انار بۇلت \ شينجياڭ گازەتىنىڭ ٴتىلشىسى جاڭ يانفاڭ 11 ـ ايدىڭ 15 ـ كۇنى ۇرىمجىدەن حابارلايدى. 11 ـ ايدىڭ 13 ـ كۇنى ”جاڭا داۋىردەگى شينجياڭ كادرلارى ۇلكەن ساباقحاناسى“ حالىقتى بايىتىپ شينجياڭدى گۇلدەندىرۋ بولىگى ارناۋلى تاقىرىپتىق لەكسياسى وتكىزىلدى. جۇڭگو فينانس ٴىلىم قوعامى جاسىل فينانس كاسىپتىك كوميتەتىنىڭ مەڭگەرۋشىسى، بەيجيڭ جاسىل فينانس جانە باياندى دامۋدى زەرتتەۋ ورنىنىڭ باستىعى ما جۇن ”جاسىل فينانس، تيپ جاڭالاعان فينانس جانە جەرگىلىكتى ورىننىڭ جاڭالىق اشۋى“ نەگىزگى تاقىرىبىن ارقاۋ ەتىپ لەكسيا جاسادى.
ما جۇن ۇزاق ۋاقىت ماكرولىق ەكونوميكا، اقشا جانە فينانس ساياساتى، كاپيتال بازارى، جاسىل فينانس، قورشاعان ورتا ەكونوميكاسى سياقتى سالالاردى زەرتتەۋمەن شۇعىلدانعان، ەلىمىزدىڭ جاسىل فينانس سالاسىنداعى بەدەلدى مامان. لەكسيادا ما جۇن جاسىل فينانس، تيپ جاڭالاعان فينانس، جەرگىلىكتى ورىننىڭ جاسىل فينانس رەفورماسىندا جاڭالىق اشۋى سياقتى جاقتاردا ەگجەي ـ تەگجەيلى تۇسىنىك جاساپ، جىجياڭ حۋجوۋ جاسىل فينانس رەفورماسىندا جاڭالىق اشۋ سىناق رايونىنىڭ تابىستى مىسالدارىنا ىشكەرىلەي تالداۋ جاسادى ٴارى شينجياڭنىڭ ٴىس جۇزىندىك جاعدايىمەن ۇشتاستىرىپ، تالداۋ جاسادى جانە تالقى جۇرگىزدى.
ساباق تىڭداۋشىلار بىلاي دەپ قارادى: ارناۋلى تاقىرىپتىق لەكسيانىڭ نەگىزگى تاقىرىبى ايقىن، مازمۇنى باي، اسا كۇشتى جەتەكشىلىك سيپاتقا، باعىتتامالىلىق سيپاتقا يە، كوپشىلىكتىڭ جاڭا جاعدايداعى شينجياڭنىڭ فينانس قىزمەتىن ويداعىداي ىستەۋىنە، شينجياڭ ەكونوميكاسىنىڭ جوعارى ساپالى دامۋىن ىلگەرىلەتۋىنە جاڭا وي جەلىسىن اشىپ، جاڭا قوزعاۋشى كۇش ۇستەدى. بۇدان بىلاي قىزمەت ورنى جاۋاپكەرشىلىگىن تياناق ەتىپ، فينانستى ۇيرەنىپ، فينانستى ٴتۇسىنىپ، فينانستان پايدالانىپ، يدەيانى ونان ارى ازات ەتىپ، ساياساتتى جەتە ٴتۇسىنىپ، ٴورىس اشا جاڭالىق اشىپ، ەكونوميكا، فينانس قىزمەتىن يگەرۋ قابىلەتىمىز بەن دەڭگەيىمىزدى ۇزدىكسىز جوعارىلاتىپ، بۇكىل شينجياڭ فينانسىنىڭ جوعارى ساپالى دامۋىنىڭ جاڭا جاعدايىن ۇزدىكسىز اشۋعا، كورىكتى شينجياڭ قۇرۋدى جەدەلدەتۋگە تىڭ ۇلەس قوسامىز.
وسى رەتكى ارناۋلى تاقىرىپتىق لەكسيا بەينە ەكران ٴماجىلىسى فورماسىندا وتكىزىلدى، اۆتونوميالى رايوننىڭ قاتىستى ورىندارىنىڭ، تاراۋلارىنىڭ، حالىقتىق ۇيىمداردىڭ، ٴىشىنارا كاسىپورىنداردىڭ جانە جوعارى تەحنيكۋم مەكتەپتەرىنىڭ جاۋاپتىلارى، شينجياڭداعى فينانس قۇرىلىمدارىنىڭ نەگىزگى جاۋاپتىلارى نەگىزگى ٴماجىلىس الاڭىندا لەكسياعا قاتىناستى. ايماق، وبلىس، قالالاردىڭ، اۋدان، قالا، رايونداردىڭ فينانس قىزمەتىن مىندەتىنە العان جاۋاپتىلارى، قاتىستى ورىنداردىڭ جاۋاپتىلارى بولىمشە ٴماجىلىس الاڭىندا لەكسياعا قاتىناستى.
