شينجياڭدا رەفورمانى جاپپاي تەرەڭدەتۋ · ءبىرىنشى شەپتەن كورگەن - بىلگەندەرىمىز | جۇڭگو — ەۆروپا كەزەكشى پويەزى جاڭا قارقىن جاراتتى

　　انار بۇلت \ شينجياڭ گازەتىنىڭ ٴتىلشىسى لۋ فىڭباۋ

　　7 ـ ايدىڭ 3 ـ كۇنى ٴۇرىمجى حالىقارالىق قۇرلىقتىق پورت رايونى جۇڭگو — ەۆروپا كەزەكشى پويەزى (ٴۇرىمجى) شوعىرلاندىرۋ ورتالىعىندا جۇك اۆتوموبيلدەرى ۇزىننان ـ ۇزاق قاتارعا ٴتىزىلىپ، جۇك تيەۋ ـ ٴتۇسىرۋ اۋماعىنا كىرۋدى كۇتىپ تۇردى. تەمىر جول ارناۋلى جەلىسى اۋماعىندا تۇرلىشە ەلدىڭ، تۇرلىشە كاسىپورىننىڭ بەلگىسى باسىلعان قىرۋار كونتەينەر بولات رەليستىڭ جانىنا رەتتى قويىلىپ، 3 رەليستى الىپ كران كونتەينەرلەردى تيەپ جاتتى. رەفورمانى جاپپاي تەرەڭدەتۋدىڭ ىشكەرىلەي ىلگەرىلەۋىنە بايلانىستى، جۇڭگو — ەۆروپا كەزەكشى پويەزى دە جوعارى دەڭگەيدەگى سىرتقا ەسىك اشۋدىڭ جاڭا قارقىنىن ۇزدىكسىز جاراتتى.

　　رەليستى كراننىڭ جۇمىس قاعيداسى ساۋدا سارايىنداعى قۋىرشاق ۇستايتىن ماشيناعا ۇقسايدى، مۇنارا تارىزدەس كراننىڭ سالبىراپ تۇرعان ٴبىر قارمالاۋىشى بار، قارمالاۋىش ٴتورت ”ساۋساعىن“ سوزىپ، ٴبىر كونتەينەردى باياۋ ۇستاپ، ونان سوڭ ونى جايداق اۆتوموبيلگە اقىرىن قويادى، نەبارى 2 مينۋت اينالاسىندا ٴبىر كونتەينەردى ٴىلىپ اپارىپ تيەپ بولادى.

　　”ەڭ تەز بولعاندا، 2 ساعاتتان استام ۋاقىتتا ٴبىر پويەزدى تيەپ تولتىرۋعا بولادى“، ـ دەدى شينجياڭ حالىقارالىق قۇرلىقتىق پورت (توبى) شەكتى جاۋاپكەرشىلىك سەرىكتەستىگى كەزەكشى پويەز ىستەرى ٴبولىمىنىڭ قىزمەتكەرى چىن ي.

　　جاڭعىرعان گۋدوك داۋىسىنا ىلەسە، 50 نەشە كونتەينەر تيەگەن پويەز الىپ ايداعارداي باياۋ قوزعالىپ، جاڭا ازيا — ەۆروپا قۇرلىقتىق كوپىرىن بويلاپ باتىسقا قاراي زىمىراپ بارىپ، قورعاس شەكارا وتكەلى ارقىلى شەكارادان شىقتى.

　　7 ـ ايدىڭ 1 ـ كۇنى ٴۇرىمجى حالىقارالىق قۇرلىقتىق پورت رايونى جۇڭگو — ەۆروپا كەزەكشى پويەزى (ٴۇرىمجى) شوعىرلاندىرۋ ورتالىعىندا رەليستى كران كونتەينەرلەردى تيەپ جاتتى. سۋرەتتى انار بۇلت \ شينجياڭ گازەتىنىڭ ءتىلشىسى لۋ فىڭباۋ تۇسىرگەن

　　شينجياڭنان جۇڭگو — ەۆروپا كەزەكشى پويەزى قاتىناي باستاعانىنا ۇزاق ۋاقىت بولدى، 2014 ـ جىلى تۇڭعىش رەت جۇڭگو — ەۆروپا كەزەكشى پويەزى قاتىنادى، العاشىندا قاتىناعان كەزەكشى پويەز سانى ٴبىرشاما از بولىپ، اپتاسىنا نەبارى ٴبىر دە ەكى كەزەكشى پويەز قاتىنادى.

　　2015 ـ جىلدىڭ اياعىندا ٴۇرىمجى حالىقارالىق قۇرلىقتىق پورت رايونى قۇرىلىس باستاپ، قۇرلىقتىق پورت رايونى كەزەكشى پويەزگە ”ٴبىر بەكەتتىك قىزمەت وتەۋ“ ازىرلەپ، كەزەكشى پويەزدىڭ كەلۋ، تيەۋ ـ ٴتۇسىرۋ، قۇراۋ، تەكسەرۋ، جۇك جونەلتۋدى ٴبىر جولدا ورىنداۋ يقۋاتىن ازىرلەدى. 2016 ـ جىلى جۇڭگو — ەۆروپا كەزەكشى پويەزى (ٴۇرىمجى) شوعىرلاندىرۋ ورتالىعى قۇرىلدى ٴارى ىسكە قوسىلدى. 3 جىلدان كەيىن، شوعىرلاندىرۋ ورتالىعىن كەڭەيتىپ سالۋ ينجەنەرياسىنىڭ 2 ـ مەرزىمدىك قۇرىلىسى اياقتاپ، كۇنىنە 20دان استام كەزەكشى پويەز جونەلتۋ قاجەتىن قاناعاتتاندىرا الاتىن بولدى، كەزەكشى پويەزدىڭ جۇمىس ۋاقىتى بۇرىنعىنىڭ ۇشتەن بىرىنە قىسقاردى، شينجياڭنان اتتانعان جۇڭگو — ەۆروپا كەزەكشى پويەزى تەز ارتۋ كەزەڭىنە ٴوتتى.

　　بىلتىر جىل سوڭىنا دەيىن شينجياڭ 8515 جۇڭگو — ەۆروپا (ورتا ازيا) كەزەكشى پويەزىن قاتىناتتى، مۇنىڭ ىشىندە بىلتىر 1517 كەزەكشى پويەز قاتىناپ، سايكەس مەزگىلدەگىدەن %5.3 ارتىپ، بۇكىل ەل بويىنشا قاتىناعان جالپى كەزەكشى پويەزدەردىڭ %8.7ىن يەلەپ، تاريحتاعى تىڭ دەڭگەيگە جەتتى. قازىر شينجياڭدا جۇڭگو — ەۆروپا كەزەكشى پويەزىنىڭ قاتىناۋ جەلىسى 23كە جەتىپ، 19 مەملەكەتتىڭ 26 قالاسىنا قاتىناپ، شينجياڭ ىشىندە كوپ جەردەن جولعا شىعاتىن، كوپ جەرگە قاتىنايتىن، كوپ تۇيىنگە جەتەتىن تاسىمال جۇلگەسىن قالىپتاستىردى.

　　كەزەكشى پويەز شوعىرلاندىرۋ ورتالىعىنان شىعىپ كەتكەنشە قاراپ تۇرعان چىن ي كەڭسەسىنە قايتىپ، كەلەسى كەزەكشى پويەزدىڭ جونەلتۋ ماتەريالىن دايىندادى.

　　كەڭسە عيماراتىنىڭ استى ءۇرىمجى حالىقارالىق قۇرلىقتىق پورتى بىرلەسىپ ءبىتىرۋ زالى، 2020 ـ جىلدان بەرى تەمىر جول، كەدەن سياقتى تاراۋلار بىرلەسىپ ٴبىتىرۋ زالىندا بىرلەسىپ جۇمىس جۇرگىزىپ، كليەنتتەردىڭ ”ٴبىر بەكەتتىك“ جۇمىس ٴبىتىرۋىن جۇزەگە اسىردى.

　　تەمىر جول جۇك تاسىمالىن قابىلداۋ تەرەزەسىندە جۇڭگو تەمىر جولى ٴۇرىمجى مەكەمەسى توبى شەكتى سەرىكتەستىگى ٴۇرىمجى تەمىر جول زات اينالىمى ورتالىعى ٴۇرىمجى باتىس تيجارات ٴبولىمىنىڭ جۇك تيەۋ كەزەكشىسى چىڭ ياشۇي مەن قىزمەتتەستەرى تاسىمال تالونىن قابىلداپ، تالون جاساپ، جۇيەگە ەنگىزۋمەن قاربالاستىققا ٴتۇستى.

　　چىن ي تاپسىرعان ٴبىر بۋدا تاسىمال تالونىن قولىنا العان چىڭ ياشۇي ەگجەي ـ تەگجەيلى تەكسەرىپ، قاتەسىز بولعان سوڭ تەز ارادا تاڭبا باستى. ”95306 تۇعىرىنىڭ كومەگىمەن ٴبىز 24 ساعات ٴۇزىلىسسىز جۇمىس ٴبىتىرىپ، پويەزدەردىڭ ايالداۋ ۋاقىتىن زور مولشەردە قىسقارتتىق“. ول بىلاي دەدى: قازىر زات ٴۇرىمجى حالىقارالىق قۇرلىقتىق پورت رايونىنا جەتكەننەن كەيىن، ادەتتە 24 ساعات ىشىندە راسميات وتەۋ جانە كەزەكشى پويەزگە جۇك تيەۋ قىزمەتىن ورىنداۋعا بولادى، ال بۇرىن بۇل بارىسقا 3 — 5 كۇن كەتەتىن.

　　2 ساعات مولشەرىندە چىن ي ٴبىر جۇڭگو _ ەۆروپا كەزەكشى پويەزىن جونەلتۋ جۇمىسىن ٴبىتىرىپ بولىسىمەن وسى كەزەكشى پويەز جولعا شىعا الاتىن بولدى. ”ٴار بۋىننىڭ ونىمدىلىگى وتە جوعارى، قازىر ٴبىر كۇندە بۇرىنعىدان 2 - 1 كەزەكشى پويەزدىڭ جۇمىسىن ارتىق بىتىرۋگە بولادى“، ـ دەدى ول.

　　مۇنان دا قولايلى بولعانى كەدەن اتقارعان سيفرلى شەكارا وتكەلى قۇرىلىسى مەن كەدەننەن ٴوتۋدى ٴبىر تۇلعالاندىرىپ مالىمدەۋدەن پايدالانىپ، جۇڭگو — ەۆروپا كەزەكشى پويەزى ٴۇرىمجى حالىقارالىق قۇرلىقتىق پورت رايونىندا زاتتاردى تەكسەرۋ، كەدەنگە مالىمدەۋ، كەدەننەن وتكىزۋ راسمياتتارىن ٴبىتىرىپ، كەزەكشى پويەزدەردىڭ ايالداۋ جۇمىس ۋاقىتىن بارىنشا قىسقارىپ، كەزەكشى پويەزدەردىڭ تەز كىرىپ، تەز شىعۋى جۇزەگە اسىرىلدى.

　　راسميات وتەپ بولعان كەزەكشى پويەزدەر شوعىرلاندىرۋ ورتالىعىنان جولعا شىعادى، ولاردىڭ كوبىنىڭ ”تيانشان“ كەزەكشى پويەزى دەگەن ٴبىرىڭعاي اتى بار. بىلتىر 12 ـ ايدا بۇكىل شينجياڭداعى جۇڭگو ـ ەۆروپا كەزەكشى پويەزىن ٴبىر تۇتاس جونەلتۋ تۇعىرى ”تيانشان“ كەزەكشى پويەزى شينجياڭ ساۋدا زات اينالىمى (توبى) شەكتى سەرىكتەستىگى جاعىنان قۇرىلىپ، جۇڭگو — ەۆروپا كەزەكشى پويەزىنىڭ، سونداي ـ اق شينجياڭنىڭ سىرتقا ەسىك اشۋىنىڭ ماڭىزدى تانىسقىسىنا اينالدى.

　　”شينجياڭنىڭ ٴوزىنىڭ ايگىلى ماركالى ارناۋلى پويەزى بار، ٴبىز جۇمىس ىستەگەندە قايراتىمىز ٴتىپتى دە تاسقىنداي ٴتۇستى“، ـ دەدى شينجياڭ حالىقارالىق قۇرلىقتىق پورت (توبى) شەكتى جاۋاپكەرشىلىك سەرىكتەستىگى كەزەكشى پويەز ىستەرى ٴبولىمىنىڭ باس ديرەكتورى جىڭ ۋيگو.

　　شينجياڭ حالىقارالىق قۇرلىقتىق پورت (توبى) شەكتى جاۋاپكەرشىلىك سەرىكتەستىگى زات اينالىمىن ۇيىمداستىرۋ ۇلگىسىندە جاڭالىق اشتى، بۇكىل ەلدىڭ كوپ جەرىندەگى زاتتار ۇرىمجىدە توپتالدى ٴارى تەز كىرىپ، تەز شىعارىلدى. جارتى جىلدان استام ۋاقىتتا ”تيانشان“ كەزەكشى پويەزى اپتاسىنا 2 كەزەكشى پويەز قاتىناۋدان بىرتىندەپ كوبەيىپ، اپتاسىنا 8دەن استام كەزەكشى پويەزگە مولايىپ، كۇندە پويەز قاتىناۋ ۇدايىلاندىرىلدى.

　　”كەلەسى قادامدا ورتا ازيا كەزەكشى پويەزدەرىنىڭ قاتىناۋ جيىلىگىن ارتتىرامىز ٴارى كاسپي تەڭىزىن اتتاعان تاسىمال ارناسى، سونداي ـ اق ەۆروپا جەلىسى سياقتىلار جونىندە بەلسەنە ىزدەنىس جاسايمىز“، ـ دەدى جىڭ ۋيگو بىرلەسىپ ٴبىتىرۋ زالىنداعى جۇڭگو _ ەۆروپا (ورتا ازيا) كەزەكشى پويەزىنىڭ قاتىناۋ جەلىسىنىڭ تۇسىندىرمەلى قاريتاسىن كورسەتىپ تۇرىپ.