كوكتەم مەرەكەسى ساۋىق كەشىندە بوي كورسەتكەن ”مىسىق ايۋ قويدىڭ“ سانى 30 مىڭعا جەتتى
انار بۇلت \ شينجياڭ گازەتىنىڭ ٴتىلشىسى جازيرا نەسىپبەك
”اپىر ـ اي، اشىعىپ قالدىڭدار ما؟ سەندەرگە دەرەۋ جەم بەرەيىن“. 11 ـ ايدىڭ 24 ـ كۇنى تاڭەرتەڭ ەرتەمەن يىڭسار اۋدانى سيتلا اۋىلى نوربەشىبەينام قىستاعىنىڭ تۇرعىنى نۇرمامەت بارات قوي قوراعا كۇندەگىسىندەي كىرىپ كەلىسىمەن ونى كورگەن قويلار ”ٴما، ٴما، ٴما“ دەپ ماڭىراي جونەلدى.
نۇرمامەت قويلارعا جاۋاپ قاتا ٴجۇرىپ، ارباعا جەم ـ ٴشوپ تيەي باستادى.
نۇرمامەتتىڭ باققان قويى نوۆيش قويى دەپ اتالادى، كوزىنىڭ اينالاسى، قۇلاعى، اۋىزى، سيراعى قارا ٴتۇستى بولىپ، بەينەسى مىسىق ايۋعا ۇقسايدى، جەرگىلىكتى بۇقارا ونى ”مىسىق ايۋ قوي“ دەپ اتايدى.”مىسىق ايۋ قوي“ جەم تالعامايدى، ىندەتكە قارسىلىق قۋاتى كۇشتى، ەتى جۇمساق، جەرگىلىكتى ورىندا 400 جىلدان استام ۋاقىت باعىمشىلىق تاريحى بار.
ايتسەدە، مۇنداي جەرگىلىكتى تۇقىمدى بۇرىن بازاردا مويىنداۋ دارەجەسى جوعارى بولماۋ، باعىمشىلىق ٴتاسىلى ۇتىمسىز بولۋ سياقتى سەبەپتەردەن سانى تۇراقسىز بولىپ كەلگەن، بىلتىر 20 مىڭنان استام عانا ەدى. بيىل 2 ـ ايدا ”مىسىق ايۋ قوي“ ورتالىق راديو ـ تەلەۆيزيا باس ستانسياسىنىڭ «2024 ـ جىلعى كوكتەم مەرەكەسى بىرلەسكەن ساۋىق كەشىنىڭ» قاشقار بولىمشە الاڭىندا بوي كورسەتىپ، بىردەن تانىمال بولارىن قىستاق تۇرعىندارى ويلاماعان ەدى.
”جۇرت ولاردىڭ سۇيكىمدى بەينەسىن وتە جاقسى كوردى، كەڭەس سۇراي كەلگەندەر دە كوبەيدى، مەنىڭشە، بۇل ٴبىر جاقسى وراي“، ـ دەدى نۇرمامەت.
نۇرمامەت اسىلىندە سيىر باعاتىن، ورايدى دەرەۋ سەزگەن ول باتىل تۇردە ۇيىندەگى سيىرلارىن تۇگەل ساتىپ جىبەرىپ، ” 30 مىسىق ايۋ قوي“ ساتىپ الادى. دەن قويا باعۋىنىڭ ارقاسىندا ”مىسىق ايۋ قويدىڭ“ سانى قازىر 50گە كوبەيدى.
”مىسىق ايۋ قوي“ تۇقىمىن قورعاۋ، سونداي ـ اق نۇرمامەت سياقتى باعىمشىلىقپەن شۇعىلداناتىن وتباسىلارىن شابىتتاندىرۋ، ولارعا دەم بەرۋ ٴۇشىن، نوربەشىبەينام قىستاعى جوعارى مەكتەپتەرمەن سەلبەسىپ ”مىسىق ايۋ قويدى“ زەرتتەۋ ورتالىعىن قۇرىپ، تەحنيكا ۇجىمىن قۇردى؛ قىستاق تۇرعىندارىنىڭ قىستاق اسىل تۇقىم جەتىلدىرۋ ورتالىعىنا كىرۋىنە قولداۋ كورسەتىپ، ولارعا قارجى، جەم ـ ٴشوپ، تەحنيكا سياقتى جاقتاردان قولداۋ كورسەتتى؛ باعىمشىلىق كاسىپورىندارى قىستاق تۇرعىندارىمەن باعىمشىلىق، ساتۋ كەلىسىمىن جاساستى...
”ٴبىزدىڭ قىستاق عانا ەمەس، باسقا قىستاقتار دا قىستاق تۇرعىندارىن ’مىسىق ايۋ قويدى‘ باعۋعا شابىتتاندىردى، قازىر كوپشىلىك بىلەك سىبانا كىرىسۋدە“، ـ دەدى نۇرمامەت.
بيىل يىڭىسار اۋدانى ”مىسىق ايۋ قويدىڭ“ سانىن 30 مىڭعا جەتكىزدى.
نۇرمامەت عىلمي جولمەن باعۋ، ىندەتتەن ساقتانۋ ـ تىزگىندەۋ سياقتى جاقتاردا جاڭا تانىمعا يە بولىپ، باعىمشىلىق دەڭگەيى بىرتىندەپ جوعارىلادى. ”قازىر بازاردا مۇنداي قوي ەرەكشە قارسى الىنۋدا. كەلەر جىلى 4 ـ ايدا باققان قويلارىمدى قولدان شىعارۋىما بولادى“. نۇرمامەت بىلاي دەدى: كەلەر جىلعى نىسانام قويدىڭ سانىن ۇزدىكسىز ارتتىرۋ، سونىمەن بىرگە بەينەجازبا ٴنومىرىن تىركەۋگە الدىرىپ، ۇيدەگى وسى كىشكەنتاي سۇيكىمدى قويلاردىڭ كۇندەلىكتى جاعدايىن ينتەرنەتكە شىعارىپ، ٴتىپتى دە كوپ ادامدى ”مىسىق ايۋ قويعا“ نازار اۋدارتۋ.
