كەزەكتەگى ەكونوميكالىق جاعداي جانە سوڭعى جارتى جىلداعى ەكونوميكالىق قىزمەت جونىندە
جۇڭگو كوممۋنيستىك پارتياسى ورتالىق كوميتەتى پارتيا سىرتىنداعى قايراتكەرلەر اڭگىمە ٴماجىلىسىن اشتى
شي جينپيڭ باسقاردى ٴارى ماڭىزدى ٴسوز سويلەدى
لي چياڭ قاتىستى جاعدايلاردى حابارلادى، ۋاڭ حۋنيڭ، ساي چي، ديڭ شۋەشياڭ قاتىناستى
شينحۋا اگەنتتىگىنىڭ 7 ـ ايدىڭ 30 ـ كۇنى بەيجيڭنەن بەرگەن حابارى. 7 ـ ايدىڭ 26 ـ كۇنى جۇڭگو كوممۋنيستىك پارتياسى ورتالىق كوميتەتى جۇڭنانحايدا پارتيا سىرتىنداعى قايراتكەرلەر اڭگىمە ٴماجىلىسىن اشىپ، كەزەكتەگى ەكونوميكالىق جاعداي جانە سوڭعى جارتى جىلداعى ەكونوميكالىق قىزمەت جونىندە دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارىنىڭ جانە پارتيادا، توپتا جوق قايراتكەرلەر ۋاكىلدەرىنىڭ پىكىرلەرى مەن ۇسىنىستارىن تىڭدادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ اڭگىمە ٴماجىلىسىن باسقاردى ٴارى ماڭىزدى ٴسوز سويلەپ بىلاي دەپ باسا دارىپتەدى: سوڭعى جارتى جىلداعى ەكونوميكالىق قىزمەتتى ويداعىداي ىستەۋ ٴۇشىن جۇڭگو كوممۋنيستىك پارتياسى 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ٴۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جەرگىلىكتى جاعدايعا قاراي جاڭاشا وندىرگىش كۇشتەردى دامىتىپ، جوعارى ساپالى دامۋدى كۇش سالا ىلگەرىلەتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋدى ارقاۋ ەتىپ رەفورمانى ونان ارى جاپپاي تەرەڭدەتىپ، ماكرولىق رەتتەۋ ـ مەڭگەرۋ تەبىنىن ارتتىرىپ، دامۋعا جاڭالىق اشۋ ارقىلى دەم بەرۋدى تەرەڭدەتىپ، ىشكى سۇرانىس كومەسكى كۇشىن ىشكەرىلەي اشىپ، جاڭا قوزعاۋشى قۋاتتى، جاڭا باسىمدىقتى ۇزدىكسىز كۇشەيتىپ، شارۋاشىلىق تۇلعالارىنىڭ ومىرشەڭدىگىن ارتتىرىپ، بازار مەجەسىن ورنىقتىرىپ، قوعام سەنىمىن كۇشەيتىپ، ەكونوميكانىڭ ٴۇرتىس قالپىنا كەلۋ، جاقسارۋ جاعدايىن كۇشەيتىپ، حالىق تۇرمىسىن شىنايى قامتاماسىزداندىرىپ جانە جاقسارتىپ، قوعام ورنىقتىلىعىن ساقتاپ، تۇتاس جىلداعى ەكونوميكالىق، قوعامدىق دامۋ نىساناسىن بۇلجىماي جۇزەگە اسىرۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي چياڭ، ۋاڭ حۋنيڭ، ساي چي، ديڭ شۋەشياڭ اڭگىمە ماجىلىسىنە قاتىناستى. لي چياڭ جۇڭگو كوممۋنيستىك پارتياسى ورتالىق كوميتەتىنىڭ تاپسىرۋىمەن الدىڭعى جارتى جىلداعى ەكونوميكالىق قىزمەتكە قاتىستى جاعدايلاردى حابارلادى، سوڭعى جارتى جىلداعى ەكونوميكالىق قىزمەت جونىندەگى قاتىستى ويلاردى تانىستىردى.
اڭگىمە ماجىلىسىندە جۇڭگو گومينداڭ توڭكەرىستىك كوميتەتى ورتالىق كوميتەتىنىڭ ٴتوراعاسى جىڭ جيانباڭ، جۇڭگو دەموكراتيالىق وداعى ورتالىق كوميتەتىنىڭ ٴتوراعاسى ديڭ جۇڭلي، جۇڭگو دەموكراتيالىق مەملەكەت قۇرۋ قوعامى ورتالىق كوميتەتىنىڭ ٴتوراعاسى حاۋ ميڭجين، جۇڭگو دەموكراتيانى ىلگەرىلەتۋ قوعامى ورتالىق كوميتەتىنىڭ ٴتوراعاسى ساي دافىڭ، جۇڭگو شارۋا ـ جۇمىسشى دەموكراتيالىق پارتياسى ورتالىق كوميتەتىنىڭ ٴتوراعاسى حى ۋي، جۇڭگو ادىلەت پارتياسى ورتالىق كوميتەتىنىڭ ٴتوراعاسى جياڭ زوجۇن، 3 ـ قىركۇيەك ٴىلمي قوعامى ورتالىق كوميتەتىنىڭ ٴتوراعاسى ۋ ۋيحۋا، تايۋان دەموكراتيالىق اۆتونوميا وداعى ورتالىق كوميتەتىنىڭ ٴتوراعاسى سۋ حۇي، مەملەكەتتىك ساۋدا ـ ونەركاسىپشىلەر بىرلەستىگىنىڭ ٴتوراعاسى گاۋ يۇنلۇڭ، پارتيادا، توپتا جوق قايراتكەرلەر ۋاكىلى وۋياڭ چاڭچيۇڭ ىلگەرىندى ـ كەيىندى ٴسوز سويلەدى. ولار جۇڭگو كوممۋنيستىك پارتياسى ورتالىق كوميتەتىنىڭ كەزەكتەگى ەكونوميكالىق جاعداي جونىندەگى تالداۋىن، تۇجىرىمىن جانە سوڭعى جارتى جىلداعى ەكونوميكالىق قىزمەت جونىندەگى جوسپارىن، ويلارىن بۇكىلدەي قۇپتادى ٴارى رەفورمانى ونان ارى جاپپاي تەرەڭدەتۋ، جوعارى دەڭگەيدە سىرتقا ەسىك اشۋدى ىلگەرىلەتۋ، جاڭاشا وندىرگىش كۇشتەردىڭ كاسىپ سالاسى مەن تەحنيكالىق نەگىزىن بەكەمدەۋ، عىلىم ـ تەحنيكا ٴتۇزىلىسى رەفورماسىن تەرەڭدەتۋ، جاراتىلىستىق بايلىق باسقارۋ رەفورماسىن ىلگەرىلەتۋ، بيولوگيالىق جاساۋ كاسىبىنىڭ دامۋىن ٴبىر تۇتاس جوسپارلاۋ، ۇلى قۇرلىق پەن تايۋان قارجى قوسقان ەلەكتروندى ينفورماتسيا كاسىبىنىڭ تيبىن وزگەرتىپ، دارەجەسىن جوعارىلاتۋعا، جۇمىس ورنىن ورنىقتىرۋعا جانە جاستاردىڭ جۇمىسقا ورنالاسۋىن كەڭەيتۋگە قولداۋ كورسەتۋ، تۇتىنۋدى جەبەۋ ساياساتىنىڭ تەبىنىن ارتتىرۋ، كاسىپورىن جانە قورا ـ جاي كاسىبىنىڭ اقاۋسىز دامۋىنا دەم بەرۋ، حالىقتىق شارۋاشىلىقتىڭ دامۋ سەنىمىن ونان ارى سەرپىلتۋ سياقتىلار جونىندە پىكىرلەرى مەن ۇسىنىستارىن ورتاعا قويدى.
كوپشىلىكتىڭ ٴسوزىن مۇقيات تىڭداعاننان كەيىن، شي جينپيڭ ماڭىزدى ٴسوز سويلەدى. ول مىنالاردى ٴبىلدىردى: بيىلعى جىلدىڭ الدىڭعى جارتىسىندا جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، كۇردەلى، وزگەرىسكە تولى ەل ٴىشى ـ سىرتى جاعدايىندا، ٴبىز قىسىمعا شىداپ، بەلسەنە ىسكەرلىك كورسەتىپ، ماكرولىق رەتتەۋ ـ مەڭگەرۋدى كۇشەيتىپ، رەفورما جاساپ، ەسىك اشۋدى تەرەڭدەتىپ، حاۋىپ ـ قاتەرلەر مەن سىن ـ سايىستارعا ٴونىمدى توتەپ بەرىپ، ەكونوميكانىڭ قايتا ورلەۋ، جاقسارۋ جاعدايىن جالعاستىردىق، جوعارى ساپالى دامۋدا تاعى دا تىڭ قادام تاستادىق.
شي جينپيڭ بىلاي دەپ باسا دارىپتەدى: كەزەكتە ەلىمىزدىڭ ەكونوميكالىق دامۋى ٴىشىنارا قيىنشىلىقتار مەن ماسەلەلەرگە ٴدوپ كەلىپ وتىر، بۇل دامۋ بارىسىنداعى، تيپ جاڭالاۋ بارىسىنداعى ماسەلە، قۇلشىنۋ ارقىلى ونى بۇكىلدەي جەڭۋگە بولادى. ٴبىز دامۋ سەنىمىن بەكەمدەپ، ستراتەگيالىق تاباندىلىقتى ساقتاپ، ماسەلەلەر مەن سىن ـ سايىستارعا بەلسەندى، ىرىقتى تۇردە توتەپ بەرىپ، جوعارى ساپالى دامۋدىڭ ناقتى ناتيجەلەرىمەن جۇڭگو ەكونوميكاسىنىڭ بولاشاعى نۇرلى نازارياسىن اسقاقتاتۋىمىز كەرەك.
شي جينپيڭ بىلاي دەپ اتاپ كورسەتتى: الدىڭعى جارتى جىلدا ٴارقايسى دەموكراتيالىق پارتيا ـ توپتاردىڭ ورتالىق كوميتەتتەرى جانە پارتيادا، توپتا جوق قايراتكەرلەر پارتيا مەن مەملەكەتتىڭ وزەكتى قىزمەتىن مىقتاپ ارقاۋ ەتىپ، نازاردى جەرگىلىكتى جاعدايعا قاراي جاڭاشا وندىرگىش كۇشتەردى دامىتۋ، ەل ىشىندەگى ۇلكەن اينالىمدى ىركىلىسسىزدەندىرۋ، مەملەكەتتىڭ جاڭالىق اشۋ جۇيەسىنىڭ جالپى تۇلعالىق ونىمدىلىگىن جوعارىلاتۋ، جاساندى زەردەنىڭ ەكونوميكامەن، قوعاممەن توعىسا دامۋىن ىلگەرىلەتۋ، جەرگىلىكتى ورىنداردىڭ قازىنا قيىنشىلىعىن باسەڭدەتۋ سياقتىلارعا شوعىرلاندىرا وتىرىپ اقىل ـ كەڭەس بەرىپ، چاڭجياڭ دارياسىنىڭ ەكولوگيالىق ورتاسىن قورعاۋعا دەموكراتيالىق باقىلاۋدى ۇزدىكسىز ورىستەتىپ، جۇڭگو كوممۋنيستىك پارتياسى ورتالىق كوميتەتىنىڭ عىلمي شەشىم جاساۋىنا ماڭىزدى دايەك ازىرلەدى. شي جينپيڭ جۇڭگو كوممۋنيستىك پارتياسى ورتالىق كوميتەتى اتىنان كوپشىلىككە شىن جۇرەكتەن العىس ايتتى.
شي جينپيڭ دەموكراتيالىق پارتيا ـ توپتارعا، مەملەكەتتىك ساۋدا ـ ونەركاسىپشىلەر بىرلەستىگىنە جانە پارتيادا، توپتا جوق قايراتكەرلەرگە 3 ٴتۇرلى ٴۇمىت ارتتى. ٴبىرىنشى، جۇڭگو كوممۋنيستىك پارتياسى 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ رۋحىن ىشكەرىلەي ۇيرەنىپ جانە دايەكتىلەندىرىپ، قالىڭ مۇشەلەر مەن وزدەرى بايلانىس ورناتقان بۇقارانى رەفورمانى ونان ارى جاپپاي تەرەڭدەتۋدىڭ كەلەلى ماڭىزىن، كەلەلى پرينسيپتەرىن جانە كەلەلى شارالارىن تەرەڭ يگەرۋگە جەتەكتەپ، جۇڭگو كوممۋنيستىك پارتياسى ورتالىق كوميتەتىنىڭ شەشىمدەرى مەن ورنالاستىرۋلارىن قوعامداعى ٴار سالانىڭ ورتاق ەركىنە جانە سانالى ارەكەتىنە اينالدىرۋ كەرەك. ەكىنشى، بىرلىكساپتىڭ ورتاق يدەيا ـ ساياسي نەگىزىن ۇزدىكسىز بەكەمدەپ، يدەيالىق تانىمدى جۇڭگو كوممۋنيستىك پارتياسى ورتالىق كوميتەتىنىڭ ەكونوميكالىق جاعداي جونىندەگى تالداۋىمەن، تۇجىرىمىمەن شىن مانىندە بىرلىككە كەلتىرىپ، جاعداي مەن رەفورما، دامۋ بارىسىنداعى ماسەلەلەرگە دۇرىس قاراپ، العا باسۋ بارىسىنداعى ٴتۇرلى حاۋىپ ـ قاتەرلەر مەن سىن ـ سايىستاردى تىزە قوسا جەڭۋ كەرەك. ٴۇشىنشى، ەكونوميكالىق، قوعامدىق دامۋ نىساناسىن جۇزەگە اسىرۋ ٴۇشىن ۇزدىكسىز اقىل كورسەتىپ، ەسە قوسىپ، جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴۇشىنشى جالپى ماجىلىسىندە ورتاعا قويىلعان كەلەلى رەفورما شارالارىن تياناقتاندىرۋ، ەكونوميكالىق، قوعامدىق دامۋ بارىسىنداعى كەلەلى ماسەلەلەر، سونداي ـ اق ”15 ـ بەسجىلدىق“ جوبانىڭ الدىڭعى مەرزىمدىك زەرتتەۋ، جوسپارلاۋ قىزمەتى قاتارلىلاردى ارقاۋ ەتىپ، ىشكەرىلەي تەكسەرۋ ـ زەرتتەۋ جۇرگىزىپ، جۇڭگو كوممۋنيستىك پارتياسى ورتالىق كوميتەتىنىڭ عىلمي شەشىم جاساۋىنا دايەك ازىرلەۋ كەرەك.
شى تايفىڭ، ليۋ گوجۇڭ، حى ليفىڭ، جاڭ گوچيڭ، ۋ جىڭلۇڭ، جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ قاتىستى تاراۋلارىنىڭ جاۋاپتىلارى اڭگىمە ماجىلىسىنە قاتىناستى.
اڭگىمە ماجىلىسىنە پارتيا سىرتىنداعى قايراتكەرلەردەن تاعى شاۋ حۇڭ، حى باۋشياڭ، ۋاڭ گۋاڭچيان، چين بويۇڭ، جۋ يۇڭشين، ياڭ جىن جانە جاڭ ىندي، جياڭ ليپيڭ، ان ليجيا، لي لين قاتارلىلار قاتىناستى.
