نۇسىرات ۋاجيدين
تالاي جىلدان بەرى «شينجياڭ گازەتى» باستان ـ اياق پارتيا مەدياسىنا ٴتان جاۋاپكەرشىلىگى مەن جاۋاپكەرشىلىك ارقالاۋى ارقىلى شينجياڭ ساحنالىق كوركەمونەرىنىڭ جەدەل دامۋىنا نازار اۋدارىپ كەلەدى، مۇنىڭ ىشىندە مەنىڭ مۋزيكانتتىق ٴومىرىمنىڭ مەيىرلى ەستەلىكتەرى دە بار. سيمفونيالىق داستان «تۋعان جەر»، ٴان ـ ٴبي «تيانشان كەمپىرقوساعى»، «قاشقار»، مۋزيكالى تەاتر «مۇزتاۋعا كەلگەن قوناق»، ٴبيلى تەاتر «قۇمدىق قىزى»، مۋزيكا، ٴبي، ولەڭ، سۋرەت قويىلىمى «مۇقام اسەرى» ... جازباشا ماتەريالدان بەينەجازباعا، گازەتتەن جاڭا مەديا تۇعىرىنا دەيىن، مەنىڭ مۋزيكالىق تۋىندىلارىم مەن شىعارماشىلىق حيكايالارىم «شينجياڭ گازەتىنىڭ» باي حابارلاۋ فورماسىمەن تارالىپ، ساحنالىق كوركەمونەر مەن كورەرمەن اراسىن جاقىنداتتى، دەن قويا شىعارعان تۋىندىلارىمنىڭ كوركەمونەرلىك قۇنى مەن قوعامدىق قۇنىن ونان ارى جۇزەگە اسىرۋىنا دا مۇمكىندىك بەردى.
«شينجياڭ گازەتىمەن» اڭگىمەمدى ايتار بولسام، مىناداي ەكى رەتكى كەشىرمە ەسىمدە تەرەڭ ساقتالىپ قالدى.
ٴبىر رەتكىسى 2019 ـ جىلى جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى كەزىندە مەن ٴساتى ٴتۇسىپ «شينجياڭ گازەتىنىڭ» ”70 جىل. شينجياڭ ەستەلىكتەرى“ جەلىلەس سۇحباتىنا سۇحبات بەرگەندەردىڭ ٴبىرى بولدىم، ول ٴبىر رەتكى جان سۇيىنە بايانداۋ بولدى، مەن شينجياڭنىڭ مۋزيكا ىستەرىنىڭ 70 جىلدىق دامۋىن، وزگەرىسىن، جاسامپازدىعىن، ناتيجەسىن ەسكە الدىم، مەنىڭ مۋزيكانتتىق ٴومىرىم ٴدال وسى اسقاق سەزىم الاۋلاعان جىلداردا بىرتىندەپ قوردالاندى.
ەكىنشى رەتكىسى 2023 ـ جىلى 1 ـ ايدا ومىرىمدەگى ەڭ ارداقتى ۇستازىم ۋان تۇڭشۋ مىرزا دۇنيەدەن ٴوتتى، «شينجياڭ گازەتى» وسىعان بايلانىستى جالپى مەديالىق حابارلاۋ ۇيىمداستىرىپ، جۇڭگو شينجياڭ ۇيعۇر مۇقام كوركەمونەرىن شۇعىل قۇتقارىپ، كورنەكتى ۇلەس قوسقان وسى ٴبىر ۇلت مۋزيكانتىن ەسكە الدى. كوكتەم مەرەكەسىنىڭ 1 ـ كۇنى تۇستەن بۇرىن سۇحباتتاسۋعا كەلىسكەن تىلشىلەرمەن شينجياڭ كوركەمونەر تەاترحاناسىنىڭ مۇقام كوركەمونەرى ۇيىرمەسىندە كەزدەستىم. ورەن كەزىمدە مۇعالىمنىڭ ۇيىندەگى سكريپكاعا، پيانينوعا قىزىققانىمدى، ونىڭ ۇلكەن ٴبىر سورەگە قويىلعان مۋزيكالىق كىتاپتارىنا تالپىنعانىمدى، ونىڭ تار كىتاپ بولمەسىندە ماعان مۋزيكا نازارياسىن زەر سالا ۇيرەتكەنىنە ريزاشىلىعىمدى اڭگىمەلەدىم ...
تاپ سول كەزدە، تىلشىلىك جاسالىپ جاتقاندا، دۇتار شالاتىن ٴبىر ورەن اكەسىمەن بىرگە مەنى ىزدەپ كەلىپتى _ ورەن ماماندىق ۇيرەنۋ جولىنا تۇسپەكشى ەكەن، اتتاناردان بۇرىن مەنىڭ ٴجون سىلتەۋىمدى ٴۇمىت ەتكەن. مەن ونىڭ كىپ ـ كىشكەنتاي بولسا دا اسپاپتى ەلىتە شەرتكەن بەينەسىنەن ٴوزىمنىڭ 50 نەشە جىلدىڭ الدىنداعى ٴار كۇنى كوشەدە، ٴۇي توبەسىندە سكريپكا شالاتىن ورەن كەزىمدى كورگەندەي بولدىم، ەستەمەلەر ٴاپ ـ ساتتە تولقىنداي جوڭكىلىپ الدىما كەلگەندەي بولدى.
سول رەتكى تىلشىلىك، ٴتۇسىرىلىم مولشەرمەن 4 ساعاتتان استام ۋاقىت جالعاستى، باسقالارمەن مۇعالىمىم تۋرالى ٴسويتىپ شەشىلە اڭگىمەلەسپەگەنىمە تالاي ۋاقىت بولعان ەكەن، مەن سوندا بارىپ مۇعالىمىمنىڭ كوڭىلىمە وسىنشاما كوپ، وسىنشاما تەرەڭ اسەر قالدىرعاندىعىن سەزىندىم.
كوپ وتپەي، «شينجياڭ گازەتى» باس بەتىنىڭ باسقى ماقالاسىندا «قۇمدى شولدەن شالقار تەڭىزگە دەيىن _ شينجياڭ ۇيعۇر مۇقام كوركەمونەرىن شۇعىل قۇتقارۋشى، قورعاۋشى ۋان تۇڭشۋ مىرزانى ەسكە الۋ» دەگەن ماقالا جاريالادى، انار بۇلت كليەنتى «مۋزيكا رۋحى _ جۇڭگو شينجياڭ ۇيعۇر مۇقام كوركەمونەرىنىڭ شۇعىل قۇتقارۋشىسى ۋان تۇڭشۋعا قۇرمەت» دەگەن ارناۋلى تاقىرىپتىق بەينە جازبا شىعاردى، ونى كورگەن سوڭ سان قيلى سەزىمگە بەرىلدىم. وسى تەرەڭ، جاندى، ناقتى، اسەرلى ەستەلىك ماعان تەك تاڭداۋلى مۋزيكا شىعارۋ عانا ەمەس، ونان دا ماڭىزدىسى، حالىق اراسىنداعى مۋزيكانى جۇيەلى اشۋ جانە ٴونىمدى جالعاستىرۋدىڭ ٴبىر حالىق مۋزيكانتىنىڭ بورىشى ەكەندىگىن تاعى ٴبىر رەت سەزىندىردى.
عاسىرلار بويى جالعاساتىن تۋىندى، ماڭگىلىك شىعارما، ٴسوز جوق، العان بەتىنەن قايتپايتىن نيەتپەن جۇرەك قاندى سارقا جۇمساي وتىرىپ جاسالادى. مەن حالىققا جاناسىمدى، تۇرمىسپەن ەتەنە اناعۇرلىم كوپ ادەبيەت ـ كوركەمونەر تۋىندىلارى ارقىلى ٴداۋىر داۋىسى مەن حالىقتىڭ جۇرەك ٴۇنىن شىرقاپ، مىڭ بوياۋلى شينجياڭدى، العا باسقان شينجياڭدى قۇلشىنا سۋرەتتەپ، جاڭا داۋىردەگى ادەبيەت ـ كوركەمونەر ىستەرىنىڭ دامۋىنا اسەم بوياۋ قوسامىن.
(اۆتورى جۇڭگو مۋزيكانتتار قوعامىنىڭ بۇرىنعى ورىنباسار ٴتوراعاسى، شينجياڭ مۋزيكانتتار قوعامىنىڭ قۇرمەتتى ٴتوراعاسى)
