شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ 16 ـ رەتكى توپتىق ۇيرەنۋىندە بىلاي دەپ باسا دارىپتەدى
بورىش ارقالاۋدى كۇشەيتىپ، وي جەلىسىندە، شارادا جاڭالىق اشىپ، قىزمەتتەردىڭ تياناقتانۋىن مىقتى يگەرىپ، قۇدىرەتتى، بەرىك وسى زامانعى شەكارا، تەڭىز، اۋە قورعانىسىن قۇلشىنا قۇرۋ كەرەك
شينحۋا اگەنتتىگىنىڭ 7 ـ ايدىڭ 31 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ ساياسي بيۋروسى 7 ـ ايدىڭ 30 ـ كۇنى تۇستەن كەيىن وسى زامانعى شەكارا، تەڭىز، اۋە قورعانىسى قۇرىلىسىن ىلگەرىلەتۋ جونىندە 16 ـ رەتكى توپتىق ۇيرەنۋ وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ۇيرەنۋدى باسقارعاندا ماڭىزدى ٴسوز سويلەپ بىلاي دەپ باسا دارىپتەدى: وسى زامانعى شەكارا، تەڭىز، اۋە قورعانىسى قۇرىلىسىن ىلگەرىلەتۋ _ مەملەكەت قورعانىسى مەن ارميانى وسىزامانداندىرۋدىڭ ىشكى تالابى، جوعارى دەڭگەيلى حاۋىپسىزدىك ارقىلى جوعارى ساپالى دامۋدى قامتاماسىز ەتۋدىڭ ٴتيىستى مازمۇنى، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ جونىنەن ماڭىزدى مانگە يە. جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، مەملەكەت حاۋىپسىزدىگى ستراتەگياسى مەن اسكەري ىستەر ستراتەگياسى جالپى جاعدايىن تياناق ەتىپ، ەل ٴىشى، حالىقارا سىندى ەكى كەلەلى جاعدايدى ٴبىر تۇتاس جوسپارلاپ، شەكارا، تەڭىز، اۋە قورعانىسىنىڭ جاڭا جاعدايىن، جاڭا ەرەكشەلىگىن، جاڭا تالابىن يگەرىپ، بورىش ارقالاۋدى كۇشەيتىپ، وي جەلىسىندە، شارادا جاڭالىق اشىپ، قىزمەتتەردىڭ تياناقتانۋىن مىقتى يگەرىپ، قۇدىرەتتى، بەرىك وسى زامانعى شەكارا، تەڭىز، اۋە قورعانىسىن قۇلشىنا قۇرۋ كەرەك.
وسى رەتكى ورتالىق كوميتەت ساياسي بيۋروسىنىڭ توپتىق ۇيرەنۋى 1 ـ تامىز ارميا مەرەكەسى قارساڭىندا وتكىزىلدى. شي جينپيڭ پارتيا ورتالىق كوميتەتى مەن ورتالىق اسكەري ىستەر كوميتەتى اتىنان بارشا حالىق ازاتتىق ارمياسىنىڭ كوماندير ـ جاۋىنگەرلەرىن، قارۋلى ساقشى ٴبولىمىنىڭ وفيتسەر ـ اسكەرلەرىن، ارميانىڭ اكىمشىلىك قىزمەتكەرلەرىن، حالىق جاساقتارى مەن زاپاستاعىلاردى مەرەكە بايلانىسىمەن قۇتتىقتادى!
ورتالىق اسكەري ىستەر كوميتەتى بىرلەسكەن شتابىنان حۋاڭ جيجۇڭ جولداس وسى زامانعى شەكارا، تەڭىز، اۋە قورعانىسى قۇرىلىسىن ىلگەرىلەتۋ ماسەلەسى جونىندە ٴتۇسىندىرۋ جاساپ، قىزمەت ۇسىنىسىن ورتاعا قويدى. ورتالىق كوميتەت ساياسي بيۋروسىنداعى جولداستار ٴتۇسىندىرۋدى مۇقيات تىڭدادى ٴارى تالقى جۇرگىزدى.
شي جينپيڭ ٴتۇسىندىرۋدى جانە تالقىنى تىڭداعاننان كەيىن ماڭىزدى ٴسوز سويلەدى. ول بىلاي اتاپ كورسەتتى: شەكارا، تەڭىز، اۋە قورعانىسى _ مەملەكەت يەلىك ۇقىعىنىڭ ماڭىزدى بەلگىسى، مەملەكەت حاۋىپسىزدىگىنىڭ ماڭىزدى قاقپاسى، مەملەكەت دامۋىنىڭ ماڭىزدى قامتاماسىزدىعى، پارتيامىز وعان ەجەلدەن ايرىقشا ٴمان بەرىپ كەلەدى. پارتيا 18 ـ قۇرىلتايىنان بەرى، پارتيا ورتالىق كوميتەتى شەكارا، تەڭىز، اۋە قورعانىسى قۇرىلىسىن ەل باسقارۋدا ماڭىزدى ورىنعا قويۋعا تاباندى بولىپ، پارتيا، ۇكىمەت، ارميا، ساقشى، حالىق كۇش بىرىكتىرىپ شەكارانى نىعايتىپ، قورعانىستى بەكەمدەۋدى كۇشەيتىپ، شەكارا، تەڭىز، اۋە قورعانىسىنىڭ باسشىلىق ـ باسقارۋ ٴتۇزىلىسى، كۇش قۇرىلىمى، ساياسات ـ ٴتۇزىمى سياقتى ٴبىر قىدىرۋ كەلەلى رەفورمالاردى اتقارۋعا باسشىلىق ەتىپ، شەكارا، تەڭىز، اۋە قورعانىسىنا قاتىستى ٴبىر قىدىرۋ كەلەلى ارەكەتتەردى ورىستەتۋگە قولباسشىلىق ەتىپ، ەلىمىزدىڭ تەرريتوريا يەلىك ۇقىعىن جانە تەڭىز ـ مۇحيت ۇقىق ـ مۇددەسىن پارمەندى قورعادى، مەملەكەت حاۋىپسىزدىگى مەن دامۋىنىڭ ستراتەگيالىق ىرىقتىلىعىن قورعادى. ەلىمىزدىڭ شەكارا، تەڭىز، اۋە قورعانىسى قۇرىلىسى تاريحي تابىسقا قول جەتكىزىپ، جاڭا باستامادا تۇردى.
شي جينپيڭ بىلاي دەپ باسا دارىپتەدى: كەزەكتە دۇنيە جۇزىندە 100 جىلدىق وزگەرىس جاعدايى جەدەل قۇبىلۋدا، ەلىمىزدىڭ شەكارا، تەڭىز، اۋە قورعانىسىنىڭ مازمۇنى مەن اياسىندا تەرەڭ وزگەرىس تۋىلدى، ىقپال كورسەتەتىن فاكتورلار اناعۇرلىم قىم ـ قۋىت، كۇردەلى بولىپ، شەكارا، تەڭىز، اۋە قورعانىسى قۇرىلىسى جاڭا وراي مەن سىن ـ سايىسقا ٴدوپ كەلدى. جۇيە كوزقاراسىنا تاباندى بولىپ، جالپى جاعدايدى ٴبىر تۇتاس جوسپارلاۋدى كۇشەيتىپ، وتاندى قورعاۋ، شەكارانى كۇزەتۋدىڭ تۇتاس تۇلعالىق قۋاتىن جوعارىلاتۋ كەرەك. شەكارا، تەڭىز، اۋە قورعانىسى قۇرىلىسى مەن شەكارا بويىنداعى، تەڭىز جاعالاۋىنداعى وڭىرلەردىڭ ەكونوميكالىق، قوعامدىق دامۋىن سايكەسە ىلگەرىلەتىپ، نەگىزدىك قۇرىلعىلاردى ۇلاستىرۋدى ـ تۇتاستىرۋدى جانە بىرگە قۇرۋدى، بىرگە پايدالانۋدى كۇشەيتىپ، ٴارى حاۋىپسىزدىكتى ٴونىمدى قورعاي الاتىن، ٴارى دامۋعا پارمەندى تىرەك بولا الاتىن شەكارا، تەڭىز، اۋە قورعانىسى قۇرىلىسى ارناسىن تۇلعالاۋ كەرەك. عىلىم ـ تەحنيكا ارقىلى قۋات ۇستەۋدى كۇشەيتىپ، شەكارا، تەڭىز، اۋە قورعانىسىنىڭ جاڭاشا شاراسى مەن شارت ـ جاعداي قۇرىلىسىن كۇشەيتىپ، شەكارا، تەڭىز، اۋە قورعانىسىن ستەرەولدى، زەردەلى باسقارۋ ـ مەڭگەرۋ جۇيەسىن ورناتۋ كەرەك. قاتىستى ەلدەرمەن تاتۋ كورشى، دوس بولۋدى جانە ناقتى ىستەر سەلبەستىگىن نىعايتىپ، شەكارا، تەڭىز، اۋە قورعانىسى قۇرىلىسىنا تاماشا توڭىرەكتىك ورتا قالىپتاستىرۋ كەرەك.
شي جينپيڭ بىلاي دەپ باسا دارىپتەدى: پارتيا 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ رۋحىن مۇقيات دايەكتىلەندىرىپ، شەكارا، تەڭىز، اۋە قورعانىسىنداعى كەلەلى ماسەلەلەردى زەرتتەۋدى تەرەڭدەتىپ، قول جەتكىزگەن رەفورما جەتىستىكتەرىن بەكەمدەپ، دارەجەسىن ٴوسىرىپ، بەلگىلەنگەن رەفورما مىندەتتەرىن تياناقتاندىرۋدى ويداعىداي يگەرىپ، سوڭعى رەفورمالاردى جوسپارلاۋدى كۇشەيتىپ، شەكارا، تەڭىز، اۋە قورعانىسى قۇرىلىسىندا جاڭالىق اشا دامۋدى ىلگەرىلەتۋ كەرەك. ٴبىر جاعىنان جۇمىس جۇرگىزۋگە، ٴبىر جاعىنان رەفورما جاساۋعا، ٴبىر جاعىنان كەمەلدەندىرۋگە تاباندى بولىپ، شەكارا، تەڭىز قورعانىسىنىڭ باسشىلىق ـ باسقارۋ ٴتۇزىلىسىن ساپالىلاندىرىپ، ارميا مەن جەرگىلىكتى ورىندى اتتاعان سايكەسۋ مەحانيزمىن كەمەلدەندىرىپ، قاتىستى زاڭ ـ ٴتۇزىم قۇرىلىسىن كۇشەيتىپ، شەكارا، تەڭىز قورعانىسى قىزمەتتەرىنىڭ جۇيەلى، ٴتارتىپتى بولۋىنا، ىركىلىسسىز، جوعارى ٴونىمدى بولۋىنا شىنايى كەپىلدىك ەتۋ كەرەك. مەملەكەتتىڭ كەڭىستىك قاتىناسىن باسقارۋ قىزمەتىن ويداعىداي ىستەپ، تومەن كەڭىستىك ەكونوميكاسىنىڭ اقاۋسىز دامۋىن جەبەۋ كەرەك. حالىقتىق اۋە قورعانىسى قۇرىلىسى ۇلگىسىن ساپالىلاندىرىپ، وسى زامانعى حالىقتىق اۋە قورعانىسى جۇيەسىن ورناتۋ كەرەك.
شي جينپيڭ بىلاي دەپ باسا دارىپتەدى: شەكارا، تەڭىز، اۋە قورعانىسى ارميا مەن جەرگىلىكتى ورىننىڭ كوپ تاراۋلارىن، كوپ ساتىسىن شارپيدى، پارتيا ورتالىق كوميتەتىنىڭ ورتالىقتانعان ٴبىر تۇتاس باسشىلىعىن كۇشەيتىپ، پارتيا، ۇكىمەت، ارميا، ساقشى، حالىقتىڭ كۇش بىرىكتىرىپ شەكارانى نىعايتۋ، قورعانىستى بەكەمدەۋ ابزالدىلىعىن ساۋلەلەندىرىپ، شەكارا، تەڭىز، اۋە قورعانىسى قۇرىلىسىندا ارميا مەن جەرگىلىكتى ورىننىڭ جوبانى ۇشتاستىرۋىن، مىندەتتى ٴتۇيىلىستىرۋىن، بايلىقتى ٴبىر تۇتاس جوسپارلاۋىن كۇشەيتىپ، ارميا، ساقشى، حالىقتىڭ بىرلەسكەن قورعانىس قولباسشىلىعىن جانە ارەكەتتى سايكەستىرۋىن كۇشەيتىپ، ٴبىر تۇتاس جۇيە قالىپتاستىرىپ، جۇدىرىقتاي جۇمىلۋ كەرەك. ارميا جەرگىلىكتى ورىنمەن بەلسەندى، ىرىقتى تۇردە ويداعىداي بايلانىس جاساۋى، سايكەسۋى كەرەك، ورتالىق پەن مەملەكەت ورگاندارىنداعى قاتىستى تاراۋلار، جەرگىلىكتى پارتكومدار مەن ۇكىمەتتەر مەملەكەت قورعانىسى تانىمىن كۇشەيتىپ، مۇقيات مىندەت اتقارىپ، جاۋاپكەرشىلىكتى ادا ەتىپ، مەملەكەت قورعانىسىن گۇلدەندىرۋ مەن بەكەمدەۋدىڭ ٴتۇرلى مىندەتتەرىن قاز ـ قالپىندا ويداعىداي تياناقتاندىرۋى كەرەك.
