تيانشان تورى - شينجياڭ گازەتىنىڭ حابارى (ٴتىلشى ٴپاريزات ابدۇل حابارلايدى). تاياۋدا حوتان ايماعىنداعى تۇڭعىش تولىق كۇندىك ۇكىمەت اشقان تولىق كۋرس مەكتەبى — شينجياڭ حوتان شۋەيۋانى ماڭدايشالىق اسىپ قۇرىلدى.
11 - ايدىڭ 8 - كۇنى، حوتان ايماعىنداعى تۇڭعىش تولىق كۇندىك ۇكىمەت اشقان تولىق كۋرس مەكتەبى — شينجياڭ حوتان شۋەيۋانى ماڭدايشالىق اسىپ قۇرىلدى. سۋرەتتى لۋ يىڭ تۇسىرگەن
شينجياڭ حوتان شۋەيۋانى 2024 ـ جىلى 5 ـ ايدا وقۋ ـ اعارتۋ مينيسترلىگىنىڭ بەكىتۋىمەن حوتان شىفان ارناۋلى تەحنيكۋم مەكتەبى مەن شينجياڭ ۇيعۇر شيپاگەرلىگى ارناۋلى تەحنيكۋم مەكتەبىنەن بىرىگىپ قۇرىلعان، مەكتەپتىڭ يەلەگەن جەر اۋماعى 2468 مۋ. قازىر زاڭ عىلىمى، پەداگوگيكا، ادەبيەت، نازاريالىق فيزيكا، ينجەنەريالىق ٴپان، اۋىل شارۋاشىلىعى ٴىلىمى، مەديتسينا، باسقارۋ عىلىمى، كوركەمونەر عىلىمى سىندى 9 ۇلكەن ٴپاندى قامتىپ، جوسپارداعى وقىپ جاتقان وقۋشى 22 مىڭعا جەتتى.
شينجياڭ حوتان شۋەيۋانىنا بارساڭىز، قىزىل ـ اق تۇستەن قۇرالعان، ەڭسەلى دە تاماشا وقىتۋ عيماراتىن كورەسىز، وقىتۋ عيماراتىنداعى كەڭ دە جارىق ساباقحانالارعا وسىزاماندانعان وقىتۋ قۇرىلعىلارى ورنالاستىرىلىپ، وقىتۋشى ـ وقۋشىلارعا تاماشا ۇيرەنۋ ورتاسىن ازىرلەگەن. كىتاپ تولى كىتاپحانا، تەگىس تە كەڭ دەنە تاربيە الاڭى، حوش ٴيىس اڭقىعان اسحانا... تۇتاس مەكتەپ اۋلاسى جاندى دا جالىندى.
10 - ايدىڭ 31 - كۇنى شينجياڭ حوتان شۋەيۋانىنىڭ الاڭىندا وقۋشىلار ساباقتا (كەڭىستىكتەن تۇسىرىلگەن). سۋرەتتى ابليكىم يبرايىم تۇسىرگەن
شينجياڭ حوتان شۋەيۋانى پارتكومىنىڭ ورىنباسار شۋجيى، شۋەيۋاننىڭ ورىنباسار باستىعى ۋاڭ جىجيان تانىستىرىپ بىلاي دەدى: شۋەيۋانىمىز پەداگوگيكانى، ينجەنەريالىق ٴپاندى، مەديتسينانى وزەكتى ٴپان ەتىپ، العاشقى توپتا يدەيالىق ـ ساياسي تاربيەنى، وقۋ الدى تاربيەسىن، باستاۋىش مەكتەپ تاربيەسىن، كومپيۋتەر عىلىمى مەن تەحنيكاسىن، ساندى مالىمەت عىلىمى مەن ٴىرى ساندى مالىمەت تەحنيكاسىن، مەديتسينالىق تەكسەرۋ تەحنيكاسىن قامتىعان 6 تولىق كۋرس ماماندىعىن اشتى، بۇل حوتان ايماعىنىڭ ەكونوميكالىق، قوعامدىق دامۋ قاجەتىنە ۇيلەسۋمەن بىرگە، وقۋشىلارعا كەڭ جۇمىستانۋ بولاشاعىن ازىرلەيدى. اشىلعان 32 ەرەكشە ارناۋلى كۋرس ماماندىعى ەگىن، ورمان، بالىق، مال شارۋاشىلىعى، ەمدەۋ، ٴدارى ـ دارمەك، دەنساۋلىق ساقتاۋ، ەلەكتروندىق ينفورماتسيا، الەۋمەتتىك باسقارۋ سياقتى كوپتەگەن سالالارعا سايادى. قازىر، تولىق كۋرسكە جاڭادان قابىلدانعان 1000نان استام وقۋشى مەكتەپكە كىرۋ راسمياتىن ءبىتىرىپ بولدى.
سانشيدان كەلگەن ۋىن كىرۇڭ شينجياڭ حوتان شۋەيۋانى 2024 - جىلدىق وقۋعا دەيىنگى وقۋ - اعارتۋ كاسىبىنىڭ وقۋشىسى، تاكلاماكان ءشولىنىڭ جيەگىنە سالىنعان بۇل مەكتەپ ونى قاتتى جەلپىندىردى. ”بۇرىن شينجياڭدى ۇنەمى بەينە جازبادان عانا كورەتىنمىن، مەكتەپكە كەلگەن كەيىن تۇسىرگەن بەينە جازبالارىمدى ۇيدەگىلەرگە جولداپ ولارمەن ورتاقتاستىم“ ،-دەدى ۋىن كىرۇڭ، ول مەكتەپتەگى ۇيرەنۋ جانە جەتىلۋ ورايىن قاستەرلەيتىنىن، قابىلەتىن جوعارىلاتىپ، وقۋ تاۋىسقان سوڭ مەملەكەتتى قۇدىرەتتەندىرۋگە ۇلەسى قوساتىنىن ايتتى.
10 - ايدىڭ 31 - كۇنى، شينجياڭ حوتان شۋەيۋانىنىڭ الدىڭعى قاقپاسى (كەڭىستىكتەن تۇسىرىلگەن). سۋرەتتى ابليكىم يبرايىم تۇسىرگەن
وقۋ ـ وقىتۋ ساپاسىن ٴوسىرۋ ٴۇشىن، شينجياڭعا كومەكتەسەتىن ولكە، قالالاردىڭ كومەگىندە شينجياڭ حوتان شۋەيۋانى بەيجيڭ، تيانجين، انحۇي سياقتى جەرلەردەگى 30دان استام جوعارى مەكتەپتەن تاڭداۋلى وقىتۋشىلار مەن باسقارۋشى دارىندىلاردى ۇسىنىس ەتتى. مۇنان سىرت، شينجياڭ حوتان شۋەيۋانى مەكتەپ، ۇكىمەت، كاسىپورىن ٴۇش جاق بىرلەسىپ قيمىلدايتىن، دارىندىلارمەن قامداۋدى قاجەتسىنۋمەن دالمە ـ ٴدال ۇشتاستىراتىن، بايلىقتى شوعىرلاندىرىپ، توعىسپالى داميتىن ٴوندىرىس، عىلىم ـ تەحنيكا، وقۋ ـ اعارتۋدى توعىستىرۋدان ۇلگى كورسەتۋ بازاسىن كۇش سالا تۇلعالايدى.
”بولاشاقتا شۋەيۋانىمىز شينجياڭنىڭ، اسىرەسە، وڭتۇستىك شينجياڭنىڭ ەكونوميكالىق، قوعامدىق دامۋ قاجەتىن تياناق ەتىپ، جاڭا ينجەنەريا عىلىمى، جاڭا مەديتسينا، جاڭا اۋىل شارۋاشىلىعى عىلىمى، جاڭا قوعامدىق عىلىمدار سياقتى سالالاردى ارقاۋ ەتىپ، بازار قاجەتىنە ۇيلەسەتىن كاسىپتەردى اناعۇرلىم يكەمدى ورنالاستىرىپ، جاڭالىق اشۋ رۋحى مەن امالياتتىق قابىلەتىنە يە اناعۇرلىم كوپ جوعارى ساپالى دارىندىلاردى باۋليدى“، ـ دەدى ۋاڭ جىجيان.
