جۇڭچيۋ مەرەكەسىنىڭ دەمالىسى ەندى عانا اياقتاپ، قىزمەتكە شىققالى ءبىر كۇن وتپەي، كوپتەگەن ادامدار بايىز تاپپادى، ويتكەنى الداعى دەمالىسقا از كۇن قالدى. ”مەملەكەتتىك كەڭەس كەڭسەسىنىڭ 2024 - جىلعى ٴىشىنارا مەرەكە، دەمالىس كۇندەرىن ورنالاستىرۋ جونىندەگى ۇقتىرۋىنا“ ساي، 10 - ايدىڭ 1 - كۇنىنەن 7 - كۇنىنە دەيىن 7 كۇن دەمالىس بەرىلەدى. 9-ايدىڭ 29 - كۇنى (جەكسەنبى) جانە 10 - ايدىڭ 12 - كۇنى (سەنبى) جۇمىس كۇنى.
مەملەكەتتىك كەڭەستىڭ قاتىستى ۇقتىرۋىنداعى تالاپ بويىنشا، 2024 – جىلعى مەملەكەت مەرەكەسى دەمالىسىندا، بۇكىل ەلدەگى اقى الىناتىن تاس جولداردا 7 ورىندىدان تومەن (7 ورىندىنى قامتيدى) شاعىن تۇرپاتتى جولاۋشىلار اۆتوكولىگىنەن قاتىناۋ اقىسى الىنبايدى، ناقتى اقىسىز قاتىناۋ ۋاقىتى 10 – ايدىڭ 1 – كۇنى ساعات 00:00 دەن باستالىپ، 10 – ايدىڭ 7 - كۇنى ساعات 24تە اياقتايدى.
قاتىناس – تاسىمال مينيسترلىگى جاريالاعان «ماڭىزدى مەرەكە، دەمالىس كۇندەرىندە شاعىن تۇرپاتتى جولاۋشىلار اۆتوكولىگىنەن قاتىناۋ اقىسىن الماۋدى اتقارۋ جوباسى» بويىنشا، كوكتەم مەرەكەسى، چيڭميڭ دەمالىسى، ەڭبەكشىلەر مەرەكەسى، مەملەكەت مەرەكەسى سىندى 4 ماڭىزدى مەرەكە، دەمالىس كەزىندە 7 ورىندىدان تومەن (7 ورىندىنى قامتيدى) شاعىن تۇرپاتتى جولاۋشىلار اۆتوكولىگىنە مەڭزەس جوعارى قارقىندى تاس جولدا اقىسىز قاتىناۋ ساياساتى اتقارىلادى. مۇنىڭ ىشىندە ادەتتەگى اقى الىناتىن تاس جولداردا اۆتوكولىكتەردىڭ اقى الۋ پۋنكتىنىڭ جولىنان وتكەن ۋاقىتى ولشەم ەتىلەدى، جوعارى قارقىندى تاس جولداردا اۆتوكولىكتەردىڭ اقى الۋ پۋنكتىنەن ءوتىپ شىققانداعى ۋاقىتى ولشەم ەتىلەدى.
قازىر مەملەكەت مەرەكەسى كەزىنىڭ پويەز بەلەتى ىركەس - تىركەس ساتىلۋدا. پويەز بەلەتىن كۇنى بۇرىن ساتۋ ەرەجەسى بويىنشا، 9 - ايدىڭ 17 - كۇنىنەن باستاپ 10 - ايدىڭ 1 - كۇنگى پويەز بەلەتىن ساتىپ الۋعا بولادى، 9 - ايدىڭ 23 - كۇنىنەن باستاپ 10 - ايدىڭ 7 - كۇنگى پويەز بەلەتىن ساتىپ الۋعا بولادى، جولاۋشىلاۋ جوسپارى بار جولاۋشىلاردىڭ ۋاقىتتى ەسكەرە وتىرىپ، ءدال ۋاعىندا بەلەت ساتىپ الۋىنا بولادى.
بەلەت تاپشى بولعاندا، جولاۋشىلار تەمىر جول 12306دىڭ تولىقتاما بەلەت ساتىپ الۋ يقۋاتىن پايدالانىپ، ەڭ كوپ بولعاندا 60 ”ۋاقىت + پويەز رەتى“ ىن تاڭداسا بولادى، ۋاقىتشا جاڭادان قوسىلعان جولاۋشىلار پويەزىنىڭ ورنىن الدىمەن تولىقتاما بەلەتكە تاپسىرىس بەرگەن جولاۋشىلارعا ساتىپ بەرىپ، بەلەت ساتىپ الۋدىڭ ٴساتتى بولۋ مولشەرىن جوعارىلاتادى. قازىر شينجياڭنىڭ جەر ـ جەرى كورىكتى كۇز ماۋسىمىنا قادام تاستادى، ساپار جوسپارىن جاساپ، بيىلعى ەڭ سوڭعى دەمالىستان پايدالانىپ، التىن كۇزدەگى ءساتتى ساپارعا دايىندالايىق!
كەلۋ قاينارى: جۇڭگو ۇكىمەت تورى، جۇڭگو جوعارى قارقىندى تاس جول، جۇڭگو تەمىر جول، مەملەكەتتىك كەڭەس كليەنتىنەن
