شي جينپيڭ حالىق ىستەرى قىزمەتى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى
جالپىعا ٴتيىمدى، نەگىزدىك، تۇبەسەلى حالىق تۇرمىسى قۇرىلىسىن كۇشەيتىپ، حالىق بۇقاراسى ٴۇشىن بەلسەندىلىكپەن، ىرىقتىلىقپەن جاقسى ٴىس، ناقتى ٴىس ىستەۋ، قيىن ىستەردى شەشۋ كەرەك
لي چياڭ 15 ـ رەتكى مەملەكەتتىك حالىق ىستەرى ماجىلىسىنە قاتىناستى ٴارى ٴسوز سويلەدى
شينحۋا اگەنتتىگىنىڭ 10 ـ ايدىڭ 26 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ تاياۋدا حالىق ىستەرى قىزمەتى جونىندە ماڭىزدى نۇسقاۋ بەرىپ، بىلاي دەپ اتاپ كورسەتتى: جۋىق جىلداردان بەرى، حالىق ىستەرى جۇيەسى پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، تياناقتاندىرىپ، تىڭعىلىقتى تۇردە مىندەت اتقارىپ، جاۋاپكەرشىلىكتەرىن ادا ەتىپ، ٴتۇرلى قىزمەتتەردە تىڭ ىلگەرىلەۋشىلىككە قول جەتكىزىپ، پارتيا مەن مەملەكەت قىزمەتىنىڭ كەلەلى جاعدايىنا پارمەندى قىزمەت وتەدى.
شي جينپيڭ بىلاي دەپ باسا دارىپتەدى: جۇڭگو ۇلگىسىندەگى وسىزامانداندىرۋدا حالىق تۇرمىسى زور ٴىس سانالادى. جاڭا ٴداۋىردىڭ جاڭا جورىعىندا ٴار دارەجەلى پارتكوم مەن ۇكىمەت حالىقتى وزەك ەتۋگە تاباندى بولىپ، حالىق ىستەرى قىزمەتىنە باسشىلىقتى كۇشەيتىپ، جالپىعا ٴتيىمدى، نەگىزدىك، تۇبەسەلى حالىق تۇرمىسى قۇرىلىسىن كۇشەيتىپ، حالىق ەڭ كوڭىل ٴبولىپ وتىرعان، ەڭ تىكە، ەڭ رەال مۇددە ماسەلەلەرىن ويداعىداي شەشىپ، حالىق ىستەرىنىڭ جوعارى ساپالى دامۋىن ۇزدىكسىز ىلگەرىلەتۋى كەرەك. ٴار دارەجەلى حالىق ىستەرى تاراۋلارى پارتيانىڭ باسشىلىعىنا تاباندى بولىپ، پارتيا قۇرىلىسىن كۇشەيتىپ، رەفورما جاساۋدى، جاڭالىق اشۋدى تەرەڭدەتىپ، ساياسات، ٴتۇزىم جۇيەسىن، قىزمەت وتەۋ، قامتاماسىز ەتۋ جۇيەسىن، باقىلاۋ ـ باسقارۋ جۇيەسىن، قوعامنىڭ ات سالىسۋ جۇيەسىن كەمەلدەندىرىپ، جان سانىنىڭ قارتتانۋىنا بەلسەنە توتەپ بەرۋ جونىندەگى مەملەكەتتىك ستراتەگيانى اتقارۋدى كۇش سالا ىلگەرىلەتىپ، قوعامدىق قۇتقارۋ ـ كومەكتەسۋ، قوعامدىق يگىلىك، قوعامدىق ىستەر، قوعامدىق باسقارۋ قىزمەت دەڭگەيىن كۇش سالا جوعارىلاتىپ، حالىق بۇقاراسى ٴۇشىن بەلسەندىلىكپەن، ىرىقتىلىقپەن جاقسى ٴىس، ناقتى ٴىس ىستەپ، قيىن ىستەردى شەشىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋگە ٴتيىستى ۇلەس قوسۋى كەرەك.
15 ـ رەتكى مەملەكەتتىك حالىق ىستەرى ٴماجىلىسى 10 ـ ايدىڭ 25 ـ كۇنىنەن 26 ـ كۇنىنە دەيىن بەيجيڭدە اشىلدى. ماجىلىستە شي جينپيڭنىڭ ماڭىزدى نۇسقاۋى جەتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ ماجىلىسكە قاتىناستى ٴارى ٴسوز سويلەدى.
لي چياڭ سوزىندە بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى نۇسقاۋى جۋىق جىلداردان بەرى حالىق ىستەرىنىڭ دامۋىندا قول جەتكەن كورنەكتى ناتيجەلەردى تولىق تۇراقتاندىرىپ، حالىق ىستەرى قىزمەتىن ويداعىداي ىستەۋگە ستراتەگيالىق جانە جالپى جاعداي تۇرعىسىنان شىنايى ٴۇمىت ارتىپ، ايقىن تالاپتار قويىپ، ٴبىزدىڭ جاڭا ٴداۋىردىڭ جاڭا جورىعىندا حالىق ىستەرىنىڭ جوعارى ساپالى دامۋىن ىلگەرىلەتۋىمىزگە ٴتۇبىرلى بويسۇنۋ ولشەمىن ازىرلەپ، قۋاتتى قوزعاۋشى كۇش ۇستەدى. ٴبىز ىشكەرىلەي ۇيرەنىپ، ٴتۇسىنىپ، دايەكتىلەندىرۋدى، تياناقتاندىرۋدى مىقتى يگەرۋىمىز كەرەك.
لي چياڭ بىلاي دەپ اتاپ كورسەتتى: حالىق ىستەرى ادامگەرشىلىكتىڭ شۇعىلاسىن شاشىپ، قوعامنىڭ ار ـ نامىسىن ايگىلەپ، ٴمورالدىڭ تومەنگى شەگىن باتىل ساقتاپ، وركەنيەتتىڭ جالعاسۋىن بەينەلەدى، بۇل بۇكىل قوعامنىڭ ورتاق ٴىسى. جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ ۇلى امالياتى حالىق ىستەرى قىزمەتىنىڭ دەڭگەيىن ۇزدىكسىز جوعارىلاتۋ ارقىلى قيىنشىلىعى بار بۇقارا، مۇگەدەكتەر سياقتىلاردى قامتىعان ٴتۇرلى قاۋىمنىڭ ٴتول مۇددەسىن ويداعىداي قامتاماسىز ەتىپ، ويداعىداي دامىتىپ، ورتاق نىسانانى جۇزەگە اسىرۋعا زەيىن ـ زەردەنى، كۇش ـ قۋاتتى شوعىرلاندىرىپ، ىنتىماقتاسا كۇرەس جۇرگىزەتىن جاندى جاعداي قالىپتاستىرۋدى قاجەت ەتەدى.
لي چياڭ بىلاي دەپ باسا دارىپتەدى: حالىق ىستەرى قىزمەتىن تەرەڭ حالىقشىلدىق سۇيىسپەنشىلىكپەن ىستەپ، جاقسى ىستەردى، ناقتى ىستەردى بۇقارانىڭ جۇرەگىنە شىنايى ۇيالاتۋ كەرەك. ساياسات بەلگىلەۋدە بۇقارانىڭ كوپ نەگىزدى قاجەتىن شىعار ٴتۇيىن ەتىپ، ساياساتتىڭ باعىتتامالىلىعى مەن ونىمدىلىگىن ارتتىرۋ كەرەك. ساياساتتى اتقارۋ جاعىندا ساياساتتىڭ تۇراقتىلىعى مەن قىزمەتتىڭ يكەمدىلىگىن ورگانيكالى ۇشتاستىرۋ كەرەك. ساياساتتىق اڭىس قايتارۋ جاعىندا ساياساتتى باعالاۋ، ساپالىلاندىرۋ مەحانيزمىن اقاۋسىزداندىرۋ كەرەك. حالىق ىستەرى قىزمەتىن كۇشتى ساياسي جاۋاپكەرشىلىك سەزىممەن ىستەپ، حالىق ىستەرىن دامىتۋعا ساياسي جاقتان وي جۇگىرتۋگە، جوسپارلاۋعا، ىلگەرىلەتۋگە شەبەر بولۋ كەرەك. حالىق ىستەرى قىزمەتىن ىشكەرىلەي، ەگجەي ـ تەگجەيلى تىندىرۋ ستيلىمەن ىستەپ، نەگىزگى ساتىنىڭ ٴبىرىنشى شەبىنە ىرىقتىلىقپەن بويلاپ، قىزمەتتى ناقتى، ىشكەرىلەي يگەرىپ، ٴىستى ەگجەي ـ تەگجەيلى ىستەۋ، ەرتە بايقاۋ قابىلەتىن كۇشەيتىپ، ٴتۇرلى مىندەتتەردىڭ ناقتى تياناقتانۋىنا شىنايى كەپىلدىك ەتىپ، بۇقارانىڭ تۇرمىسىنداعى كىشى ـ گىرىم ىستەردى شەشۋ بارىسىندا حالىق ٴۇشىن ىستەۋ، حالىقتى ٴسۇيۋ سىندى كەلەلى ىستەردى ويداعىداي ىستەۋگە شەبەر بولۋ كەرەك. رەفورما جاساۋ، جاڭالىق اشۋ رۋحىمەن حالىق ىستەرى قىزمەتىن ىستەپ، پارتيا 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ ورنالاستىرۋلارىن ىشكەرىلەي دايەكتىلەندىرىپ، تياناقتاندىرىپ، حالىق ىستەرى رەفورماسىن جۇيەلى جوسپارلاپ اتقارىپ، بۇقارانىڭ كوز الداعى باس قاتىرعان ىستەرىن، ۋايىمداعان ىستەرىن ويداعىداي شەشۋمەن بىرگە، حالىق تۇرمىسىن قامتاماسىز ەتۋ جانە جاقسارتۋ ٴتۇزىمى جۇيەسىن ىرىقتىلىقپەن جوسپارلاپ، اقاۋسىزداندىرىپ، حالىق ىستەرى دامۋىنىڭ جاڭا جاعدايىن ۇزدىكسىز اشۋ كەرەك.
مەملەكەتتىك كەڭەستىڭ مۇشەسى شىن يچين سوزىندە بىلاي دەپ اتاپ كورسەتتى: باس شۋجي شي جينپيڭنىڭ حالىق ىستەرى قىزمەتى جونىندەگى ماڭىزدى بايىمداۋلارى مەن ماڭىزدى نۇسقاۋلارىنىڭ، بەكىتۋلەرىنىڭ رۋحىن ىشكەرىلەي ۇيرەنىپ، دايەكتىلەندىرىپ، لي چياڭ زۇڭليدىڭ ٴسوزىنىڭ تالابىن مۇقيات تياناقتاندىرىپ، حالىقتى وزەك ەتكەن دامۋ يدەياسىنا تاباندى بولىپ، قوعامدىق قۇتقارۋ ـ كومەكتەسۋ جۇيەسىن ونان ارى اقاۋسىزداندىرىپ، قارتتاردى كۇتىمدەۋگە قىزمەت وتەۋ جۇيەسىن كەمەلدەندىرىپ، قوعامدىق ۇيىمدار مەن رايوندارعا ٴبولۋدى، جەر اتتارىن باسقارۋدى كۇشەيتىپ، جەرلەۋ سياقتى سالالارداعى رەفورمانى تەرەڭدەتىپ، قايىرىمدىلىق ىستەرىنىڭ دامۋىن جەبەپ، جاڭا ٴداۋىردىڭ جاڭا جورىعىنداعى حالىق ىستەرىنىڭ جوعارى ساپالى دامۋىن قۇلشىنا ىلگەرىلەتۋ كەرەك.
ماجىلىستە مەملەكەتتىك حالىق ىستەرى جۇيەسىندەگى وزات كوللەكتيۆتەر، ەڭبەك ەرلەرى جانە وزات قىزمەتكەرلەر ماداقتالىپ ـ سيلاندى. شاڭحاي قالاسىنىڭ، جياڭسۋ ولكەسىنىڭ، جىجياڭ ولكەسىنىڭ، جياڭشي ولكەسىنىڭ، شاندۇڭ ولكەسىنىڭ، سىچۋان ولكەسىنىڭ، گۇيجوۋ ولكەسىنىڭ، شانشي ولكەسىنىڭ قاتىستى جاۋاپتى جولداستارى پىكىر اۋىستىرىپ، لەبىز ٴبىلدىردى.
ۋ جىڭلۇڭ ماجىلىسكە قاتىناستى.
ٴارقايسى ولكە، اۆتونوميالى رايون، توتە قاراستى قالالاردىڭ جانە جوسپارى ايىرىم جاسالاتىن قالالاردىڭ، شينجياڭ ٴوندىرىس ـ قۇرىلىس بيڭتۋانىنىڭ، ورتالىق پەن مەملەكەت ورگاندارىنىڭ قاتىستى تاراۋلارىنىڭ، قاتىستى حالىقتىق ۇيىمداردىڭ جاۋاپتى جولداستارى، ماداقتالىپ ـ سيلانعان كوللەكتيۆتەر مەن جەكەلەردىڭ ۋاكىلدەرى ماجىلىسكە قاتىناستى.
