【تيانشان الابىندا مول ءونىمدى قۇتتىقتايمىز】
تيانشان تورى - شينجياڭ گازەتىنىڭ ٴتىلشىسى دۋ جيانحۇي
بالداي ٴتاتتى كورلا المۇرتى، يانجيدىڭ كەپتىرىلگەن قىزىل بۇرىشى، ادامدى قىزىقتىراتىن گۋنياڭجۇي سۇرلەنگەن سيىر ەتى... التىن كۇز 9 ـ ايدا شينجياڭنىڭ بايتاق دالاسىن مول ٴونىم شاتتىعى كەرنەدى. شينجياڭنىڭ كوپتەگەن ەرەكشە اۋىل شارۋاشىلىق قوسىمشا ونىمدەرى ەلەكتروندى ساۋدا تۇعىرى ارقىلى شار تاراپقا بەتتەدى.
9 ـ ايدىڭ 15 ـ كۇنى يانجي جۇڭپەي ناقتى جاتتىعۋ شەكتى سەرىكتەستىگىنىڭ تىكە تاراتۋ بازاسىندا تاراتۋشى ما چيانحۇي توراپتاستارعا يانجي قىزىل بۇرىشىن ىستىق ىقىلاسپەن تانىستىرۋدا. سۋرەتتى ما شياۋوۋ تۇسىرگەن
مول ٴونىم قايدا؟
ينتەرنەت مايتالماندارىنىڭ تىكە تاراتۋىندا. ۇمىتكە تولى وسى مول ٴونىم الۋ مەزگىلىندە سان مىڭداعان ينتەرنەت مايتالمانى تىكە تاراتۋ ارقىلى شينجياڭنىڭ مول ٴونىم كارتيناسىن بۇكىل ەلگە، ٴتىپتى، دۇنيە جۇزىنە ايگىلەدى.
دوۋيىن، كۋايشوۋ سياقتى بەينەجازبا تۇعىرلارىن اشىپ، ”شينجياڭدى سەزىنۋ“ جاقسى ونىمدەردى تانىستىرۋشى حى جياۋلۇڭ، جياڭيۇي الىم، پۋتاۋبالاڭ، شينجياڭ ماجيە، گۋان شۋجي سياقتى ينتەرنەتتە تىكە تاراتاتىن كوپتەگەن مايتالمان ىركەس ـ تىركەس ورتاعا شىقتى. ولاردىڭ اراسىندا ميلليون جانكۇيەرى بار ينتەرنەتتە تىكە تاراتاتىن الپاۋىتتار دا، قىستاقتا تۇراتىن قىزمەت اترەتىنەن، اۋىل ـ قىستاقتاعى ٴار ۇلت بۇقاراسىنان شىققان زات تانىستىرۋشىلار دا بار. جانكۇيەر سانى مەيلى قانشا بولسا دا، ولار اۋىلعا ماحابباتى جانە مول ٴونىم شاتتىعىمەن تىكە تاراتىپ زات ساتۋعا بەلسەنە ات سالىستى.
حى جياۋلۇڭ ”شينجياڭدى سەزىنۋ“ جاقسى ونىمدەرىن تانىستىرۋشى رەتىندە، ٴوزىنىڭ ىقپال كۇشى مەن كاسىپتىك تانىستىرۋىنا سۇيەنىپ، ٴتىپتى دە كوپ ادامعا شينجياڭنىڭ ساپالى اۋىل شارۋاشىلىق ونىمدەرىن تانىستىردى. جياڭيۇي الىم ٴوزىنىڭ وزگەشە تىكە تاراتۋ ستيلىمەن شينجياڭنىڭ ەرەكشە اۋىل شارۋاشىلىق ونىمدەرىن جاندى تۇردە كورسەتتى. پۋتاۋ بالاڭ شينجياڭنىڭ ٴجۇزىمىن جالپىلاستىرۋعا دەن قويدى، تىزبەك ـ تىزبەك مولدىرەگەن ٴجۇزىم ونىڭ اپپارات كوزىندە ادامدى وزىنە ەرەكشە باۋرادى. گۋان شۋجي دە وسال تۇسپەي، قاراپايىم تىلمەن جانە شىنايى پوزيتسيامەن كورەرمەندەرگە شينجياڭنىڭ جۇقا قابىقتى جاڭعاعىن، كورلا المۇرتىن تانىستىردى.
ينتەرنەتتەگى وسى مايتالمانداردىڭ تىكە تاراتۋى تۇتىنۋشىلارعا شينجياڭنىڭ مول ٴونىم جەتىستىكتەرىن تىكە كورسەتۋمەن بىرگە، شينجياڭنىڭ اۋىل شارۋاشىلىق ونىمدەرىنىڭ جاڭا ساتىلۋ ارناسىن دا اشتى. ولاردىڭ قۇلشىنىسى ارقىلى شينجياڭنىڭ الما، ٴجۇزىم، المۇرت سياقتى ەرەكشە اۋىل شارۋاشىلىق ونىمدەرى بۇكىل ەلدىڭ جەر ـ جەرىنە، ٴتىپتى، شەتەلگە دە ساتىلدى.
ولاردىڭ تىكە تاراتۋ اپپارات كوزىنەن كورەرمەندەر شينجياڭنىڭ ۇلان ـ بايتاق اتىزىنداعى بۇتاقتاردا سامسىعان ٴتۇسى قانىق، تورسيعان شىلانداردى، كەپتىرۋ الاڭىندا تولتىرا جايىلعان قىپ ـ قىزىل كەپتىرىلگەن قىزىل بۇرىشتاردى كورە الادى.
ينتەرنەتتەگى مايتالمانداردىڭ تىكە تاراتىپ زات ساتۋى ٴتىپتى دە كوپ ادامنىڭ شينجياڭدى تۇسىنۋىنە، شينجياڭدى سۇيۋىنە مۇمكىندىك جاسادى. ولاردىڭ باستاۋىندا، شينجياڭنىڭ اۋىل شارۋاشىلىعى اناعۇرلىم كوركەم بولاشاقتى قارسى الدى، مول ٴونىم شاتتىعى دا اناعۇرلىم كوپ ادامعا جەتكىزىلدى.
مول ٴونىم قايدا؟
ەلەكتروندى ساۋدا ينتەرنەت تۇعىرىنداعى ەرەكشە دۇكەندەردە.
تاۋباۋ ينتەرنەت تۇعىرىن اشساڭىز، شينجياڭنىڭ مول اۋىل شارۋاشىلىق ونىمدەرىن كورىپ ۇلگىرە المايسىز. جۇقا قابىقتى، ەتتى قاۋىننان ادامدى وزىنە باۋرايتىن ٴتاتتى حوش ٴيىس اڭقيدى؛ تىزبەك ـ تىزبەك مولدىرەگەن جۇزىمدەردى كورگەندە جاقۇت تەڭىزىندە جۇرگەندەي بولاسىز.
دۇڭفاڭ جىنشۋان ينتەرنەت تۇعىرى دا شينجياڭنىڭ ەرەكشە اۋىل شارۋاشىلىق ونىمدەرىنىڭ ماڭىزدى كورمە تەرەزەسىنە اينالدى. كورلا المۇرتى، ٴپايزاۋات شينمەيى سياقتى ماۋسىمدىق جەمىس ـ جيدەكتەر كوپتەگەن تۇتىنۋشىنىڭ نازارىن اۋداردى.
جيڭدۇڭ ينتەرنەت تۇعىرىندا دا شينجياڭنىڭ كوپتەگەن ەرەكشە اۋىل شارۋاشىلىق ونىمدەرى جينالدى. جاس جەمىس ـ جيدەكتەردەن كەپتىرىلگەن قۇرعاق جەمىستەرگە، ەرەكشە ٴسۇت ونىمدەرىنەن ٴداستۇرلى قولونەر بۇيىمدارىنا دەيىن تۇتىنۋشىلاردىڭ وسى ارادا شينجياڭنىڭ ناعىز اۋىل شارۋاشىلىق قوسىمشا ەرەكشە ونىمدەرىن وپ ـ وڭاي تاڭداپ ساتىپ الۋىنا بولادى.
ٴارقايسى ٴىرى ەلەكتروندى ساۋدا نەگىزگى تۇعىرلارىندا شينجياڭنىڭ ەرەكشە اۋىل شارۋاشىلىق ونىمدەرىنىڭ ساتىلۋى ەرەكشە كۇسەت بولدى. تۇتىنۋشىلاردىڭ اقاۋسىز، جاسىل ازىق ـ تۇلىك قاجەتىنىڭ ۇزدىكسىز ارتۋىنا بايلانىستى، شينجياڭنىڭ اۋىل شارۋاشىلىق ونىمدەرى تابيعي، لاستانباعان، ساپاسى جوعارى بولۋداي ەرەكشەلىگىمەن قالىڭ تۇتىنۋشىلاردىڭ مويىنداۋىنا جانە ۇناتۋىنا يە بولدى.
9 ـ ايدىڭ 16 ـ كۇنى بايىنعولين وبلىسى جياڭتاۋ نۇڭگى ەلەكتروندى ساۋدا ىستەرى شەكتى سەرىكتەستىگىنىڭ بازاسىندا جۇمىسشىلار المۇرتتى ٴبولىپ قوراپتاۋدا. سۋرەتتى ليۋ ياڭ تۇسىرگەن
”المۇرت بازارعا سالىنعاننان قازىرگە دەيىن سەرىكتەستىگىمىز ينتەرنەت جەلىسىندە جانە جەلىدەن تىسقارى شامامەن 70 مىڭ جاشىك المۇرت ساتتى، ساتىلىم سوماسى 3 ميلليون يۋاننان استام بولدى“، ـ دەدى 9 ـ ايدىڭ 17 ـ كۇنى بايىنعولين وبلىسى جياڭتاۋ نۇڭگى ەلەكتروندى ساۋدا ىستەرى شەكتى سەرىكتەستىگىنىڭ جاۋاپتىسى تاۋ دىڭفىڭ تەبىرەنە.
مول ٴونىم قايدا؟
تاماشا جىنتىكتەي وڭدەلگەن ەرەكشە ونىمدەردە. مول ٴونىمنىڭ دەرەگىن دەن قويا ىزدەگەن كەزىمىزدە، ونىڭ ەلەكتروندى ساۋدا تۇعىرىنداعى دۇكەندەردەگى دۋماندى ورتادا عانا ەمەس، تاعى ادەمى قوراپتالعان جىنتىكتەي وڭدەلگەن ەرەكشە ونىمدەردە ەكەنىن دە قۋانا بايقادىق.
شينجياڭ سىندى وسىناۋ ۇلان ـ بايتاق ٴارى كەرەمەت توپىراقتا ەرەكشە اۋىل شارۋاشىلىق ونىمدەرى تاماشا وزگەرىستى باستان كەشىرۋدە. اتىز باسىنداعى ماۋەلى جەمىستەردەن زاۆود سەحتارىنداعى جىنتىكتەي وڭدەۋگە دەيىن ٴاربىر بۋىنعا ەڭبەكشىلەردىڭ اقىل ـ پاراساتى مەن ماڭداي تەرى سىڭگەن.
ٴدوربىلجىن اۋدانىنداعى گۋنياڭجۇي سۇرىلەنگەن سيىر ەتى وزگەشە تەحنولوگياسىمەن جانە كۇشتى ەرەكشەلىگىمەن كوپتەگەن تۇتىنۋشىنىڭ اۋزىندا ٴدامى قالاتىن تاماشا تاعامعا اينالدى؛ التاي ساۋىر بال ليمون سۋى ۇلى تابيعاتتىڭ بال ٴدامى مەن تۇنىقتىعىن مۇلتىكسىز توعىستىردى؛ جىڭ الاقاتىنىڭ جاس جەمىس قويمالجىڭى تازا ساپاسى مەن مول قورەكتىگى ارقىلى شينجياڭنىڭ ەرەكشە اۋىل شارۋاشىلىق ونىمدەرىنىڭ شەكسىز كومەسكى كۇشىن ايگىلەدى...
9-ايدىڭ 16-كۇنى ٴدوربىلجىن اۋدانى شيندا تۇڭچۋاڭ بيولوگيالىق ينجەنەريا شەكتى جاۋاپكەرشىلىك سەرىكتەستىگى ەلەكتروندى ساۋدا تەكشەسىندە ۇگىتتەۋ، جالپىلاستىرۋ قيمىلىن وتكىزۋدە. ينتەرنەتتەگى بەينە جازبانىڭ قيما سۋرەتى
ەلەكتروندى ساۋدا تۇعىرىنداعى دۇكەندەردە شينجياڭنىڭ جىنتىكتەي وڭدەلگەن ەرەكشە ونىمدەرى شار تاراپتىڭ نازارىن اۋداردى. ولار شيكىزاتتىڭ تابيعي ابزالدىلىعىن ساقتاپ قانا قويماي، وڭدەۋ تەحنيكاسىندا جاڭالىق اشۋ ارقىلى ونىمگە ٴتىپتى دە كوپ قۇن جانە باۋراۋ قۋاتىن ۇستەدى.
ٴدوربىلجىن اۋدانى شيندا تۇڭچۋاڭ بيولوگيالىق ينجەنەريا شەكتى جاۋاپكەرشىلىك سەرىكتەستىگى قۇلىستاي ويپاتىنداعى مال، قۇس باعىمشىلىعى بايلىق باسىمدىعىنا سۇيەنىپ، ازىق ـ تۇلىك زەرتتەۋ ـ اشۋ، ٴوندىرۋ، ساتۋدى نەگىز ەتىپ، سيىر، قوي ەتىنىڭ ەگىن، مال شارۋاشىلىق ونىمدەرىنەن كوپ نەگىزدى تاۋارلارعا اينالۋىن جۇزەگە اسىردى. ”سەرىكتەستىگىمىز قازاق ۇلتىنىڭ ٴداستۇرلى تەحنولوگياسىمەن سۇرىلەنگەن گۋنياڭجۇي جەلىلەس سۇرىلەنگەن سيىر ەتى تۇتىنۋشىلاردىڭ قىزۋ قارسى الۋىنا يە بولدى، بيىل جىل باسىنان بەرى سەرىكتەستىگىمىز ساتىلىم سوماسىن 10 ميلليون يۋانعا جەتكىزدى“، ـ دەدى ٴدوربىلجىن اۋدانى شيندا تۇڭچۋاڭ بيولوگيالىق ينجەنەريا شەكتى جاۋاپكەرشىلىك سەرىكتەستىگىنىڭ القا باستىعى يۋە جيانپيڭ.
مول ٴونىم وسى ەلەكتروندى ساۋدا تۇعىرلارى مەن تىكە تاراتۋ بولمەلەرىندە، ۇزدىكسىز جاڭالانعان ونىمدەردە. ەڭبەكتەنگەن شارۋالار، كۇرەس جۇرگىزگەن كاسىپورىندار، ىستىق ىقىلاستى تىكە تاراتۋشىلار شينجياڭنىڭ جاڭا داۋىردەگى اۋىل شارۋاشىلىعىن دامىتۋدىڭ تاماشا تاراۋىن بىرگە جازدى.
