يمپورت كورمەسىندە شينجياڭ كاسىپورىندارىنا ىلەسىپ ”تاۋار ساتىپ الدى“
□ انار بۇلت \ شينجياڭ گازەتىنىڭ ٴتىلشىسى حي حۇڭۋي
”ٴبىز مۇناي ـ حيميا كاسىپورنىمىز، بىزگە، نەگىزىنەن، ٴبىرسىپىرا ٴىرى تۇرپاتتى جابدىق قاجەت“؛
”شينجياڭدا بازار اشقانىمىزعا 10 جىل بولدى“؛
”شينجياڭداعى كوپتەگەن ٴىرى كاسىپورىن ٴبىزدىڭ جابدىقتارىمىزدى ىستەتۋدە“؛
...
11 ـ ايدىڭ 7 ـ كۇنى 7 ـ كەزەكتى جۇڭگو حالىقارالىق يمپورت كورمەسىنىڭ (تومەندە قىسقارتىلىپ ”يمپورت كورمەسى“ دەلىنەدى) تەحنيكالىق جابدىقتار كورمە اۋماعىندا شينجياڭ كاسىپورىندارىنان قۇرام تاپقان كورمە ۇيىرمەسى سەلبەستىك جاساسۋ ورايىن بەلسەنە ىزدەپ، حالىقارالىق بازارىن كەڭەيتتى.
تاڭەرتەڭ ەرتە اۆتونوميالى رايوندىق ساۋدا ىستەرى مەڭگەرمەسى قارجى قوسۋ، ساۋدانى جەبەۋ ورتالىعىنىڭ كادرى دۋ گوشىڭ 10نان استام شينجياڭ كاسىپورنىنىڭ ادامدارىن باستاپ، ٴارقايسى كورمە ورىندارى اراسىندا شاپقىلاپ، ٴتۇيىلىستىرۋ، اۋىس ـ كۇيىس جاساۋمەن قاربالاس بولدى.
وسى كەزەكتى يمپورت كورمەسى جالپى 129 مەملەكەت پەن رايوننان كەلگەن 3496 كورمە ساۋداگەرىن كورمەگە قاتىسۋعا باۋرادى. مەملەكەت (رايون) سانى مەن كاسىپورىن سانى الدىڭعى كەزەكتەگىدەن اسىپ ٴتۇستى. شينجياڭ ساۋدا ۇيىرمەسى 270 كاسىپورىندى كورمەگە قاتىناسۋعا ۇيىمداستىردى، يمپورت كورمەسىنىڭ شوعىرلاندىرۋ ونىمدىلىگى شينجياڭ كاسىپورىندارىنا بۇكىل جەر شارىنداعى وزىق دەڭگەيدەگى تاۋارلاردى ٴبىر جولدا تاڭداپ ساتىپ الۋىنا وراي ازىرلەدى.
وسىنىڭ الدىندا شينجياڭنىڭ ساتىپ الۋ ساۋداگەرلەرىمەن ”بىرگە ٴبىر“ دالمە ـ ٴدال ٴتۇيىلىسۋ ارقىلى اۆتونوميالى رايوندىق ساۋدا ىستەرى مەڭگەرمەسى ساتىپ الۋشى ساۋداگەرلەردىڭ سۇرانىسىنا نەگىزدەلىپ، تۇتىنۋ بۇيىمدارى، ازىق ـ تۇلىك جانە اۋىل شارۋاشىلىق ونىمدەرى، تەحنيكالىق جابدىق، اۆتوكولىك سياقتى سالاعا ساياتىن 5 كورمە ۇيىرمەسىن دەن قويا ۇيىمداستىرىپ، شينجياڭ ساۋدا ۇيىرمەسىنىڭ كورمە ارالايتىن 5 جەلىسىن بەلگىلەدى، جالپى 50 كاسىپورىن وسى رەتكى كورمە قيمىلىنا قاتىناستى.
”وسى جەلىلەردىڭ بارىنە شينجياڭ كاسىپورىندارى ٴبىرشاما كوڭىل بولەدى جانە قىزىعادى“. دۋ گوشىڭ بىلاي دەدى: الدىن الا ارالاۋ جانە جاعداي ۇعىسۋ ارقىلى اۆتونوميالى رايوندىق ساۋدا ىستەرى مەڭگەرمەسى شينجياڭ كاسىپورىندارىمەن بايلانىسى ٴبىرشاما جوعارى كاسىپورىنداردى ىرىكتەدى ٴارى ولاردى ٴبىر جەلىگە ٴتىزىپ، كاسىپورىنداردىڭ لايىقتى سەلبەستىك سەرىكتەرىن ٴتىپتى دە تەز ٴارى جوعارى ٴونىمدى تابۋىنا مۇمكىندىك جاراتتى.
”تابىس مول، مۇنداي ۇيىرمە قۇراپ كورمەگە قاتىناسۋ ٴتاسىلىنىڭ ونىمدىلىگى جوعارى ٴارى دالمە ـ ٴدال بولدى“. الاتاۋ جياندان جيحۋا زات اينالىمى قامباسى شەكتى سەرىكتەستىگىنىڭ كاسىپ ىستەرى ديرەكتورى باينتاۋحا بىلاي دەدى: وسى كەزەكتى يمپورت كورمەسىندە سەرىكتەستىگىمىز حالىقارالىق كاسىپورىنداردىڭ وزىق تەحنيكاسى مەن باسقارۋ ۇلگىسىن ۇيرەندى، زەردەلىلەنگەن، سيفرلانعان تۇعىرلاردى شەكارا وتكەلىنىڭ زات اينالىمى قامبا ىستەرىنە ەنگىزىپ، زات اينالىمىنىڭ ونىمدىلىگى مەن قىزمەت وتەۋ ساپاسىن جوعارىلاتۋدى جوسپارلاۋدامىز.
وسى رەت كورمەگە قاتىناسقان شينجياڭ يوۋفۋ كاسىپ سالاسى بازاسى شەكتى سەرىكتەستىگى، باستىسى، تەحنيكالىق جابدىق جانە ساۋداعا قىزمەت وتەۋ جاعىنداعى سەلبەستىك سەرىكتەرىن قاراستىردى. اتالعان سەرىكتەستىكتىڭ ورىنباسار باس ديرەكتورى جاڭ سۇڭلياڭ بىلاي دەدى: كورمەگە قاتىناسۋ جانە اۋىس ـ كۇيىس جاساۋ ارقىلى سەرىكتەستىگىمىز كومەسكى سەلبەستىك سەرىكتەرىن تاپتى، ونىڭ ۇستىنە تاعى فينانس، حالىقارالىق زات اينالىمى سياقتى سايكەستى قىزمەت وتەۋگە قاتىستى ينفورماتسيالاردى العاشقى ادىمدا ۇعىسىپ، كەلەر جىلعى شەتەل بازارىن اشۋ جوسپارىمىزعا بەرىك نەگىز قالادىق.
شاڭحاي لانجيڭ ميكرو ورگانيزم عىلىم ـ تەحنيكا شەكتى سەرىكتەستىگىنىڭ سەرىكتەسۋشىسى گىڭ چياڭ مىنالاردى ٴبىلدىردى: سەرىكتەستىگىمىز شينجياڭنىڭ اۋىل شارۋاشىلىق بايلىعىنا جانە بازار كومەسكى كۇشىنە ايرىقشا نازار اۋدارىپ وتىر، شينجياڭنىڭ جوعارى مەكتەپتەرىمەن جانە عىلمي زەرتتەۋ ورىندارىمەن سەلبەستىك جاساسىپ، اۋىل شارۋاشىلىعى عىلىم ـ تەحنيكاسىندا جاڭالىق اشۋ مەن تابىستاردى كادەگە جاراتۋدى بىرگە ىلگەرىلەتۋدى ٴۇمىت ەتەمىز. يمپورت كورمەسى سىندى تۇعىر ارقىلى ٴتىپتى دە كوپ سەلبەستىك جاساسىپ، شينجياڭداعى شارۋالاردىڭ ٴونىمدى مولايتۋىنا، كىرىستى ارتتىرۋىنا دەم بەرۋمەن قاتار، شينجياڭنىڭ ساپالى اۋىل شارۋاشىلىق ونىمدەرىن ەنگىزىپ، ەكى جەردىڭ ەكونوميكالىق قۇنىن بىرگە جوعارىلاتۋدى ٴۇمىت ەتەمىز.
وسى كەزەكتى يمپورت كورمەسىندە ٴۇرىمجى قالاسىنان جالپى 137 كاسىپورىن كورمەگە قاتىناستى، وسى كاسىپورىنداردىڭ يمپورت كورمەسىندەگى تابىسى مول بولدى، 10 نەشە كاسىپورىن سول جەردىڭ وزىندە حالىقارالىق قاريدارلارمەن شامامەن 5 ميلليارد 800 ميلليون يۋان ساۋدا توحتامىنا قول قويىستى.
ٴۇرىمجى قالالىق ساۋدا ىستەرى مەكەمەسى پارتيا باسشىلىق گرۋپپاسىنىڭ شۋجيى يان جۇن تانىستىرىپ بىلاي دەدى: ٴۇرىمجى قالاسى تاعى وسى رەتكى كورمەگە قاتىناسۋ ورايىنان پايدالانىپ جياڭسۋ، جىجياڭ، شاڭحاي وڭىرلەرىندە كەڭىنەن ساۋداگەر شاقىرۋ قيمىلىن قانات جايدىرىپ، جاڭا ەنەرگيا، بيولوگيالىق ٴدارى ـ دارمەك، قۇرىلىس ماتەريالدارى سياقتى كوپتەگەن كاسىپ سالاسىمەن ٴساتتى ٴتۇيىلىسىپ، كوپتەگەن كاسىپورىندى شينجياڭعا كەلىپ قارجى قوسۋعا، تەكسەرۋگە باۋرادى.
قازاقستان جىبەك جولى شەكتى جاۋاپكەرشىلىك سەرىكتەستىگىنىڭ باس ديرەكتورى ارىسقانوۆ مۇراتقان مىنالاردى ٴبىلدىردى: قازاقستان جۇڭگونىڭ شينجياڭىمەن كورشىلەس، سەرىكتەستىگىمىز جۇڭگونىڭ شينجياڭىمەن سەلبەستىك بولاشاعىنا سەنىممەن قارايدى. جۇڭگو شينجياڭ كاسىپورىندارىمەن ٴتىپتى دە كەڭ سەلبەستىك ورىستەتىپ، ەكى جاقتىڭ ەكونوميكاسىنىڭ گۇلدەنۋىن، دامۋىن بىرگە ىلگەرىلەتۋدى ٴۇمىت ەتەمىز.
