انار بۇلت \ شينجياڭ گازەتىنىڭ ٴتىلشىسى دۋ جيانحۇي
11 ـ ايدىڭ 8 ـ كۇنى، حوشۇت اۋدانى تاعارشى قالاشىعى اردۇن ٴدورۋىن قىستاعىنىڭ تۇرعىنى لي چيڭحۋانىڭ جىلىجايىندا بۇتاقتا سامسىعان التىن سارى شىزىلار، قىزىل وت دوپتان اۋمايتىن حولۇڭگولار قاۋلاپ ٴوسىپ تۇر. ”شىزى 3 رەت تەرىلدى، حولۇڭگو دا 5 رەت تەرىلدى. 12 ـ ايدىڭ سوڭىنا دەيىن تەرۋگە بولادى“. شىزى تەرىپ جاتقان لي چيڭحۋا بيىل شىزىدان جانە حولۇڭگودان مەجەمەن 70 مىڭنان استام يۋان كىرىس تابۋعا بولاتىندىعىن قۋانا ايتتى.
1991 ـ جىلى لي چيڭحۋا مەن كۇيەۋى سىچۋاننىڭ نانچۇڭىنان شينجياڭعا جۇمىس ىستەۋگە كەلدى. ولار ماقتا تەرىپ، باسقالارعا كومەكتەسىپ كوكونىس ەگىپ، كەرپىش زاۆودىندا كەرپىش تيەپ ـ ٴتۇسىرىپ، كۇنىنە 80 _ 70 يۋان كىرىس تاپتى. 2009 ـ جىلى ازىراق قور جيناعان لي چيڭحۋا جەردى كوتەرمەگە الىپ، جىلىجاي سالىپ كوكونىس ەكپەكشى بولادى. ايتسەدە كۇيەۋى جىلىجاي سالسا ابىگەرى كوپ، ونان دا جۇمىسكەر بولسا كۇندىك ورنىقتى كىرىسى بولادى دەپ مۇنى قۇپتامايدى.
جۇمىس ىستەۋگە عانا سۇيەنىپ اقشا تابۋ باياندى بولمايدى. لي چيڭحۋا مويىنسال بولماي، 80 مىڭ يۋان قارجى قۇراپ، كۇيەۋىنىڭ كۇڭكىلىنە قاراماستان 1.2 مۋ كەلەتىن جىلىجاي سالىپ، اسقاباق، قىزىل بۇرىش، قيار قاتارلى كوكونىستەردى ەكتى.
توڭىرەگىندە جىلىجايدا كوكونىس ەگەتىن وتباسىلارى بارعان سايىن كوبەيدى، ”قياردىڭ، قىزىل بۇرىشتىڭ ٴار كيلوگرامىنىڭ باعاسى نەشە 10 تيىن عانا، باعادا ساۋداگەرلەردىڭ ايتقانى ەسەپ، بىلاي كەتە بەرسە بولمايدى عوي“، ـ دەدى لي چيڭحۋا. ويدا جوقتا ول تەلەۆيزوردان ”وڭتۇستىكتىڭ جەمىسىن سولتۇستىكتە ەگۋگە“ قاتىستى حاباردى كورىپ، جىلىجايدا حولۇڭگو، شىزى، بۇلدىرگەن قاتارلى 10 نەشە ٴتۇرلى ەكونوميكالىق داقىلداردى سىناق رەتىندە ەگۋدى باستادى، سوڭىندا نە بارى شىزى مەن حولۇڭگو عانا ولمەي ٴساتتى ٴوستى.
لي چيڭحۋا قايراتىنا قامشى باسىپ، 2015 ـ جىلى 2.8 مۋ جەرگە تاعى ٴبىر جىلىجاي سالىپ، ٴبىر جىلىجايدا شىزى ەكسە، ەندى ٴبىر جىلىجايدا حولۇڭگو ەگىپ، ماماندانعان ەگىمشىلىك جولىنا قادام تاستايدى.
”جاڭادان ەگىلگەن شىزى اعاشى 3 جىلدان كەيىن ارەڭ جەمىس بەرەدى، حولۇڭگونىڭ جەمىس بەرۋىنە 14 اي اينالاسىندا ۋاقىت قاجەت. جىلىجاي ەگىمشىلىگى قىستا ەڭ باستى قاتىرادى، قار جاۋۋدان، بۇلىڭعىر كۇننىڭ جالعاسۋىنان، اۋا رايىنىڭ سۋىق بولۋىنان الاڭدايسىڭ، ٴارقانداي بىرەۋىنەن ەگىمشىلىكتىڭ ساتسىزدىككە ۇشىراۋى ابدەن مۇمكىن ەدى. ىشكى ـ سىرتقى ورتا تەمپەراتۋراسى بىركەلكى بولماسا جىلىجايدان سۋ تامشىلايدى، ىزعار سۋ بۇتاققا تولاسسىز تامشىلاسا، بۇل جەرلەردى ٴشىرىتىپ كەتەدى...“ 3 جىلدا لي چيڭحۋا جىلىجايدا جاتىپ، تاماقتانىپ، ينتەرنەتتە جەرگىلىكتى اۋىل شارۋاشىلىعى تەحنيكتەرىنەن جەمىس اعاشىن باپتاۋ تەحنيكاسىن ۇيرەنىپ، كۇنى ـ ٴتۇنى 2 جىلىجاي اراسىندا شاپقىلايدى. وسىلايشا ول ٴوزىن جەمىس اعاشىن ەگەتىن مايتالمان ەتىپ شىڭدايدى.
3 جىل بار زەيىنىمەن ۇقىپتاپ باپتاۋدىڭ ارقاسىندا 2016 ـ جىلى قىستا لي چيڭحۋا ەككەن حولۇڭگودان ٴونىم الىندى؛ 2017 ـ جىلى شىزى اعاشى جەمىس بەردى. ٴونىم الىپ قانا قويماي، لي چيڭحۋا ەككەن شىزىسى مەن حولۇڭگوسىنىڭ تاۋار ماركاسىن تىزىمگە الدىرىپ، تاپسىرىسپەن ادەمى قوراپ ساندىق جاساتىپ، ۋيشين، دوۋيىن ارقىلى ونىمدەرىن ۇگىتتەپ تانىستىردى.
2019 ـ جىلدان بەرى بوس جۇرگەندى قالامايتىن لي چيڭحۋا سىناق رەتىندە ماڭگو، ايداعار كوز جەمىسىن، جۇيزى ەگىپ تابىسقا جەتتى. ول كەلەر جىلى تاعى دا جاڭا جىلىجاي سالىپ، تەحنيكاسى كەمەلدەنگەندە ماڭايىنداعى ەگىنشىلەرگە ۇيرەتىپ، كەڭ كولەمدە جالپىلاستىرۋدى جوسپارلاپ وتىر.
جاپا ـ ماشاقاتتان قورىقپايتىن، قاجىرلى، ۇيرەنۋگە قۇلىقتى لي چيڭحۋا ىلگەرىندى ـ كەيىندى ”اۆتونوميالى رايوندىق ەڭبەك ەرى“، ”عىلىم ـ تەحنيكا ارنايى قىزمەتكەرى“ قاتارلى داڭقتاردى الدى. ول تاعى ٴار جىلى ۇسىنىسپەن بايىنعولين موڭعۇل اۆتونوميالى وبلىسىنىڭ اۋدان، قالالارىنا بارىپ جەمىس اعاشىن ەگۋ تاجىريبەلەرىن ۇيرەتەتىن بولدى.
