2023 ـ جىلى شينجياڭنىڭ عىلىم ـ تەحنيكادا جاڭالىق اشۋداعى كوپ ٴتۇرلى ٴتۇيىندى كورسەتكىشى تاريحتاعى تىڭ دەڭگەيگە جەتتى
زەرتتەپ ـ اشۋ ۇسىنىلىمى 10 ميلليارد يۋاندىق ۇلكەن وتكەلدەن ٴوتتى
انار بۇلت \ شينجياڭ گازەتىنىڭ ٴتىلشىسى شيە حۇيبيان 11 ـ ايدىڭ 19 ـ كۇنى ۇرىمجىدەن حابارلايدى. 11 ـ ايدىڭ 19 ـ كۇنى اۆتونوميالى رايوندىق حالىق ۇكىمەتى اقپارات كەڭسەسى اشقان ”عىلىم ـ تەحنيكادا جاڭالىق اشۋدى جەتەكشى ەتۋگە تاباندى بولىپ، كۇش توپتاپ، جاڭاشا وندىرگىش كۇشكە قۋات ۇستەۋ“ جونىندەگى اقپار جاريالاۋ ماجىلىسىنەن ۇعىسۋىمىزشا، 2023 ـ جىلى شينجياڭنىڭ عىلىم ـ تەحنيكادا جاڭالىق اشۋداعى كوپ ٴتۇرلى ٴتۇيىندى كورسەتكىشى تاريحتاعى تىڭ دەڭگەيگە جەتكەن، مۇنىڭ ىشىندە تۇتاس قوعامنىڭ زەرتتەۋ جانە تاجىريبە بويىنشا دامىتۋ (R&D) قاراجاتى 10 ميلليارد يۋاندىق ۇلكەن وتكەلدەن ٴوتىپ، 11 ميلليارد 552 ميلليون يۋانعا جەتىپ، سايكەس مەزگىلدەگىدەن %27 ارتىپ، ارتۋ قارقىنى بۇكىل ەل بويىنشا 2 ـ ورىندا تۇرعان. R&D قاراجات ۇسىنىلىم كۇشەمەلىلىگى %0.6كە جەتىپ، الدىڭعى جىلداعىدان 0.09 پايىز جوعارىلاعان؛ R&D ادام سانى 61 مىڭ 700گە جەتىپ، سايكەس مەزگىلدەگىدەن %41.3 ارتقان.
R&D قارجىسى مەن ونىڭ ۇسىنىلىم كۇشەمەلىلىگى حالىقارادا كەڭىنەن قولدانىلاتىن ٴبىر مەملەكەتتىڭ نەمەسە ٴبىر ٴوڭىردىڭ دەربەس جاڭالىق اشۋ ۇسىنىلىمىنىڭ كولەمى مەن دەڭگەيىن ولشەيتىن ماڭىزدى كورسەتكىش. زەرتتەۋ ـ اشۋ ۇسىنىلىمىنىڭ ۇزدىكسىز ارتۋىنا بايلانىستى، شينجياڭنىڭ عىلىم ـ تەحنيكادا جاڭالىق اشۋ قابىلەتى ۇزدىكسىز كۇشەيىپ، ٴبىر قىدىرۋ وزەكتى تەحنيكالاردا كەلەلى سەرپىلىستەرگە قول جەتكىزدى، جاڭالىق اشۋ نەگىزگى تۇلعاسى، جاڭادان گۇلدەنگەن كاسىپ سالاسى سياقتى ارتىقشىلىقتار شوعىرلانۋدا، جارىققا شىعۋدا، جاڭالىق اشۋ ارقىلى دامۋعا دەم بەرۋدىڭ نەگىزى اناعۇرلىم تىڭعىلىقتى بولدى جانە بەكەمدەلدى.
مۇناي حيميا ونەركاسىبى، كومىر، كومىر حيميا ونەركاسىبى، كەن بايلىعىن اشۋ، جاڭا ەنەرگيا، جاڭا ماتەريال سياقتى سالالاردا ٴبىرقىدىرۋ كەلەلى سەرپىلىستەرگە قول جەتتى. قۇمىل كومىرىن تىكەلەي كادەگە جاراتىپ، جوعارى دەڭگەيلى نازىك حيميالىق ونىمدەردى جاساۋ تەحنيكاسىن زەرتتەۋ ـ اشۋ مەملەكەتتىڭ ٴتۇيىندى زەرتتەۋ ـ اشۋ ارناۋلى قولداۋىنا يە بولدى، تارىم مۇناي الابىنىڭ 10 مىڭ مەتر اسا تەرەڭدىكتەگى ۇڭىعىماسى ازيا رەكوردىن جاڭالادى، حوتان حوشاۋيۇن 10 ميلليون توننالىق قورعاسىن ـ مىرىش كەنى، دا حۇڭليۋتان ميلليون توننالىق سيرەك كەزدەسەتىن مەتال كەنى سياقتى ٴبىر توپ دۇنيە جۇزىلىك كەن ورنى ىلگەرىندى ـ كەيىندى بارلانىپ اشىلدى، ەرەكشە ترانسفورماتور سەرىكتەستىگى كاسىپ سالاسىنداعى تۇڭعىش 110 كيلوۆولتتىق دالالىق زەردەلى قۇرعاق ترانسفورماتوردى دەربەس زەرتتەپ جاسادى، شينجياڭنىڭ 3 ـ رەتكى جالپىلىق عىلمي تەكسەرۋىندە ٴبىر توپ ماڭىزدى جەتىستىككە قول جەتتى، ت . ب.
كاسىپورىنداردىڭ جاڭالىق اشۋداعى نەگىزگى تۇلعالىق ورنى اناعۇرلىم كورنەكتىلەندى. 2023 ـ جىلى اۆتونوميالى رايوندا جوعارى، جاڭا تەحنيكالىق كاسىپورىنداردىڭ سانى تاعى دا تىڭ ورەگە كوتەرىلىپ، 529 كاسىپورىن ناق ارتىپ، 1911گە جەتىپ، سايكەس مەزگىلدەگىدەن %40 ارتتى. اۆتونوميالىق رايونداعى عىلىم ـ تەحنيكالىق ورتا، شاعىن كاسىپورىن 2256عا جەتىپ، سايكەس مەزگىلدەگىدەن %80 ارتتى.
عىلىم ـ تەحنيكادا جاڭالىق اشۋ جەتىستىكتەرى ۇزدىكسىز كوبەيدى. 2023 ـ جىلى اۆتونوميالى رايوندا تەحنيكالىق توقتامداعى كەلىسكەن سوماسى 7 ميلليارد 358 ميلليون يۋانعا جەتىپ، الدىڭعى جىلداعىدان 2.3 ەسە ارتتى. 2023 ـ جىلى اۆتونوميالى رايوندا 2398 تاپقىرلىققا پاتەنت ۇقىعى بەرىلىپ، سايكەس مەزگىلدەگىدەن %18 ارتتى.
اۆتونوميالى رايوندىق عىلىم ـ تەحنيكا مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى جالەل حالەل بىلاي دەدى: عىلىم ـ تەحنيكا ٴتۇزىلىسى مەحانيزمى رەفورماسىن جاپپاي تەرەڭدەتىپ، جاڭالىق اشۋدىڭ، جاسامپازدىقتىڭ ومىرشەڭدىگىن تولىق قاۋلاتىپ، وقۋ ـ اعارتۋدىڭ، عىلىم ـ تەحنيكانىڭ، دارىندىلاردىڭ دامۋىن ٴبىر تۇتاس ىلگەرىلەتىپ، دارىندىلار باسەكەسى باسىمدىلىعىن قالىپتاستىرىپ، عىلىم ـ تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ تەرەڭدەي توعىسۋىن ىلگەرىلەتىپ، وڭىرلىك جاڭالىق اشۋدىڭ جالپى تۇلعالىق ونىمدىلىگىن ۇزدىكسىز جوعارىلاتىپ، جوعارى دەڭگەيلى عىلىم ـ تەحنيكادا ٴوز كۇشىنە سۇيەنۋدى، ٴوزىن الۋەتتەندىرۋدى جەدەل ىلگەرىلەتىپ، جاڭاشا وندىرگىش كۇش ارقىلى شينجياڭنىڭ جوعارى ساپالى دامۋىنا تىرەك ازىرلەيمىز، جەتەكشىلىك ەتەمىز.
