ما شيڭرۇي، ەركىن تۇنياز يۇي پەيگىنمەن، جاڭ يانجۇنمەن جانە ولاردىڭ ساپارلاستارىمەن كەزدەستى، حى جۇڭيوۋ قاتىناستى
انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 12 ـ ايدىڭ 11 ـ كۇنى بەيجيڭنەن حابارلايدى. 12 ـ ايدىڭ 10 ـ كۇنى اۆتونوميالى رايوندىق حالىق ۇكىمەتى مەن جۇڭگو دۇڭفاڭ ەلەكتر توبى شەكتى سەرىكتەستىگى بەيجيڭدە ستراتەگيالىق سەلبەستىك كەلىسىمىن جاساستى، شينجياڭنىڭ جاڭا ەنەرگيا كاسىپ سالاسى، ستراتەگيالىق جاڭادان گۇلدەنگەن كاسىپ سالاسى سياقتىلاردىڭ دامۋىن ارقاۋ ەتىپ، ورتالىق كاسىپورىندارى مەن جەرگىلىكتى ورىنداردىڭ ٴوزارا پايدا جەتكىزىپ سەلبەسۋىن تەرەڭدەتىپ، مەملەكەتتىڭ ەنەرگيا حاۋىپسىزدىگىن قول ۇستاسا قامتاماسىز ەتىپ، ٴوڭىردىڭ جوعارى ساپالى دامۋىن ىلگەرىلەتتى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ٴتوراعاسى ەركىن تۇنياز دۇڭفاڭ ەلەكتر توبىنىڭ باس جوراسى يۇي پەيگىنمەن، باس ديرەكتورى جاڭ يانجۇنمەن جانە ولاردىڭ ساپارلاستارىمەن كەزدەستى ٴارى كەلىسىم جاساۋعا بىرگە كۋا بولدى.
اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى حى جۇڭيوۋ قيمىلعا قاتىناستى.
ما شيڭرۇي كەزدەسكەندە بىلاي دەدى: باس شۋجي شي جينپيڭنىڭ جانە پارتيا ورتالىق كوميتەتىنىڭ پارمەندى باسشىلىعىندا شينجياڭ جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، مەملەكەتتىڭ جالپى جاعدايىنداعى ستراتەگيالىق ورنىن كوزدەپ، بايلىق، وڭىرلىك ورىن، ساياسات سياقتى باسىمدىقتارىن ساۋلەلەندىرىپ، ”ون ٴىرى كاسىپ سالاسى شوعىرىن“ قۇرۋدى، وسىزاماندانعان كاسىپ سالاسى جۇيەسىن تۇلعالاۋدى جەدەلدەتتى، تيانشان الابىندا جوعارى ساپالى دامۋدىڭ قوزعالىس قۋاتى قاۋلادى، اسىرەسە، جەل ەلەكتر، فوتوۆولت سياقتى جاڭا ەنەرگيا كاسىپ سالاسىنىڭ ارتۋ ارىنى كۇشتى بولدى. دۇڭفاڭ ەلەكتر توبى شينجياڭنىڭ دامۋىن باستان ـ اياق زور كۇشپەن قولداپ كەلدى، وسى رەتكى قيمىلدى وراي ەتىپ، شينجياڭمەن ناقتى ىستەر سەلبەستىگىن ونان ارى تەرەڭدەتىپ، شينجياڭنىڭ جەل ەنەرگيا بايلىعىنىڭ كومەسكى كۇشىن تولىق اشىپ، شينجياڭدا جەل ەلەكتر نىسانىن ورنالاستىرۋ، قۇرىلىس جۇرگىزۋ سەرپىنىن ارتتىرىپ، شينجياڭنىڭ جەل ەلەكتر جابدىعىن جاساۋ تۇتاس كاسىپ سالاسى تىزبەگىنىڭ دامۋىن بەلسەنە ىلگەرىلەتىپ، تازا ەنەرگيانى زور كۇشپەن دامىتىپ، جوعارى ساپالى دامۋدى بىرگە ىلگەرىلەتۋىن ٴۇمىت ەتەمىز. شينجياڭ دۇڭفاڭ ەلەكتر توبىنىڭ شينجياڭدا قارجى قوسىپ دامۋىنا بار كۇشپەن قولداۋ كورسەتىپ جانە ونى قامتاماسىز ەتىپ، ورتالىق كاسىپورىندارى مەن جەرگىلىكتى ورىنداردىڭ ٴوزارا پايدا جەتكىزىپ سەلبەسۋىنىڭ اناعۇرلىم تەرەڭ قاتپارعا، اناعۇرلىم كەڭ سالاعا كەڭەيۋىن قول ۇستاسا ىلگەرىلەتەدى.
يۇي پەيگىن اۆتونوميالى رايوندىق پارتكوم مەن ۇكىمەتتىڭ كاسىپورىنداردىڭ شينجياڭدا دامۋىنا كوڭىل ٴبولىپ، قولداۋ كورسەتكەندىگىنە العىس ايتا كەلىپ مىنالاردى ٴبىلدىردى: دۇڭفاڭ ەلەكتر توبى شينجياڭدى باستان ـ اياق مەملەكەت ستراتەگياسىنا قىزمەت وتەۋدەگى، كاسىپورىننىڭ جوعارى ساپالى دامۋىن ىلگەرىلەتۋدەگى ەڭ ماڭىزدى ٴوڭىر ەتىپ كەلدى، ەكى جاقتىڭ بىرگە ىلگەرىلەتۋىندە دۇڭفاڭ ەلەكتر توبى مەن شينجياڭنىڭ سەلبەستىگىندە بەلسەندى جاعداي جارىققا شىعىپ، شينجياڭداعى ٴبىر توپ ٴتۇيىندى كاسىپ سالاسى نىسانى جەدەل ىلگەرىلەپ، ونىمدىلىگى تاماشا بولدى. ستراتەگيالىق سەلبەستىك كەلىسىمىن مۇقيات تياناقتاندىرىپ، كاسىپ سالاسى ارقىلى شينجياڭدى گۇلدەندىرۋ ارەكەتىن ىشكەرىلەي ورىستەتىپ، شينجياڭنىڭ جەل ەلەكتر كاسىپ سالاسىن دامىتۋ، جەل ەلەكتر جابدىعىن جاساۋ بازاسى قۇرىلىسى سياقتىلاردى ارقاۋ ەتىپ، بايلىق نىساندارىن ورنالاستىرۋ جانە كاسىپ سالاسىنا قارجى قوسۋ سەرپىنىن ٴۇرتىس ارتتىرىپ، شينجياڭنىڭ ەرەكشە، باسىمدىققا يە كاسىپ سالاسى شوعىرى قۇرىلىسى مەن ەكونوميكانىڭ، قوعامنىڭ جوعارى ساپالى دامۋىنا تىڭ دا اناعۇرلىم زور ۇلەس قوسامىز.
اۆتونوميالى رايوننىڭ باسشىلارىنان چىن ۋيجۇن جانە قاتىستى ورىندارداعى جاۋاپتى جولداستار، دۇڭفاڭ ەلەكتر توبىنداعى قاتىستى جولداستار قيمىلعا قاتىناستى.
