— دۇنيە ساياحات ۇيىمىنىڭ ساياحات مامانى ماري پيەر مورتيمەن سۇحبات
انار بۇلت \ شينجياڭ گازەتىنىڭ ٴتىلشىسى سۇڭ حايبو
سۇيكىمدى مىسىق ايۋ اشەكەي ىلمە بۇيىمىن، اعاشتان جاسالعان مونشاق بىلەزىك، سونداي ـ اق دوپپا ەلەمەنتتەرىمەن ساندەلگەن شاش قىستىرعىش تاعىپ، 2024 ـ جىلعى ەۆروپا ەلدەرى ساياحات ساۋداگەرلەرىنىڭ شينجياڭعا كەلىپ ارالاۋ قيمىلىنا قاتىناسقان دۇنيە ساياحات ۇيىمىنىڭ ساياحات مامانى ماري پيەر مورتي بىلاي دەدى: قىسقا عانا بىرنەشە كۇندىك ەكسكۋرسيا، ساپار قيمىلىندا شينجياڭ ماعان تەرەڭ اسەر قالدىردى، ”مەنىڭشە، ساياحاتتىڭ دۇنيە ٴجۇزىنىڭ دامۋىنداعى رولى وتە زور، ويتكەنى ساياحات جەرگىلىكتى ورىننىڭ ەكونوميكاسىنىڭ دامۋىن جەبەۋمەن بىرگە، ادامدار اراسىنداعى تانىسۋ مەن ٴتۇسىنىسۋدى دە جەبەيدى، اسىرەسە، شينجياڭعا كەلىپ كورمەگەن ادامدار جونىنەن، بۇل ارانىڭ بارلىعى سونداي كوركەم“.
”دۇنيە ساياحات ۇيىمىنىڭ ساندى مالىمەتىندە كورسەتىلۋىنشە، 2024 ـ جىلى دۇنيە جۇزىندە مولشەرمەن 28 ميلليون ساياحاتشى 1 ـ ايدان 5 ـ ايعا دەيىن شەتەلگە ساياحاتتاي بارىپ، 2023 ـ جىلعى سول تۇستاعىدان %20 ارتقان، بۇل حالىقارالىق ساياحات كاسىبىنىڭ قالپىنا كەلگەندىگىن تۇسىندىرەدى“. ماري بىلاي دەپ تانىستىردى: جۇڭگونىڭ ساياحات كاسىبى بۇكىل دۇنيە ٴجۇزى ساياحات كاسىبىنىڭ دامۋ بەتالىسىنا ۇزدىكسىز ىقپال جاساۋدا. ساياحات بازارىنىڭ كۇيىن، ساياحاتتىق تۇتىنۋ ارەكەتى، سونداي ـ اق ساياحاتتاعى كوزەۋلى جەرلەردىڭ باياندى دامۋى سياقتى ماسەلەلەردى ىشكەرىلەي زەرتتەۋ ارقىلى جۇڭگو ساياحات كاسىبىنىڭ دارەجەسىن جوعارىلاتۋعا ٴونىمدى جەتەكشىلىك ەتۋگە بولادى.
ماري جۇڭگوعا بەيتانىس ەمەس، ول كەزىندە يۇننان _ گۇيجوۋ ۇستىرتىندەگى تاۋلى رايوندارعا بارىپ، ول جەردىڭ جاراتىلىستىق كورىنىسى مەن گۋمانيتارلىق سالت ـ ساناسىن سەزىنگەن؛ بەيجيڭ، شاڭحاي سياقتى ٴىرى قالالارعا دا بارىپ، جۇڭگونىڭ وسىزاماندانۋىن سەزىنگەن. ول تەبىرەنە بىلاي دەدى: ”جۇڭگونىڭ جەرى كەڭ، جاراتىلىستىق بايلىعى مول، الۋان ٴتۇرلى. بۇل مەنىڭ شينجياڭعا تۇڭعىش كەلۋىم، مەن كورگەن كورىنىستەر باتىستاعى كەيبىر مەديالاردىڭ جات نيەتتى جالعان حابارلارىنا مۇلدە ۇقسامايدى ەكەن، مەن جۇڭگونىڭ تاريحى، گۋمانيتارلىق جاعدايى جونىندە اناعۇرلىم تەرەڭ تانىمعا يە بولدىم“.
قاشقار بايىرعى قالاسىنىڭ كوشەلەرىندە سەيىلدەپ جۇرگەندە، ماري جەرگىلىكتى تۇرعىندارمەن ىقىلاستى تۇردە امانداستى. ول قاشقار بايىرعى قالاسىنىڭ شينجياڭداعى ەرەكشە ۋاكىلدىك سيپاتقا يە تاريحي گۋمانيتارلىق كورىنىس بولىپ، ادەمى قۇرىلىستار مەن مول گۋمانيتارلىق بايلىققا يە ەكەندىگىن ٴبىلدى. تاشقورعان تاجىك اۆتونوميالى اۋدانىن ەكسكۋرسيالاعاندا، ول پامير ٴۇستىرتىن ”بۇل تازا جەر، ادام مەن تابيعات جاراسىمدى قاتار ٴومىر سۇرگەن تاڭداۋلى ساياحات جەرىنىڭ ۇلگىسى ەكەن“ دەپ القادى. ول تۇرپان قالاسىنىڭ يارعول بايىرعى قالاسىنا كەلگەندە ونىڭ تەرەڭ تاريحي استارى ونى تاڭ قالدىردى. يارعول بايىرعى قالاسى جىبەك جولىنداعى ماڭىزدى ايالداما عانا ەمەس، ونان دا ماڭىزدىسى، دۇنيە جۇزىندەگى ەڭ ۇلكەن، ەڭ بايىرعى، ونىڭ ۇستىنە ٴبىرشاما جاقسى ساقتالعان توپىراقپەن سوعىلعان قۇرىلىس.
”مەنىڭشە، شينجياڭنىڭ جاراتىلىستىق بايلىعى توتەنشە مول، ايتسە دە، دۇنيە جۇزىندەگى ساياحاتشىلار تۇرعىسىنان قاراعاندا، بۇل ارانىڭ ادامدى ەڭ باۋرايتىنى بايىرعى جىبەك جولى قالدىرعان گۋمانيتارلىق كورىنىستەر“. ماري شينجياڭنىڭ ساياحات كاسىبىنىڭ دامۋىن تىلگە العاندا ٴوز ۇسىنىسىن ورتاعا قويدى، ”مەنىڭشە، ساياحات ساۋداگەرلەرىنىڭ ارالاۋ ۇيىرمەسىن ۇيىمداستىرۋ وتە تاماشا امال بولىپتى، وسىنداي قيمىلدار ارقىلى شەتەلدىك ساياحات ساۋداگەرلەرى وسى ارانىڭ كوركەم كورىنىستەرىن ٴوز كوزدەرىمەن كورىپ، ەڭ جاڭا العاشقى ماتەريالعا يە بولىپ، وسى ينفورماتسيالاردى ٴوز ەلدەرىنىڭ بازارىنا جەتكىزە الادى. شينجياڭ شىعىس پەن باتىس مادەنيەتى توعىسقان، شوعىرلانعان جەر رەتىندە، باۋراۋ قۋاتى ەرەكشە ساياحات كوزەۋلى جەرى ەكەندىگى ٴشۇباسىز“.
ماري بىلاي دەدى: ”9 ـ ايدىڭ 17 ـ كۇنى شينجياڭدى قامتىعان جۇڭگونىڭ كوپتەگەن ولكەلەرى 2024 فرانسيا پاريج ساياحات كورمەسىنە قاتىناسادى، سول كەزدە شينجياڭ ساياحاتتى تانىستىرادى، ٴبىز باسى ـ قاسىندا بولىپ قولداۋ كورسەتىپ، ٴبىزدىڭ شينجياڭداعى شىنايى ساياحات اسەرىمىزدى باياندايمىز“.
