_ پاريج وليمپيادا سپورت جارىسىندا جۇڭگو دەنە تاربيە ۋاكىلدەر ۇيىرمەسىندەگى شينجياڭ ساڭلاقتارى تاماشا كەلبەتىن ايگىلەدى
انار بۇلت \ شينجياڭ گازەتىنىڭ ٴتىلشىسى حۋاڭ شيڭ
جەرگىلىكتى ۋاقىت 8 ـ ايدىڭ 11 ـ كۇنى پاريج وليمپيادا سپورت جارىسى تابىستى اياقتادى. 40 التىن، 27 كۇمىس، 24 قولا، جالپى 91 مەدال العان جۇڭگو دەنە تاربيە ۋاكىلدەر ۇيىرمەسى پاريج وليمپيادا سپورت جارىسىندا ەلىمىز 1984 ـ جىلدان باستاپ جازعى وليمپيادا سپورت جارىسىنا جاپپاي قاتىناسقاننان بەرگى شەكارا سىرتىندا جارىسقا قاتىناسۋ تاريحىنداعى ەڭ تاماشا ناتيجەگە قول جەتكىزدى. مەدال تاقتاسىنداعى ٴبىر كۇمىس مەدالدى شينجياڭدىق بويجەتكەن ان چيشۋان مەن مەملەكەتتىك ايەلدەر ساداق اتۋ كومانداسىنداعى سەرىكتەرى الدى. بۇل ناتيجە شينجياڭ ساڭلاقتارىنىڭ جۇڭگو كومانداسى اتىنان وليمپيادا سپورت جارىسىنا قاتىناسىپ قول جەتكىزگەن ەڭ تاماشا ناتيجەسىنە تەڭەسۋى سانالادى، ان چيشۋان دا جاعاجاي ۆولەيبول ايەل شەبەرى ۋاڭ جيەدەن كەيىن وليمپيادا سپورت جارىسىنىڭ كۇمىس مەدالىن ەنشىلەگەن ەكىنشى شينجياڭ ساڭلاعى بولدى.
پاريج وليمپيادا سپورت جارىسىنا قاتىناسقان 404 جۇڭحۋا دەنە تاربيە ساڭلاعىنىڭ بەسەۋى شينجياڭنان كەلگەن، ان چيشۋاننان سىرت، تاعى ەرلەر بوكس شەبەرى توقتاربەك تاڭاتقان، ايەلدەر جاعاجاي ۆولەيبول شەبەرى شيا شين ـ ي، ەرلەر كۇرەس سپورتشىسى كابيران ٴابۋشايمان، ايەلدەر باسكەتبول سپورتشىسى ۋ تۇڭتۇڭ بار. جارىس كەزىندە، ولاردى قامتىعان ەلىمىزدىڭ دەنە تاربيە ساڭلاقتارى ايانباي ايقاسىپ، ىنتىماقتاسا كۇرەس جۇرگىزىپ، دوستىق بەينەدە اۋىس ـ كۇيىس جاساپ، تاماشا كەلبەتىن ايگىلەپ، باسەكەلىك جارىس ناتيجەسىندە جانە رۋحاني وركەنيەتتە بىردەي مول تابىسقا قول جەتكىزدى.
7 ـ ايدىڭ 28 ـ كۇنى پاريج وليمپيادا سپورت جارىسىنىڭ ساداق اتۋ ايەلدەر توپتىق شەشۋشى جارىسىندا ان چيشۋان، ياڭ شياۋلەي جانە لي جياماننان ۇيىمداسقان جۇڭگو كومانداسى جۇلدەگەرلىكتى ەنشىلەدى. بۇل سالماقتى كۇمىس مەدالدىڭ استارىندا بىرنەشە ۇرپاق شينجياڭدىق ساداق اتۋشىلاردىڭ قۇلشىنىسى مەن تاباندىلىعى جاتىر ٴارى 2008 ـ جىلعى بەيجيڭ وليمپيادا سپورت جارىسىندا شۋە حايفىڭ ەرلەر ساداق اتۋ توپتىق جارىسىنىڭ قولا مەدالىن العاننان كەيىن، شينجياڭ ساڭلاقتارىنىڭ ساداق اتۋ تۇرىندە قول جەتكىزگەن ەكىنشى وليمپيادا مەدالى.
40 نەشە جىلدان بەرى، ساداق اتۋ ٴتۇرى باستان ـ اياق شينجياڭنىڭ باسەكەلىك دەنە تاربيەسىندەگى ٴداستۇرلى باسىمدىققا يە ٴتۇر بولىپ كەلدى. 1984 ـ جىلى ىلە قازاق اۆتونوميالى وبلىسى شاپشال سىبە اۆتونوميالى اۋدانىنان كەلگەن با يۇڭشان لوس ـ انجەلەس وليمپيادا سپورت جارىسىنىڭ جارىس الاڭىندا بوي كورسەتتى، وسىدان كەيىن رۋ گۋاڭ، شۋە حايفىڭ، ان چيشۋان ىلگەرىندى ـ كەيىندى وليمپيادا سپورت جارىسىنىڭ جارىس الاڭىنان كورىندى، گو مەيجىن، با يۇڭشان، لۇڭ لينچياۋ جاتتىقتىرۋشى رەتىندە وليمپيادا سپورت جارىسىنا قاتىناستى. سوڭعى جىلدارى شينجياڭ ساداق اتۋ سپورتى حالىقارالىق وزىق دەڭگەيگە قاراي ۇزدىكسىز ارشىنداي ىلگەرىلەدى، ادام سانى ەڭ كوپ كەزدە ان چيشۋان، لي شينشين، يۇي مىڭتيڭ، ايىر دىڭساڭ قاتارلىلار مەملەكەتتىك توپتىق جاتتىعۋ كومانداسىنا تاڭدالدى. بولاشاعىنا توقتالعاندا ان چيشۋان: ”وليمپيادا جۇلدەگەرى بولۋ مەنىڭ كومبەم ەمەس، ٴبىر پەريود كەزەڭىنىڭ اياقتاۋى كەلەسى پەريود كەزەڭىنىڭ باستالعانىن بىلدىرەدى. مەن قايراتتانا العا ىلگەرىلەپ، اناعۇرلىم جوعارى نىساناعا قاراي ۇزدىكسىز ارشىنداي العا ىلگەرىلەيمىن“، ـ دەدى نىق سەنىممەن.
”ان چيشۋاننىڭ كۇمىس مەدال ەنشىلەۋى شينجياڭ ساداق اتۋ كومانداسى جونىنەن زور شابىت بولىپ عانا قويماي، شينجياڭداعى جەر ـ جەردىڭ ساداق اتۋ سپورتىن ورىستەتۋدە اناعۇرلىم جوعارى بەلسەندىلىك تانىتۋىنا دا مۇمكىندىك جاسادى“. اۆتونوميالى رايوندىق دەنە تاربيە مەكەمەسى دەنە تاربيە جاتتىعۋى 2 ـ ۇلكەن اترەتى پارتكومىنىڭ شۋجيى شۋە لەي بىلاي دەدى: بولاشاقتا ٴبىز، ٴبىر جاعىنان، مەملەكەتتىك ساداق اتۋ كومانداسىنىڭ قولداۋىنا بەلسەنە قول جەتكىزىپ، 5 جىل ىشىندە ٴبىر توپ تاڭداۋلى جاتتىقتىرۋشى باۋلۋعا ۇمتىلىس جاسايمىز؛ ەندى ٴبىر جاعىنان، باستاپقى دارەجەلى زاپاس دارىندىلاردى تاڭداۋ نەگىزىن ويداعىداي قالاپ، 2028 ـ جىلى بۇكىل شينجياڭداعى 14 ايماق، وبلىس، قالانىڭ بارىندە ساداق اتۋ سپورتىن ورىستەتۋگە كۇش سالامىز.
پاريج ساپارى توقتاربەك تاڭاتقاننىڭ وليمپيادا سپورت جارىسىنا ەكىنشى رەت قاتىناسۋى، 2023 ـ جىلعى بوكس الەمدىك جۇلدەلى جارىسىنىڭ جۇلدەگەرى، حاڭجوۋ ازيا سپورت جارىسىنىڭ اعا جۇلدەگەرى رەتىندە، ول وليمپيادا سپورت جارىسىنىڭ 16 مىقتىنى تاڭداۋ جارىسىندا ٴبىر دۇركىن قارسىلاسىن سوققىعا جىققانىمەن، الايدا ەڭ سوڭىندا ۇپاي سانىنان جارىستا جەڭىلىپ قالدى. التايدان كەلگەن بۇل قايسار جىگىت كەلەر كەزەكتى وليمپيادا سپورت جارىسىن نىسانا ەتتى، ”قايتىپ بارىپ ٴبىر مەزەت تىنىعىپ ـ رەتتەلگەننەن كەيىن ۇزبەي جاتتىعۋ جاساپ، ٴوزىمنىڭ ورتا، الىس ارالىقتى ەرەكشەلىگىمدى ساۋلەلەندىرەمىن“.
2000 ـ جىلعى سيدنەي وليمپيادا سپورت جارىسىنان بەرى، شينجياڭنان جالپى 5 سپورتشى، 8 ادام (رەت) جۇڭگو دەنە تاربيە ۋاكىلدەر ۇيىرمەسىنە تاڭدالىپ، 6 كەزەك وليمپيادا سپورت جارىسىنىڭ بوكس جارىسىنا قاتىناستى، شينجياڭ بوكسى جۇڭگو بوكسىنىڭ ماڭىزدى قۇرامداس بولىگىنە اينالدى. ”وسى كەزەكتى وليمپيادا سپورت جارىسىندا ٴبىز وتە كوپ نارسە ۇيرەندىك، تاجىريبە دە توپتادىق، ٴوز جەتەرسىزدىگىمىز بەن ولقىلىقتارىمىزدى دا بايقادىق. وسى كەزەكتى وليمپيادا سپورت جارىسىنىڭ اياقتاۋى كەلەر كەزەكتى وليمپيادا سپورت جارىسىنىڭ باستالۋى بولىپ تابىلادى، بولاشاقتا مۇنان دا جاقسى بولاتىندىعىمىزعا سەنىمىمىز كامىل“، ـ دەدى جۇڭگو بوكس كومانداسىنىڭ جاتتىقتىرۋشىسى، شينجياڭ بوكس سپورتىن باسقارۋ ورتالىعىنىڭ مەڭگەرۋشىسى ابدۇشۇكىر ميجيت. قازىرگە دەيىن شينجياڭ بوكس كومانداسىنان جالپى 6 سپورتشى مەملەكەتتىك بوكس كومانداسىندا توپتىق جاتتىعۋ جاساۋدا.
ٴۇش ۇلكەن دوپ ىشىندە شيا شين ـ ي مەن سەرىگى شۋە چىن ٴۇرتىس ەكى كەزەك وليميپادا سپورت جارىسىندا 16 مىقتى قاتارىندا قالعانىمەن، الايدا بۇل دا جۇڭگو قايراڭ ۆولەيبول سپورتىنىڭ جاقىنعى 3 كەزەك وليمپيادا سپورت جارىسىنداعى ەڭ تاماشا ناتيجەسى بولىپ تابىلادى؛ جۇڭگو ايەلدەر باسكەتبول كومانداسىنىڭ مۇشەسى ۋ تۇڭتۇڭ دا وليمپيادا سپورت جارىسىندا تاماشا كەلبەتىن ايگىلەدى، شينجياڭ ايەلدەر باسكەتبولىنىڭ جاڭا مۇشەسى بولعان ول وسى كوماندانىڭ كوشباسشى تۇلعاسىنا اينالدى. سوڭعى جىلدارى اۆتونوميالى رايوندىق دەنە تاربيە مەكەمەسى باسكەتبول مەن جەڭىل اتلەتيكا تۇرىندە دەنە تاربيە مەن وقىتۋدى توعىستىرۋعا ايرىقشا ٴمان بەرىپ، تاڭداۋلى جاتتىقتىرۋشىلاردى مەكتەپكە كىرگىزۋ ارقىلى مەكتەپ اۋلاسىندا تاڭداۋلى جاتتىقتىرۋشىلاردى باۋلۋعا كومەكتەسىپ، دارىندىلاردى بايقاۋ، دارىندىلاردى باۋلۋ، مەملەكەتكە تاڭداۋلى سپورتشى باۋلۋ سىندى 3 قادامدى ”10 جىلدىق دارىندىلاردى باۋلۋ جوسپارى“ جۇيەسى ينجەنەرياسىن اتقاردى، شينجياڭدا 3 ۇلكەن دوپ ٴتۇرىنىڭ دامۋ اياق الىسىنىڭ بارعان سايىن بەكەمدەلە تۇسەتىندىگىنە سەنەمىز.
26 جاستاعى كابيران ٴابۋشايمان 2023 ـ جىلعى حاڭجوۋ ازيا سپورت جارىسىنىڭ ەرلەر ەركىن كۇرەسىندەگى 97 كيلوگرامداعىلار جارىسىنىڭ قولا مەدال يەگەرى ٴارى شينجياڭ ەرلەر ەركىن كۇرەس ٴتۇرى تاريحىنان بەرى وليمپيادا سپورت جارىسىنا قاتىناسۋ تولىمدىلىعىن العان تۇڭعىش ساڭلاق. ەرلەر ەركىن كۇرەسى 97 كيلوگرامداعىلار جارىسىنىڭ العاشقى كەزەك بەلدەسۋىندە جۇڭگو كومانداسىنا ۋاكىل بولىپ جارىسقا شىققان كابيران وكىنىشتى تۇردە امەريكانىڭ وليمپيادا اعا جۇلدەگەرى سىنايدىردان جەڭىلىپ قالدى.
ٴدوربىلجىن اۋدانى اتى زاتىنا ساي كۇرەس مەكەنى، وليمپيادا سپورت جارىسىنا قاتىناسقان ٴۋاليقان، كابيران جانە مەملەكەتتىك اعا جۇلدەگەرلەر ٴتوربات، راحات گىمىڭحان تۇگەلدەي وسى ارادان شىققان. زاپاس دارىندىلاردى اناعۇرلىم ويداعىداي تاڭداۋ ٴۇشىن، 8 ـ ايدىڭ 4 ـ كۇنى 2024 ـ جىلعى شينجياڭنىڭ ”بالۋان جۇلدىزداردى تاڭداۋ جوسپارى“ حالىقارالىق ۇلگىدەگى كۇرەس جاتتىعۋ لاگەرى ٴدوربىلجىن اۋدانىندا تابىسپەن اياقتادى، بۇكىل شينجياڭنىڭ جەر ـ جەرىنەن كەلگەن 180 نەشە جاس ٴوسپىرىم سپورتشى وسى رەتكى جاتتىعۋعا قاتىناستى. كەزەكتە شينجياڭ كۇرەس كومانداسىنان جالپى 10 سپورتشى مەملەكەتتىك كوماندادا توپتىق جاتتىعۋ جاساۋدا.
پاريج وليمپيادا سپورت جارىسىنىڭ بارلىق جارىسى تابىسپەن اياقتادى، جاڭا جورىق جۋىقتا باستالادى. ايانباي ايقاسۋ ارمانعا جەتكىزەدى، كۇرەس شۇعىلالى ناتيجە جاراتادى، ٴتىپتى دە كوپ شينجياڭ ساڭلاقتارىنىڭ جۇڭگو دەنە تاربيە ۋاكىلدەر ۇيىرمەسىنە تاڭدالىپ، دۇنيە جۇزىلىك ۇلكەن جارىستاردا مەملەكەتكە داڭق اپەرۋىن، شينجياڭنىڭ ابىرويىن اسىرۋىن كۇتەمىز.
