از ۇلتتاردىڭ مەملەكەتتىك 12 ـ كەزەكتى ٴداستۇرلى سپورت جارىسى تابىسپەن اياقتادى
شينجياڭ 33 مەدالعا يە بولدى
انار بۇلت \ شينجياڭ گازەتىنىڭ ٴتىلشىسى گو ليڭ 11 ـ ايدىڭ 30 ـ كۇنى سان ـ يادان حابارلايدى. 11 ـ ايدىڭ 30 ـ كۇنى از ۇلتتاردىڭ مەملەكەتتىك 12 ـ كەزەكتى ٴداستۇرلى سپورت جارىسى حاينان ولكەسىنىڭ سان ـ يا قالاسىندا جابىلدى. شينجياڭ ۋاكىلدەر ۇيىرمەسى مول تابىسقا قول جەتكىزىپ، 7 ٴبىرىنشى دارەجەلى سيلىققا، 11 ەكىنشى دارەجەلى سيلىققا، 15 ٴۇشىنشى دارەجەلى سيلىققا يە بولدى ٴارى بۇكىل مەملەكەتكە شينجياڭداعى ٴار ۇلت حالقىنىڭ ىنتىماقتاسا كۇرەس جۇرگىزەتىن، قايراتتانا العا ۇمتىلاتىن رۋحاني بەت ـ بەينەسىن ايگىلەپ، ”شينجياڭ جاقسى جەر“ دەگەن داڭقتى جۇرت جۇرەگىنە ونان ارى تەرەڭ ۇيالاتتى.
وسى كەزەكتى سپورت جارىسى 11 ـ ايدىڭ 22 ـ كۇنىنەن 30 ـ كۇنىنە دەيىن حاينان ولكەسىنىڭ سان ـ يا قالاسىندا وتكىزىلدى، شينجياڭ ۋاكىلدەر ۇيىرمەسىنىڭ قاتىناسقان جارىس كولەمى الدىڭعى كەزەكتەن اسىپ، جيىنى 14 جارىس تۇرىنە قاتىناستى، مۇندا، ۇلتتىق كۇرەس، ۇلتتىق ات ونەرى، دارۋاز، سارعايدە، كوكپار، قىز قۋار، اۋدارىسپاق تۇرلەرىندە ٴبىرىنشى دارەجەلى سيلىققا يە بولدى، ٴبىرىنشى دارەجەلى سيلىقتىڭ سانى دا الدىڭعى كەزەكتەگىدەن استى.
سپورت جارىسىندا شينجياڭ ۋاكىلدەر ۇيىرمەسىندەگى ادىل وشۇر دارۋازشىلار توبىن باستاپ كەڭىستىكتە 20 مينۋت كوز تارتارلىق ونەر كورسەتتى. ورىنداۋشىلار ۇستىلەرىنە ٴساندى ۇلتتىق كيىم كيىپ، جەڭىل قاداممەن بيىكتىگى 21 مەتر، ۇزىندىعى 80 مەتر بولات ارقاننىڭ ۇستىندە سەكىرىپ، دومالاپ، بۇلت اراسىن ارالاپ جۇرگەندەي بولدى. ”ٴبىز دۇنيە جۇزىنە دارۋازدى ايگىلەيتىن ٴار رەتكى ورايدى قاستەرلەيمىز، وسى مىڭ جىلعا جالعاسقان سەرىك ونەر ويىن فورماسىن ٴتىپتى دە كوپ ادامنىڭ ٴتۇسىنۋىن ٴۇمىت ەتەمىز“، ـ دەدى شينجياڭ ۋاكىلدەر ۇيىرمەسى دارۋاز اترەتىنىڭ باستىعى ادىل وشۇر، ولار ٴۇرتىس 11 كەزەك 1 ـ دارەجەلى سيلىقتى ەنشىلەدى، ”بۇدان كەيىن ۇزدىكسىز قۇلشىنىپ، ٴتىپتى دە كوپ تەحنيكالىق ارەكەتتەردى جاراتامىز“.
از ۇلتتاردىڭ مەملەكەتتىك ٴداستۇرلى سپورت جارىسى _ ەلىمىزدە ەڭ ەرتە وتكىزىلگەن مەملەكەتتىك جالپىلىق سپورت جارىسى. 1953 ـ جىلى 1 ـ كەزەك وتكىزىلگەننەن باستاپ، جارىسقا قاتىناساتىن ۇلتتار حانزۋ، موڭعۇل، حۇيزۋ سياقتى 13 ۇلتتان كەڭەيىپ بۇگىنگى كۇنى 56 ۇلتقا جەتتى؛ جارىسقا قاتىناسقان ادام سانى 400گە جۋىق ادامنان 10 مىڭعا جۋىق ادامعا كوبەيدى؛ باسەكەلىك جارىس تۇرلەرى 5تەن 18گە ارتتى، ونەر كورسەتۋ تۇرلەرى 3 تۇردەن 160تان استام تۇرگە كوبەيدى. از ۇلتتاردىڭ مەملەكەتتىك ٴداستۇرلى سپورت جارىسى ٴار ۇلت سپورتشىلارىنىڭ ارالاسۋىنىڭ، ىشتەسۋىنىڭ، توعىسۋىنىڭ ماڭىزدى تۇعىرى رەتىندە، جۇڭحۋا ۇلتىنىڭ ۇلى ىنتىماعىنا كۋا بولدى جانە ونى ىلگەرىلەتتى، سونداي ـ اق جۇڭحۋا مادەنيەتىنىڭ الۋان بوياۋىن ايگىلەيتىن ساحناعا اينالدى.
”وسى رەت ٴبىرىنشى دارەجەلى سيلىققا يە بولىپ كوپشىلىك ايرىقشا قۋاندى. سپورت جارىسى سياقتى وسىنداي تاماشا تۇعىردان پايدالانىپ سارعايدەنىڭ تانىمالدىلىعىن اسىرۋدى ٴۇمىت ەتەمىز“، ـ دەدى شينجياڭ ۋاكىلدەر ۇيىرمەسى سارعايدە كومانداسىنىڭ جاتتىقتىرۋشىسى ايگۇل تۇران.
سول كۇنگى جابىلۋ سالتىندا از ۇلتتاردىڭ مەملەكەتتىك ٴداستۇرلى سپورت جارىسىنىڭ جارىس تۋىن تاپسىرىپ بەرۋ ـ تاپسىرىپ الۋ سالتى وتكىزىلدى. مەملەكەتتىك كەڭەستىڭ بەكىتۋىمەن، از ۇلتتاردىڭ مەملەكەتتىك 13 ـ كەزەكتى ٴداستۇرلى سپورت جارىسى 2027 ـ جىلى حۋنان ولكەسىندە وتكىزىلەدى.
