2024 جۇڭگو شينجياڭ جىبەك جولى مۋزيكا ماۋسىمىنىڭ تۇڭعىش قويىلىمى قويىلدى
مۋزيكادان جىبەك جولى جاڭعىرىعى ەستىلدى
انار بۇلت \ شينجياڭ گازەتىنىڭ ٴتىلشىسى ليۋ مىڭمىڭ 11 ـ ايدىڭ 18 ـ كۇنى ۇرىمجىدەن حابارلايدى. 11 ـ ايدىڭ 18 ـ كۇنى كەشتە ٴۇرىمجى مادەنيەت ورتالىعىنىڭ مۋزيكا زالىندا جۇڭگو مۋزيكا شۋەيۋانى ۇلتتىق وركەسترىنىڭ باس ديريجەرى شۇي جىجۇننىڭ ديريجەر تاياقشاسىن جەڭىل سەرمەۋىمەن «چاڭان ەلەسىنە بويلاۋ» كۇيى باياۋ ورىندالا باستادى، كوزدى جۇمىپ دەن قويا تىڭداعاندا، بەينە ٴبىر چاڭاننان جول العان كەرۋەن ياڭگۋاننان شىعىپ، ٴشول دالانى، قارلى تاۋدى، جايلاۋدى، قۇبا ٴتۇزدى باسىپ وتكەندەي بولادى... «مۋزيكا سالعان جىبەك جولى» مۋزيكا كەشىنىڭ شىمىلدىعىن اشىپ، مۋزيكانىڭ رومانتيكالى سالتاناتتى ساپارىن باستادى.
وسى جولعى مۋزيكا كەشىن جۇڭگو مۋزيكا شۋەيۋانى، شينجياڭ كوركەمونەر تەاترى ۇلتتىق وركەسترى، شينجياڭ كوركەمونەر شۋەيۋانى ورىندادى، ورىندالعان 12 مۋزيكانىڭ ىشىندە جۇرت اۋزىندا جات بولىپ كەتكەن حالىق اندەرىمەن قاتار، ەلىمىزدەگى ۇزدىك كومپوزيتورلار شىعارعان جاڭا كۇيلەر دە بار. وسى مۋزيكالار جىبەك جولى بويىنداعى ەلدەردىڭ كلاسسيك مۋزيكالارىن ماتەريال ەتە وتىرىپ، وعان جاسامپازدىقپەن وزگەرىس ەنگىزىلىپ، اسپاپقا ٴتۇسىرىلىپ، سيمفونيا فورماسىندا ورىندالدى. سونىمەن قاتار عىجەك، راۋاپ، ساتار، تامبۇر، داپ، پيپا، ارحۋ، بامبۋك سىبىزعى، سىرناي سياقتى حالىقتىق مۋزيكا اسپاپتارى مەن ترومبون، باس سكريپكا سياقتى باتىس ەلدەرىنىڭ مۋزيكا اسپاپتارىن كەمەلدى توعىستىردى.
«شيڭشيڭشيا شالقىما كۇيى»، «حۋاڭحىنىڭ باتىس جاعالاۋى»، «كروران سارىنىنان» تارتىپ «تۇسىمدە كوردىم قىزىل مىڭ ٴۇيدى»، «كالينكاعا» دەيىن، ودان كورەرمەندەر قۇلاعىنا ابدەن تانىس «ياحشىعا» دەيىن... شۇي جىجۇننىڭ ديريجەرلىك ىستەۋىندە، تۇتاس الاڭداعى ورىنداۋشىلار تىعىز سايكەسىپ مول سۇيىسپەنشىلىكتەرىن مۋزيكا اسپابىنا توعىستىرىپ، تەرەڭ سەزىمگە تولى جىبەك جولى اۋەندەرىن ورىنداپ، كورەرمەندەر كوڭىلىندەگى جىبەك جولى جونىندەگى قيال مەن ۇندەستىكتى تاسقىنداتتى.
”قاتتى تاڭ قالدىردى“. ٴۇرىمجى قالاسىنىڭ تۇرعىنى سۇن ياسى 11 جاستاعى قىزىن ەرتىپ كونسەرتتى كوردى، ”بالاما مۋزيكانىڭ باۋرامدىلىعىن سەزىندىرۋدى ويلادىم“.
شينجياڭ شىفان داشۋەسى اسەمونەر شۋەيۋانىنىڭ دوتسەنتى تاڭ ليشيا بىلاي دەپ قارادى: بۇل ٴبىر رەتكى جىبەك جولى مۋزيكاسىنىڭ كوپ نەگىزدى كۇيى مەن قۋاتتى باۋراۋ قۋاتىن جان ـ جاقتىلى ايگىلەگەن كونسەرت بولدى، ”سۋرەت سالۋ، مۇسىنشىلىك سياقتى وزگە كوركەمونەر فورماسىمەن سالىستىرعاندا، مىڭ جىلدىق جىبەك جولى بويىنداعى تۇرلىشە ۇلتتىڭ، تۇرلىشە ٴوڭىردىڭ مۋزيكاسى، ٴبيى ٴوزارا ۇلگى الىپ توعىسىپ، جىبەك جولى مۋزيكاسىنىڭ، ٴبيىنىڭ قوماقتى جەتىستىگىن جارىققا شىعاردى، كوركەمونەردىڭ حيكىمەتى ۋاقىت وتكەن سايىن تۇرلەنىپ جاڭاردى“.
شينجياڭ كوركەمونەر تەاترى پارتكومىنىڭ شۋجيى ساي شياۋرۇڭ بىلاي دەپ تانىستىردى: وسى رەتكى مۋزيكا كەشى _ 2024 جۇڭگو شينجياڭ جىبەك جولى مۋزيكا ماۋسىمىنىڭ تۇڭعىش قويىلىمى. مۋزيكا ماۋسىمى ”بەرەكەلى مۋزيكا تاراۋى، ارمانعا بىرگە تالپىنۋدى“ نەگىزگى تاقىرىپ ەتتى، ەلىمىز مۋزيكانتتارىنان تىس، تاعى ارمەنيا، كولۋمبيا، رەسەي، فرانسيا، امەريكا قاتارلى ەلدەردىڭ مۋزيكانتتارى قاتىناسۋعا ۇسىنىس ەتىلدى، جيىنى 19 رەت مۋزيكا كەشى، 22 رەت كونسەرت قويىلادى. سونىمەن بىرگە 10 جاسامپازدىققا تولى سايكەستى قيمىل دەن قويا جوسپارلانعان، بۇل 12 ـ ايدىڭ 29 ـ كۇنىنە دەيىن جالعاسادى.
