7 ـ ايدىڭ 20 ـ كۇنى تۇستەن كەيىن ساعات 4 مولشەرىندە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ ۆيەتنامنىڭ جۇڭگودا تۇراتىن ەلشىحاناسىنا بارىپ، ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى رۋان فۋجۇڭنىڭ قايتىس بولعاندىعىنا ازا ٴبىلدىردى.
□ سۋرەتتى شينحۋا اگەنتتىگىنىڭ ٴتىلشىسى شىن حۇڭ تۇسىرگەن
شينحۋا اگەنتتىگىنىڭ 7 ـ ايدىڭ 20 ـ كۇنى بەيجيڭنەن بەرگەن حابارى (ٴتىلشى ياڭ يجۇن). 7 ـ ايدىڭ 20 ـ كۇنى تۇستەن كەيىن ساعات 4 مولشەرىندە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ ۆيەتنامنىڭ جۇڭگوداعى ەلشىحاناسىنا بارىپ، ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى رۋان فۋجۇڭنىڭ قايتىس بولعاندىعىنا ازا ٴبىلدىردى.
شي جينپيڭ ۆيەتنامنىڭ جۇڭگوداعى ەلشىحاناسىنىڭ ازا ٴبىلدىرۋ زالىنا كەلدى. زالعا رۋان فۋجۇڭنىڭ سۋرەتى قويىلعان. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي ۇسىنعان گۇل شەڭبەرلەر، جۇڭگو كوممۋنيستىك پارتياسى ورتالىق كوميتەتى، مەملەكەتتىك حالىق قۇرىلتايى، مەملەكەتتىك كەڭەس، مەملەكەتتىك ساياسي كەڭەس، ورتالىق اسكەري ىستەر كوميتەتى، سونداي ـ اق جۇڭگو كوممۋنيستىك پارتياسى ورتالىق كوميتەتى سىرتپەن بايلانىس جاساۋ ٴبولىمى، سىرتقى ىستەر مينيسترلىگى، مەملەكەت قورعانىس مينيسترلىگى، بەيجيڭ قالالىق پارتكوم مەن قالالىق ۇكىمەت، قاتىستى حالىقتىق ۇيىمدار ۇسىنعان گۇل شەڭبەرلەر سۋرەتتىڭ الدىنا قويىلىپتى.
شي جينپيڭ رۋان فۋجۇڭنىڭ سۋرەتى الدىندا ايالداپ ٴۇنسىز ازا ٴبىلدىردى، سۋرەتكە ٴۇش رەت تاعزىم ەتتى، ازا ٴبىلدىرۋ داپتەرىنە لەبىز قالدىردى ٴارى قول قويدى.
شي جينپيڭ بىلاي دەپ اتاپ كورسەتتى: رۋان فۋجۇڭ جولداس تاباندى ماركسيزمشى، ۆيەتنام كوممۋنيستىك پارتياسى مەن ۆيەتنام حالقىنىڭ ۇلى باسشىسى، ول ومىرلىك قاجىر ـ قايراتىن ۆيەتنامنىڭ پارتيا مەن مەملەكەت ىستەرىنە ارناپ، ۆيەتنام حالقىنا ارناپ، ۆيەتنامنىڭ سوتسياليزم ىستەرىنە ارناپ، ۆيەتنامنىڭ بۇكىل پارتياسىنىڭ، بۇكىل ارمياسىنىڭ، بۇكىل ەل حالقىنىڭ ەرەكشە قولداۋىنا جانە قۇرمەتىنە بولەندى. 10 نەشە جىلدان بەرى مەن رۋان فۋجۇڭ جولداسپەن ٴجيى بارىس ـ كەلىس جاساپ، قويۋ جولداستىق سۇيىسپەنشىلىك ورناتتىم. بەلەستىك مانگە يە بولعانى بىلتىر ٴبىز ستراتەگيالىق مانگە يە جۇڭگو _ ۆيەتنام تاعدىرلاس ورتاق تۇلعاسىن قۇرۋدى بىرگە جاريالادىق. رۋان فۋجۇڭ جولداستىڭ قايتىس بولۋىمەن ٴبىز جۇڭگو _ ۆيەتنام قارىم ـ قاتىناسىنىڭ ىلگەرىلەتۋشىسىنەن جانە سوتسياليزم ىستەرىندەگى ساپارلاسىمىزدان ايىرىلدىق، ٴبىز بۇعان قاتتى قايعىرامىز. ٴبىز رۋان فۋجۇڭ جولداستىڭ ەكى پارتيا، ەكى ەل قارىم ـ قاتىناسى جانە دۇنيە ٴجۇزى سوتسياليزم قوزعالىسى ىستەرى ٴۇشىن قوسقان ەرەن ۇلەسىن ماڭگى ەستە ساقتايمىز.
شي جينپيڭ بىلاي دەپ باسا دارىپتەدى: جۇڭگو پارتياسى مەن ۇكىمەتى ۆيەتنام كوممۋنيستىك پارتياسىنىڭ ۆيەتنام حالقىن ىنتىماقتاستىرىپ جانە باستاپ، ٴوز ەلىنىڭ مەملەكەت جاعدايىنا ۇيلەسەتىن سوتسياليزم داڭعىل جولىمەن ٴجۇرۋىن باتىل قولدايدى. مەن ۆيەتنام كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا ۆيەتنام حالقىنىڭ، ٴسوزسىز، قايعىنى قايراتقا جەڭدىرىپ، جاڭالىق اشۋ، ەسىك اشۋ جانە سوتسياليستىك قۇرىلىس ىستەرىندە تىڭ دا اناعۇرلىم زور تابىستارعا ۇزدىكسىز قول جەتكىزەتىندىگىنە سەنەمىن. مەن جۇڭگو _ ۆيەتنام ەكى جاقتىڭ، ٴسوزسىز، ۇزدىكسىز بىرگە قۇلشىنىپ، جۇڭگو _ ۆيەتنام تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتەتىندىگىنە كامىل سەنەمىن.
ۆيەتنامنىڭ جۇڭگودا تۇراتىن باس ەلشىسى فان شيڭمەي مىنانى ٴبىلدىردى: باس شۋجي شي جينپيڭنىڭ كەلىپ ازا ٴبىلدىرۋى، جۇڭگو كوممۋنيستىك پارتياسى ورتالىق كوميتەتىنىڭ ەڭ الدىمەن ۆيەتنام كوممۋنيستىك پارتياسى ورتالىق كوميتەتىنە كوڭىل ايتۋ تەلەگرامماسىن جولداۋى جۇڭگو پارتياسىنىڭ، ۇكىمەتىنىڭ ۆيەتنام _ جۇڭگو ەكى پارتيا، ەكى ەل قارىم ـ قاتىناسىنا ايرىقشا ٴمان بەرەتىندىگىن ايگىلەدى، باس شۋجي شي جينپيڭنىڭ رۋان فۋجۇڭ جولداسقا دەگەن ەرەكشە سۇيىسپەنشىلىگىن ايگىلەدى، ۆيەتنام جاق بۇدان قاتتى اسەرلەندى، ەرەكشە العىس ايتادى. رۋان فۋجۇڭ جولداس كوزى تىرىسىندە جۇڭگومەن قارىم ـ قاتىناسقا بارىنشا ٴمان بەرىپ، ۆيەتنام _ جۇڭگو دوستىعىن دامىتۋ ٴۇشىن قىرۋار زەيىن ـ زەردەسىن جۇمساپ، وراسان زور ۇلەس قوستى. ۆيەتنام جاق رۋان فۋجۇڭ جولداستىڭ مۇراتىنا مۇراگەرلىك ەتىپ، ۆيەتنام _ جۇڭگو ەكى پارتيانىڭ، ەكى ەلدىڭ ەڭ جوعارى باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، جۇڭگومەن دوستىق سەلبەستىكتى دامىتۋدى ۆيەتنامنىڭ سىرتقى ساياساتىنىڭ ستراتەگيالىق تاڭداۋى جانە ماڭداي الدى ماڭىزى ٴىسى ەتۋگە تاباندى بولىپ، ستراتەگيالىق مانگە يە ۆيەتنام _ جۇڭگو تاعدىرلاس ورتاق تۇلعاسى قۇرىلىسىنىڭ ۇزدىكسىز العا قاراي دامۋىن ىلگەرىلەتەدى.
ساي چي، ۋاڭ ي قاتارلىلار ازا ٴبىلدىرۋ قيمىلىنا قاتىناستى.
