جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ، ورتالىق اسكەري ىستەر كوميتەتىنىڭ
تاڭ حۇڭبوعا ” 2 ـ دارەجەلى عارىش ۇلەسكەرى مەدالىن“ بەرۋ، تاڭ شىڭجيەگە، جياڭ شينلينگە ”قاھارمان عارىشكەر“ داڭق اتاعىن بەرۋ جانە ”3 ـ دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى
(2024 ـ جىلى 7 ـ ايدىڭ 26 ـ كۇنى)
2023 ـ جىلى 10 ـ ايدىڭ 26 ـ كۇنى شىنجوۋ 17 ـ ٴنومىرلى عارىشكەرلى الەم كەمەسى ٴساتتى ۇشىرىلىپ، عارىشكەرلەر تاڭ حۇڭبو، تاڭ شىڭجيە، جياڭ شينلين الەم كەمەسىنە وتىرىپ، تيانحى وزەكتى بولمەسىنە ٴساتتى جايعاسىپ، وربيتادا 6 اي تۇرىپ، ىلگەرىندى ـ كەيىندى 2 رەت كەمە بولمەسىنەن شىعىپ قيمىل جاساپ، 8 رەت جۇك تيەلەتىن گاز تيەكتى بولمەگە كىرۋ ـ شىعۋ مىندەتىن اتقارىپ، كەڭىستىك بەكەتىن قۇرۋ، دەڭگەيىن كوتەرۋ، قورعاۋ، جوندەۋگە قاتىستى 50 نەشە ٴتۇرلى مىندەتتى ورىنداپ، 100گە جۋىق كەڭىستىك عىلمي تاجىريبەسىن جانە قولدانىلمالى كوتەرىلىمدىلىك وربيتا تاجىريبەسىن (سىناق) جۇرگىزىپ، 2024 ـ جىلى 4 ـ ايدىڭ 30 ـ كۇنى امان ـ ەسەن ورالدى. شىنجوۋ 17 ـ ٴنومىرلىنىڭ ادام الىپ ۇشۋ مىندەتى _ ەلىمىز عارىشقا ادام الىپ ۇشۋ ينجەنەرياسىنىڭ كەڭىستىك بەكەتىن قولدانۋ جانە دامىتۋ كەزەڭىنە وتكەننەن كەيىنگى 2 ـ رەتكى ادام الىپ ۇشۋ مىندەتى، وربيتاداعى عارىش اپپاراتىنىڭ بولمە سىرتىنداعى جابدىعىن جوندەۋدى تۇڭعىش رەت تولىق تابىسپەن ورىنداپ، تۇڭعىش توپتاعى بولمە سىرتىندا اشىق تۇرعان تاجىريبە ماتەريالدارىنىڭ ۇلگىسىن ٴساتتى الىپ كەلۋى بولىپ تابىلادى. بۇل جۇڭگو عارىش ىستەرىنىڭ جوعارى دەڭگەيدەگى عىلىم ـ تەحنيكادا ٴوز كۇشىنە سۇيەنۋدە، ٴوزىن الۋەتتەندىرۋدە تىڭ قادام تاستاعاندىعىنىڭ بەلگىسى، بۇل ەلىمىزدىڭ جالپىلىق مەملەكەت قۋاتىن جوعارىلاتۋدا جانە جۇڭحۋا ۇلتىنىڭ ۇيىسۋ قۋاتىن كۇشەيتۋدە، بۇكىل پارتيانى، بۇكىل ارميانى، بۇكىل ەلدەگى ٴار ۇلت حالقىن سەنىمدى بەكەمدەپ، ەرلىكپەن العا ىلگەرىلەۋگە جىگەرلەندىرۋدە كەلەلى مانگە يە.
شىنجوۋ 17 ـ ٴنومىرلى عارىشكەرلى الەم كەمەسىنىڭ ۇشۋ مىندەتىنىڭ تولىق تابىستى بولۋىنا قالىڭ عىلىم ـ تەحنيكا قىزمەتكەرلەرىنىڭ، عارىشكەرلەردىڭ، كادرلار مەن جۇمىسشى ـ قىزمەتكەرلەردىڭ، ازاتتىق ارميا كوماندير ـ جاۋىنگەرلەرىنىڭ اقىل ـ پاراساتى مەن جۇرەك قانى سىڭگەن. تاڭ حۇڭبو، تاڭ شىڭجيە، جياڭ شينلين جولداستار وسىلاردىڭ ۇزدىك ۋاكىلى، ولار مىزعىماس نيەتپەن پارتياعا ىلەسىپ، بورىشقا ادال بولىپ، جاپا ـ ماشاقاتتان، حاۋىپ ـ قاتەردەن جاسقانباي، قايراتتانا شايقاسىپ، دۇنيە جۇزىنە قۇدىرەتتى جۇڭگو رۋحىن، جۇڭگو كۇشىن ايگىلەدى. تاڭ حۇڭبو جولداس اراعا 2 جىل سالىپ، تاعى دا عارىش كەڭىستىگىنە شىعىپ ٴارى بۇيرىق بەرۋشى مىندەتىن اتقارىپ، عارىش بەكەتىنە قايتا ورالعان تۇڭعىش عارىشكەر بولىپ، جۇڭگو عارىشكەرلەرىنىڭ وربيتادا ۇشۋ ۋاقىت ۇزاقتىعىنىڭ جاڭا رەكوردىن جاراتتى. تاڭ شىڭجيە جولداس قايراتتانا العا ۇمتىلىپ، قاجىرلىلىقپەن جاتتىعۋ جاساپ، قازىرگى ەلىمىزدەگى عارىش كەڭىستىگىنە قادام تاستاعان ەڭ جاس عارىشكەر بولىپ، 3 ـ توپتاعى عارىشكەرلەردىڭ ىشىندەگى تۇڭعىش بولمەدەن شىعۋ قيمىلىن ورىستەتكەن عارىش جۇرگىزۋشىسىنە اينالدى. جياڭ شينلين جولداس بولمە سىرتىنداعى جوندەۋ جۇمىستارىنىڭ نەگىزگى تىزگىندەۋشىسى مىندەتىن اتقاردى، تەحنيكاعا جەتىك، سابىرلى دا سالماقتى، تۇڭعىش رەت عارىشقا ۇشقاندا ـ اق ارقالاعان مىندەتىن تولىق تابىسپەن ورىندادى. ولاردىڭ ەلىمىزدىڭ عارىشقا ادام الىپ ۇشۋ ىستەرىنە قوسقان ەرەن ەڭبەگىن ماراپاتتاۋ ٴۇشىن، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى تاڭ حۇڭبو جولداسقا ” 2 ـ دارەجەلى عارىش ۇلەسكەرى مەدالىن“ بەرۋدى، تاڭ شىڭجيە، جياڭ شينلين جولداستارعا ”قاھارمان عارىشكەر“ داڭق اتاعىن بەرۋدى جانە ”3 ـ دارەجەلى عارىش ۇلەسكەرى مەدالىن“ بەرۋدى ۇيعاردى.
تاڭ حۇڭبو، تاڭ شىڭجيە، جياڭ شينلين جولداستار _ اۋەلگى ماقساتتى ۇمىتپاي، بورىشتى ەستە بەرىك ساقتاپ، ارداقتى ىسكە وزدەرىن ارناعان ٴداۋىر اۆانگاردتارى، الەمدى زەرتتەۋدىڭ، عارىش كەڭىستىگى ارمانىنا قانات قاعۋدىڭ، عارىش ىستەرىندە قۋاتتى ەل قۇرۋدىڭ ونەگەلى ۇلگىلەرى. پارتيا ورتالىق كوميتەتى مىناعان ۇندەيدى: بۇكىل پارتيا، بۇكىل ارميا، بۇكىل ەلدەگى ٴار ۇلت حالقى شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ٴۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ماراپاتتالعان عارىشكەرلەردى ونەگە ەتىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ٴتورت تانىمدى“ كۇشەيتىپ، ”ٴتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ەكى بومبى، ٴبىر جاساندى سەرىك“ رۋحى مەن عارىشقا ادام الىپ ۇشۋ رۋحىن بار كۇشپەن اسقاقتاتىپ، تالىقپاي تالپىنىپ، ەرلىكپەن شىڭعا شىعىپ، بەرىلە شوگەلدىكپەن ىستەپ، قايراتتانا العا ىلگەرىلەپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزەيىك!
(شينحۋا اگەنتتىگىنىڭ 7 ـ ايدىڭ 26 ـ بەيجيڭنەن بەرگەن حابارى)
