شينجياڭ ۋاكىلدەر ۇيىرمەسىنىڭ سپورتشىلارى:
ۇلتتار ىنتىماعى گۇلىن نانحاي تەڭىزى جاعاسىندا قۇلپىرتامىز
انار بۇلت \ شينجياڭ گازەتىنىڭ ٴتىلشىسى گو ليڭ
از ۇلتتاردىڭ مەملەكەتتىك 12 ـ كەزەكتى ٴداستۇرلى سپورت جارىسى 11 ـ ايدىڭ 22 ـ كۇنى حايناننىڭ سان ـ ياسىندا باستالادى، بۇكىل ەلدەگى 56 ۇلتتان 10 مىڭعا جۋىق سپورتشى مەن سيلى قوناق نانحاي تەڭىزى جاعاسىندا باس قوسىپ، بۇقارالىق سپورت جارىسى سالتاناتىنا بىرگە اتتانادى. مەرزىمىنەن بۇرىن جەتكەن شينجياڭدىق سپورتشىلار وسى بىرنەشە كۇندە ۇيلەسۋ سيپاتتى جاتتىعۋ جۇرگىزىپ، جارىس الاڭىنىڭ ٴىشى ـ سىرتىندا شينجياڭ كەلبەتىن ايگىلەۋدى كۇتۋدە.
شينجياڭ ۋاكىلدەر ۇيىرمەسى جەكە ـ جەكە بۇقا تارتىس، التىباقان، ۇلتتىق كۇرەس، ۇلتتىق سايسكەرلىك، ۇلتتىق دەنە شىنىقتىرۋ گيمناستيكاسى، تاقتاي كەبىسپەن جارىسۋ، مەرۋەرت دوپ سىندى 7 جارىس تۇرىنە جانە ٴماررا دوپ، داۋاز، سارعايدە سىندى 3 ونەر كورسەتۋ تۇرىنە قاتىناسادى. مۇنىڭ ىشىندە تاقتاي كەبىسپەن جارىسۋعا جانە مەرۋەرت دوپ جارىسىنا شينجياڭ ۋاكىلدەر ۇيىرمەسى تۇڭعىش رەت قاتىناسادى.
11 ـ ايدىڭ 21 ـ كۇنى ساعات 8، وزدەرى تۇسكەن قوناق سارايدىڭ دەنە شىنىقتىرۋ ۇيىنەن، قيمىل بولمەسىنەن، اۋلادان سپورتشىلاردىڭ جاتتىعۋ جۇرگىزىپ جاتقان بەينەسىن كورۋگە بولادى. ”سان ـ يانىڭ ۋاقىت پارقى مەن اۋا رايىنا ۇيلەسۋ ٴۇشىن، 11 ـ ايدىڭ 19 ـ كۇنى تاڭەرتەڭ جاتتىعۋدى باستاپ كەتتىك“. ۇلتتىق دەنە شىنىقتىرۋ گيمناستيكاسىنىڭ جاتتىقتىرۋشىسى جاي ۋي تانىستىرىپ، 11 ـ ايدىڭ 23 ـ كۇنى جارىس الاڭىنا بارىپ مايدانعا ۇيىرلەسپەكشى ەكەندىگىن، بۇل ٴارى ٴار ۇلت سپورتشىلارىنىڭ ٴوزارا ٴتۇسىنىسۋدى تەرەڭدەتۋىنە، شىنايى مويىنداۋدى كۇشەيتۋىنە قولايلى بولاتىندىعىن ايتتى.
”از ۇلتتاردىڭ مەملەكەتتىك 11 ـ كەزەكتى ٴداستۇرلى سپورت جارىسىنان باستاپ ٴماررا دوپ جۇرتتىڭ نازارىن اۋداردى. وسى بىرنەشە كۇندە ٴبىز ۇيىرلەسۋ سيپاتتى جاتتىعۋدان سىرت، بۇكىل ەلدىڭ جەر ـ جەرىندەگى مەديالاردىڭ تىلشىلىگىن قابىلدادىق، وسى سپورت ٴتۇرىن ٴتىپتى كوپ ادامعا ايگىلەپ، ٴبىزدىڭ شينجياڭنىڭ وزگەشە ٴداستۇرلى مادەنيەتىن ۇگىتتەگەندىگىمىزگە توتەنشە قۋانىشتىمىز“. ٴماررا دوپ جارىس ٴتۇرىنىڭ دايىنداۋشى رەجيسسەرى ٴماتروزى يمىن بىلاي دەپ تانىستىردى: ٴماررا دوپ مەملەكەت دارەجەلى بەيزاتتىق مادەنيەت مۇراسى ٴتۇرى، وتكەن كەزەكتى سپورت جارىسىندا اعا جۇلدەگەرلىكتى الدىق، بۇل جولى دا تولىق سەنىمدىمىز، كوپشىلىك ٴبىر نيەتپەن سەلبەسىپ وسى سپورتتى ۇزدىكسىز دامىتامىز“.
تاقتاي كەبىس جارىسىنا تۇڭعىش رەت قاتىناسىپ جاتقان سپورتشىلار جارىس مايدانىنا ۇيىرلەسۋ بارىسىندا، جەر بەتى وتە تايعاق بولۋ ماسەلەسىنە تاپ بولدى. تاقتاي كەبىسپەن جارىسۋ ٴتۇرىنىڭ جاتتىقتىرۋشىسى چياڭ شينلي بىلاي دەدى: ”ٴبىز قوناق ٴۇيدىڭ قارسىسىنان جاتتىعۋ الاڭىن تاۋىپ، باعىتتامالى جاتتىعۋ ورىستەتتىك، مۇنداعى ماقسات سپورتشىلاردىڭ قارقىنىن رەتتەپ، سىرعاناپ توقتاي الماي قالۋ ماسەلەسىن شەشۋ“. جاتتىعۋ الاڭىنىڭ جاۋاپتىسى جاعدايدى بىلگەن سوڭ جاتتىعۋ الاڭىنىڭ جالعا بەرۋ اقىسىن كەشىرىم ەتىپ، ولاردىڭ جۇرەگىن مەيىرگە بولەدى.
بيىك وكشەلى اياق كيىممەن بولات ارقاندا ٴجۇرۋ، بولات ارقاندا بالەت ٴبيىن بيلەۋ... ادىل وشۇر داۋاز ۇيىرمەسىن باستاپ وسى كەزەكتى سپورت جارىسىنا كەلدى، جاڭا جارىس تۇرلەرى كوپتەگەن مەديالاردىڭ نازارىن اۋداردى. ۇيىرمە مۇشەسى ٴابيبا مالىك بۇل جولى بيىك وكشەلى اياق كيىممەن بولات ارقانمەن ٴجۇرۋ جانە بالەت ٴبيىن بيلەۋگە سايىس جاريالايدى، ”جاڭا ورتادا قيىنداۋ بولعانىمەن، تەز ارادا ۇيلەسىپ، ەڭ جاقسى بەينە كورسەتىپ، بۇكىل ەل حالقىنا بيىكتە ونەر كورسەتۋدىڭ وزگەشە ٴتۇرىن ۇسىنامىن“.
”ٴبىز سپورت جارىسىندا سپورتتىڭ قىزىعىنا باتامىز، ٴوزارا سۇيىسپەنشىلىگىمىز نىعايادى، سونداي ـ اق جەر ـ جەردەگى شەبەرلەرمەن اۋىس ـ كۇيىس جاساپ، ۇيرەنۋىمىزگە بولادى“. سپورت جارىسىنا 2 ـ رەت قاتىناسقان ۇلتتىق سايىسكەرلىك جارىس ٴتۇرىنىڭ سپورتشىسى ما جيا ـ ي جارىس ارقىلى تاعى ٴار ۇلتتان دوس تابۋدى ٴۇمىت ەتەتىندىگىن ايتتى.
جۇڭحۋا ۇلتى ورتاق تۇلعا تانىمىن بەكەمدەپ، از ۇلتتاردىڭ ٴداستۇرلى دەنە تاربيە قيمىلىن جالعاستىرۋ جاس ۇرپاقتاردىڭ قۇلشىنىسىنان ايرىلا المايدى. اۆتونوميالى رايوندىق دەنە تاربيە مەكەمەسى بۇقارالىق سپورت باسقارماسىنىڭ قاتىستى جاۋاپتىسى بىلاي دەدى: وسى كەزەكتى سپورت جارىسىندا شينجياڭ ۋاكىلدەر ۇيىرمەسىنىڭ سپورتشىلارى شينجياڭداعى ٴار ۇلت حالقىنىڭ ىنتىماقتاسا العا باسقان، اشىق، سەنىمدى تاماشا وبرازىن ايگىلەيدى، سپورت جارىسى ارقىلى تۋىسقان ولكە، اۆتونوميالى رايون، توتە قاراستى قالالارمەن ارالاسۋدى، ىشتەسۋدى، توعىسۋدى اناعۇرلىم جەبەپ، ۇلتتار ىنتىماعى، العاباسارلىعى جاعىندا شينجياڭنىڭ كۇش ـ قۋاتىن ارناۋدى ٴۇمىت ەتەمىن.
