تيانشان تورى - شينجياڭ گازەتىنىڭ ٴتىلشىسى حي حۇڭۋي
”كونەسىنىڭ ورنىنا جاڭاسىن اۋىستىرۋ“ بيىلعى تۇتىنۋ بازارىندا اۋىزعا ەڭ كوپ الىنعان ٴسوز بولدى. ناقتىلى ساياساتتىق قوسىمشا قاراجات تۇتىنۋ بازارىنا جاڭا ومىرشەڭدىك كۇش ۇستەدى.
تۇتىنۋ ٴبىر جاعىنان ماكرولىق ەكونوميكاعا، ەندى ٴبىر جاعىنان سان وتباسىنىڭ تۇرمىسىمەن بايلانىسىپ، ەكونوميكالىق دامۋدىڭ ماڭىزدى قوزعالتقىشىنا سايادى. كونەسىنىڭ ورنىنا جاڭاسىن اۋىستىرۋ كاسىپورىندار مەن بۇقاراعا نەندەي ىقپال اكەلدى؟ ۇكىمەت، كاسىپورىن، قوعام سياقتى ٴار جاقتىڭ ىلگەرىلەتۋىندە، شينجياڭنىڭ تۇتىنۋ بازارىندا قانداي جاڭا بەتالىس كورىلدى، نەندەي ماسەلەلەر ورىن تەۋىپ وتىر، ۇلگى ەتۋگە تاتيتىن قانداي تاماشا ادىستەر بار؟ سونىمەن بۇل جونىندە تىلشىلىك ىستەدىك.
ساياساتتىڭ پايداسى جەدەل جارىققا شىقتى
جۋىقتا سانجى حۇيزۋ اۆتونوميالى وبلىسى 2024 ـ جىلعى تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ارەكەتىن باستادى. بۇل جولعى قيمىلعا سايكەسۋ ٴۇشىن سانجى وبلىسى وجياديانچي باسقارۋ شەكتى سەرىكتەستىگى 20دان استام ايگىلى ماركامەن سەلبەسىپ، كەڭ كولەمدە قوسىمشا قاراجات بەرىپ تيىمدىلىك جاساۋ قيمىلىن بىرگە شىعاردى.
وسى سەرىكتەستىكتىڭ دۇكەن ديرەكتورى جين ميڭ بىلاي دەپ تانىستىردى: كاسىپورىن 20 ميلليون يۋان قوسىمشا قاراجات قارجىسىن قوستى، ٴۇي ەلەكتر جابدىقتارىنا ەڭ كوپ بولعاندا 3000 يۋان قوسىمشا قاراجات بەرىلەدى. تۇتىنۋشىلاردىڭ سەزىنۋىن جوعارىلاتۋ ٴۇشىن وجياديانچي ٴۇي ەلەكتر جابدىقتارىن تەگىن جەتكىزۋ، اشۋ، ورناتۋ، تاسۋ سياقتى ٴبىر بەكەتتىك قىزمەت وتەۋدى شىعاردى.
جاسىل تۇتىنۋ تۇتىنۋدى سەرپىلتەتىن جاڭا قوزعالتقىشقا اينالۋمەن بىرگە، مۇنان دا ماڭىزدىسى، ٴوندىرىس، تۇرمىس ٴتاسىلىنىڭ جاسىل، تومەن كومىر قىشقىل گازدى تيپ جاڭالاۋىن ىلگەرىلەتۋدىڭ تەتىگى. 6 ـ ايدىڭ سوڭىندا شينجياڭنىڭ تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ارەكەتى باستالىپ، شينجياڭنىڭ جەر ـ جەرىندەگى اۆتوكولىك، ٴۇي ەلەكتر جابدىقتارى بازارىندا جاسىل تۇتىنۋدىڭ ”شاعىن ورلەۋى“ كوتەرىلدى.
ٴتىلشىنىڭ كوزىنە ۇرىمجىدەگى كوپتەگەن ەلەكتر جابدىقتارىن ساتۋ ورىندارىنان ”كونەنى جاڭاعا اۋىستىرۋ“ دەگەن جازۋ جازىلعان جارياناما ايرىقشا ءتۇستى، ٴالسىن ـ ٴالى تۇتىنۋشىلار كەلىپ اقىل ـ كەڭەس سۇراپ تۇرادى ەكەن. ۇكىمەتتىڭ قوسىمشا قاراجاتىنىڭ، كاسىپورىنداردىڭ پايدا جەتكىزۋىنىڭ جەبەۋىندە، اۋىستىرىپ ساتىپ العان تۇتىنۋشىلاردىڭ سانى كورنەكتى ارتتى.
8 - ايدىڭ 2 - كۇنى تۇرپان قالاسى گاۋچاڭ رايونى ”اۆتوكولىك، ٴۇي ەلەكتر جابدىقتارىنىڭ كونەسىن جاڭاسىنا اۋىستىرۋ“ ارقىلى تۇتىنۋدى جەبەۋ قيمىلىن وتكىزدى (ماتەريال سۋرەت). سۋرەتتى ٴسۇبينۇر ٴىلحام تۇسىرگەن
شينجياڭ سۋنيڭ يگوۋ كونەسىنىڭ ورنىنا جاڭاسىن اۋىستىرۋ ارەكەتىنە بەلسەنە ٴۇن قوسىپ، بۇكىل شينجياڭداعى دۇكەندەردە ٴۇي ەلەكتر جابدىقتارىنىڭ كونەسىنىڭ ورنىنا جاڭاسىن اۋىستىرۋ، قىزمەت وتەۋدى شاعىن اۋماقتارعا جەتكىزۋ قيمىلىن ورىستەتتى.
قيمىل باستالعاننان بەرى جاڭالاۋ تاپسىرىسىنىڭ جالپىلىق ساتىلىم مولشەرىندە يەلەيتىن سالىستىرماسى شامامەن %30 بولدى“. شينجياڭ سۋنيڭ يگوۋ ساۋدا شەكتى سەرىكتەستىگىنىڭ باس ديرەكتورى ۋاڭ يەجى بىلاي دەپ تانىستىردى: سۋنيڭ يگوۋ ”ۇكىمەت پەن كاسىپورىن سەلبەسىپ قوسىمشا قاراجات بەرۋ كۇزگى ٴۇي اشەكەيى مەرەكەسى“ سياقتى قيمىلداردى دا ورىستەتىپ، ۇكىمەتتىڭ تۇتىنۋ قوسىمشا قاراجاتىن بەرۋى نەگىزىندە كوپ ٴتۇرلى تيىمدىلىكتەردى قوسىپ، تۇتىنۋشىلارعا تيىمدىلىك جاسادى. قىزمەت وتەۋ دەڭگەيىن جوعارىلاتۋدا سۋنيڭ يگوۋ تەگىن تازالاۋ، تەگىن جاڭالاۋ، تەگىن سىناق رەتىندە پايدالانۋ جونىنەن قىزمەت وتەپ، تۇتىنۋشىلارعا تۇتاس كورىنىستىك زات ساتىپ الۋدىڭ جاڭا سەزىنۋىن ۇسىندى.
بازاردى جانداندىرۋدا، ٴسوز جوق، ساياساتتىڭ پايداسىن جەدەل جارىققا شىعارۋ كەرەك. كەڭ كولەمدە جابدىق جاڭالاۋدى جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋدى ىلگەرىلەتۋ ٴۇشىن، بيىل شينجياڭ ”1 + 10+ 1“ ساياسات جۇيەسىن شىعاردى ٴارى «اۆتونوميالى رايوننىڭ كەڭ كولەمدە جابدىق جاڭالاۋدى جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋدى ىلگەرىلەتۋدى اتقارۋ جوباسىن» باسىپ تاراتتى.
سونىمەن بىرگە سانجى، تۇرپان، قارامايلى سياقتى كوپتەگەن ايماق، وبلىس، قالالار ىلگەرىندى ـ كەيىندى اتقارۋ جوباسىن نەمەسە ەگجەي ـ تەگجەيلى قاعيداسىن جاريالاپ، ناقتى قوسىمشا قاراجات بەرىپ قولداۋ كورسەتەتىندىگىن ايقىندادى.
بيىل شينجياڭ ورتالىق پەن جەرگىلىكتى ورىن قازىنا قارجىسىنان 430 ميلليون يۋاندى قولعا كەلتىرىپ، اۆتوكولىكتىڭ، ٴۇي ەلەكتر جابدىقتارىنىڭ كونەسىنىڭ ورنىنا جاڭاسىن اۋىستىرۋ ارناۋلى ارەكەتىن ىلگەرىلەتتى. اۆتونوميالى رايوندىق ساۋدا ىستەرى مەڭگەرمەسى كاسىپورىنداردى تۇتىنۋدى جەبەۋ قيمىلىن ورىستەتۋگە بەلسەنە جەتەكتەپ، قازىرگە دەيىن اۆتونوميالى رايون دارەجەسىندە 30دان استام (رەت) قيمىل ورىستەتتى.
اۆتونوميالى رايوندىق ساۋدا ىستەرى مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى جۋ حىشياڭ بىلاي دەپ تانىستىردى: ساۋدا ىستەرى مەڭگەرمەسى كونەسىنىڭ ورنىنا جاڭاسىن اۋىستىرۋ ارەكەتىنىڭ ٴتۇرلى شارالارىن ٴۇرتىس تەرەڭدەتىپ، ٴتۇيىندى وڭىرلەرگە قۋزاۋ ـ جەتەكشىلىك ەتۋدى كۇشەيتىپ، تۇتىنۋ بازارىنداعى ٴتۇرلى شارۋاشىلىق تۇلعالارى مەن فينانس قۇرىلىمدارىنىڭ تەرەڭدەي ات سالىسۋىن ٴبىر تۇتاس جوسپارلايدى. سونىمەن بىرگە تۇرعىن ٴۇي جانە قالا، اۋىل قۇرىلىسى مەڭگەرمەسى سياقتى تاراۋلاردىڭ بىرلەسكەن قىزمەت مەحانيزمىن سۇيەنىش ەتىپ، ساياساتتاردى ٴتۇيىلىستىرۋدى جانە بىرگە ارەكەتتەنۋدى كۇشەيتىپ، ٴۇي ەلەكتر جابدىقتارى جانە ٴۇي اشەكەيى، قۇرىلىس ماتەريالدارى، ٴۇي جيھازدارى سياقتى قونىستانۋ تۇرىندەگى تاۋارلاردى تۇتىنۋدى بىرگە جەبەيدى.
تاياۋدا مەملەكەتتىك دامۋ جانە رەفورما كوميتەتى، قازىنا مينيسترلىگى «كەڭ كولەمدە جابدىق جاڭالاۋعا جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋعا ۇدەتە قولداۋ كورسەتۋ جونىندەگى ٴبىر قىدىرۋ شارالاردى» باسىپ تاراتىپ، 300 ميلليارد يۋان اينالاسىندا اسا ۇزاق مەرزىمدىك ەرەكشە زايوم قارجىسىن ٴبىر تۇتاس ورنالاستىرىپ، كەڭ كولەمدە جابدىق جاڭالاۋعا جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋعا ۇدەتە قولداۋ كورسەتۋدى العا قويدى.
جۇڭگو ينفورماتسيا قوعامىنىڭ ۇنەمىلىك ىستەرگە جاۋاپتى القاسى جۋ كىلي بىلاي دەپ اتاپ كورسەتتى: ساياسات ورنالاستىرۋ جاعىنان قاراعاندا، بۇل رەتكى كەڭ كولەمدى شىدامدى تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ارەكەتىنىڭ كوزدەگەنى قازىرگى تۇتىنۋ بازارىنىڭ ومىرشەڭدىك كۇشىن قاۋلاتۋ عانا ەمەس، مۇنان دا ماڭىزدىسى، جاڭاشا وندىرگىش كۇشتەردى دامىتۋدىڭ، جوعارى ساپالى قامداۋ ارقىلى جاڭا سۇرانىس جاراتۋعا جەتەكشىلىك ەتۋدىڭ تەرەڭ بەينەسى.
كونە بۇيىمداردى ٴبىر جاقتى ەتۋدەگى بوگەتتى تالقاندادى
”جاڭاسىن اۋىستىرۋ + جيناپ الۋ“ تىزبەگىندە ”جيناپ الۋ“ بۋىنى اينالمالى ەكونوميكانى دامىتۋعا تۇساۋ بولعان شەشۋشى بوگەتتى تۇيىنگە اينالدى. اۆتونوميالى رايوندىق ساۋدا ىستەرى مەڭگەرمەسى 13 تاراۋمەن بىرلەسىپ «اۆتونوميالى رايوننىڭ تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ارەكەتىن ىلگەرىلەتۋ جوباسىن» بىرگە باسىپ تاراتىپ، ساياسات جاعىنان ىنتالاندىرۋ جانە مەحانيزمدى جاڭالاۋ ارقىلى تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋدىڭ ۇزاق ٴونىمدى مەحانيزمىن بىرتىندەپ ورناتىپ، بايلىقتان اينالمالى پايدالانۋ جۇيەسى قۇرىلىسىن ىلگەرىلەتۋ كەرەكتىگىن العا قويدى.
”كونە ٴۇي ەلەكتر جابدىقتارىن، ٴۇي جيھازدارىن جاراقسىز بۇيىمدار رەتىندە ساتقانعا قيمايدى ەكەنسىڭ، وتكەرمەلەۋ تۇعىرىندا وتكەرمەلەپ ساتۋ بارىسىندا كوڭىلىڭ تولاتىن الارمان تابۋ دا توتەنشە قيىن ەكەن“. ٴۇرىمجى قالاسىنىڭ تۇرعىنى تيان شياۋحۇي: ”كوپ ويلاي كەلىپ تاعى ٴبىر مەزەت ەپتەپ ـ سەپتەپ ىستەتە تۇرمايمىن با دەگەن ويعا كەلەدى ەكەنسىڭ“، ـ دەدى.
تيان شياۋحۇيدىڭ كەشىرمەسى قازىرگى كونە بۇيىمداردى ٴبىر جاقتى ەتۋدەگى قيىنشىلىقتىڭ شاعىن كورىنىسى سانالادى. كونە بۇيىمداردى ٴبىر جاقتى ەتۋ جاڭاسىن ساتىپ الۋدان اناعۇرلىم قيىن، وسىنداي داعدارىس سەبەبىنەن كوپتەگەن وتباسى كونەسىن جاڭالاۋدان تايساقتايدى.
كونەسىنىڭ ورنىنا جاڭاسىن اۋىستىرۋداعى كوپتەگەن اينالىم تىزبەگى كونە بۇيىمداردى ٴبىر جاقتى ەتۋ بۋىنىندا بوگەلىپ وتىر. سونىمەن بىرگە وتكەرمەلى ٴۇي جيھازدارى ساۋداگەرلەرى مەديالارعا قاريدار تابۋدىڭ قيىن ەكەندىگىن ايتتى.
وسى قيىن ماسەلەنى شەشۋ ٴۇشىن، اۆتونوميالى رايوندىق ساۋدا ىستەرى مەڭگەرمەسى 15 قاتىستى تاراۋمەن بىرلەسىپ «قايتا تۋىندايتىن بايلىقتى جيناپ الۋ جۇيەسى قۇرىلىسىن جەدەل ىلگەرىلەتۋدى اتقارۋ جوباسىن» دايىنداپ، ٴبىر قىدىرۋ ناقتى شارالاردى العا قويدى. شينجياڭ قايتا تۋىندايتىن بايلىقتى جيناپ الۋ جۇيەسىن كەمەلدەندىرىپ، جاراقسىز، كونە ٴۇي ەلەكتر جابدىقتارىن، ٴۇي جيھازدارىن جيناپ الۋ تورىن جاڭالاپ، دارەجەسىن ٴوسىرىپ، جيناپ الۋ ونىمدىلىگىن جوعارىلاتادى. سونىمەن بىرگە كاسىپورىنداردى جيناپ الۋ ۇلگىسىندە جاڭالىق اشىپ، ”كونە، جاراقسىز بۇيىمداردى ارناۋلى كولىكپەن ۇيىنە بارىپ جيناپ الۋ“ سياقتى يكەمدى جىلجىمالى جيناپ الۋ تاسىلدەرىن جالپىلاستىرىپ، جاراقسىز، كونە ٴۇي ەلەكتر جابدىقتارىن جيناعان زامان الىپ كەتۋدى جۇزەگە اسىرادى.
7 - ايدىڭ 20 - كۇنى ٴۇرىمجى قالاسى حۇڭشان باقشاسىندا ”شۇيموگوۋ رايونىندا تاڭداۋلىلارىن تاڭداۋ، ساۋدانى جەبەپ، حالىققا تيىمدىلىك جاساۋ“ تۇتىنۋ بۇيىمدارىنىڭ كونەسىن جاڭاسىنا اۋىستىرۋ جەلىلەس قيمىلىنا قاتىناسقان بۇقارا ٴۇي ەلەكتر جابدىقتارىنىڭ كونەسىن جاڭاسىنا اۋىستىرۋ قوسىمشا قاراجاتىنىڭ جاي - جاپسارىن ۇعىسۋدا (ماتەريال سۋرەت). سۋرەتتى تيانشان تورى - شينجياڭ گازەتىنىڭ ٴتىلشىسى چين پىڭ تۇسىرگەن
وسى شارالار قالا تۇرعىندارىنىڭ كونە بۇيىمداردى ٴبىر جاقتى ەتۋىنە قولايلىلىق جاساۋمەن بىرگە، كاسىپورىندارعا جاڭا ارتۋ ٴتۇيىنىن ازىرلەدى. تۇتىنۋ بازارىندا كونەسىنىڭ ورنىنا جاڭاسىن اۋىستىرۋ قيمىلى سالتقا اينالدى. ارالاۋ بارىسىندا ٴتىلشى مىنالاردى بايقادى: حۋاۋي، رۇڭياۋ، شياۋمي سياقتى كوپتەگەن قول تەلەفون ماركالارى تۇگەلدەي كونەسىنىڭ ورنىنا جاڭاسىن اۋىستىرۋ قىزمەت وتەۋىن العا قويدى، جيناپ الۋ سوماسى نەشە 100 يۋاننان 10 نەشە مىڭ يۋانعا دەيىن بولدى، سونىمەن بىرگە ٴۇي ەلەكتر جابدىقتارى بازارى دا كونەسىنىڭ ورنىنا جاڭاسىن اۋىستىرۋدىڭ جاڭا قاۋىرت مەزگىلىن قارسى الىپ، سۋنيڭ يگوۋ، جۇيران جىجيا سياقتى ساۋدا ورىندارى بەلگىلى سوماعا تولسا تيىمدىلىك جاساۋ، زات ساتىپ السا تۇتىنۋ بەلەتىن بەرۋ سياقتى تيىمدىلىك جاساۋ قيمىلدارىن جابال شىعارىپ، قوسىمشا قاراجات بەرۋ سەرپىنى نەشە 100 يۋاننان 1000 يۋاننىڭ ۇستىنە دەيىن شىقتى.
كاسىپ ىلگەرىلەتۋشىلەردىڭ ٴبىرى رەتىندە، جيڭدۇڭ 2016 ـ جىلدىڭ وزىندە ـ اق ينتەرنەت جەلىسىندە ٴۇي ەلەكتر جابدىقتارى ٴتۇرىنىڭ كونەسىنىڭ ورنىنا جاڭاسىن اۋىستىرۋ قىزمەت وتەۋىن العا قويدى ٴارى قىزمەت وتەۋ كولەمىن ۇزدىكسىز كەڭەيتتى. قازىر جيڭدۇڭنىڭ كونەسىنىڭ ورنىنا جاڭاسىن اۋىستىرۋ بويىنشا قىزمەت وتەۋى تەلەۆيزور، توڭازىتقىش، قول تەلەفون، كومپيۋتەر سياقتى ونىمدەردى جانە دارەت شەلەگى، توسەنىش سياقتى ٴۇي جابدىقتارى بۇيىمدارىن قامتىعان 200دەن ارتىق تۇرگە جىكتەلگەن ٴونىمدى قامتىدى.
كاسىپورىنداردىڭ وزدىگىنەن ارەكەتتەنۋىنەن سىرت، ۇكىمەت تە قولداۋ كورسەتۋ سەرپىنىن ارتتىرۋدا. اۆتونوميالى رايوندىق ساۋدا ىستەرى مەڭگەرمەسى ورتالىق قازىنادان اۋدان ٴوڭىرىنىڭ ساۋدا قۇرىلىسى ارەكەتىنە ورنالاستىرىلعان قاتىستى قارجىنى ٴبىر تۇتاس جوسپارلاپ پايدالانىپ، اۋدان وڭىرىندەگى جاراقسىز، كونە ٴۇي ەلەكتر جابدىقتارىن، ٴۇي جيھازدارىن جيناپ الۋ، وتكەرمەلەۋ، جيناۋ ـ جونەلتۋ پۋنكتتەرىن جاڭالاپ، قۇرىپ، اۋدان ٴوڭىرىنىڭ قايتا تۋىندايتىن بايلىقتى شوعىرلاندىرۋ جانە وتكەرمەلەۋ قابىلەتىن جوعارىلاتادى. سونىمەن بىرگە اۋىل ـ قالاشىق ساۋدا ورتالىعى سياقتى ساۋدا تور تۇيىندەرىنىڭ جاراقسىز، كونە ٴۇي ەلەكتر جابدىقتارىن جيناپ الۋ، وتكەرمەلى ٴۇي ەلەكتر جابدىقتارىن ساتۋ، جوندەۋ سياقتى تۇرمىستىق قىزمەت وتەۋىنە قولداۋ كورسەتىپ، قىزمەت وتەۋ رولىن ارتتىرادى.
جۋ حىشياڭ بىلاي دەپ تانىستىردى: شينجياڭ 2030 ـ جىلعا دەيىن قايتا تۋىندايتىن بايلىقتان اينالمالى پايدالانۋ جۇيەسىن نەگىزىنەن ورناتىپ، جيناپ الۋ قىزمەت وتەۋىمەن قالا، اۋىلدى تۇتاس قامتۋدى جۇزەگە اسىرىپ، قايتا تۋىندايتىن بايلىقتى جيناپ الۋ كولەمىن ونان ارى كەڭەيتىپ، نەگىزگى جاراقسىز، كونە زاتتىق ماتەريالداردى جيناپ الۋ سالىستىرماسىن 2023 ـ جىلداعىدان %20 ارتتىرۋعا قۇلشىنادى.
”بار بولۋدان“ ”ساپالى بولۋعا“ ويىسىپ، تۇرمىس ساپاسى جوعارىلادى
”ۇيدەگى تەلەۆيزوردى، كىر جۋعىشتى 10 نەشە جىل پايدالاندىق، جۋىقتان بەرى ۇنەمى كىلتيپان شىعىپ تۇر“. ٴۇرىمجى قالاسىنىڭ تۇرعىنى جاڭ حايچاۋ ۇيىندەگى ەلەكتر جابدىقتارىن جاڭالاۋ ويىندا بولىپ كەلدى، تاياۋدا ٴۇي ەلەكتر جابدىقتارى بازارىن ارالاپ، ٴتۇرلى زەردەلى باسقارىلاتىن جابدىقتارعا قاتتى قىزىقتى. ”كونەسىنىڭ ورنىنا جاڭاسىن اۋىستىرۋعا قوسىمشا قاراجات بەرۋ ساياساتى تياناقتاندى، وسى ورايدا كونە ٴۇي ەلەكتر جابدىقتارىن جاڭالاپ الاتىن بولدىم“، ـ دەدى ول.
مۇنداي ”بار بولۋدان“ ”ساپالى بولۋعا“ ويىسۋ كەزەكتە ەلىمىزدىڭ ٴۇي ەلەكتر جابدىقتارى بازارىنىڭ، ٴتىپتى، ۇلكەن، شىدامدى تۇتىنۋ بۇيىمدارى بازارىنىڭ زور بەتالىسى.
”ەلىمىزدىڭ اۆتوكولىك جانە ٴۇي ەلەكتر جابدىقتارى سياقتى ۇلكەن، شىدامدى تۇتىنۋ بۇيىمدارى كىلەڭ ارتۋ مولشەرى داۋىرىنەن ارتۋ مولشەرى مەن قور مولشەرىنە تەڭ ٴمان بەرەتىن داۋىرگە ٴوتتى“. جۇڭگو جەتەكشى ەكونوميستەر تالقى مىنبەرىنىڭ القا باستىعى ليان پيڭ: ”ۇزاق ۋاقىتتان الىپ قاراعاندا، بۇل ساياسات تۇتىنۋدىڭ تيبىن جاڭالاپ، دارەجەسىن ٴوسىرۋىن جانە كاسىپ سالاسى قۇرىلىمىن ساپالىلاندىرىپ، دارەجەسىن ٴوسىرۋدى جەبەي الادى“، ـ دەدى.
سۇرانىس بۋىنىندا تۇتىنۋشىلاردىڭ ٴۇي ەلەكتر جابدىقتارى مەن اۆتوكولىك تۇتىنۋ كوزقاراسىندا دا تەرەڭ وزگەرىستەر جارىققا شىقتى. ولار ٴونىمنىڭ نەگىزدىك يقۋاتىنا عانا قاناعاتتانىپ قالماستان، ٴونىمنىڭ ساپاسىنا، زەردەلى بولۋىنا جانە قورشاعان ورتانى قورعاۋ رولىنا دا اناعۇرلىم ٴمان بەردى.
ٴۇرىمجى قالاسىنىڭ تۇرعىنى سۋ شياۋيان جاڭا ەنەرگيالى اۆتوكولىكتى اۋىز جاپپاي ماقتاپ، ”زەردەلىلەنۋگە باسا ٴمان بەرەمىن، پايدالانۋعا قولايلى، تيىمدىلىك جاساۋ سەرپىنى زور“ دەپ ٴوز تۇيسىنىگى ارقىلى قىرۋار تۇتىنۋشىنىڭ جۇرەك ٴۇنىن ايتتى.
24 - كەزەكتى شينجياڭ حالىقارالىق اۆتوموبيل ونەركاسىپ كورمەسىنىڭ ناق مايدانى. سۋرەتتى تيانشان تورى - شينجياڭ گازەتىنىڭ ٴتىلشىسى حي حۇڭۋي تۇسىرگەن
كاسىپورىندار دا وسى ٴبىر بازار سۇرانىسىنا بەلسەنە ٴۇن قوستى. جيكى اۆتوكولىك ٴۇرىمجى ٴماجىلىس ـ كورمە ۋ ـ يۋە الاڭى دۇكەنىنىڭ باستىعى جاڭ كىپىڭ بىلاي دەپ تانىستىردى: ساپ ەلەكترمەن قوزعالاتىن كولىكتەردىڭ توقتاۋسىز ٴجۇرۋىن، جىلدام زاريادتانۋىن جانە تاماشا ساپاسىن تۇتىنۋشىلار ۇناتتى. كونەسىنىڭ ورنىنا جاڭاسىن اۋىستىرۋ ساياساتىنا سايكەسۋ ٴۇشىن، ولار مول قوسىمشا قاراجات بەرۋ، العاشقى تولەۋ اقىسىن بەرۋ قاجەتسىز، ٴوسىمسىز بولۋ سياقتىلاردى قامتىعان كوپ تيىمدىلىك شارالاردى شىعارىپ، اۆتوكولىك ساتىپ الۋ شارتىن ونان ارى ازايتتى.
ساندى مالىمەتتە كورسەتىلۋىنشە، الدىڭعى جارتى جىلدا شينجياڭنىڭ جاڭا ەنەرگيالى اۆتوكولىكتەرى جوعارى جىلدامدىقتى ارتۋدى ساقتاپ، جاڭا ەنەرگيالى اۆتوكولىكتەردىڭ بولشەك ساتىلۋ سوماسى 10 ميلليارد 3 ميلليون يۋانعا جەتىپ، سايكەس مەزگىلدەگىدەن 1.7 ەسە ارتقان.
سانجى وبلىستىق ساۋدا ىستەرى مەكەمەسىنىڭ ورىنباسار باستىعى كۇڭ ۋييۇي مىنالاردى ٴبىلدىردى: مەملەكەتتىڭ جاڭا كەزەكتى تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋدى ىلگەرىلەتۋى _ ارتۋدى ورنىقتىرۋدىڭ، تيپ جاڭالاۋدى جەبەۋدىڭ، حالىق تۇرمىسىنا تيىمدىلىك جاساۋدىڭ، ۇزاق بولاشاققا ٴتيىمدى بولۋدىڭ ماڭىزدى شاراسى. سانجى وبلىسى اناعۇرلىم كوپ ٴتيىمدى ساياساتتاردى جانە حالىققا قولايلى شارالاردى ارت ـ ارتىنان شىعارىپ، كونەسىنىڭ ورنىنا جاڭاسىن اۋىستىرۋدىڭ ولشەمدەنگەن قىزمەت وتەۋ دەڭگەيىن جوعارىلاتىپ، قوسىمشا قاراجات بەرىپ اۋىستىرۋ ٴتارتىبىن ساپالىلاندىرىپ، اۆتوكولىك، ٴۇي ەلەكتر جابدىقتارى، ٴۇي جابدىقتارى، ٴۇي اشەكەيى سياقتى سالالاردىڭ جاسىل دامۋىنا جاڭا ومىرشەڭدىك كۇش ۇستەيدى.
جاڭا مەن كونە اراسىندا ىشكى سۇرانىستى كەڭەيتۋدىڭ، جوعارى ساپالى دامۋدى ىلگەرىلەتۋدىڭ قۇدىرەتتى قوزعاۋشى كۇشى قامتىلعان، جاڭا كەزەكتى كونەسىنىڭ ورنىنا جاڭاسىن اۋىستىرۋ ساياساتى اتقارىلىپ، تياناقتانىپ، تۇتىنۋشىلاردىڭ تۇرمىسى جاڭاردى.
