شينحۋا اگەنتتىگىنىڭ 12 ـ ايدىڭ 3 ـ كۇنى بەيجيڭنەن بەرگەن حابارى. 12 ـ ايدىڭ 3 ـ كۇنى مەملەكەت ٴتوراعاسى شي جينپيڭ 2024 ـ جىلعى ”جۇڭگونى ٴتۇسىنۋ“ حالىقارالىق ماجىلىسىنە (گۋاڭجوۋ) قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: جۇڭگونى تۇسىنۋدە رەفورمانى ونان ارى جاپپاي تەرەڭدەتۋدى، جۇڭگو ۇلگىسىندەگى وسىزامانداندىرۋدى ىلگەرىلەتۋدى ٴتۇسىنۋ قاجەت. بۇگىنگى جۇڭگو جوعارى دەڭگەيلى سوتسياليستىك بازار شارۋاشىلىعى ٴتۇزىلىسىن جەدەل ورناتىپ، تۇزىمدىك ەسىك اشۋدى نىق قاداممەن كەڭەيتىپ، حالىقارالىق جوعارى ولشەمدى ەكونوميكا ـ ساۋدا ەرەجەسىمەن ىرىقتىلىقپەن ٴتۇيىلىسىپ، جاريا، ورنىقتى، مەجەلى تۇزىمدىك ورتانى بەلسەنە تۇلعالاۋدا. جۇڭگو ۇلگىسىندەگى وسىزامانداندىرۋ قۇرىلىسى ٴبىر ميلليارد 400 ميلليون حالىقتىڭ تاماشا تۇرمىسقا تالپىنىسىن قاناعاتتاندىرا الۋمەن بىرگە، دۇنيە ٴجۇزىنىڭ بەيبىت دامۋىنا دا جاڭا اناعۇرلىم زور ۇلەس قوسادى.
شي جينپيڭ بىلاي دەپ باسا دارىپتەدى: قازىرگى دۇنيە ٴجۇزىنىڭ 100 جىلدىق وزگەرىس جاعدايى جەدەل قۇبىلۋدا، دۇنيە جۇزىندەگى ٴار ەل جاڭا حاۋىپ ـ قاتەرلەر مەن سىن ـ سايىستارعا ٴدوپ كەلۋمەن بىرگە، جاڭا دامۋ ورايىنا جانە العا باسۋ بولاشاعىنا دا يە. جۇڭگو ٴار ەلمەن دامۋعا ٴتيىمدى ورتا مەن شارت ـ جاعدايدى قول ۇستاسا جاراتىپ، ٴتۇرلى قيىنشىلىقتار مەن سىن ـ سايىستارعا بەلسەنە توتەپ بەرۋدى، بەيبىت داميتىن، ٴوزارا تيىمدىلىك جەتكىزىپ سەلبەسەتىن، بىرگە گۇلدەنەتىن دۇنيە جۇزىندەگى ٴار ەلدىڭ وسىزاماندانۋىن جۇزەگە اسىرۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدىڭ جاڭا تاراۋىن جازۋدى ٴۇمىت ەتەدى.
”جۇڭگونى ٴتۇسىنۋ“ حالىقارالىق ٴماجىلىسىن جۇڭگو مەملەكەتتىك جاڭالىق اشۋ جانە دامۋ ستراتەگياسىن زەرتتەۋ قوعامى، جۇڭگو حالىق ديپلوماتيا عىلمي قوعامى، گۋاڭدۇڭ ولكەلىك حالىق ۇكىمەتى بىرلەسىپ وتكىزدى، 12 ـ ايدىڭ 3 ـ كۇنى گۋاڭجوۋدا اشىلدى، نەگىزگى تاقىرىبى: ”رەفورمانى سوڭىنا دەيىن جۇرگىزۋ _ جۇڭگو ۇلگىسىندەگى وسىزامانداندىرۋ مەن دۇنيە ٴجۇزى دامۋىنىڭ جاڭا ورايى“.
