انار بۇلت \ شينجياڭ گازەتىنىڭ ٴتىلشىسى ٴپاريزات ابدۇل 12 ـ ايدىڭ 10 ـ كۇنى حوتاننان حابارلايدى. 12 ـ ايدىڭ 10 ـ كۇنى اۆتونوميالى رايوننىڭ كاسىپ سالاسى ارقىلى شينجياڭعا كومەكتەسۋ بويىنشا 4 ـ رەتكى شوعىرلى تانىستىرۋ قيمىلى حوتان قالاسىندا وتكىزىلدى، اۆتونوميالى رايوننىڭ قاتىستى ورىندارىنىڭ، شينجياڭعا كومەكتەسەتىن 19 ولكە، قالانىڭ الدىڭعى، ارتقى شەپ ورىندارىنىڭ، سونداي ـ اق 14 ايماقتىڭ (وبلىس، قالا) جانە شينجياڭنىڭ ٴىشى ـ سىرتىنداعى 400دەن استام كاسىپورىننىڭ ۋاكىلدەرى قاتىناستى. كەلىسىمگە قول قويىسۋ سالتىندا 14 ايماق (وبلىس، قالا) شينجياڭعا كومەكتەسەتىن ولكە، قالا كاسىپورىندارىمەن كاسىپ سالاسى ارقىلى شينجياڭعا كومەكتەسۋ بويىنشا 105 نىسان كەلىسىمىن جاساستى، كەلسىم سوماسى 122 ميلليارد 945 ميلليون يۋان بولدى.
مۇنىڭ ىشىندە 68 قارجى قوسۋ كەلىسىمى نىسانى، 37 جۇلگەلىك كەلىسىم نىسانى بار. وسى رەت جاساسقان كەلىسىم كاسىپورىنداردىڭ قارجى قوسۋ كەلىسىمى، ەڭبەككۇش شىعارۋ كەلىسىمى، تاپسىرىس بەرۋ فورماسىمەن باۋلۋ كەلىسىمىنە بولىنگەن، نىساندار جاڭا ەنەرگيا، جاڭا ماتەريال، جاسىل كەن كاسىبى، جابدىق جاساۋ، توقىماشىلىق، كيىم ـ كەشەك، ەلەكتروندى ينفورماتسيا تەحنيكاسى سياقتى سالالارعا سايادى.
”جۇمىستاندىرۋدى جەتەكشى ەتكەن كاسىپ سالاسى ارقىلى شينجياڭعا كومەكتەسۋ _ شينجياڭعا باعىتتامالى كومەكتەسۋ قىزمەتىنىڭ ماڭىزدى قۇرامداس بولىگى، شينجياڭعا كومەكتەسەتىن ولكە، قالالار نازاردى اۆتونوميالى رايوننىڭ’ ون ٴىرى كاسىپ سالاسى شوعىرى‘ قۇرىلىسىنا شوعىرلاندىرىپ، كاسىپ سالاسىنىڭ دامۋىن جانە جۇمىستانۋدى جەبەۋدى ۇزدىكسىز ىلگەرىلەتىپ، ٴبىر قىدىرۋ سۇبەلى ناتيجەلەرگە قول جەتكىزدى“. اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى لي شياڭۋي مىنالاردى ٴبىلدىردى: وسى رەتكى تانىستىرۋ قيمىلىن وراي ەتىپ، كاسىپ سالاسى ارقىلى شينجياڭعا كومەكتەسۋ قىزمەتى جونىندەگى ورنالاستىرۋلاردى باتىل تياناقتاندىرىپ، جۇمىستانۋدى ورنىقتىرۋ قىزمەت مەحانيزمىن ۇزدىكسىز كەمەلدەندىرىپ، جۇمىستانۋدى جەبەۋدىڭ پارمەندى بىرىككەن كۇشىن ۇيىستىرىپ، جۇمىستانۋدى ورنىقتىرۋ ساياساتتارىنىڭ تياناقتانۋىن تىڭعىلىقتى ىلگەرىلەتىپ، جۇمىستانۋدىڭ نەگىزگى جاعدايىن كۇش سالا ورنىقتىرامىز.
شينجياڭ نوليان جاڭا ماتەريال عىلىم ـ تەحنيكا شەكتى سەرىكتەستىگى قارجى قوسقان قورعاس اۋدانىنىڭ جىلدىق ٴونىمى 100 مىڭ توننا كەلەتىن قۇرىلىس ماتەريالدارىن وڭدەۋ قۇرىلىس نىسانى بيىل 11 ـ ايدا قورعاس اۋدان قالاشىعىندا تياناقتانىپ ىرگە تەپتى، بۇل نىسانعا 500 ميلليون يۋان قارجى قوسۋ جوسپارلانعان، 2025 ـ جىلى 5 ـ ايدا وندىرىسكە قوسىلادى. ”جاڭا ماتەريال كاسىپورىندارىنىڭ ۋاكىلى رەتىندە، وسى رەتكى تانىستىرۋ قيمىلىنا قاتىناسىپ، مول تابىسقا قول جەتكىزدىك. ماجىلىستەن كەيىن نىسانداردىڭ اياق الىسىن جەدەلدەتىپ، ەرتەرەك وندىرىسكە قوسىپ، قورعاس اۋدانىنىڭ ەكونوميكالىق، قوعامدىق دامۋىنا اناعۇرلىم كوپ كۇش قوسۋعا قۇلشىنامىز“، ـ دەدى وسى سەرىكتەستىكتىڭ باس ديرەكتورى چيۋ پىڭ.
بيىل جىل باسىنان بەرى، اۆتونوميالى رايون شينجياڭعا كومەكتەسەتىن ولكە، قالالارداعى كاسىپورىنداردى شينجياڭدا قارجى قوسىپ شارۋاشىلىقتارىن گۇلدەندىرۋگە جەتەكتەۋدى بار كۇشپەن ىلگەرىلەتىپ، ىلگەرىندى ـ كەيىندى قارامايلى قالاسىندا، كورلا قالاسىندا، قۇلجا قالاسىندا 3 رەت كاسىپ سالاسى ارقىلى شينجياڭعا كومەكتەسۋدى شوعىرلى تانىستىرۋ قيمىلىن ٴساتتى وتكىزىپ، شينجياڭ ەكونوميكاسىنىڭ جوعارى ساپالى دامۋىن ىلگەرىلەتۋگە، قوعام ورنىقتىلىعى مەن باياندى تىنىشتىقتى جۇزەگە اسىرۋعا قۋاتتى قوزعاۋشى كۇش ۇستەدى.
