شينحۋا اگەنتتىگىنىڭ 7 ـ ايدىڭ 19 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى 7 ـ ايدىڭ 19 ـ كۇنى ۆيەتنام كوممۋنيستىك پارتياسى ورتالىق كوميتەتىنە كوڭىل ايتۋ تەلەگرامماسىن جولداپ، ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى رۋان فۋجۇڭ جولداسقا قايعىلى ازا ٴبىلدىردى. كوڭىل ايتۋ تەلەگرامماسىنىڭ تولىعى تومەندەگىدەي:
ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى رۋان فۋجۇڭ جولداس باقىتقا قارسى ومىردەن ٴوتتى، جۇڭگو كوممۋنيستىك پارتياسى جانە جۇڭگو حالقى جاقسى جولداسىنان، جاقسى باۋىرلاسىنان، جاقسى دوسىنان ايرىلدى. ٴبىز شەكسىز قايعىلى كوڭىل كۇيمەن ۆيەتنام كوممۋنيستىك پارتياسى ورتالىق كوميتەتىنە، ۆيەتنام ۇكىمەتىنە جانە ۆيەتنام حالقىنا ەرەكشە قايعىلى ازا بىلدىرەمىز جانە ولاردان اسا شىنايى حال سۇرايمىز.
رۋان فۋجۇڭ جولداس تاباندى ماركسيزمشى، ۆيەتنام كوممۋنيستىك پارتياسى مەن ۆيەتنام حالقىنىڭ ۇلى باسشىسى، ول ومىرلىك قاجىر ـ قايراتىن ۆيەتنامنىڭ پارتيا مەن مەملەكەت ىستەرىنە ارناپ، ۆيەتنامنىڭ جاڭالىق اشۋىنا، ەسىك اشۋىنا جانە سوتسياليستىك قۇرىلىس ىستەرىنە، دۇنيە ٴجۇزى سوتسياليزم قوزعالىسىنىڭ دامۋىنا ەرەن ۇلەس قوستى.
رۋان فۋجۇڭ جولداس جۇڭگو كوممۋنيستىك پارتياسىنىڭ جانە جۇڭگو حالقىنىڭ جاقىن جولداسى جانە شىنايى دوسى، ول جۇڭگو _ ۆيەتنام ەكى پارتيانىڭ، ەكى ەلدىڭ ”جولداس ۇستىنە باۋىرلاس بولۋ“ سىندى ٴداستۇرلى دوستىعىن جالعاستىرىپ جانە دامىتىپ، جۇڭگو كوممۋنيستىك پارتياسىمەن جانە جۇڭگو باسشىلارىمەن تەرەڭ دوستىق ورناتتى. رۋان فۋجۇڭ جولداس باس شۋجي شي جينپيڭمەن بىرگە جۇڭگو _ ۆيەتنام قارىم ـ قاتىناسىن ستراتەگيالىق ٴمان الاتىن تاعدىرلاس ورتاق تۇلعا دەڭگەيىنە كوتەرىپ، جۇڭگو _ ۆيەتنام جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ ۇزدىكسىز العا دامۋىن پارمەندى ىلگەرىلەتتى. جۇڭگو پارتياسى، ۇكىمەتى جانە جۇڭگو حالقى رۋان فۋجۇڭ جولداستى ماڭگى ساعىنادى.
ۆيەتنام پارتياسى مەن ۆيەتنام حالقىنىڭ قايعىنى قايراتقا جەڭدىرىپ، رۋان فۋجۇڭ جولداستىڭ مۇراتىنا مۇراگەرلىك ەتىپ، ىنتىماقتاسا كۇرەس جۇرگىزىپ، جاڭالىق اشۋ، ەسىك اشۋ ٴىسى مەن سوتسياليستىك قۇرىلىس ىستەرىندە جاڭا اناعۇرلىم زور تابىستارعا قول جەتكىزەتىندىگىنە سەنەمىز.
جۇڭگو مەن ۆيەتنام _ تاۋ ـ وزەنى تۇتاسقان سوتسياليستىك كورشى ەلدەر، ستراتەگيالىق مانگە يە تاعدىرلاس ورتاق تۇلعا. جۇڭگو ۆيەتنامدى قاشاندا توڭىرەكتىك ديپلوماتياسىنداعى الدىمەن ويلاستىراتىن بەتالىس سانايدى، ۆيەتنام جاقپەن بىرگە ساياسي ٴوزارا سەنىمدىلىكتى ۇزدىكسىز بەكەمدەپ، ىنتىماقتاسا سەلبەسۋدى كۇشەيتىپ، جۇڭگو _ ۆيەتنام تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتۋدى، ەكى ەل حالقىن باقىتقا كەنەلتۋدى، ٴوڭىردىڭ جانە دۇنيە ٴجۇزىنىڭ بەيبىتشىلىگى مەن دامۋىنا ۇلەس قوسۋدى قالايدى.
رۋان فۋجۇڭ جولداس ماڭگى جاسايدى!