شي جينپيڭ پەرۋگە بارىپ ازيا - تىنىق مۇحيت ەكونوميكالىق سەلبەستىك ۇيىمىنىڭ 31 ـ رەتكى باسشىلار بەيرەسمي ماجىلىسىنە قاتىناسادى ٴارى پەرۋدە مەملەكەتتىك ساپاردا بولادى، برازيلياعا بارىپ 20 ەل توبى باسشىلارىنىڭ 19 ـ رەتكى باسشىلار ماجىلىسىنە قاتىناسادى ٴارى برازيليادا مەملەكەتتىك ساپاردا بولادى
سىرتقى ىستەر مينيسترلىگىنىڭ مالىمدەمەشىسى تىلشىلەردىڭ سۇراۋىنا جاۋاپ بەردى
شينحۋا اگەنتتىگىنىڭ 11 ـ ايدىڭ 8 ـ كۇنى بەيجيڭنەن بەرگەن حابارى. سىرتقى ىستەر مينيسترلىگىنىڭ مالىمدەمەشىسى حۋا چۇنيىڭ 11 ـ ايدىڭ 8 ـ كۇنى مىنانى جاريالادى:
پەرۋ رەسپۋبليكاسىنىڭ زۇڭتۇڭى بولۋارتتىڭ ۇسىنىسىمەن، مەملەكەت ٴتوراعاسى شي جينپيڭ 11 ـ ايدىڭ 13 ـ كۇنىنەن 17 ـ كۇنىنە دەيىن ليماعا بارىپ ازيا _ تىنىق مۇحيت ەكونوميكالىق سەلبەستىك ۇيىمىنىڭ 31 ـ رەتكى باسشىلار بەيرەسمي ماجىلىسىنە قاتىناسادى ٴارى پەرۋدە مەملەكەتتىك ساپاردا بولادى.
برازيليا فەدەراتسيالىق رەسپۋبليكاسىنىڭ زۇڭتۇڭى لۋلانىڭ ۇسىنىسىمەن، مەملەكەت ٴتوراعاسى شي جينپيڭ 11 ـ ايدىڭ 17 ـ كۇنىنەن 21 ـ كۇنىنە دەيىن ريو ـ دە جانە يرودا 20 ەل توبى باسشىلارىنىڭ 19 ـ رەتكى باسشىلار ماجىلىسىنە قاتىناسادى ٴارى برازيليادا مەملەكەتتىك ساپاردا بولادى.
شينحۋا اگەنتتىگىنىڭ 11 ـ ايدىڭ 8 ـ كۇنى بەيجيڭنەن بەرگەن حابارى (تىلشىلەر چىڭ شين، جۋ چاۋ). سىرتقى ىستەر مينيسترلىگىنىڭ مالىمدەمەشىسى ماۋ نيڭ 11 ـ ايدىڭ 8 ـ كۇنى مەملەكەت ٴتوراعاسى شي جينپيڭنىڭ پەرۋدىڭ ليماسىنا بارىپ ازيا _ تىنىق مۇحيت ەكونوميكالىق سەلبەستىك ۇيىمىنىڭ 31 ـ رەتكى باسشىلار بەيرەسمي ماجىلىسىنە قاتىناساتىندىعى، برازيليانىڭ ريو ـ دە جانە يروسىنا بارىپ 20 ەل توبى باسشىلارىنىڭ 19 ـ رەتكى باسشىلار ماجىلىسىنە قاتىناساتىندىعى جونىندە تىلشىلەردىڭ سۇراۋىنا جاۋاپ بەردى.
”ٴتوراعا شي جينپيڭنىڭ ازيا _ تىنىق مۇحيت ەكونوميكالىق سەلبەستىك ۇيىمى باسشىلارىنىڭ بيىلعى بەيرەسمي ماجىلىسىنە قاتىناسۋى جۇڭگونىڭ ازيا _ تىنىق مۇحيت رايونىن بەتكە الىپ ورىستەتكەن ٴبىر رەتكى ماڭىزدى مەملەكەت باسشىسى ديپلوماتيالىق قيمىلى سانالادى، بۇل جۇڭگو جاقتىڭ ازيا _ تىنىق مۇحيت ەكونوميكالىق سەلبەستىگىنە ايرىقشا ٴمان بەرەتىندىگىن تولىق ايگىلەيدى“. ماۋ نيڭ بىلاي دەدى: قازىر دۇنيە ٴجۇزى ەكونوميكاسىنىڭ ارتۋى دارمەنسىز، ازيا _ تىنىق مۇحيت ٴوڭىرىنىڭ ەكونوميكالىق سەلبەستىگى جاڭا سىن ـ سايىسقا ٴدوپ كەلۋدە. ازيا _ تىنىق مۇحيت ەكونوميكالىق سەلبەستىك ۇيىمى ازيا _ تىنىق مۇحيت وڭىرىندەگى ماڭىزدى ەكونوميكالىق سەلبەستىك تۇعىرى، تاراپتار ازيا _ تىنىق مۇحيت ەكونوميكالىق سەلبەستىك ۇيىمىنىڭ قوزعالتقىشتىق رولىن ۇزدىكسىز ساۋلەلەندىرىپ، دۇنيە ٴجۇزى ەكونوميكاسىنىڭ ارتۋىنا جەتەكشىلىك ەتۋىن ٴۇمىت ەتەدى. ٴتوراعا شي جينپيڭ ماجىلىستە ماڭىزدى ٴسوز سويلەپ، رەفورمانى، ەسىك اشۋدى تەرەڭدەتۋدىڭ ماڭىزدى شارالارىن تانىستىرىپ، جۇڭگونىڭ ازيا ـ تىنىق مۇحيت سەلبەستىگىن ىلگەرىلەتۋ جونىندەگى ساياساتتىق دارىپتەمەسىن بايىمدايدى. جۇڭگو جاق ٴارقايسى جاقپەن بىرگە قۇلشىنىپ، ازيا ـ تىنىق مۇحيت ەكونوميكالىق سەلبەستىك ۇيىمىنىڭ 2040 ـ جىلعى پۇتراجايا كەلەشەكتىڭ نىساناسىن جاپپاي تەڭ تياناقتاندىرىپ، وسى رەتكى ٴماجىلىستىڭ بەلسەندى جەتىستىكتەرگە قول جەتكىزۋىن ىلگەرىلەتىپ، ٴوڭىر ەكونوميكاسىنىڭ ٴبىر تۇلعالانۋىن ىلگەرىلەتۋگە، ازيا ـ تىنىق مۇحيت ٴوڭىرى مەن دۇنيە ٴجۇزىنىڭ ارتۋىن جەبەۋگە تىڭ قوزعاۋشى كۇش قوسىپ، ازيا ـ تىنىق مۇحيت تاعدىرلاس ورتاق تۇلعاسىن قول ۇستاسا قۇرۋدى قالايدى.
”ٴتوراعا شي جينپيڭنىڭ 20 ەل توبى باسشىلار ماجىلىسىنە قاتىناسۋى جۇڭگو جاقتىڭ كوپ جاقتىلىقتى باتىل قولداعاندىعىن ايگىلەدى، جۇڭگو جاقتىڭ 20 ەل توبى سەلبەستىگىنە ايرىقشا ٴمان بەرەتىندىگىن ايگىلەدى“. ماۋ نيڭ بىلاي دەدى: قازىر دۇنيە ٴجۇزى ەكونوميكاسىنىڭ ارتۋ قوزعاۋشى كۇشى جەتكىلىكسىز، الەمدىك دامۋ سىن ـ سايىسقا ٴدوپ كەلۋدە، حالىقارالىق جاعدايدا ورنىقسىز، تۇراقسىز فاكتورلار كوبەيۋدە. تاراپتار 20 ەل توبىنىڭ حالىقارالىق ەكونوميكالىق سەلبەستىگى نەگىزگى تالقى مىنبەرىنىڭ رولىن ساۋلەلەندىرىپ، دۇنيە ٴجۇزى ەكونوميكاسىنىڭ ارتۋىن جەبەۋگە قوزعاۋشى كۇش قوسىپ، الەمدىك ەكونوميكانى باسقارۋدى كەمەلدەندىرۋگە ايقىن باعدار كورسەتۋىن جاپپاي ٴۇمىت ەتۋدە. ٴتوراعا شي جينپيڭ ماجىلىسكە قاتىناسقاندا ماڭىزدى ٴسوز سويلەپ، ”ادىلەتتى دۇنيە جانە باياندى پلانەتا قۇرۋ“ نەگىزگى تاقىرىبىن ارقاۋ ەتىپ، ٴار ەل باسشىلارىمەن ىشكەرىلەي پىكىر اۋىستىرادى. جۇڭگو جاق تەرەزەسى تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋى مەن جالپىعا ٴتيىمدى، سيىسىمدى ەكونوميكانىڭ جاھاندانۋىن دارىپتەيدى، تاراپتارمەن بىرگە قۇلشىنىپ، ريو ـ دە جانە يرو باسشىلار ٴماجىلىسىنىڭ كوپ جاقتىلىققا تاباندى بولۋ، اشىق دۇنيە ٴجۇزى ەكونوميكاسىن قۇرۋ، باياندى دامۋدى قولداۋ جاقتارىندا بەلسەندى تابىستارعا قول جەتكىزۋىن ىلگەرىلەتۋدى، ايقىن سيگنال تاراتىپ، ٴار ەلدىڭ سىن ـ سايىستارعا سەلبەسە توتەپ بەرۋىن، بىرگە گۇلدەنۋدى جۇزەگە اسىرۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.
شينحۋا اگەنتتىگىنىڭ 11 ـ ايدىڭ 8 ـ كۇنى بەيجيڭنەن بەرگەن حابارى (ٴتىلشى چىڭ شين). سىرتقى ىستەر مينيسترلىگىنىڭ مالىمدەمەشىسى ماۋ نيڭ 11 ـ ايدىڭ 8 ـ كۇنى مەملەكەت ٴتوراعاسى شي جينپيڭنىڭ پەرۋدە، برازيليادا مەملەكەتتىك ساپاردا بولاتىندىعى جونىندە تىلشىلەردىڭ سۇراۋىنا جاۋاپ بەردى.
ماۋ نيڭ مىنالاردى ٴبىلدىردى: پەرۋ لاتىن امەريكاسىنداعى ماڭىزدى مەملەكەت، جۇڭگو پەرۋمەن جالپى بەتتىك ستراتەگيالىق سەرىكتەستىك قارىم ـ قاتىناس ورناتقان. ديپلوماتيالىق قارىم ـ قاتىناس ورناتقان 53 جىلدان بەرى، ەكى ەلدىڭ ساياسي ٴوزارا سەنىمدىلىگى ۇزدىكسىز بەكەمدەلىپ، ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىنىڭ تابىسى مول بولدى، گۋمانيتارلىق اۋىس ـ كۇيىس اناعۇرلىم تەرەڭدەپ، ەكى ەل حالقىنا ناقتى يگىلىكتەر اكەلدى. بىلتىردان بەرى ٴتوراعا شي جينپيڭ مەن بولۋارت زۇڭتۇڭ ەكى رەت كەزدەسىپ، جۇڭگو _ پەرۋ قارىم ـ قاتىناسىنىڭ دامۋىنا جاڭا جوبا جاسادى.
ماۋ نيڭ تانىستىرىپ بىلاي دەدى: وسى رەتكى ساپار ٴتوراعا شي جينپيڭنىڭ اراعا 8 جىل سالىپ پەرۋگە تاعى دا ساپارلاي بارۋى بولماق. ساپار كەزىندە ٴتوراعا شي جينپيڭ بولۋارت زۇڭتۇڭمەن كەڭەس وتكىزىپ، ەكى جاقتى قارىم ـ قاتىناس، ٴتۇيىندى سالالارداعى سەلبەستىك سياقتىلار جونىندە ىشكەرىلەي پىكىر اۋىستىرادى ٴارى قارسى الۋ سالتى، سەلبەستىك حۇجاتتارىن اۋىستىرۋ سالتى، قارسى الۋ قوناعاسى سياقتى مەملەكەتتىك ىستەر قيمىلدارىنا، سونداي ـ اق باسقا دا قاتىستى سايكەستى قيمىلدارعا قاتىناسادى. ”ٴتوراعا شي جينپيڭنىڭ وسى رەتكى ساپارىنىڭ جۇڭگو مەن پەرۋدىڭ ساياسي سەنىمدىلىگىن ونان ارى بەكەمدەپ، ٴار سالاداعى ناقتى سەلبەستىكتى تەرەڭدەتىپ، جۇڭگو مەن پەرۋدىڭ جان ـ جاقتى ستراتەگيالىق سەرىكتەستىك قارىم ـ قاتىناسىنىڭ اناعۇرلىم كوپ بەلسەندى جەتىستىكتەرگە قول جەتكىزۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتەتىندىگىنە سەنەمىن“.
ماۋ نيڭ مىنالاردى ٴبىلدىردى: جۇڭگو مەن برازيليا جەكە ـ جەكە شىعىس، باتىس جارتى شارداعى ەڭ ٴىرى وركەندەپ كەلە جاتقان ەلدەر، ەكەۋى دە بازارى جاڭادان گۇلدەنگەن ماڭىزدى ەلدەر، ٴوزارا جالپى بەتتىك ستراتەگيالىق سەرىكتەر. بيىل جۇڭگو مەن برازيليانىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعى. جارتى عاسىردان بەرى، حالىقارالىق اۋمالى ـ توكپەلى جاعداي الدىندا، جۇڭگو مەن برازيليا قارىم ـ قاتىناسى باستان ـ اياق اقاۋسىز، ورنىقتى دامىپ، ٴار سالاداعى ناقتى ىستەر سەلبەستىگىنىڭ تابىسى مول بولىپ، وركەندەپ كەلە جاتقان ٴىرى ەلدەردىڭ ىنتىماقتاسا سەلبەسۋىنىڭ، قول ۇستاسا دامۋىنىڭ ۇلگىسىنە اينالىپ، ەكى جاقتى قارىم ـ قاتىناستىڭ جالپى جاعدايلىق، ستراتەگيالىق، الەمدىك ىقپالى ۇزدىكسىز جوعارىلادى. بىلتىر 4 ـ ايدا برازيليا زۇڭتۇڭى لۋلا جۇڭگودا ٴساتتى تۇردە مەملەكەتتىك ساپاردا بولدى، ەكى ەلدىڭ مەملەكەت باسشىلارى جاڭا داۋىردەگى جۇڭگو _ برازيليا قارىم ـ قاتىناسىنىڭ جاڭا بولاشاعىن اشۋعا جەتەكشىلىك ەتۋ جونىندە ٴبىر قىدىرۋ ماڭىزدى ورتاق تانىمعا كەلدى.
ماۋ نيڭ بىلاي دەدى: وسى رەتكى ساپار ٴتوراعا شي جينپيڭنىڭ اراعا 5 جىل سالىپ برازيلياعا تاعى دا ساپارلاي بارۋى بولماق. ٴتوراعا شي جينپيڭ لۋلا زۇڭتۇڭمەن كەڭەس وتكىزىپ، ەكى جاقتى قارىم ـ قاتىناس جانە بىرگە كوڭىل ٴبولىپ وتىرعان حالىقارالىق، وڭىرلىك ماسەلەلەر جونىندە ىشكەرىلەي پىكىر اۋىستىرادى، قارسى الۋ سالتى، سەلبەستىك حۇجاتتارىنا قول قويۋ سالتى، تىلشىلەرمەن كەزدەسۋ، قارسى الۋ قوناعاسى سياقتى مەملەكەتتىك ىستەر قيمىلدارىنا قاتىناسادى. ٴتوراعا شي جينپيڭنىڭ وسى رەتكى ساپارىنىڭ ەكى جاقتىڭ ساياسي جاقتاعى ٴوزارا سەنىمدىلىگىن ونان ارى بەكەمدەپ، ەكى جاقتى قارىم ـ قاتىناستىڭ ستراتەگيالىق سيپاتىن، جاڭالىق اشۋ سيپاتىن جانە جەتەكشىلىك سيپاتىن جوعارىلاتىپ، ەكى ەلدىڭ دامۋ ستراتەگياسىن ۇشتاستىرۋدى كۇشەيتىپ، ەكى جاقتىڭ الەمدىك قولامتالى ماسەلەلەر جونىندەگى ستراتەگيالىق پىكىرلەسۋى مەن سايكەسۋىن تەرەڭدەتەتىندىگىنە، جۇڭگو مەن برازيليا قارىم ـ قاتىناسىنىڭ تاعى ٴبىر ”التىن 50 جىلىن“ قول ۇستاسا باستايتىندىعىنا سەنەمىن.
