□ انار بۇلت \ شينجياڭ گازەتىنىڭ ٴتىلشىسى دۋ جيانحۇي
كۇندەلىكتى ادەتى بويىنشا تاڭ ەندى عانا راۋانداپ اتا باستاعاندا، ٴانۋار ابلا ورنىنان تۇردى. ونىڭ ىستەگەن ٴبىرىنشى شارۋاسى سەلبەستىك كووپەراتيۆىنىڭ باعىمشىلىق الاڭىنا تەلەفون بەرىپ، ول جاقتاعى جاعدايدى ۇعىسۋ بولدى. تەلەفوندى قويعان سوڭ ول اۆتوكولىگىن اسىعىس جۇرگىزىپ اۋدان ورتالىعىنان اشقان اسحاناسىنىڭ سول كۇنگى تيجاراتى ٴۇشىن ازىق ماتەريالدارىن دايىنداۋعا جول تارتتى.
”سەلبەستىك كووپەراتيۆىنىڭ مۇشەلەرى، باعىمشىلىق الاڭى جانە اسحاناداعى نەشە ون ادام تۇگەلدەي وسىلارعا سۇيەنىپ جاقسى تۇرمىس كەشىرۋدەن ۇمىتتەنىپ وتىر، ەگەر مەن قام جەمەسەم، بۇل شارۋالار بىلىعىپ كەتۋى مۇمكىن.“ 52 جاستاعى ٴانۋاردىڭ سوزىنەن سالماقتى جاۋاپكەرشىلىك سەزىمى اڭعارىلادى.
ٴانۋار لوپنۇر اۋدانى شيڭپيڭ قالاشىعى تۇڭچيكى قىستاعىنداعى ىسكەر جان، 15 جاسىنان باستاپ اتاسى مەن اكەسىنە ىلەسىپ سيىر، قوي الىپ ـ ساتىپ، جايما جايىپ ساۋدا ىستەپ، مول تاجىريبە جينادى. 2011 ـ جىلى قىستاقتىڭ كومەگىندە ول لوپنۇر اۋدانى باۋىرلاستار باعىمشىلىق شارۋالار كاسىپتىك سەلبەستىك كووپەراتيۆىن قۇرىپ، جۇمىسى ماڭايداعى بىرنەشە قىستاقتى قامتىدى. سەلبەستىك كووپەراتيۆى ىلگەرىندى ـ كەيىندى 2 قوي قورا جانە ٴبىر سيىر قورا سالىپ، وسىدان باستاپ ارنايىلانعان باعىمشىلىق جولىمەن ٴجۇردى.
”ول كەزدە قىستاق تۇرعىندارىنىڭ بارىندە قوي بار بولاتىن، الايدا ونىمدىلىگىنىڭ تومەندىگىن بىلاي قويعاندا، ارناۋلى ادامنىڭ باعۋى قاجەت ەدى. سەلبەستىك كووپەراتيۆى قۇرىلسا، شوعىرلى باعۋعا بولادى، قويعا مەن جاۋاپتى بولامىن، قىستاق تۇرعىندارىنىڭ قولى بوساپ باسقا جۇمىس ىستەپ اقشا تابادى، مەن جىل سايىن ولارعا پايدا ٴبولىسىن بەرەمىن“، ـ دەدى ٴانۋار. بۇل ونىڭ سەلبەستىك كووپەراتيۆىن قۇرۋداعى اۋەلگى ماقساتى بولاتىن.
شيڭپيڭ قالاشىعى كۇنچى قىستاعىنىڭ تۇرعىنى ايگۇل قادىردىڭ ۇيىندە 10 قوي باعاتىن، بۇرىن ول كۇن سايىن ەگىس جۇمىستارىن اياقتاتقان سوڭ تاعى دا قويعا قارايتىن. لوپنۇر اۋدانى باۋىرلاستار باعىمشىلىق شارۋالار كاسىپتىك سەلبەستىك كووپەراتيۆى قۇرىلعان سوڭ، ول قويىن وسىندا اماناتتاپ باقتىردى. ەگىس جۇمىسى سايابىر كەزىندە، ول جۇمىس ىستەپ كىرىسىن ارتتىردى. ايگۇل بىلاي دەدى:” اماناتتاپ باقتىرعانىما 6 جىل بولدى، مەن ەشنارسەگە باس اۋىرتپايمىن، جىل سايىن سەلبەستىك كووپەراتيۆى ماعان 1500 يۋان پايدا ٴبولىسىن بەرەدى، ەگەر قويلارىمدى ٴوزىم باققىم كەلسە، 10 قويدى قايتارىپ الۋىما بولادى، بۇل وتە جاقسى بولدى“.
كەيبىر قىستاق تۇرعىندارى باعىمشىلىق كاسىبىن دامىتۋدى ويلاسا دا، قارجى كەمشىل بولۋ سەبەبىنەن باعاتىن قوي جوق بولاتىن. وسىعان مەڭزەس، ٴانۋار قارجى قوسىپ ساۋلىق قوي ساتىپ الىپ قىستاق تۇرعىندارىنىڭ باعۋىنا بەرىپ، قىستاق تۇرعىندارىنان تەك 5 جىل ىشىندە قويدىڭ قۇنىن عانا قايتارىپ بەرۋىن تالاپ ەتتى. 2018 ـ جىلى ول 70 مىڭ يۋان قارجى قوسىپ 20 ساۋلىق قوي ساتىپ الىپ، قىستاق تۇرعىنى يبىراھيم سۇلەيمەنگە باقتىردى، بيىل يبىراھيم ناۋقاس سەبەبىنەن قايتىس بولدى، ٴانۋار ونىڭ وتباسىنداعىلاردى 70 مىڭ يۋان وزىندىك قۇندى قايتارۋعا قۋزامادى، قايتا كۇرىش، ۇن، ماي اپارىپ بەرىپ حال سۇرادى.
13 جىلدان بەرى، ٴانۋار 200گە جۋىق وتباسىن باعىمشىلىقتى دامىتۋعا باستاپ، ولاردىڭ تۇرمىستارىن كۇن سايىن جاقسارتتى. سەلبەستىك كووپەراتيۆىنىڭ مۇشەسى العاشقى كەزدەگى 5 وتباسىنان قازىر 104 وتباسىنا جەتتى. سەلبەستىك كووپەراتيۆىنىڭ تابىسىن جوعارىلاتۋ ٴۇشىن، ول ىلگەرىندى ـ كەيىندى سويىس الاڭىن قۇرىپ، اۋداننان سيىر، قوي ەتىن ساتۋ ٴتۇيىنىن اشتى. 2023 ـ جىلى ول تاعى اسحانا اشىپ، كاسىبىندە باعىمشىلىقتان باستاپ ساتۋدىڭ سوڭعى بۋىنىنا دەيىنگى تىزبەكتى ۇلگىنى قالىپتاستىردى. باعىمشىلىق الاڭى، اسحانا مەن سيىر، قوي ەتىن ساتۋ تۇيىنىنە 30 قىستاق تۇرعىنىن جۇمىستانۋعا ورنالاستىردى، اي سايىن جۇمىسشىلارعا 150 مىڭ يۋان ەڭبەكاقى تاراتادى.
ٴانۋار بىلاي دەدى: وسىنشاما جىلداردان بەرى، قالاشىقتاعى جانە قىستاقتاعى كادرلار كوپ كومەك جاسادى، ولار بەلسەنە سايكەستىرىپ، سيىر، قويدىڭ جەم ـ ٴشوبىن ساتىپ الۋىما كومەكتەستى، تاعى وسىزاماندانعان باعىمشىلىق شاعىن اۋماعىن قۇرۋىما دا دەم بەردى. اسحانام جاڭادان جۇمىس باستاعان كەزدە، ساۋدا تىم جاقسى ەمەس ەدى، قالاشىقتاعى كادرلار كومەك قولىن سوزىپ، ينتەرنەتتە تانىمالداردى ۇسىنىس ەتىپ اسحانانى ۇگىتتەۋىمە كومەكتەستى. قازىر اسحانانىڭ ساۋداسى كۇسەت، ورتاشا ەسەپپەن كۇنىنە 8 قوي، 30 كيلوگرام سيىر ەتىن ساتامىز، تيجارات سوماسى 20 مىڭ يۋاننان اسادى. ”كادرلار مەن ٴۇشىن وسىنشاما ىستەر ىستەپ، ساۋدامدى بارعان سايىن جاقسارتتى، مەن شىن جۇرەگىمنەن ولارعا العىس ايتامىن، مەن دە العىس ايتا بىلەتىن ادام بولامىن“، ـ دەدى ول.
قازىر ٴانۋار جۇرگىزىپ وتىرعان اسحانانىڭ اۋدانى 500 شارشى مەتردەن اسادى، ساۋداسى كۇسەت بولعاندىقتان، قاريدارلار ۇنەمى شىرەتكە تۇرىپ تاماقتانادى. ول قازىر ۇيلەسىمدى ورىن قاراستىرىپ، كەلەر جىلى اسحاناسىن 1000 شارشى مەترگە كەڭەيتۋدى جوسپارلاۋدا. ”سول كەزدە ٴتىپتى دە كوپ قىستاق تۇرعىنىنىڭ جۇمىستانۋىنا كومەكتەسەتىن بولامىن“، ـ دەدى ٴانۋار.
