قايراتتانا ٴىس تىندىرىپ، اۋىل ـ قىستاقتى جاپپاي گۇلدەندىرۋدىڭ جاڭا جاعدايىن اشايىق
حالىق گازەتى باسماقالاسى
جۇڭگو ۇلگىسىندەگى وسىزامانداندىرۋدى جۇزەگە اسىرۋدا، ٴسوز جوق، اۋىل ـ قىستاقتىڭ جاپپاي گۇلدەنۋىن جەدەل ىلگەرىلەتۋ كەرەك. باس شۋجي شي جينپيڭ اۋىل شارۋاشىلىعى، اۋىل ـ قىستاق، شارۋالار قىزمەتىن ويداعىداي ىستەۋ جونىندە ماڭىزدى نۇسقاۋ بەرىپ، جۇڭگو ۇلگىسىندەگى وسىزامانداندىرۋ قۇرىلىسىن ىلگەرىلەتۋ ستراتەگيالىق بيىگىنەن كەزەكتەگى جانە بۇدان بىلايعى ٴبىر مەزگىلدەگى اۋىل شارۋاشىلىعى، اۋىل ـ قىستاق، شارۋالار قىزمەتىن ويداعىداي ىستەۋ جونىندە كەلەلى ورنالاستىرۋ جاساپ، ايقىن تالاپ قويىپ، اۋىل ـ قىستاقتىڭ جاپپاي گۇلدەنۋىن تىڭعىلىقتى ىلگەرىلەتۋگە، اۋىل شارۋاشىلىعىنىڭ، اۋىل ـ قىستاقتىڭ وسىزاماندانۋ اياق الىسىن جەدەلدەتۋگە يدەيا جانە ارەكەت جاعىنان جەتەكشىلىك ازىرلەدى.
12 ـ ايدىڭ 17 ـ كۇنىنەن 18 ـ كۇنىنە دەيىن بەيجيڭدە اشىلعان ورتالىقتىڭ اۋىل ـ قىستاق قىزمەتى ٴماجىلىسى باس شۋجي شي جينپيڭنىڭ اۋىل شارۋاشىلىعى، اۋىل ـ قىستاق، شارۋالار قىزمەتى جونىندەگى ماڭىزدى بايىمداۋىنىڭ جانە ماڭىزدى نۇسقاۋىنىڭ رۋحىن جاپپاي دايەكتىلەندىرىپ، كەزەكتەگى اۋىل شارۋاشىلىعى، اۋىل ـ قىستاق، شارۋالار قىزمەتى ٴدوپ كەلگەن جاعدايلار مەن سىن ـ سايىستارعا ىشكەرىلەي تالداۋ جاساپ، 2025 ـ جىلعى اۋىل شارۋاشىلىعى، اۋىل ـ قىستاق، شارۋالار قىزمەتى جونىندە ناقتى ورنالاستىرۋ جاسادى.
اۋىل شارۋاشىلىعى، اۋىل ـ قىستاق، شارۋالار جاعدايى جاقسارىپ، نەگىزى بەكەمدەلىپ، جالپى جاعداي ىرىقتى بولدى. بيىل جىل باسىنان بەرى، سىرتقى قىسىم ارتىپ، ىشكى جاقتا قيىنشىلىقتار كوبەيىپ، جاعداي كۇردەلى دە قاتاڭ بولدى. پارتيا ورتالىق كوميتەتى ٴجۇز ميلليونداعان حالىقتى ىنتىماقتاستىرىپ، باستاپ وزگەرىسكە بايىپتىلىقپەن توتەپ بەرىپ، قيىندىقتى ەڭسەرە العا ۇمتىلىپ، اۋىل شارۋاشىلىعى، اۋىل ـ قىستاق، شارۋالار ماسەلەسىن ويداعىداي شەشۋدى بۇكىل پارتيا قىزمەتىندەگى ەڭ ماڭىزدى ورىنعا قويۋعا تاباندى بولىپ، اۋىل شارۋاشىلىعى، اۋىل ـ قىستاق، شارۋالار قىزمەتىندە وڭاي ـ وسپاق قولعا كەلمەگەن، ادامدى جەلپىندىرەتىن ناتيجەلەرگە قول جەتكىزىپ، ەكونوميكانىڭ، قوعامنىڭ جوعارى ساپالى دامۋىن ىلگەرىلەتۋگە ماڭىزدى ۇلەس قوستى، نەگىزدىك تىرەك ازىرلەدى.
استىق وندىرىسىنەن قاراعاندا، بيىل بۇكىل ەلدىڭ استىق جالپى ٴونىم مولشەرى ٴبىر تريلليون 413 ميلليارد جىڭعا جەتىپ، الدىڭعى جىلداعىدان 22 ميلليارد 200 ميلليون جىڭ ارتىپ، تاريحتان بەرى تۇڭعىش رەت ٴبىر تريلليون 400 ميلليارد جىڭدىق دەڭگەيگە كوتەرىلدى؛ شارۋالار كىرىسىنەن قاراعاندا، الدىڭعى 3 ماۋسىمدا اۋىل ـ قىستاق تۇرعىندارىنىڭ جان باسىندىق ورتاشا قولداعى تابىسى 16 مىڭ 740 يۋانعا جەتىپ، قالا ـ اۋىل تۇرعىندارى كىرىسىنىڭ سالىستىرمالى پارقى ۇزدىكسىز ازايىپ، قالىڭ شارۋالاردىڭ تابىس سەزىمى، باقىت سەزىمى، حاۋىپسىزدىك سەزىمى اناعۇرلىم كۇشەيدى؛ اۋىل ـ قىستاق قۇرىلىسىنان قاراعاندا، اۋىل ـ قىستاقتىڭ ەرەكشە كاسىپ سالاسى تولىسىپ، جەتىلىپ، اۋىل ـ قىستاق قونىس ورتاسى ۇزدىكسىز جاقسارىپ، قونىسقا جايلى، كاسىپكە ىڭعايلى، جاراسىمدى، كورىكتى اۋىل ـ قىستاق قۇرىلىسىندا بەلسەندى ىلگەرىلەۋشىلىككە قول جەتىپ، اۋىل ـ قىستاق شات ـ شادىمان تىرشىلىك كەشەتىن مەكەنگە اينالدى.
ٴبىر جىلدان بەرگى دامۋ بارىسى وزگەشە بولدى، اۋىل شارۋاشىلىعى، اۋىل ـ قىستاق، شارۋالار قىزمەتى حالىقتى الاڭسىز ەتەتىن، كەلەلى جاعدايدى ورنىقتىراتىن ”ورنىقتىرعىشتىق“ رولىن ساۋلەلەندىردى. اماليات مىنانى تولىق دالەلدەدى: اۋىل ـ قىستاق ىستەرىن ويداعىداي ىستەپ، اۋىل ـ قىستاقتىڭ جاپپاي گۇلدەنۋىن جۇزەگە اسىرۋدىڭ تەتىگى پارتيادا. پارتيا ورتالىق كوميتەتىنىڭ ورتالىقتانعان ٴبىر تۇتاس باسشىلىعى _ اۋىل شارۋاشىلىعى، اۋىل ـ قىستاق، شارۋالار قىزمەتىن ويداعىداي ىستەۋدىڭ ٴتۇبىرلى كەپىلى، پارتيا ورتالىق كوميتەتىنىڭ اۋىل شارۋاشىلىعى، اۋىل ـ قىستاق، شارۋالار قىزمەتى جونىندەگى كەلەلى باعىت ـ ساياساتى بۇكىلدەي دۇرىس، جاڭا ٴداۋىردىڭ جاڭا جورىعىندا اۋىل شارۋاشىلىعىنا ٴمان بەرىپ، اۋىل شارۋاشىلىعىن كۇشەيتۋدىڭ ارقاۋىن قاي ـ قاشان دا بوساڭسىتۋعا بولمايدى.
جاپپاي سوتسياليستىك وسىزاماندانعان مەملەكەت قۇرۋداعى ەڭ جاپالى، ەڭ اۋىر مىندەت ٴالى دە اۋىل ـ قىستاقتا. كەلەر جىلى ” 14 ـ بەسجىلدىق“ جوبا اياقتالاتىن جىل. كەلەر جىلعى اۋىل شارۋاشىلىعى، اۋىل ـ قىستاق، شارۋالار قىزمەتىن ويداعىداي ىستەۋ ”14 ـ بەسجىلدىق“ جوبانىڭ نىسانا ـ مىندەتتەرىن جوعارى ساپامەن ورىنداۋ، جۇڭگو ۇلگىسىندەگى وسىزامانداندىرۋدى تىڭعىلىقتى ىلگەرىلەتۋ جونىنەن كەلەلى مانگە يە. كەزەكتە سىرتقى ورتانىڭ وزگەرىسى اكەلگەن ٴتيىمسىز ىقپال كۇشەيىپ، ەلىمىزدىڭ ەكونوميكالىق اينالىمى ٴالى دە كوپتەگەن قيىنشىلىقتار مەن سىن ـ سايىستارعا ٴدوپ كەلىپ وتىر. ەكونوميكالىق جاعداي نەعۇرلىم كۇردەلى بولعان سايىن، اۋىل شارۋاشىلىعى، اۋىل ـ قىستاق، شارۋالار قىزمەتىن سولعۇرلىم ورنىقتىرۋ كەرەك. ٴبىز قالا مەن اۋىلدىڭ توعىسا دامۋىنا تاباندى بولىپ، اۋىل ـ قىستاق رەفورماسىن ونان ارى تەرەڭدەتىپ، اۋىل شارۋاشىلىعىن كۇشەيتۋ، اۋىل ـ قىستاققا تيىمدىلىك جاساۋ، شارۋالاردى بايىتۋدى قولداۋ ٴتۇزىمىن كەمەلدەندىرىپ، اۋىل ـ قىستاقتىڭ گۇلدەنۋىن جاپپاي ىلگەرىلەتىپ، اۋىل شارۋاشىلىعىنىڭ ونىمدىلىكتى ارتتىرۋىن، اۋىل ـ قىستاقتىڭ ومىرشەڭ كۇشىن ارتتىرۋىن، شارۋالاردىڭ كىرىستى ارتتىرۋىن امالدىڭ بارىنشا ىلگەرىلەتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە پارمەندى تىرەك ازىرلەۋىمىز كەرەك.
اۋىل شارۋاشىلىعى ورنىقتى بولسا، قوعام ورنىقتى بولادى، استىق الەمنىڭ تىنىشتىعىنا سايادى. استىق، مايلى داقىلداردىڭ زور كولەمدە بىرلىك ٴونىمىن ارتتىرۋ ارەكەتىن ىشكەرىلەي ىلگەرىلەتۋدەن اۋىل شارۋاشىلىعىنىڭ اپاتتان ساقتانۋ، اپات زيانىن ازايتۋ قابىلەتى قۇرىلىسىن كۇشەيتۋگە، ودان ەگىستىك جەردى قورعاۋ جانە ساپانى جوعارىلاتۋدى كۇشەيتۋگە، اۋىل شارۋاشىلىعى عىلىم ـ تەحنولوگيا كۇشتەرىنىڭ سايكەسە قامال الۋىن ىلگەرىلەتۋگە دەيىن، ٴماجىلىس كەلەر جىلعى اۋىل شارۋاشىلىعى، اۋىل ـ قىستاق، شارۋالار قىزمەتىن ورنالاستىرىپ، استىق سياقتى ماڭىزدى اۋىل شارۋاشىلىق ونىمدەرىمەن قامداۋ، قامتاماسىز ەتۋ قابىلەتىن ۇزدىكسىز كۇشەيتۋدى ٴبىرىنشى ورىنعا قويدى، بۇل استىق حاۋىپسىزدىگىن ماڭداي الدى ٴىرى ٴىس رەتىندە يگەرەتىن ستراتەگيالىق تاباندىلىق پەن جاۋاپكەرشىلىكتى ايگىلەدى. ”مەملەكەتتىڭ زور ٴىسىن“ كوكەيدە ساقتاپ، استىق حاۋىپسىزدىگىندە پارتيا مەن ۇكىمەت بىردەي جاۋاپكەرشىلىك ارقالاۋدى قاتاڭ تياناقتاندىرىپ، ەگىستىك جەر قىزىل سىزىعىن قاتاڭ ساقتاپ، ”استىق وندىرىسىندە جەرگە سۇيەنۋ، استىق وندىرىسىندە تەحنولوگياعا سۇيەنۋدى“ شىنايى تياناقتاندىرىپ، اۋىل شارۋاشىلىعىنىڭ جالپىلىق ٴوندىرىس قۋاتىن جوعارىلاتىپ، استىق حاۋىپسىزدىگى ىرىقتىلىق ۇقىعىن مىقتاپ يگەرىپ، جۇڭگونىڭ اس كەسەسىن ٴتىپتى دە مىقتى، ٴتىپتى دە ورنىقتى ۇستاۋ كەرەك.
كەدەيلىكتەن ارىلتۋدان قامال الۋ جەتىستىگىن بەكەمدەۋ، كەڭەيتۋ _ اۋىل ـ قىستاقتىڭ گۇلدەنۋىن جاپپاي ىلگەرىلەتۋدىڭ تومەنگى شەك مىندەتى. ٴماجىلىس اۋىل ـ قىستاقتاردا قايتا كەدەيلەسۋدەن، كەدەيلەسۋدەن ساقتانۋ مەحانيزمىن جانە تومەن كىرىستى جان سانىن، دامۋى كەنجە قالعان وڭىرلەردى ساتىعا، تۇرگە ٴبولىپ كومەكتەسۋ ـ سۇيەمەلدەۋ ٴتۇزىمىن ٴبىر تۇتاس ورناتۋ سياقتىلار جونىندە ايقىن تالاپتار قويدى، ٴارى قازىرگى جاعدايدى تياناق ەتىپ، كورنەكتى ماسەلەلەردى شەشتى، ٴارى ۇزاق بولاشاقتى كوزدە ۇستاپ، دامۋ نەگىزىن بەكەمدەدى. يدەيالىق تانىمدى شىن مانىندە جوعارىلاتىپ، قىزمەتتى تياناقتاندىرۋدى مىقتى يگەرىپ، كولەمدى قايتا كەدەيلەسۋ، كەدەيلەسۋ تۋىلماۋ تومەنگى شەگىن باتىل ساقتاۋ كەرەك.
اۋىل ـ قىستاقتىڭ جاپپاي گۇلدەنۋىن ىلگەرىلەتۋ _ جۇيەلى ينجەنەريا. كاسىپ سالاسىن گۇلدەندىرۋ __ اۋىل ـ قىستاقتىڭ ىشكى دامۋ قوزعاۋشى كۇشىن تاسقىنداتاتىن قاينار، اسىرەسە، اۋىل ـ قىستاقتى جاپپاي گۇلدەندىرۋدىڭ نەگىزى جانە تەتىگى. ٴماجىلىس اۋىل ـ قىستاقتاردا حالىقتى بايىتۋ كاسىپ سالاسىن دامىتۋ جونىندە ورنالاستىرۋ جاساپ، اۋىل ـ قىستاق كاسىپ سالاسىنىڭ ساپاسىن جوعارىلاتىپ، ونىمدىلىگىن ارتتىرۋدى ىلگەرىلەتۋ، جاڭا كاسىپ سالاسىن، جاڭا كاسىپ كۇيىن جەتىلدىرۋ، شارۋالارمەن بايلانىس جاساۋ، شارۋالاردى جەتەكتەۋ مەحانيزمىن كەمەلدەندىرۋ سياقتىلاردى ارقاۋ ەتىپ ٴبىر قىدىرۋ ساياسات ـ شارانى العا قويدى. قىزمەت ٴتۇيىنىن مىقتى يگەرىپ، قىزمەت ادىسىنە جاڭالىق ەنگىزىپ، جەرگىلىكتى جاعدايعا قاراي اۋىل شارۋاشىلىعىن وسىزاماندانعان ٴىرى كاسىپ سالاسى ەتىپ قۇرىپ شىعىپ، شارۋالاردىڭ ”التىن اپكىش“ كوتەرۋىنە مۇمكىندىك جاساۋ كەرەك. ”مىڭ قىستاق ۇلگى كورسەتۋ، ون مىڭ قىستاقتى رەتتەۋ ـ وڭاۋ“ ينجەنەرياسىنىڭ تاجىريبەلەرىن ۇيرەنىپ، قولدانىپ، اۋىل ـ قىستاقتىڭ جاپپاي گۇلدەنۋىن ىلگەرىلەتۋدىڭ باياندى مەحانيزمىن اقاۋسىزداندىرىپ، اۋىل ـ قىستاق قونىس ورتاسىن جاقسارتۋ، اۋىل ـ قىستاقتى باسقارۋ جۇيەسىن اقاۋسىزداندىرۋ، اۋىل ـ قىستاق مادەنيەتىن گۇلدەندىرۋ سياقتى جاقتاردا مىعىم كۇش جۇمساپ، ناقتى شارا شىعارىپ، ناقتى ونىمدىلىككە ۇمتىلىپ، وڭىرلىك ەرەكشەلىككە يە اۋىل ـ قىستاق قۇرىلىسى ۇلگىسىن قالىپتاستىرىپ، قونىسقا جايلى، كاسىپكە ىڭعايلى، جاراسىمدى، كورىكتى اۋىل ـ قىستاق جاڭا كارتيناسىن سالۋ كەرەك.
اۋىل شارۋاشىلىعىندا قۋاتتى ەل قۇرۋ نىساناسىنا قاراي نىق قادام تاستاۋ ستراتەگيالىق تاباندىلىقتى سىننان وتكىزەدى، جاۋاپكەرشىلىك ارقالاپ ىسكەرلىك كورسەتۋگە شاقىرادى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ٴبىز كۇش ۇستىنە كۇش قوسىپ، قايراتتانا ٴىس تىندىرىپ، شىنايى يگەرىپ ناقتى ىستەپ، ۇزاق ۋاقىت ەڭبەك كورسەتىپ، اۋىل شارۋاشىلىعى نەگىزىنىڭ اناعۇرلىم بەكەمدەلۋىن، اۋىل ـ قىستاق وڭىرلەرىنىڭ اناعۇرلىم گۇلدەنۋىن، شارۋالار تۇرمىسىنىڭ اناعۇرلىم شالقۋىن ىلگەرىلەتىپ، اۋىل ـ قىستاقتىڭ جاپپاي گۇلدەنۋ جاڭا جاعدايىن ۇزدىكسىز اشۋىمىز كەرەك.
(شينحۋا اگەنتتىگىنىڭ 12 ـ ايدىڭ 18 ـ كۇنى بەيجيڭنەن بەرگەن حابارى)
