جۇڭگو كوممۋنيستىك پارتياسى ورتالىق كوميتەتى ساياسي بيۋروسى ٴماجىلىس اشتى
2025 ـ جىلعى ەكونوميكالىق قىزمەت جونىندە تالداۋ جاسادى، اقىلداستى
پارتيا ستيلى، پاكتىك قۇرىلىسى جانە شىرىكتەسۋگە قارسى تۇرۋ قىزمەتىن اقىلداستى، ورنالاستىردى
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ٴماجىلىستى باسقاردى
شينحۋا اگەنتتىگىنىڭ 12 ـ ايدىڭ 9 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى ساياسي بيۋروسى 12 ـ ايدىڭ 9 ـ كۇنى ٴماجىلىس اشىپ، 2025 ـ جىلعى ەكونوميكالىق قىزمەت جونىندە تالداۋ جاسادى، اقىلداستى؛ ورتالىق ٴتارتىپ تەكسەرۋ كوميتەتىنىڭ، مەملەكەتتىك باقىلاۋ ـ تەكسەرۋ كوميتەتىنىڭ قىزمەت مالىمەتىن تىڭدادى، 2025 ـ جىلعى پارتيا ستيلى، پاكتىك قۇرىلىسى جانە شىرىكتەسۋگە قارسى تۇرۋ قىزمەتىن اقىلداستى، ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ٴماجىلىستى باسقاردى.
ٴماجىلىس بىلاي دەپ قارادى: بيىل — ”14 ـ بەسجىلدىق“ جوباداعى نىسانا ـ مىندەتتەردى ورىنداۋداعى شەشۋشى جىل، شي جينپيڭ جولداستى ۇيتقى ەتكەن پارتيا ورتالىق كوميتەتى بۇكىل پارتيانى، بۇكىل ەلدەگى ٴار ۇلت حالقىن ىنتىماقتاستىرىپ جانە باستاپ، وزگەرىسكە بايىپتىلىقپەن توتەپ بەرىپ، كەشەندى شارا قولداندى، ەكونوميكالىق اينالىم جالپى جاقتان ورنىقتى بولىپ، ورنىقتىلىق بارىسىندا ىلگەرىلەدى، ەلىمىزدىڭ ەكونوميكالىق قۋاتى، عىلىم ـ تەحنيكالىق قۋاتى، جالپىلىق مەملەكەت قۋاتى ۇزدىكسىز كۇشەيدى. جاڭاشا وندىرگىش كۇش ورنىقتى دامىپ، رەفورما جاساۋ، ەسىك اشۋ ۇزدىكسىز تەرەڭدەدى، ٴتۇيىندى سالالارداعى حاۋىپ ـ قاتەردى جويۋ ٴتارتىپتى، ٴونىمدى بولدى، حالىق تۇرمىسىن قامتاماسىز ەتۋ تىڭعىلىقتى، پارمەندى بولدى، تۇتاس جىلداعى ەكونوميكالىق، قوعامدىق دامۋدىڭ باستى نىسانا ـ مىندەتتەرى تابىسپەن ورىندالۋ الدىندا تۇر.
ٴماجىلىس مىنالاردى باسا دارىپتەدى: كەلەر جىلعى ەكونوميكالىق قىزمەتتى ويداعىداي ىستەۋدە شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ٴۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى تىڭعىلىقتى ىلگەرىلەتىپ، رەفورمانى ونان ارى جاپپاي تەرەڭدەتىپ، جوعارى دەڭگەيدە سىرتقا ەسىك اشۋدى كەڭەيتىپ، وسىزاماندانعان كاسىپ سالاسى جۇيەسىن قۇرىپ، دامۋ مەن حاۋىپسىزدىكتى اناعۇرلىم ويداعىداي ٴبىر تۇتاس جوسپارلاپ، اناعۇرلىم بەلسەندى دە ٴونىمدى ماكرولىق ساياسات اتقارىپ، ەل ٴىشى سۇرانىسىن كەڭەيتىپ، عىلىم ـ تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ توعىسپالى دامۋىن ىلگەرىلەتىپ، تۇرعىن ٴۇي بازارىن، جارنا بازارىن ورنىقتىرىپ، ٴتۇيىندى سالالارداعى حاۋىپ ـ قاتەرلەردەن جانە سىرتقى سوققىدان ساقتانىپ جانە ونى جويىپ، مەجەنى ورنىقتىرىپ، ومىرشەڭ كۇشتى قاۋلاتىپ، ەكونوميكانىڭ ٴۇرتىس قايتا ورلەۋىن، جاقسارۋىن ىلگەرىلەتىپ، حالىقتىڭ تۇرمىس دەڭگەيىن ۇزدىكسىز جوعارىلاتىپ، قوعامنىڭ جاراسىمدىلىعىن، ورنىقتىلىعىن ساقتاپ، ”14 ـ بەسجىلدىق“ جوباداعى نىسانا ـ مىندەتتەردى جوعارى ساپالى ورىنداپ، ”15 ـ بەسجىلدىقتا“ تاماشا باستاما اشۋدى جۇزەگە اسىرۋعا بەرىك نەگىز قالاۋ كەرەك.
ٴماجىلىس مىنالاردى اتاپ كورسەتتى: كەلەر جىلى ورنىقتىلىق بارىسىندا ىلگەرىلەۋگە، ىلگەرىلەۋ ارقىلى ورنىقتىلىقتى جەبەۋگە تاباندى بولىپ، تۋراشىلدىقتان اينىماي جاڭالىق اشىپ، الدىمەن قۇرىپ، ونان سوڭ كۇشىنەن قالدىرىپ، جۇيەلى شوعىرلاندىرىپ، سايكەسىپ، سەلبەسىپ، اناعۇرلىم بەلسەندى قازىنا ساياساتى مەن ۇيلەسىمدى كەڭ اقشا ساياساتىن اتقارىپ، ساياسات قۇرال ـ جابدىق ساندىعىن تولىقتاپ، كەمەلدەندىرىپ، ەرەن كەرى پەريودتىق رەتتەۋدى كۇشەيتىپ، ساياسات ”كەشەندى شاراسىن“ ويداعىداي اتقارىپ، ماكرولىق رەتتەۋ ـ مەڭگەرۋدىڭ بولجامدىلىعىن، باعىتتامالىلىعىن، ونىمدىلىگىن جوعارىلاتۋ كەرەك. تۇتىنۋدى بار كۇشپەن سەرپىلتىپ، قارجى قوسۋ پايداسىن جوعارىلاتىپ، ەل ٴىشى سۇرانىسىن جان ـ جاقتى كەڭەيتۋ كەرەك. عىلىم ـ تەحنيكادا جاڭالىق اشۋ ارقىلى جاڭاشا وندىرگىش كۇشتەردى دامىتۋعا جەتەكشىلىك ەتىپ، وسىزاماندانعان كاسىپ سالاسى جۇيەسىن قۇرۋ كەرەك. ەكونوميكالىق ٴتۇزىلىس رەفورماسىنىڭ جەتەكتەۋ رولىن ساۋلەلەندىرىپ، بەلگى سيپاتتى رەفورما شارالارىنىڭ تياناقتانىپ ونىمدىلىك كورسەتۋىن ىلگەرىلەتۋ كەرەك. جوعارى دەڭگەيدە سىرتقا ەسىك اشۋدى كەڭەيتىپ، سىرتقى ساۋدانى ورنىقتىرۋ، شەتەل قارجىسىن ورنىقتىرۋ كەرەك. ٴتۇيىندى سالالارداعى حاۋىپ ـ قاتەرلەردەن ٴونىمدى ساقتانىپ جانە ونى جويىپ، جۇيەلىك حاۋىپ ـ قاتەر تۋىلماۋ تومەنگى شەگىن باتىل ساقتاۋ كەرەك. كەدەيلىكتەن ارىلتۋدان قامال الۋ جەتىستىگىن ۇزدىكسىز بەكەمدەپ جانە كەڭەيتىپ، جاڭاشا قالا ـ قالاشىقتاندىرۋ مەن اۋىل ـ قىستاقتى جاپپاي گۇلدەندىرۋدى ٴبىر تۇتاس جوسپارلاپ ىلگەرىلەتىپ، قالا مەن اۋىلدىڭ توعىسپالى دامۋىن جەبەۋ كەرەك. وڭىرلىك ستراتەگيانى اتقارۋ تەبىنىن ارتتىرىپ، وڭىرلىك دامۋدىڭ ومىرشەڭ كۇشىن ارتتىرۋ كەرەك. كومىر قىشقىل گازىنىڭ شىعارىلۋىن ازايتۋدى، لاستانۋدى ازايتۋدى، جاسىل جامىلعىنى كوبەيتۋدى، ەكونوميكانى ارتتىرۋدى سايكەستى ىلگەرىلەتىپ، ەكونوميكالىق، قوعامدىق دامۋدىڭ جاپپاي جاسىل تيپ جاڭالاۋىن جەدەلدەتۋ كەرەك. حالىق تۇرمىسىن قامتاماسىز ەتۋ جانە جاقسارتۋ تەبىنىن ارتتىرىپ، حالىق بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن كۇشەيتۋ كەرەك.
ٴماجىلىس مىنالاردى باسا دارىپتەدى: پارتيانىڭ ەكونوميكالىق قىزمەتكە باسشىلىعىن كۇشەيتىپ، پارتيا ورتالىق كوميتەتىنىڭ ٴتۇرلى شەشىمدەرىنىڭ، ورنالاستىرۋلارىنىڭ ناقتى تياناقتانۋىنا شىنايى كەپىلدىك ەتۋ كەرەك. ٴار جاقتىڭ بەلسەندىلىگىن تولىق جۇمىلدىرىپ، كادرلاردىڭ ٴىس تىندىرىپ ناتيجە شىعارۋ ىشكى قوزعاۋشى كۇشىن جۇمىلدىرۋ كەرەك. شىندىققا جۇگىنىپ ناقتى ٴىس ىستەۋگە تاباندى بولىپ، دامۋ مەن حاۋىپسىزدىكتى ٴبىر تۇتاس جوسپارلاپ، سايكەسۋدى، بىرلەسىپ ارەكەتتەنۋدى كۇشەيتىپ، مەجەنى باسقارۋدى كۇشەيتىپ، ساياساتتىڭ جالپى تۇلعالىق ونىمدىلىگىن جوعارىلاتۋ كەرەك. حالىق تۇرمىسىن قامتاماسىز ەتۋ جانە حاۋىپسىزدىكتىڭ، ورنىقتىلىقتىڭ ٴتۇرلى قىزمەتتەرىن ويداعىداي ىستەپ، قوعامدىق كەلەلى جاعدايدىڭ ورنىقتىلىعىنا شىنايى كەپىلدىك ەتۋ كەرەك.
ٴماجىلىس مىنالاردى اتاپ كورسەتتى: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ورتالىق ٴتارتىپ تەكسەرۋ كوميتەتى، مەملەكەتتىك باقىلاۋ ـ تەكسەرۋ كوميتەتى جانە ٴار دارەجەلى ٴتارتىپ تەكسەرۋ، باقىلاۋ ـ تەكسەرۋ ورگاندارى شي جينپيڭ جاڭا ٴداۋىر جۇڭگوشا سوتسياليزم يدەياسىن، اسىرەسە، باس شۋجي شي جينپيڭنىڭ پارتيانىڭ وزىنە ـ ٴوزى توڭكەرىس جاساۋى جونىندەگى ماڭىزدى يدەياسىن ىشكەرىلەي ۇيرەنىپ، دايەكتىلەندىرىپ، پارتيا مەن مەملەكەتتىڭ وزەكتى مىندەتىن ارقاۋ ەتىپ، ساياسي باقىلاۋدى ٴۇرتىس كۇشەيتىپ، ستيلدى دۇرىستاۋدى، ٴتارتىپتى قاتايتۋدى، شىرىكتەسۋگە قارسى تۇرۋدى ىشكەرىلەي ىلگەرىلەتىپ، پارتيا ٴتارتىبىن ۇيرەنۋ تاربيەسىن تىڭعىلىقتى ورىستەتىپ، ورتالىقتىڭ 8 ٴتۇرلى بەلگىلەمەسىنىڭ رۋحىن دايەكتىلەندىرۋدىڭ، تياناقتاندىرۋدىڭ تەرەڭدەۋىن، ناقتىلانۋىن ىلگەرىلەتىپ، بۇقارانىڭ جانىنداعى بۇرىس ستيلدەر مەن شىرىكتەسۋ ماسەلەلەرىن شوعىرلى وڭاپ، شىرىكتەسۋدىڭ ٴوسىپ ـ ونەتىن توپىراعى مەن شارت ـ جاعدايىن كۇش سالا الاستاپ، پارتيانى جاپپاي قاتاڭ باسقارۋ جۇيەسىن اقاۋسىزداندىرۋدى، پارتيا مەن مەملەكەتتىڭ باقىلاۋ جۇيەسىن كەمەلدەندىرۋدى ىلگەرىلەتىپ، نەگىزگى تاقىرىپتىق تاربيە مەن تاربيەلەۋ، رەتتەۋ جەتىستىكتەرىن بەكەمدەپ، كەڭەيتىپ، جاڭا جورىقتاعى ٴتارتىپ تەكسەرۋ، باقىلاۋ ـ تەكسەرۋ قىزمەتىنىڭ جوعارى ساپالى دامۋىندا تىڭ ونىمدىلىككە قول جەتكىزۋدى ىلگەرىلەتتى.
ٴماجىلىس مىنالاردى باسا دارىپتەدى: ٴتارتىپ تەكسەرۋ، باقىلاۋ ـ تەكسەرۋ ورگاندارى شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ەكىنى قورعاۋدى“ باتىل ورىنداپ، شىرىكتەسۋدى جازالاۋدىڭ تەگەۋرىندى كۇيىن باستان ـ اياق ساقتاپ، شىرىكتەسۋگە قارسى تۇرۋ كۇرەسىن بۇلجىماي ىشكەرىلەي ىلگەرىلەتىپ، پارتيانى جاپپاي قاتاڭ باسقارۋدىڭ جاڭا ونىمدىلىگى ارقىلى جۇڭگو ۇلگىسىندەگى وسىزامانداندىرۋدى ىلگەرىلەتۋگە پارمەندى قامتاماسىزدىق ازىرلەۋى كەرەك. نازاردى ”ەكىنى قورعاۋعا“ شوعىرلاندىرىپ، ساياسي باقىلاۋدى كۇشەيتىپ، ساياسي ٴتارتىپ پەن ساياسي قاعيدانى قاتايتىپ، كەلەلى رەفورمالاردىڭ تياناقتانۋ جاعدايىن باقىلاۋ ـ تەكسەرۋ جانە شارلاۋ ـ تەكسەرۋ مازمۇنىنا ەنگىزىپ، پارمەندى باقىلاۋ ارقىلى رەفورمانىڭ ٴساتتى ىلگەرىلەۋىن قامتاماسىز ەتۋ كەرەك. پارتيا ٴتارتىبىن ۇيرەنۋ تاربيەسى جەتىستىگىن بەكەمدەپ، تەرەڭدەتىپ، پارتيا ٴتارتىبى تاربيەسىنىڭ تەجەۋ، قامتاماسىز ەتۋ، شابىتتاندىرۋ رولىن جان ـ جاقتى ساۋلەلەندىرۋ كەرەك. بۇرىس ستيلدەر مەن شىرىكتەسۋ ماسەلەلەرىن بىرگە تەكسەرۋ، بىرگە جونگە سالۋ مەحانيزمىن اقاۋسىزداندىرىپ، ستيل دۇرىستاۋ مەن شىرىكتەسۋگە قارسى تۇرۋدى ٴبىر تۇلعالى تەرەڭدەتۋدى كۇش سالا ىلگەرىلەتۋ كەرەك. بۇقارانىڭ جانىنداعى بۇرىس ستيلدەر مەن شىرىكتەسۋ ماسەلەلەرىن وڭاۋدى ٴۇرتىس تەرەڭدەتىپ، رەفورما، دامۋ جەتىستىكتەرىنەن قالىڭ حالىق بۇقاراسىنىڭ اناعۇرلىم ويداعىداي، اناعۇرلىم ٴادىل يگىلىكتەنۋىن ىلگەرىلەتۋ كەرەك. پارتيانى جاپپاي قاتاڭ باسقارۋ ساياسي جاۋاپكەرشىلىگىن كۇشەيتىپ، قاتاڭ اۋەندى سوڭىنا دەيىن تۇبەگەيلى دايەكتىلەندىرۋدى كۇش سالا ىلگەرىلەتۋ كەرەك. ٴتارتىپ تەكسەرۋ، باقىلاۋ ـ تەكسەرۋ قىزمەتىن ارناعا ٴتۇسىرۋ، زاڭمەن باسقارۋ، جۇيەلىلەندىرۋ قۇرىلىسىن كۇشەيتىپ، ٴتارتىپ تەكسەرۋ، باقىلاۋ ـ تەكسەرۋ ٴتۇزىلىس رەفورماسىن تەرەڭدەتىپ، ادال، كىرشىكسىز، جاۋاپكەرشىلىك ارقالايتىن، باتىلدىقپەن، شەبەرلىكپەن كۇرەس جۇرگىزەتىن ٴتارتىپ تەكسەرۋ، باقىلاۋ ـ تەكسەرۋ قۇرىش قوسىنىن تۇلعالاۋ كەرەك.
وسىنىڭ الدىندا، باس شۋجي شي جينپيڭ ورتالىق كوميتەت ساياسي بيۋروسى تۇراقتى كوميتەتى ٴماجىلىسىن باسقارىپ اشىپ، ورتالىق ٴتارتىپ تەكسەرۋ كوميتەتىنىڭ، مەملەكەتتىك باقىلاۋ ـ تەكسەرۋ كوميتەتىنىڭ 2024 ـ جىلعى قىزمەت جاعدايىنان جانە 20 ـ كەزەكتى ورتالىق ٴتارتىپ تەكسەرۋ كوميتەتى ٴتورتىنشى جالپى ٴماجىلىسىنىڭ دايىندىق جاعدايىنان بەرىلگەن مالىمەتتى تىڭدادى.
ٴماجىلىس كەلەر جىلى 1 ـ ايدىڭ 6 ـ كۇنىنەن 8 ـ كۇنىنە دەيىن 20 ـ كەزەكتى ورتالىق ٴتارتىپ تەكسەرۋ كوميتەتى ٴتورتىنشى جالپى ٴماجىلىسىن اشۋعا قوسىلدى.
ٴماجىلىس باسقا دا ىستەردى اقىلداستى.
