□ انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ
11 ـ ايدىڭ 23 ـ كۇنى ۇرىمجىگە جاۋعان قار 18 ـ كەزەكتى شينجياڭ قىسقى ساياحات كاسىپ سالاسى ساۋدا كورمەسى جانە 2024 ـ جىلعى شينجياڭ دابىرالى قار مەرەكەسى (تومەندە قىسقارتىلىپ ”قىسقى ساياحات كورمەسى“ دەلىنەدى) كورمەسىنە قاتىناسقان ساۋداگەر لوۋ شياۋيەنىڭ قالاۋىنان شىقتى. ول جىجياڭنان الا كەلگەن كورمە بۇيىمى _ مۇز اربانى، ەلەكترلى شاڭعىنى سۇيرەپ شينجياڭ حالىقارالىق ٴماجىلىس ـ كورمە ورتالىعىنىڭ سىرتىنداعى الاڭقىعا تارتتى، ”ٴبىزدىڭ جەردە قار كوپ جاۋمايدى، شينجياڭعا كەلىپ وسىنشاما قالىڭ قارعا جولىقتىم، ونىمدەرىمدى سۋرەتكە، بەينەجازباعا كوبىرەك ٴتۇسىرىپ الايىن“.
وسى كەزەكتى قىسقى ساياحات كورمەسى مەملەكەتتىك كەڭەس كەڭسەسىنىڭ «قار ـ مۇز سپورتىنىڭ جوعارى ساپالى دامۋى ارقىلى قار ـ مۇز ەكونوميكاسىنىڭ ومىرشەڭ كۇشىن قاۋلاتۋ جونىندەگى ٴبىرقانشا پىكىردى» (تومەندە قىسقارتىلىپ «پىكىر» دەلىنەدى) باسىپ تاراتۋىنا تۋرا كەلىپ، جۇرت نازارىن ايرىقشا اۋداردى. 18 مىڭ شارشى مەتر، 3 ۇلكەن كورمە سارايى بار، 11 مەملەكەت كورمەگە قاتىناستى، ەل ىشىندەگى 8 ولكەدەگى، شينجياڭداعى 200دەن استام ساياحات كووپەراتيۆى، 100دەن استام قوناق ٴۇي، سونداي ـ اق 50 نەشە اۆتوكولىك جالعا بەرۋ كاسىپورنى قاتىناستى. ”وتكەن جىلدارداعىمەن سالىستىرعاندا، بيىلعى قىسقى ساياحات كورمەسى تۇتىنۋدى جەبەۋ نەگىزگى تاقىرىبىن كورنەكتىلەندىرىپ، جەر ـ جەردەگى كورىنىس وڭىرلەرىنىڭ، ساياحات كاسىپورىندارىنىڭ باعانى ارزانداتۋى ارقىلى قار ـ مۇز تۇتىنۋىن جەبەپ، شينجياڭنىڭ قىسقى قار ـ مۇز بازارىنىڭ ومىرشەڭدىگىن قاۋلاتتى“، ـ دەدى شينجياڭ ساياحات قوعامىنىڭ ورىنباسار باستىعى، باس حاتشىسى جاڭ شياۋيۇي.
بۇقارامەن جاناسىپ، تۇتىنۋدى جەبەدى
11 ـ ايدىڭ 22 ـ كۇنى تاڭەرتەڭ ٴۇرىمجى اۋدانى شۇيشيگوۋ قالاشىعىندا تۇراتىن ۋ شۋەجوۋ اۆتوكولىكپەن ۇيىنەن اتتانىپ، شينجياڭ حالىقارالىق ٴماجىلىس ـ كورمە ورتالىعىنا بارىپ، قىسقى ساياحات كورمەسىن ارالادى. 20 جىل كونكي تەپكەن قار ـ مۇز سپورت اۋەسكەرى رەتىندە، ول كورمەدەن ٴبىر جۇپ جاڭا كونكي ساتىپ الماقشى بولدى.
وتكەن كەزەكتى قىسقى ساياحات كورمەسىن ەسكە الساق، باستىسى، جەر ـ جەردەگى مادەنيەت ـ ساياحات مەكەمەلەرىنىڭ قار ـ مۇز ساياحات بايلىعى مەن كاسىپورىندار اراسىنداعى كاسىپتىك ٴتۇيىلىسۋدى كورسەتۋىن نەگىز ەتەتىن، ال بيىل باسقاشا، كونكي، قار كيىمى، شاڭعى ماركالارى جينالعان، قالا تۇرعىندارى جابدىقتاردى ساتىپ الا سالىسىمەن، قار شاڭعى الاڭدارىنىڭ، جاتتىقتىرۋشى قۇرىلىمدارىنىڭ كورمە تۇعىرلارىنا بارىپ، تەگىن قار ـ مۇز بەلەتىن جانە جاتتىقتىرۋشىنىڭ ساباق اقىسىندا تيىمدىلىك جاساۋ بەلەتىن الۋىنا بولادى، ٴبىر بەكەتتىك، ەرەكشە ٴتيىمدى قىزمەت وتەۋ بۇقارانىڭ قىس ماۋسىمىندا قار ـ مۇز سپورتىن سەزىنۋ قاجەتىن قاناعاتتاندىردى.
ۋ شۋەجوۋ ايگىلى ”حيلۇڭ بيڭداۋ“ ماركاسى كورمە ورنىنا جەتىپ بارىپ، چيچيحار حيلۇڭ حالىقارالىق قار ـ مۇز جابدىقتارى شەكتى سەرىكتەستىگى شينجياڭ سەرىكتەستىگىنىڭ ديرەكتورى ني لياڭنىڭ تانىستىرۋىمەن تەز سىرعاناۋ كونكيىن ساتىپ الدى. ونىڭ جانىنداعى 6 _ 5 دوسى دا جاستايىنان كونكي تەبەتىندەر، ”شينجياڭ قىسقى سپورتتى باسقارۋ ورتالىعى ٴبىزدىڭ قالاشىقتا، تەز سىرعاناۋ سارايى جازدا دا سىرتقا اشىق ۇستالادى، الايدا مەن دالادا سىرعاناۋدى ۇناتامىن، كورمەدە باعا تيىمدىلىگىنەن پايدالانىپ، تاعى ٴبىر پار جاڭا كونكي ساتىپ الماقپىن“، ـ دەدى ۋ شۋەجوۋ.
قىسقى ساياحات كورمەسىندە وڭتۇستىك شينجياڭداعى قار كوپ جاۋمايتىن ايماق، وبلىستار دا جەر ـ جەردەن كەلگەن ساياحاتشىلاردى شىن ىقىلاسىمەن باۋرادى. ”ٴاسىلى كورىنىس ٴوڭىرىنىڭ 600 تەگىن ەسىك بەلەتىن دايىنداعان ەدىك، ناتيجەدە ٴبىرىنشى كۇننىڭ وزىندە 1200 بەلەت تاراتتىق، كوپشىلىكتىڭ قىسقى ساياحات كورمەسىنەن باستاپ ٴبىزدىڭ وسى جاڭا كورىنىس ٴوڭىرىمىزدى ٴتۇسىنۋىن ٴۇمىت ەتەمىن“. كۇشار قالاسى شينجياڭ قىزىليار كورىنىس ٴوڭىرىنىڭ جاۋاپتىسى لي ليجۋان بىلاي دەدى: كورىنىس ٴوڭىرىمىز مايتاۋ _ كۇشار تاس جولىنىڭ وڭتۇستىك بولىگىنە ورنالاسقان، بيىل 6 ـ ايدا جۇمىس باستادى، ”كوپتەگەن ادام مايتاۋ _ كۇشار تاس جولىمەن قىس ماۋسىمىندا جۇرە المايتىندىقتارىنا وكىنەدى، ٴبىزدىڭ كورىنىس ٴوڭىرىمىز وسى وكىنىشتىڭ ورنىن تولتىرادى، ٴبىر جىلدىڭ ٴتورت ماۋسىمىندا ٴوز اۆتوكولىگىمەن كىرۋگە بولادى“.
قىسقى ساياحات كورمەسىندە جەر ـ جەر تاعى ناقتى پايدا جەتكىزىپ، مادەنيەت ـ ساياحات تۇتىنۋ بەلەتىن تاراتتى: بۇراتالا موڭعۇل اۆتونوميالى وبلىسى، قۇمىل قالاسى، تۇرپان قالاسى 4 ميلليون يۋاننىڭ مادەنيەت ـ ساياحات تۇتىنۋ بەلەتىن تاراتتى، ىلە قازاق اۆتونوميالى وبلىسى، بايىنعولين موڭعۇل اۆتونوميالى وبلىسى تاياۋدا ينتەرنەت جەلىسىنە شىقپاقشى ٴارى 4 ميلليون 500 مىڭ يۋاننىڭ تۇتىنۋ بەلەتىن تاراتپاقشى. تۇرپان قالاسىنىڭ مادەنيەت ـ ساياحات تۇتىنۋ بەلەتىن شينجياڭدا ٴبىر كودپەن ساياحاتتاۋ تۇعىرىنان الۋدان سىرت، باسقا ايماق، وبلىس، قالالاردىڭ تاراتقانىن تۇگەلدەي شيەچىڭ ساياحات APPىنان نەمەسە چۇي نا ـ ىر ساياحات APPىنان الۋعا بولادى.
بازارعا سايكەسىپ، سەلبەستىكتى قاراستىردى
وسى كەزەكتى قىسقى ساياحات كورمەسىندە شينجياڭداعى كوپتەگەن كورىنىس ٴوڭىرى، كاسىپورىن قار ـ مۇز ساياحات كاسىپ كۇيىن جاڭادان اشاتىن نەمەسە دەڭگەيىن جوعارىلاتاتىن سەلبەستىك سەرىگىن تاپتى.
”كورىنىس ٴوڭىرىمىز بيىل قىستا قار ـ مۇز كاسىبىنىڭ جاڭا كۇيى _ قار شاتتىعى باقشاسىن اشادى، قىسقى ساياحات كورمەسىندە جىجياڭنىڭ ٴوندىرىس زاۆودىمەن تۇيىلىستىك“، ـ دەدى شينجياڭ مانشين ۋاڭيوۋگۋ مادەنيەت ـ ساياحاتتى دامىتۋ شەكتى سەرىكتەستىگىنىڭ ساتۋعا جاۋاپتى ورىنباسار باس باقىلاۋشىسى يۇي جۋان، ـ كورىنىس ٴوڭىرىمىز قورعاس اۋدانىنىڭ تاۋ اڭعارىنا ورنالاسقان، تابيعي سىرعاناۋ بەتكەيى بار، قار شاتتىعى نىسانىن دامىتۋعا ۇيلەسەدى.
يۇي جۋانمەن سەلبەستىك كەلىسىمىن جاساسقان ادام ونىمدەرىن الىپ، قار كورىنىسى جارناماسىن تۇسىرگەن لوۋ شياۋيە، ونىڭ زاۆودى جىجياڭ ولكەسىنىڭ يۇڭكاڭ قالاسىندا، بۇقارالىق شاڭعى ونىمدەرىن جاسايتىن سەرىكتەستىك. 2009 ـ جىلى ولار شينجياڭنىڭ قىسقى ساياحات كورمەسىنە كەلگەن بولاتىن. ”الدىڭىزداعى بارلىق كورمە بۇيىمدارىنىڭ بارىنە تاپسىرىس ٴتۇسىپ بولدى، كورمە اياقتاسىمەن ـ اق قاريدارلارعا زاتتاردى جولدايمىز، قول تەلەفونىم مەن داپتەرىمدە نەشە 10 تاپسىرىس بار“، ـ دەدى لوۋ شياۋيە تىلشىگە.
كورمەدەن ٴبىر كۇن بۇرىن لوۋ شياۋيە قىزمەتتەستەرىمەن بىرگە 8 ساعات قاربالاس جۇمىس ىستەپ، 100گە جۋىق قار ـ مۇز كورمەسى بۇيىمدارىن دايىنداپ ۇلگىردى. ”جىجياڭنان كەلەردەگى ۇشاق بەلەتىنىڭ باعاسى مەن ونىمدەردىڭ تاسىمال اقىسى قىمبات، وزىندىك قۇنى دا ٴبىرشاما جوعارى، كورمە باستالۋدان بۇرىن، شىنىن ايتساق، الاڭدادىق. الايدا كورمە باستالىپ جارتى كۇننەن كەيىن مەن سەرىكتەستىكتىڭ جاۋاپتىسىنا تەلەفون جالعاپ، وسى رەت شينجياڭعا كەلۋىمىزدىڭ توتەنشە دۇرىس بولعاندىعىن ايتتىم“، ـ دەدى لوۋ شياۋيە. ونىڭ سەلبەستىك سەرىكتەرى وڭتۇستىك، سولتۇستىك شينجياڭنىڭ بارىندە بار، شاڭعى الاڭى دا، كوپتەگەن كورىنىس ٴوڭىرى دە بار، شينجياڭنىڭ قار ـ مۇز بازارى دۋماندى ەكەنىن كورگەن ولار شينجياڭدا بولىمشە قۇرۋدى ويلاستىرا باستادى.
بومباردير قار ـ مۇز جابدىقتارى كورمە اۋماعىندا جاڭا ۇلگىدەگى بومباردير قار موتوتسيكلى ٴىرى شاڭعى الاڭدارىن ايرىقشا قىزىقتىردى. ”قورعاس اۋدانى فۋشوۋشان شاڭعى الاڭى 5 تاپسىرىس بەردى، كوكتوعاي حالىقارالىق شاڭعى دەمالىس اۋماعى 5 تاپسىرىس بەردى، بۇل، نەگىزىنەن، قار الاڭىن قورعاۋعا جانە قۇتقارۋ ـ كومەكتەسۋگە پايدالانىلادى. وسى شاڭعى الاڭدارىنىڭ نەگىزدىك قۇرىلعىلارى وتە كەمەلدى، وسى موتوتسيكلدەردى شاڭعى الاڭىنىڭ قىزمەت وتەۋىن ونان ارى جوعارىلاتۋ ٴۇشىن ساتىپ الدى“، ـ دەدى شينجياڭ جيليان دەنە تاربيە ساياحاتىن دامىتۋ شەكتى سەرىكتەستىگىنىڭ باس ديرەكتورى لو چياڭ.
شينجياڭنىڭ مول دا ساپالى قار ـ مۇز بايلىعى ەل ىشىندەگى ٴتۇيىندى تۇعىر كاسىپورىندارىنىڭ دا نازارىن اۋداردى، شيەچىڭ، شياۋحۇڭشۋ سياقتىلاردىڭ ٴبارى وسى رەتكى قىسقى ساياحات كورمەسىنە قاتىناستى. شياۋحۇڭشۋ 12 ـ ايدىڭ 20 ـ كۇنىنەن 23 ـ كۇنىنە دەيىن التاي گەنەرال تاۋى حالىقارالىق شاڭعى دەمالىس اۋماعىندا ”شياۋحۇڭشۋ قار ادام مەرەكەسىن“ وتكىزەدى، سول كەزدە 100گە جۋىق بلوگەر مەن كوركەمونەرشىنى سەزىنۋگە جانە جارىسقا قاتىناسۋعا ۇسىنىس ەتەدى.
بىرلەسىپ قيمىلداپ، بايلىقتى مەملەكەت قاقپاسىنان شىعاردى
حالىقارالىق ۇلگىدەگى قىسقى ساياحات كورمەسى قىرۋار شەتەلدىك ساۋداگەردى كورمەگە قاتىناسۋعا باۋرادى.
كورمە الاڭىندا ني لياڭ اۋدارما جۇمساق بولشەگىنەن پايدالانىپ قىرعىزستاننان كەلىپ كورمەگە قاتىناسقان ساۋداگەرمەن كونكي تاپسىرىسىن اقىلداسىپ جاتتى، ”ورتا ازيا ەلدەرىنە ساتىلاتىن ونىمدەر، باستىسى، ساپالىق باعاسى جوعارى كونكي، ولاردىڭ ەلىندە مۇز الاڭى كوپ، كونكي تەبەتىندەردىڭ سانى دا مول، قاجەتسىنۋ مولشەرى وتە جوعارى“.
قازاقستاننان كەلگەن گۇلنيسا ٴومىرقان جەرگىلىكتى ورىنداعى ٴبىر ساياحات كووپەراتيۆىنىڭ جاۋاپتىسى، 3 جىلدان بەرى ونىڭ ساياحات كووپەراتيۆى جۇڭگودان بارعان 200دەن استام قوناقتى قابىلدادى، شەكارادان ۆيزاسىز كىرىپ ـ شىعۋ ساياساتىنىڭ ارقاسىندا ول جۇڭگو سىندى ساياحاتشى قاينارى مول وراسان زور بازاردى بايقادى. ”وسى جولى ٴبىز شينجياڭداعى كوپتەگەن ساياحات كووپەراتيۆىمەن بايلانىس ورناتتىق، ولار قىسقى اڭ اۋلاۋ لەنياسىنا ەرەكشە قىزىقتى، مەن سولاردىڭ بىرنەشەۋىمەن تاياۋدا ەڭ الدىمەن بارىپ باستان كەشىرۋ ۇيىرمەسىن ۇيىمداستىرۋدى اقىلداستىم“، ـ دەدى گۇلنيسا.
قار ـ مۇز سپورتىن جەتەكشى ەتىپ، قار ـ مۇز مادەنيەتى، قار ـ مۇز جابدىعى، قار ـ مۇز ساياحاتى تۇتاس كاسىپ سالاسى تىزبەگىنىڭ دامۋىنا جەتەكشىلىك ەتتى. وسى كەزەكتى قىسقى ساياحات كورمەسىندەگى ماڭىزدى جارىس رەتىندە، 12 ـ ايدا FWT دۇنيە جۇزىلىك دالالىق قار شاڭعى قىدىرمالى جارىسى التاي ايماعىنىڭ جىكپەلەڭ حالىقارالىق شاڭعى دەمالىس اۋماعىندا وتكىزىلەدى؛ 2025 ـ جىلعى 2 ـ كەزەكتى ”قار ـ مۇز جىبەك جولى جۇڭگو قار مەكەنى“ التاي تاۋىن اينالۋ قىسقى سپورت جارىسى كەلەر جىلى 1 ـ ايدا التاي گەنەرال تاۋى حالىقارالىق شاڭعى دەمالىس اۋماعىندا وتكىزىلەدى. ”حالىقارالىق جارىس وتكىزىپ، دۇنيە ٴجۇزىنىڭ نازارىن اۋدارىپ، قار ـ مۇز كاسىپ سالاسىنىڭ دامۋىن جەبەيمىز. قىسقى ساياحات كورمەسىن باستاما ەتىپ، 2025 _ 2024 ـ جىلعى جاڭا قار ـ مۇز ماۋسىمىندا شينجياڭ 10 مىڭ شاقىرىمدىق قار جامىلعان تاماشا كورىنىستەن پايدالانىپ، قار ـ مۇز ساياحاتىنىڭ جوعارى ساپالى دامۋعا قاراي ورنىقتى قاداممەن الىسقا جەتۋىن ىلگەرىلەتىپ، شينجياڭ ەكونوميكاسىنىڭ جوعارى ساپالى دامۋىنا قوزعاۋشى كۇش ۇستەپ، ومىرشەڭدىگىن ارتتىرادى“، ـ دەدى جاڭ شياۋيۇي.
