11 - ايدىڭ 8 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن يتاليا زۇڭتۇڭى ماتتارەللامەن كەڭەس وتكىزدى. سۋرەتتە: شي جينپيڭ مەن حانىمى پىڭ لييۋان ماتتارەللا جانە ونىڭ قىزى لاۋرامەن بىرگە سۋرەتكە ءتۇستى.
□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگىنىڭ 11 ـ ايدىڭ 8 ـ كۇنى بەيجيڭنەن بەرگەن حابارى (تىلشىلەر دۇڭ شۋە، فىڭ شينران). 11 ـ ايدىڭ 8 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن يتاليا زۇڭتۇڭى ماتتارەللامەن كەڭەس وتكىزدى.
شي جينپيڭ بىلاي دەپ اتاپ كورسەتتى: بيىل جۇڭگو مەن يتاليانىڭ جالپى بەتتىك ستراتەگيالىق سەرىكتەستىك قارىم ـ قاتىناس ورناتقاندىعىنىڭ 20 جىلدىعى. ەكى جاق جالپى بەتتىك ستراتەگيالىق سەرىكتەستىك قارىم ـ قاتىناستى كۇشەيتۋ ارەكەت جوسپارىن جاريالاپ، تاريحى ۇزاق جىبەك جولى رۋحىن ۇستانىپ، ەكى جاقتى قارىم ـ قاتىناستى دامىتۋدىڭ جاڭا كەزەڭىنە ٴوتۋدى ىلگەرىلەتۋگە ٴبىر اۋىزدان قوسىلدى. بۇگىنگى تاڭدا دۇنيە ٴجۇزى 100 جىلدا بولماعان زور وزگەرىستى باستان كەشىرۋدە، جۇڭگو مەن يتاليا ەكى ٴىرى وركەنيەتتى بايىرعى ەل رەتىندە، اشىق، سيىسىمدى بولۋ، ٴبارىن تۇگەل قامتۋ ٴداستۇرىن اسقاقتاتىپ، حالىقارالىق قوعامنىڭ كەڭەسۋ ارقىلى الاۋىزدىقتاردى شەشىپ، سەلبەستىك ارقىلى قاقتىعىستان اۋلاق بولىپ، قول ۇستاسا جاراسىمدى بىرگە تۇراتىن كوركەم دۇنيە قۇرۋىن ىلگەرىلەتۋى كەرەك.
شي جينپيڭ بىلاي دەپ باسا دارىپتەدى: ٴوزارا قۇرمەت ەتۋ، ٴوزارا سەنىم ارتۋ، ٴوزارا پايدا جەتكىزىپ تەڭ يگىلىككە كەنەلۋ باستان ـ اياق جۇڭگو _ يتاليا قارىم ـ قاتىناسىنىڭ ەڭ ايقىن نەگىزىنە اينالۋى كەرەك. ەكى جاق جۇڭگو _ يتاليا ۇكىمەت كوميتەتتەرىنىڭ جانە ٴار سالاداعى تىلدەسۋ مەحانيزمىنىڭ رولىن تولىق ساۋلەلەندىرىپ، بارىس ـ كەلىستى كۇشەيتىپ، ٴوزارا سەنىمدىلىكتى بەكەمدەپ، ٴبىر ـ ٴبىرىنىڭ وزەكتى مۇددەسى مەن ٴجىتى قاداعالاپ وتىرعان كەلەلى ىستەرىن ۇزدىكسىز ٴتۇسىنىپ جانە قولداپ، ٴوزارا قولداۋ كورسەتەتىن ستراتەگيالىق سەرىك بولۋى كەرەك. جۇڭگو مەن يتاليانىڭ مادەنيەت سەلبەستىگى مول تابىستارعا جانە ومىرشەڭ كۇشكە يە، ەكى جاق گۋمانيتارلىق اۋىس ـ كۇيىستى ۇزدىكسىز جيىلەتىپ، جاڭا كەزەكتى مادەنيەت سەلبەستىگىن اتقارۋ جوسپارىن ويداعىداي تياناقتاندىرىپ، مادەنيەت ـ كوركەمونەر، مادەني ەسكەرتكىشتەردى قورعاۋ، كلاسسيكالىق شىعارمالاردى ٴوزارا اۋدارۋ، ساياحات، وقۋ ـ اعارتۋ سياقتى سالالارداعى سەلبەستىكتى تەرەڭدەتىپ، مادەنيەت مۇرالارى ورىندارى سەلبەستىگىن جۇڭگو مەن يتاليانىڭ گۋمانيتارلىق اۋىس ـ كۇيىسىنىڭ جاڭا جارقىن تۇيىنىنە اينالدىرۋى كەرەك. ەكى جاق ٴتىل وقىتۋىن جانە جاستار مەن ورەندەردىڭ اۋىس ـ كۇيىسىن قولداپ، اناعۇرلىم كوپ جاڭا ٴداۋىر ماركو پولولارىن بىرگە جەتىلدىرۋى كەرەك. ەكى جاق ٴبىرىن ـ ٴبىرى تابىسقا جەتكىزەتىن سەلبەستىك سەرىكتەر بولۋعا تاباندى بولۋى كەرەك. جۇڭگو جاق يتاليانىڭ ساپالى ونىمدەرىن يمپورت ەتۋدى كەڭەيتىپ، ەكى ەل كاسىپورىندارىنىڭ ٴوزارا قارجى قوسۋىن قولداپ، عىلىم ـ تەحنيكا، قورشاعان ورتانى قورعاۋ، تازا ەنەرگيا، عارىش سياقتى سالالارداعى سەلبەستىكتى ۇزدىكسىز ىلگەرىلەتۋدى قالايدى.
شي جينپيڭ بىلاي دەپ اتاپ كورسەتتى: بۇگىنگى تاڭدا دۇنيە ٴجۇزى تەرەڭ وزگەرىستەردى باستان كەشىرۋدە، جۇڭگو مەن ەۆروپانىڭ ەكى ۇلكەن بەيبىت، سىندارلى كۇش رەتىندە، ستراتەگيالىق بايلانىس، ەسىك اشۋ، سەلبەستىك، اۋىس ـ كۇيىس جاساۋ، ٴوزارا ۇلگى الۋ سىندى دۇرىس بەتالىسقا تاباندى بولۋى ەكى جاققا ٴتيىمدى، دۇنيە جۇزىنە ٴتيىمدى. جۇڭگو ەۆروپانى جۇڭگو ۇلگىسىندەگى وسىزامانداندىرۋدى جۇزەگە اسىرۋداعى ماڭىزدى سەرىگى ەتەدى، ەكى جاق سەلبەسىپ تەڭ يگىلىككە كەنەلۋگە تاباندى بولىپ، الاۋىزدىقتاردى ۇيلەسىمدى تىزگىندەپ، جۇڭگو _ ەۆروپا قارىم ـ قاتىناسىنىڭ بولۋعا ٴتيىستى كەمەلدىلىگى مەن تۇراقتىلىعىن ايگىلەۋى كەرەك. جۇڭگو جاق ەۆروپا جاقپەن سەلبەستىكتى كۇشەيتىپ، الەمدىك سىن ـ سايىستارعا توتەپ بەرۋدى قالايدى، يتاليا جاقتىڭ وسى جولدا بەلسەندى رول اتقارۋىن ٴۇمىت ەتەدى.
ماتتارەللا مىنالاردى ٴبىلدىردى: مەنىڭ 2017 ـ جىلى جۇڭگوداعى ساپارىم جانە 2019 ـ جىلى ٴتوراعا شي جينپيڭدى يتالياداعى ساپارىندا كۇتىپ العانىم ٴالى ەسىمدە. بيىل ماركو پولونىڭ قايتىس بولعاندىعىنىڭ 700 جىلدىعى، ماركو پولونىڭ جۇڭگومەن بايلانىسى _ يتاليا _ جۇڭگو دوستىعىنىڭ ارىدان باستاۋ العاندىعىنىڭ، ەكى ۇلكەن وركەنيەتتىڭ ٴبىر ـ بىرىنە ٴار بەرگەندىگىنىڭ ىقشام كورىنىسى. بۇگىنگى تاڭدا دۇنيە ٴجۇزى تەرەڭ وزگەرىستەردى باستان كەشىرۋدە، ادامزات قوعامى ىنتىماقتى، ٴوزارا كومەكتەسۋدى كۇشەيتىپ، جاراسىمدى قاتار ٴومىر ٴسۇرۋدى جۇزەگە اسىرۋدى قاجەت ەتەدى. يتاليا مەن جۇڭگو مادەنيەت، وقۋ ـ اعارتۋ، ٴتىل وقىتۋى، مۇرا ورىندارىنىڭ دوستاسۋى سياقتى گۋمانيتارلىق سالالارداعى اۋىس ـ كۇيىستى، سەلبەستىكتى ونان ارى تەرەڭدەتىپ، شىعىس ـ باتىس وركەنيەتتەرىنىڭ اۋىس ـ كۇيىسىن، ٴوزارا ۇلگى الۋىن ىلگەرىلەتۋگە، ادامزات وركەنيەتىنىڭ العا باسۋىن جەبەۋگە تىڭ ۇلەس قوسۋى كەرەك. يتاليا جاق ٴبىر جۇڭگو پرينسيبىنە تاباندىلىقپەن بويسۇنىپ، جۇڭگونى باستان ـ اياق ماڭىزدى سەلبەستىك سەرىگى ەتەدى، جۇڭگو جاقپەن بىرگە يتاليا مەن جۇڭگونىڭ جالپى بەتتىك ستراتەگيالىق سەرىكتەستىك قارىم ـ قاتىناس ورناتقاندىعىنىڭ 20 جىلدىعىن قۇتتىقتاۋدى وراي ەتىپ، ەكونوميكا ـ ساۋدا، عىلىم ـ تەحنيكا سياقتى سالالارداعى سەلبەستىكتى كۇشەيتىپ، ەكى ەل قارىم ـ قاتىناسىنىڭ تىڭ دەڭگەيگە كوتەرىلۋىن ىلگەرىلەتۋدى ٴۇمىت ەتەدى. يتاليا جاقتىڭ كوپتەگەن كەلەلى ماسەلەدە جۇڭگو جاقپەن تۇرعىسى قارايلاس، ەكەۋى دە قورعامپازدىققا قارسى تۇرادى، ٴوزارا ەسىك اشۋدى دارىپتەيدى، سىندارلى بايلانىس پەن ىنتىماقتى، سەلبەستىكتى كۇشەيتىپ، ٴتۇرلى سىن ـ سايىستارعا بىرگە توتەپ بەرۋدى دارىپتەيدى. يتاليا جاق جۇڭگو جاقپەن كوپ جاقتى ىستەستىكتى جيىلەتىپ، دۇنيە ٴجۇزىنىڭ بەيبىتشىلىگى مەن ورنىقتىلىعىن جەبەۋگە يتاليا _ جۇڭگو ەكى ۇلكەن وركەنيەتتىڭ اقىل ـ پاراساتىن ارناۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى مادەنيەت، عىلىم ـ تەحنيكا، وقۋ ـ اعارتۋ، دۇنيە جۇزىلىك مادەني مۇرا ورىندارىنىڭ دوستاسۋى سياقتى سالالارداعى كوپتەگەن ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا ماتتارەللاعا ارناپ قارسى الۋ سالتىن وتكىزدى.
تيان ـ انمىن الاڭىندا 21 رەت ساليۋت اتىلىپ، قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن يتاليا ەكى ەلدىڭ مەملەكەت ٴانىن ورىندادى. ماتتارەللا شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى سالتانات قاتارىن تاماشالادى.
سول كۇنى كەشتە ٴتوراعا شي جينپيڭ مەن حانىمى پىڭ لييۋان حالىق سارايىنىڭ جينسى زالىندا ماتتارەللا زۇڭتۇڭ مەن ونىڭ قىزى لاۋرانى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
