”جۇڭگو . تاڭ — كوپ نەگىزدى اشىق پاتشالىق ٴداۋىر (7 ـ عاسىردان 10 ـ عاسىرعا دەيىن)“ كورمەسى اشىلدى
ٴتوراعا شي جينپيڭ مەن ماكرون زۇڭتۇڭ كىرىس ٴسوز جازدى
شينحۋا اگەنتتىگىنىڭ 11 ـ ايدىڭ 19 ـ كۇنى بەيجيڭنەن بەرگەن حابارى. ”جۇڭگو. تاڭ _ كوپ نەگىزدى اشىق پاتشالىق ٴداۋىر (7 ـ عاسىردان 10 ـ عاسىرعا دەيىن)“ كورمەسى 11 ـ ايدىڭ 18 ـ كۇنى فرانسيانىڭ گۇيمەت مەملەكەتتىك ازيا كوركەمونەر مۇراجايىندا اشىلدى، جۇڭگو مەملەكەت ٴتوراعاسى شي جينپيڭ مەن فرانسيا زۇڭتۇڭى ماكرون جەكە ـ جەكە كورمەگە كىرىس ٴسوز جازدى.
شي جينپيڭ بىلاي دەپ اتاپ كورسەتتى: بيىل _ جۇڭگو مەن فرانسيانىڭ ديپلوماتيالىق قارىم ـ قاتىناس ورناتقاندىعىنىڭ 60 جىلدىعى. 5 ـ ايدا مەن فرانسيادا ساپاردا بولعان كەزىمدە، جۇڭگو مەن فرانسيا ەكى جاق فرانسيانىڭ گۇيمەت مەملەكەتتىك ازيا كوركەمونەر مۇراجايىندا تاڭ ٴداۋىرى مادەني ەسكەرتكىشتەر كورمەسىن وتكىزۋ كەلىسىمىن جاساسقان بولاتىن. مەن ەكى ەلدىڭ مادەني ەسكەرتكىش ماماندارىنىڭ بىرگە قۇلشىنۋىندا، ”جۇڭگو · تاڭ _ كوپ نەگىزدى اشىق پاتشالىق ٴداۋىر (7 ـ عاسىردان 10 ـ عاسىرعا دەيىن)“ كورمەسىنىڭ ۋاعىندا اشىلعاندىعىنا قاباعات قۋاندىم.
شي جينپيڭ بىلاي دەپ اتاپ كورسەتتى: تاڭ ٴداۋىرى _ جۇڭگو تاريحىنداعى ەڭ داۋرەندەگەن پاتشالىق ٴداۋىر، ول كەزدە شارۋاشىلىق شالقىدى، مادەنيەت وركەندەدى، يدەيادا سيىسىمدى بولدى، كوركەمونەر كوركەيدى، ۇلتتار توعىستى. تاڭ ٴداۋىرى مادەنيەتىنىڭ ىقپالى ازيانى شارپىدى ٴارى جىبەك جولى ارقىلى ەۆروپاعا تارالدى. تاڭ ٴداۋىرىنىڭ ولەڭ ـ ٴبايىت، سۋرەت، التىن، كۇمىس جابدىق سياقتى كوركەمونەر جەتىستىكتەرى كۇنى بۇگىنگە دەيىن ادامداردىڭ القاۋىنا بولەنىپ كەلەدى. وسى رەتكى كورمەنىڭ وتكىزىلۋى فرانسيا جانە ەۆروپا كورەرمەندەرىنىڭ جارقىراعان، شۇعىلالى، سەنىمدى، اشىق، گۇلدەنگەن تاڭ ٴداۋىرىنىڭ جاعدايىن اناعۇرلىم وبرازدى تۇسىنۋىنە، جۇڭحۋا وركەنيەتىنىڭ وزگەشە تارتىمدىلىعىن سەزىنۋىنە مۇمكىندىك جاسايتىندىعىنا سەنەمىن.
شي جينپيڭ بىلاي دەپ اتاپ كورسەتتى: جۇڭحۋا ۇلتى مەن فرانسۋز ۇلتى ٴبارى دە ۇزاق تاريحقا جانە شۇعىلالى مادەنيەتكە يە. ەكى ەل حالقى تاريحتان بەرى ٴبىر ـ ٴبىرىنىڭ ارتىقشىلىقتارىن كورە ٴبىلىپ، ٴبىرىن ـ ٴبىرى باۋراپ كەلەدى، دوستىق بارىس ـ كەلىسىنىڭ تاريحى ارىدان باستالعان. ٴبىز تاريحي مادەنيەتتەن شابىت الىپ، وي قابىلداپ، گۋمانيتارلىق سالاداعى اۋىس ـ كۇيىستى، ٴوزارا ۇلگى الۋدى جانە مادەنيەت مۇرالارىن قورعاۋ سەلبەستىگىن تەرەڭدەتۋىمىز، ٴوز كوركەمدىگىمىزدى ايگىلەپ، كوركەمدىكتەن ورتاق يگىلىكتەنىپ، تاريحي سۇيىسپەنشىلىك پەن ٴداۋىر رۋحىن جۇڭگو جانە فرانسيا دوستىعىمەن توعىستىرىپ، جۇڭگو مەن فرانسيانىڭ جالپى بەتتىك ستراتەگيالىق سەرىكتەستىك قارىم ـ قاتىناسىن اناعۇرلىم بەرىك، اناعۇرلىم ومىرشەڭ كۇشكە تولى ەتىپ سومداۋىمىز كەرەك.
ماكرون زۇڭتۇڭ مىنانى ٴبىلدىردى: فرانسيا مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 60 جىلدىعى مەن مادەنيەت ـ ساياحات جىلىن قۇتتىقتاۋ ٴۇشىن، گۇيمەت مۇراجايى سالتاناتتى تاڭ ٴداۋىرى كوركەمونەر كورمەسىن وتكىزدى. تاڭ ٴداۋىرىنىڭ جۇڭگونىڭ وركەنيەت تاريحىنداعى مارتەبەسى ەرەكشە، اسا شۇعىلالى مادەنيەت پەن ادام نانعىسىز جاسامپازدىق قۋاتقا يە، سونداي ـ اق جىبەك جولى ارقىلى سىرتپەن اۋىس ـ كۇيىس جاساۋدى بەلسەنە ورىستەتىپ، كوز تۇندىرارلىق كوركەمونەر بايلىعىن جاراتتى. وسى ٴبىر تاريحي ٴمان الاتىن كورمە فرانسيا مەن جۇڭگو مادەنيەت اۋىس ـ كۇيىسىنىڭ ومىرشەڭ كۇشكە تولى ەكەندىگىن، ەكى ەل قاتىناسىنىڭ دامۋىندا ۇزدىكسىز ماڭىزدى رول ساۋلەلەندىرەتىندىگىن قايتالاي كورنەكتىلەندىردى.
وسى رەتكى كورمەگە جۇڭگو مەملەكەتتىك مادەني ەسكەرتكىشتەر مەكەمەسى مەن فرانسيا مادەنيەت مينيسترلىگى جەتەكشىلىك ەتتى، جۇڭگوداعى 10 ولكە، اۆتونوميالى رايون، توتە قاراستى قالاداعى 32 مادەنيەت مۇراجاي قۇرىلىمىنىڭ 200 دەن استام اسەم مادەني ەسكەرتكىشى كورمەگە قويىلدى.
