندى ەتۋگە قاراتىلعان. جۇڭگوشا سوتسياليزمنىڭ ۇزدىكسىز دامۋىنا بايلانىستى ٴتۇزىمىمىزدىڭ بارعان سايىن كەمەلدەنە تۇسەتىندىگى، ەلىمىز سوتسياليستىك ٴتۇزىمىنىڭ ابزالدىلىعىنىڭ اناعۇرلىم كورنەكتىلەنەتىندىگى، جولىمىزدىڭ جۇرگەن سايىن داڭعىل بولا تۇسەتىندىگى، ەلىمىز دامۋ جولىنىڭ دۇنيە جۇزىنە ىقپالىنىڭ بارعان سايىن ارتا تۇسەتىندىگى داۋسىز. جۇڭگونىڭ دامۋ بولاشاعى نۇرلى، بىزدە مۇنداي نەگىز جانە سەنىم بار.
