شينحۋا اگەنتتىگىنىڭ 11 ـ ايدىڭ 7 ـ كۇنى بەيجيڭنەن بەرگەن حابارى (ٴتىلشى جۋ چاۋ). 11 ـ ايدىڭ 7 ـ كۇنى تۇستەن كەيىن، مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا ساپارلاي كەلگەن مالايزيا زۇڭليى انۋارمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن مالايزيا ەكى ەل ارالارىن تەڭىز ٴبولىپ جاتقان جاقسى كورشىلەر ٴارى مۇراتتارى ۇقساس جاقسى دوستار، قول ۇستاسا داميتىن جاقسى سەرىكتەر. بىلتىر 3 ـ ايدا ٴسىز زۇڭلي بولىپ تاعايىندالعاننان كەيىن تۇڭعىش رەت جۇڭگودا ساپاردا بولدىڭىز، ٴبىز جۇڭگو مەن مالايزيانىڭ تاعدىرلاس ورتاق تۇلعاسىن بىرگە قۇرۋ جونىندە ماڭىزدى ورتاق تانىمعا كەلدىك. ٴبىر جىلدان استام ۋاقىتتان بەرى، ەكى جاق ٴار جىكتەگىلەردىڭ قويۋ بارىس ـ كەلىسىن، ىقپالداستىعىن ساقتاپ، ٴار سالاداعى ٴوزارا تيىمدىلىك جەتكىزۋ سەلبەستىگىن جوعارى ساپالى ىلگەرىلەتىپ، ەكى ەل حالقىنا ناقتى پايدا اكەلدى. كەزەكتە جۇڭگو مەن مالايزيا ەكى ەل ٴوز ەلدەرى دامۋىنىڭ، گۇلدەنۋىنىڭ شەشۋشى مەزگىلىندە تۇر، ەكى جاق جۇڭگو مەن مالايزيانىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن قۇتتىقتاۋدى جانە ”جۇڭگو _ مالايزيا دوستىق جىلىن“ وراي ەتىپ، جۇڭگو _ مالايزيا تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن قول ۇستاسا ىلگەرىلەتىپ، وزدەرىنىڭ دامۋ نىساناسىن جۇزەگە اسىرۋعا كۇش ۇستەپ، ٴوڭىردىڭ گۇلدەنۋىنە، ورنىقتىلىعىنا تىڭ دا اناعۇرلىم زور ۇلەس قوسۋى كەرەك.
شي جينپيڭ بىلاي دەپ باسا دارىپتەدى: ەكى جاق جوعارى دەڭگەيدەگى ستراتەگيالىق سەرىكتەستىك قارىم ـ قاتىناستى دامىتىپ، جوعارى جىكتەگىلەردىڭ قويۋ بارىس ـ كەلىسىن ۇزدىكسىز ساقتاپ، ەل باسقارۋ تاجىريبەلەرىن اۋىستىرۋدى كۇشەيتىپ، ساياسي ٴوزارا سەنىمدىلىكتى ارتتىرىپ، ٴبىر ـ ٴبىرىنىڭ وزەكتى مۇددەسى مەن ٴجىتى قاداعالاپ وتىرعان كەلەلى ىستەرىن تاباندىلىقپەن قولداۋى كەرەك. جۇڭگو جاق مالايزيا جاقتىڭ ستراتەگيالىق دەربەستىككە تاباندى بولعاندىعىن، ٴوز ەلىنىڭ جاعدايىنا ۇيلەسەتىن دامۋ جولىن تاڭداعاندىعىن قولدايدى. ەكى جاق دامۋ ستراتەگيالارىن ٴتۇيىلىستىرۋدى كۇشەيتىپ، جان ـ جاقتى ٴوزارا تيىمدىلىك جەتكىزۋ سەلبەستىگىن تەرەڭدەتىپ، ”ٴبىر بەلدەۋ، ٴبىر جولدى“ جوعارى ساپادا بىرگە قۇرۋدى ۇزدىكسىز ىلگەرىلەتىپ، ”ەكى ەل، ەكى كاسىپ سالاسى باقشاسى“ سياقتى باستاماشى نىسانداردى بىرگە ويداعىداي اتقارىپ، سيفرلى ەكونوميكا، جاساندى زەردە، جاڭا ەنەرگيا سياقتى سەلبەستىكتىڭ جاڭا ارتۋ تۇيىندەرىن تۇلعالاپ، كەدەيلىكتى ازايتۋ جونىندەگى اۋىس ـ كۇيىس، سەلبەستىك مەحانيزمىن ورناتۋ تۋرالى ىزدەنىس جاساۋى كەرەك. مالايزيا جاقتىڭ جۇڭگو حالىقارالىق يمپورت كورمەسى تۇعىرىنان ويداعىداي پايدالانىپ، مالايزيانىڭ ٴتىپتى دە كوپ ساپالى، ەرەكشە ونىمدەرىن جۇڭگوعا تانىستىرۋىن قارسى الامىز. جۇڭگو جاق مالايزيا جاقپەن جوعارى وقۋ ـ اعارتۋ، مادەنيەت، ساياحات، جاستار، جەرگىلىكتى ورىن سياقتى جاقتارداعى اۋىس ـ كۇيىستى، سەلبەستىكتى تەرەڭدەتىپ، جۇڭگو _ مالايزيا دوستىعىنىڭ، حالىق تىلەگىنىڭ دانەكەرىن نىعايتۋدى قالايدى. وركەنيەتتەردىڭ كوپ نەگىزدى قاتار ٴومىر ٴسۇرۋىن، جاراسىمدى، سيىسىمدى بولۋىن دارىپتەپ، بەيبىت بولۋدى، سەلبەستىك جاساسۋدى، سيىسىمدى بولۋدى، توعىسۋدى وزەك ەتكەن ازيا قۇن كوزقاراسىن امالياتتا ايگىلەپ، جۇڭحۋا وركەنيەتى مەن ٴىسلام وركەنيەتىنىڭ ٴوزارا ۇيرەنۋ، ٴوزارا ۇلگى الۋ بارىسىندا بىرگە دامۋىن ىلگەرىلەتۋ كەرەك.
شي جينپيڭ بىلاي دەپ اتاپ كورسەتتى: بۇگىنگى دۇنيە جۇزىندە وزگەرىس پەن بىلىقپالىق قاباتتاسىپ، دۇنيە ٴجۇزى جاڭا اۋمالى ـ توكپەلى وزگەرىس مەزگىلىنە ٴوتتى. ازياداعى وركەندەپ كەلە جاتقان ەلدەردىڭ جانە جاڭادان گۇلدەنگەن ەكونوميكالىق تۇلعالاردىڭ ماڭىزدى ۋاكىلى رەتىندە، جۇڭگو مەن مالايزيا ەكى جاق حالىقارالىق جانە وڭىرلىك ماسەلەلەردە تىلدەسۋدى، سايكەسۋدى كۇشەيتىپ، ٴبىرىن ـ ٴبىرى باتىل قولداپ، قورعامپازدىققا بىرگە قارسى تۇرىپ، ساۋدا مەن قارجى قوسۋدىڭ ەركىن، قولايلى بولۋىن جەبەپ، تەرەزەسى تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن دارىپتەپ، جەر شارىن باسقارۋ جۇيەسى وزگەرىسىن كەمەلدەندىرۋدى ىلگەرىلەتىپ، حالىقارالىق ادىلدىكتى، ادىلەتتىلىكتى جانە وركەندەپ كەلە جاتقان ەلدەردىڭ ورتاق مۇددەسىن قورعاۋى كەرەك. جۇڭگو جاق مالايزيانىڭ كەلەر جىلى شىعىس وڭتۇستىك ازيا ەلدەرى وداعىنىڭ كەزەكتى ٴتوراعا ەلى بولۋ قىزمەتىن قولدايدى، شىعىس وڭتۇستىك ازيا ەلدەرى وداعىنىڭ وزەكتى ورنى مەن ستراتەگيالىق دەربەستىگىن قولدايدى، ٴوڭىردىڭ دامۋ ـ سەلبەسۋ نەگىزگى اۋقىمىن ويداعىداي قورعايدى.
ٴانۋار مىنالاردى ٴبىلدىردى: ٴتوراعا شي جينپيڭنىڭ ادامزاتتىڭ تاعدىرلاس ورتاق تۇلعاسىن قۇرۋ سياقتى ماڭىزدى ۇستانىمداردى العا قويۋى، تۇرلىشە وركەنيەتتەردىڭ سيىسىمدى بولۋىن، ٴوزارا ۇلگى الۋىن دارىپتەۋى، سونداي ـ اق ”بريكس+“ سەلبەستىگىن ىلگەرىلەتۋگە جەتەكشىلىك ەتۋ جونىندە العا قويعان كورەگەن پىكىر ـ ۇسىنىستارى ادامزات وركەنيەتىنىڭ العا باسۋى جانە حالىق مۇددەسى، قۇت ـ ىرىسى جونىندەگى تەرەڭ سۇيىسپەنشىلىگىن جانە اقىل ـ پاراساتىن، جاۋاپكەرشىلىگىن بەينەلەپ، الەمنىڭ وڭتۇستىگىنىڭ ورتاق ارمانى مەن جۇرەك ۇنىنە ۋاكىلدىك ەتتى. مالايزيا جاق ٴتوراعا شي جينپيڭنىڭ كورەگەندىگى مەن باستاماسىن القايدى جانە قولدايدى. مالايزيا ۇكىمەتى جۇڭگومەن جالپى بەتتىك ستراتەگيالىق سەرىكتەستىك قارىم ـ قاتىناستى ونان ارى تەرەڭدەتۋگە كۇش سالىپ، ينفورماتسيا تەحنيكاسى، سيفرلى ەكونوميكا، ەنەرگيا سياقتى جاقتارداعى سەلبەستىكتى كۇشەيتەدى. مالايزيا جاق جۇڭگو جاقتىڭ كەدەيلىكتى ازايتۋ سالاسىندا قول جەتكىزگەن تاڭداي قاقتىراتىن جەتىستىكتەرىنە سۇيىنەدى، جۇڭگو جاقتىڭ ەل باسقارۋ تاجىريبەسىنەن ۇيرەنۋدى، ۇلگى الۋدى ٴۇمىت ەتەدى. مالايزيا مەن جۇڭگونىڭ كوپتەگەن كەلەلى حالىقارالىق، وڭىرلىك ماسەلەلەردەگى ۇستانىمى ۇقساس، تۇرعىسى جاقىن، مالايزيا جاق ستراتەگيالىق دەربەستىككە تاباندى بولادى، جۇڭگو جاقپەن بىرگە كوپ جاقتى سەلبەستىكتى قويۋلاتىپ، ٴوڭىردىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن قورعاۋدى قالايدى.
ۋاڭ ي كەزدەسۋگە قاتىناستى.
