الدىڭعى 10 ايدا شينجياڭ قابىلداعان ساياحاتشى 270 ميلليون ادامنان (رەت) استى
سايكەس مەزگىلدەگىدەن %14.42 ارتتى
انار بۇلت \ شينجياڭ گازەتىنىڭ ٴتىلشىسى ياۋ گاڭ 11 ـ ايدىڭ 22 ـ كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، الدىڭعى 10 ايدا بۇكىل رايون بويىنشا ەل ٴىشى ـ سىرتىنان قابىلدانعان جالپى ساياحاتشى 270 ميلليوننان (رەت) اسىپ، سايكەس مەزگىلدەگىدەن %14.42 ارتقان؛ ساياحات كىرىسى 320 ميلليارد يۋان بولىپ، سايكەس مەزگىلدەگىدەن %21.31 ارتقان. مادەنيەت جانە ساياحات كاسىبىنىڭ دامۋىندا ەكەۋى بىردەي ىلگەرىلەۋ، كوپ سالادا باسىپ وزۋ جاعدايى جارىققا شىققان.
بايتاق دالا قار قىمتانىپ، شينجياڭدا تاعى جاڭا قار ماۋسىمى باستالدى. شينجياڭ قار ـ مۇز ساياحاتى نەگىزدىك قۇرىلعىلارى قۇرىلىسىن ۇزدىكسىز نىعايتىپ، قار ـ مۇز ساياحاتىن دامىتتى. بۇكىل رايوندا قازىر 101 شاڭعى الاڭى بار بولىپ، سانى جاعىنان بۇكىل ەل بويىنشا ٴبىرىنشى ورىندا تۇردى. 2023 _ 2024 ـ جىلعا دەيىنگى قار ماۋسىمىندا بۇكىل رايون ەل ٴىشى ـ سىرتىنان جيىنى 92 ميلليون 585 مىڭ 100 (رەت) ساياحاتشى قابىلداپ، سايكەس مەزگىلدەگىدەن %147.78 ارتتى؛ ساياحات كىرىسى 106 ميلليارد 697 ميلليون يۋان بولىپ، سايكەس مەزگىلدەگىدەن %263.74 ارتتى.
ٴوزى كولىك جۇرگىزىپ ساياحاتتاۋ دۋماندى بولىپ، شينجياڭ ٴوزى كولىك جۇرگىزىپ ساياحاتتاۋدىڭ جەلى كورسەتكىشىنە اينالدى. مايتاۋ _ كۇشار تاس جولى، S101، G219 سياقتىلار ەل ىشىندەگى ٴوزى كولىك جۇرگىزىپ ساياحاتتاۋداعى سارا جەلىگە اينالدى. 2024 ـ جىلى قىستا مايتاۋ _ كۇشار تاس جولىنىڭ كۇشار بولىگى ساياحاتشى قابىلداۋ ۇلگىسىن باستاپ، ساياحاتشىلاردىڭ قىس ماۋسىمىندا دا مايتاۋ ـ كۇشار تاس جولى كۇشار بولىگىنىڭ كوركەم كورىنىسىن تاماشالاۋىنا مۇمكىندىك جاسادى.
مادەنيەت پەن ساياحاتتىڭ تەرەڭدەي توعىسۋىن ىلگەرىلەتىپ، «التايىم» تەلەفيلمىنىڭ جانە ”جۇڭحۋانى ٴتۇسىندىرۋ“ شەكارا ساپارى 2024 ەرەكشە قيمىلى _ ”مەملەكەت تاس جولىندا اقىرىن ساياحاتتاۋ · 219 “سياقتىلاردىڭ دابىرالى قويىلۋى اسەرىندە، رايونىمىز كونسەرتپەن بىرگە ساياحاتتاۋ، جارىسپەن بىرگە ساياحاتتاۋ، ٴدامدى تاعدامداردان اۋىز ٴتيىپ ساياحاتتاۋ، كلاسسيكالىق شىعارمالاردى وقىپ شينجياڭدى ساياحاتتاۋ سياقتى كوپتەگەن ساياحات فورمالارىن ۇسىنىپ، ”ارمان القابىنىڭ“ جاڭا تاراۋىن شىعانداتتى.
ساياحاتشىلاردىڭ رازى بولۋ دەڭگەيىن شىن مانىندە جوعارىلاتۋ ٴۇشىن، رايونىمىزدىڭ مادەنيەت ـ ساياحات تاراۋلارى ساياحاتتىق قىزمەت وتەۋ ساپاسىن جوعارىلاتۋ جىلى قيمىلىن تىڭعىلىقتى تۇردە ورىستەتىپ، ”اس ـ سۋ، جاتىن ورىن، قاتىناس، حاۋىپسىزدىك، قىزمەت وتەۋ ماركاسى، شەكارادان كىرىپ ساياحاتتاۋ“ سىندى 6 ۇلكەن دارەجە جوعارىلاتۋ قيمىلىن ورىستەتىپ، ساياحاتتىق قىزمەت وتەۋ ساپاسىن جوعارىلاتۋعا ىقپال جاسايتىن كورنەكتى ماسەلەلەردى كۇش سالا شەشىپ، ساياحاتتىق قىزمەت وتەۋدىڭ ساپاسىن جان ـ جاقتى جوعارىلاتتى.
